അപ്പൊസലല 12
12
എത്തിന്യൊ കൊഡിമെഗ
1അയ്യി കാലാത്തിലി എരോദാ് റാജാവു പഗ്‌ദി ഏസുക്കാറാര് കൂട്ടണ കൊഡിമെപഡ്‌സ്യ പ്‌ഡിത്താ്. 2ഓഗന്നാ് എങ്കവാന്‌ദ് അണ്ണാ് ആക്കോവുണ എരോദാ് റാജാവു ബാള്‌ക്കെ ബെ്ട്ടി കൊല്ലിസിനാ്. 3ഇച്ചെ സെയ്‌ദാദ്‌ക്ക് എഗുദാര് പിര്യപട്ടാര് എന്ത് എരോദാന്‌ക്ക് തെരിന്ത്‌ദ്. അദ്‌ക്ക് എരോദാ് റാജാവു പത്ത്‌റോസ്‌ണാമ് പ്‌ഡിക്ക്യ മുഡിവെ്ഡ്‌ത്താ്. (പുളില്ലാത്ത അഡേദ് ണോമ്പി ഗള്യേലിത്തെ അദ് ണഡാന്താദ്) 4എരോദാ് റാജാവു പത്ത്‌റോസ്‌ണ പ്‌ഡിത്ത് ജെയില്‌ക്ക് ഇക്കിന പ്‌റ പദിനാറ് കാവക്കാറാര്‌ണ കാവാക്ക് ബെക്കാമ് സെയ്‌ദാ്. പെസഗെ ണോമ്പിക്ക് പ്‌റ ആള്‌ഗാദ് മദ്ദേസാക്കെ കൊഡുക്ക്യാത്തെ അയാള് ഇച്ചെ സെയ്‌ദാദ്.
5അച്ചെ പത്ത്‌റോസ് ജെയിലിലി ഇര്‌ന്താ്. ആന ഏസുക്കാറാര് കൂട്ട ഒരു ണാള് ബ്‌ഡാദെ പത്ത്‌റോസ്‌ക്ക് ബേ്ണ്ടി സാമിക്ക് പരേസി കൊണ്ട് ഇര്‌ന്താര്.
സാമിദൂദാ് പത്ത്‌റോസ്‌ണ ജെയില്‌ക്ക് ബെ്ള്യെ കഡാത്ത്‌റാ്
6പത്ത്‌റോസ്‌ണ റണ്ട് സങ്കിളിക്കെ കെ്ട്ടി ബെത്തിര്‌ന്താര്. അയാള് റണ്ട് പഡെയാളിഗാദ് ണഡ്‌ക്കെ ജാമാത്തിലി ഉറാങ്കിര്‌ന്താ്. ജെയില്‌ദ് ബാസാത്തിലി കാവക്കാറാര്‌ണാമ് ബെത്ത് ഇര്‌ന്താര്. എരോദാ് റാജാവു മറ് ണാള് പത്ത്‌റോസ്‌ണ എഗുദ ഗോഡ്‌ദിക്കെ എ്ഡ്‌ത്ത് പോഡൊ എന്തിര്‌ന്താ്. 7സട്ടന ഒരു ആണ്ടവാന്‌ദ് ദൂദാ് അദ്‌ക്കെ ബന്ത് ണിന്റാ്. അക്കുളെ അവാര് ഇര്‌ന്ത പട്ട്‌ക്ക് ബെ്ള്‌സ തുമ്പിറ്റ്. അയ്യി ദൂദാ് പത്ത്‌റോസ്‌ദ് മുപ്പ്‌ണ കുലുക്കി ഏ്ത്തിര്‌ന്ത്: <<പൊത്തന എ്ന്ത്>> എന്ത് സൊന്നാ്. അപ്പ്‌താനെ അയാള്‌ദ് കയ്യിലിര്‌ന്ത സങ്കിളി ഊരി അഡി അലേന്ത്‌ദ്.
8അക്കുളെ ദൂദാ് അയാള്‌ക്കെ: <<ഒഡെന ഇ്റ്‌ക്കി കെ്ട്ടി സെര്‌പ്പ്‌ണ ഇക്ക്>> എന്ത് സൊന്നാ്. അക്കുളെ പത്ത്‌റോസ് അയാള് സൊന്ന പാസെ താനെ സെയ്‌ദാ്. പ്‌റ ദൂദാ്: <<ണിന്ന് സീലെന പൊദേത്ത് എന്ന് പിന്ന്‌മേലെ ബാ>> എന്ത് സൊന്നാ്. 9പത്ത്‌റോസ് ദൂദാന്‌ദ് പിന്ന്‌മേലെ പോയി ജെയില്‌ക്ക് ബെ്ള്യെ ഇ്റാങ്കിനാ്. ദൂദാ് സെയ്‌ദാദ് എല്ല ണേര്‌ത്തേഗ എന്ത് പത്ത്‌റോസ്‌ക്ക് തെര്യാലെ. തനാക്ക് ഒരു തോറ്റ കാട്ട്‌ദ് എന്ത് അയാള് ണെനേത്ത് ഇര്‌ന്താ്. 10അവാര് കാവക്കാറാര് ഇര്‌ന്ത മുദാത്തില്യ ബാസണാമ് കഡാന്ത്, പ്‌റാഗേത്ത ബാസണാമ് കഡാന്ത് പട്ടണാക്ക് കഡാക്ക ഇര്‌മ്പ് ബാസാക്ക് മുന്തുക്ക് എജ്ജിനാര്. അക്കുളെ അയ്യി ബാസ തന്‌കൊണ്ട്യെ തുറാന്ത്‌ദ്. അദ്‌ണാലെ അവാര് ബെ്ള്യെ കഡാന്ത് തെരുവു മേലെ ണഡാന്ത് ലേസ അക്കോസ പോനാര്. അപ്പ്‌താനെ ദൂദാ് പത്ത്‌റോസ്‌ണ ബ്‌ട്ട് പോനാ്.
11അക്കുളെത്തെ പത്ത്‌റോസ്‌ക്ക് ണഡാന്താദ്‌ണ പറ്റി ണെനേവു ബന്ത്‌ദ്. അയാള് സൊന്നാ്: <<എരോദാന്‌ദ് കയ്യിലി ഇര്‌ന്ത്‌മ് എഗുദാര് എനാണ സെയ്യ ണെനേത്ത കാര്യഗാത്തിലിര്‌ന്ത്‌മ് ആണ്ടവാ് എനാണ കാപാറ്റിനാ്. സാമി തന്ന് ദൂദാന ബ്‌ട്ട് എനാണ കാപാറ്റിനാദ് ഇപ്പ്‌ത്തെ എനാക്ക് സെരിക്ക്‌മ് തെരിദ്.>>
12പത്ത്‌റോസ് ഇദ്‌ണ എല്ല ണലമായി തെരിന്ത പ്‌റ മറ്‌ക്കോസ് എങ്ക ഓഗന്നാന്‌ദ് അവ്വാസി മറിയാദ് കൂരേക്ക് പോനാ്. അക്കുളെ അദിലി മൊത്തന ആള്‌ഗ ഒന്റായി ഇര്‌ന്ത് പരേസി കൊണ്ടിര്‌ന്താര്. 13പത്ത്‌റോസ് മുന്തുക്കേത്ത ബാസണ പോയി കൊട്ടിനാ്. അദില്യ ബേലെക്കാറിസി പ്‌ള്ളെ റോദ എങ്കവ ആര് കൊട്ട്‌റാദ് എന്ത് ണോഡ്യ പോന. 14അവ പത്ത്‌റോസ്‌ദ് ണായണ ണെപ്പ്‌കെ്ഡേസിന. പത്ത്‌റോസ് ബന്ത പിര്യാക്ക് അവ ബാസണ ഗൂഡി തുറാക്ക്യ ണില്ലാദെ ഉള്ളുക്ക് താനെ ഓഡി പോന. <<അദാഗെ, പത്ത്‌റോസ് ബാസ മുന്തുക്ക് ബന്ത് ഇര്‌ക്കാ്>> എന്ത് അവ അദിലി ഇര്‌ന്തവാര്‌ക്ക് സൊന്ന.
15<<ണിനാക്ക് എന്ത പിരാന്ത>> എന്ത് അവാര് സൊന്നാര്. <<ഇല്ലെ, ണാന് സൊന്നാദ് ണേര്>> എന്ത് അവ സൊന്ന. <<അദ് അയാള്‌ദ് ദൂദാ് ആയിര്‌ക്കു>> എന്ത് അവാര് സൊന്നാര്.
16പത്ത്‌റോസ് പിന്നേമ് ബാസണ കൊട്ടികൊണ്ടെ ഇര്‌ന്താ്. അക്കുളെ അവാര് പോയി ബാസണ തുറാന്ത് ണോഡിനാര്. അവാര് പത്ത്‌റോസ്‌ണ കണ്ടാദ്‌മ് അദിസ്യപട്ട് എക്കിനാര്. 17അയാള് കയ്യിലി താനെ ജാഡെ മാഡി മ്‌ണ്ടാദെ ഇര്‌ക്ക്യ സൊന്നാ്. പ്‌റ പത്ത്‌റോസ് തനാണ ജെയിലിലിര്‌ന്ത് ആണ്ടവാ് ബെ്ള്യെ എ്ഡ്‌ത്ത് ബന്താദ്‌ണ പറ്റി സൊക്കാന അവാര്‌ക്ക് സൊല്ലികൊഡുത്താ്. <<ഈ സേദിന ആക്കോവുക്ക്‌മ് ബാക്കി ഇര്‌ക്ക ഏസുക്കാറാര്‌ക്ക്‌മ് സൊല്ലിരി>> എന്ത് സൊല്ലി അയാള് ബേ്റെ ഒരു എ്ഡേക്ക് പോനാ്.
18മറ് ണാള് ബെ്ഡ്യാലെ പത്ത്‌റോസ്‌ക്ക് എന്താറ്റൊ എന്ത് പഡെയാളിഗ റമ്പ അങ്കലാപ്പ്‌പട്ടാര്. 19എരോദാ് പത്ത്‌റോസ്‌ണ പരാന്ത് കണ്ട്‌പ്‌ഡിക്ക്യ സൊന്നാ്. ആന അവാര്‌ക്ക് അദ് മുഡ്യാലെ. പത്ത്‌റോസ്‌ക്ക് കാവ ണിന്റിര്‌ന്ത പഡെയാളിഗണ സൊക്കാന കേ്ട്ട പ്‌റ അവാര്‌ണ കൊല്ല്യ എരോദാ് സൊന്നാ്.
അദ്‌ക്ക് പ്‌റ എരോദാ് എഗുദ ണാഡിലി ഇര്‌ന്ത് കയ്യിസര്യ ണാഡ്‌ക്ക് പോയി അദിലി ലേസ ണാള് ഇര്‌ന്താ്.
എരോദാ് റാജാവു സാരാ്
20അയ്യി കാലാത്തിലി സോര്, സീദോന് ണാഡ്‌ക്കാറാരോഡെ എരോദാ് റാജാവുക്ക് റമ്പ മൊനെ ഇര്‌ന്ത്‌ദ്. അദ്‌ണാലെ സോരിലി ഒരു കൂട്ട ആള്‌ഗ എരോദാ് റാജാവുണ കാണ്യ പോനാര്. അദ്‌ക്ക് അവാര് മുദതാനെ റാജാവുദ് കോട്ടെന ണോഡി ണഡാത്ത്‌റ ബ്‌ളത്തോസ് എങ്കവാന തമാക്ക് ബേ്ണ്ടി റാജാവോഡെ പേസ്യ തമ്മ് സാരി സേത്തിനാര്. അച്ചെ അവാര് റാജാവു പട്ട്‌ക്ക് പോയി എമ്മോഡെ റാജി കൂഡുഡോമെ എന്ത് കേ്ട്ടാര്. എരോദാ് റാജാവുദ് ണാഡിലി ഇര്‌ന്ത്‌ത്തെ തമ്മ് ണാഡ്‌ക്ക് സാപാഡ്‌ക്കുള്ള സാമാനഗ കെ്ഡേത്ത് ഇര്‌ന്താദ്. അദ്‌ണാലെത്തെ അവാര് റാജാവോഡെ ഇച്ചെ കേ്ട്ടാദ്.
21അവാര്‌ണ കാണ്‌റാദ്‌ക്കുള്ള ഒരു ണാള് സൊല്ലി ബെത്താ്. അയ്യി ണാള് എങ്കാട്ടി എരോദാ് റാജാവു റാജ ബേസണ ഇക്കി താന് കുക്കാക്ക എ്ഡേക്ക് പോയി കുക്കാന്താ്. അദ്‌ക്ക് പ്‌റ അയാള് ആള്‌ഗാക്ക് ണായ സൊല്ല്യ പ്‌ഡിത്താ്. 22അക്കുളെ ആള്‌ഗ: <<ഈ പേസ്‌റ ണായ ഒരു ദേവാന്‌ദ്‌ത്തെ. മന്‌സാര്‌ദ് അല്ല>> എന്ത് ബെല്ല്യാദ്‌ക്ക് ആലാത്ത് സൊന്നാര്. 23എരോദാ് ആള്‌ഗ സൊന്നാദ്‌ണ സെരി എന്ത് സൊല്ലി സാമിന ബ്‌ഡ തനാണതാനെ ബെല്ല്യാദാക്കിനാ്. അദ്‌ണാലെ എരോദാന ആണ്ടവാ് ദൂദാ് ബന്ത് അഡിത്ത് ബീ്ത്തിനാ്. അച്ചെ അയാള് പൂത്ത് സത്ത് എക്കിനാ്.
24ആന സാമി സൊല്ലുസുലാക്ക മുദ ഇര്‌ന്താദ്‌ണ ബ്‌ഡ എല്ല എ്ഡേക്കേമ് സേത്തി സേത്തി പാസികൊണ്ടിര്‌ന്ത്‌ദ്.
25ബറ്‌ണവാസ്‌മ് സവുലുമ് തമാക്ക് സെയ്യ ഇര്‌ന്ത ബേലെഗ സെയ്‌ദ് തീത്ത പ്‌റ മറ്‌ക്കോസ് എങ്ക ഓഗന്നാനാമ് കൂട്ടി എര്‌സലേമിലി ഇര്‌ന്ത് തിലിമ്പി പോനാര്.
Currently Selected:
അപ്പൊസലല 12: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
