അപ്പൊസലല 14
14
പവുലോസ്‌മ് ബറ്‌ണവാസ്‌മ് ഇക്കോനി എങ്ക പട്ടണാത്തിലി
1പവുലോസ്‌മ് ബറ്‌ണവാസ്‌മ് ഇക്കോനി എങ്ക പട്ടണാക്ക് പോനാര്. അവാര് എപ്പ്‌മ് സെയ്‌ര പാസെ അദിലി ഇര്‌ക്ക എഗുദാര് പരേസ്‌റ കൂരേക്ക് പോയി ണല്ല സേദിന ആള്‌ഗാക്കെ സൊന്നാര്. അച്ചെ അവാര് ണലമായി സൊന്നാദ് കേ്ട്ട് എത്തിന്യൊ എഗുദാര്‌മ് എഗുദാര് അല്ലാത്ത ജാദിഗാമ് ഏസുണ ണമ്പിനാര്. 2ആന ഏസുണ ണമ്പ്‌റാദ്‌ണ തള്ളി എക്കിന എഗുദാര്, എഗുദാര് അല്ലാത്ത ജാദിഗാക്കെ കോളുകുത്തി ഏസുക്കാറാര്‌ക്ക് ണേരെ മൂട്ടി ബ്‌ട്ടാര്. 3എന്താല്‌മ് പവുലോസ്‌മ് ബറ്‌ണവാസ്‌മ് ബ്‌ഡാലെ. ണല്ല ദയ്യിരത്തോഡെ ആണ്ടവാന പറ്റി സൊല്ലികൊണ്ട് എത്തിന്യൊ ണാള് ഇക്കോനി എങ്ക പട്ടണാത്തിലി താനെ ഇര്‌ന്താര്. ആണ്ടവാ് അവാര്‌ക്ക് അദിസ്യഗാമ് അഡ്യാളഗാമ് സെയ്‌രാദ്‌ക്കുള്ള ണല്ല സക്‌ദിമ് കൊഡുത്താ്. അച്ചെ സാമിക്ക് ആള്‌ഗോഡെ ഇര്‌ക്ക ഗവണ പറ്റ്യുള്ള സേദി ണേര് എന്ത് സാമി കാട്ടി കൊഡുത്താ്. 4അയ്യി പട്ടണാത്തിലിര്‌ക്ക ആള്‌ഗ റണ്ട് പച്ച്യ ആയി പ്‌റ്‌ന്ത്, ഒരു പച്ച്യ എഗുദലോഡേമ്, ഒരു പച്ച്യ അപ്പൊസലലോഡേമ് എജേന്താര്.
5ലേസ എഗുദാര്‌മ്, ലേസ എഗുദാര് അല്ലാത്ത ജാദിഗാമ് തമ്മ്‌ദ് അദിഗാരിഗാക്കെ എജേന്ത് അപ്പൊസലലണ ണാണഗെഡ്‌സ്യാമ് കല്ല് എ്റ്യാമ് മുഡിവെ്ഡ്‌ത്താര്. 6ഇദ്‌ണ തെരിന്ത അപ്പൊസലല അദ്‌ണ ബ്‌ട്ട് സൂഗാന ലുക്കവോന്യ ണാഡിലിര്‌ക്ക ലുസ്‌റെ എങ്ക പട്ടണാക്ക്‌മ് ദറ്‌വെ എങ്ക പട്ടണാക്ക്‌മ് അയ്യി ബട്ടഗരത്തി ഇര്‌ക്ക എ്ഡേഗാക്കേമ് പോനാര്. 7അച്ചെ അയ്യി ണാഡ്‌ക്ക്‌റാഗ അവാര് ണല്ല സേദിന സൊന്നാര്.
പവുലോസ്‌ല ലുസ്‌റെക്ക്‌റാഗാമ് ദറ്‌വെക്ക്‌റാഗാമ്
8ലുസ്‌റെ എങ്ക എ്ഡേലി കാല്‌ക്ക് മുജുവില്ലാത്ത ഒരുത്താ് ഇര്‌ന്താ്. അയാള് പ്‌റാപ്പിലിര്‌ന്തെ മൊണ്ടി. അയാള് ഒരു ണാള് ഗൂഡി ണഡാക്കാഗെ ഇല്ലെ. 9അവാ് കുക്കാന്ത് പവുലോസ്‌ദ് ണായണ സൊക്കാന കേ്ട്ട് ഇര്‌ന്താ്. പവുലോസ് അയാള്‌ണ സൊക്കാന ണോഡുഗാട്ടി, ഇവാന്‌ക്ക് ണോയി തെ്ളിരാദ്‌ക്കുള്ള ണമ്പിക്കെ ഇര്‌ക്ക്‌ദ് എന്ത് പവുലോസ്‌ക്ക് തെരിന്ത്‌ദ്. 10അദ്‌ണാലെ പവുലോസ് അവാന്‌ക്ക്: <<എ്ന്ത് മെ്ട്ടി ണേരെ ണില്ല്!>> എന്ത് ബെല്ല്യാദ്‌ക്ക് സൊന്നാ്. അപ്പ്‌താനെ അയാള് ബുഗ്‍റ്‌ക്കന എ്ന്താദ്‌മ് ണഡാക്ക്യ പ്‌ഡിത്താ്.
11പവുലോസ് ഇച്ചെ സെയ്‌ദാദ്‌ണ കണ്ടാദ്‌മ് ആള്‌ഗ ലുക്കവോന്യ ണായാത്തിലി ബെല്ല്യാദ്‌ക്ക് ആലാത്ത് കൊണ്ട് ഇച്ചെ സൊന്നാര്: <<സാമിഗ മന്‌സാര്‌ണ പാസെ ണമ്മ് പട്ട്‌ക്ക് ഇ്റാങ്കി ബന്തിര്‌ക്കാര്.>> 12അവാര് ബറ്‌ണവാസ്‌ണ സീഓസ്#14:12സീഓസ് ഗ്‌റീക്ക്‌ക്കാറാര് മൊത്തന സാമിഗണ ണമ്പിര്‌ന്താര്. അയ്യി സാമിഗളിലി ബെത്ത് മുന്തിനവാ്ത്തെ സീഓസ് സാമി. എന്ത്‌മ്, പവുലോസ് ബെല്ല്യ ണായക്കാറാ് ആനാദ്‌ണാലെ അയാള്‌ണ എര്‌മോസ്#14:12എര്‌മോസ് ബേ്റെ സാമിഗാക്ക് സേദി എത്ത്‌സ്‌റവാ് എന്ത് ഗ്‌റീക്ക്‌ക്കാറാര് എര്‌മോസ്‌ണ ണമ്പിര്‌ന്താര്. എന്ത്‌മ് ഒളേത്താര്. 13അയ്യി പട്ടണാദ് മുന്തുക്ക് സീഓസ് എങ്ക സാമിദ് ഒരു കോയാല് ഇര്‌ന്ത്‌ദ്. അയ്യി കോയാലിലിര്‌ക്ക പൂസാരി ഓരിഗണാമ് പൂമാലെഗണാമ് എ്ഡ്‌ത്ത് പട്ടണ ബാസാക്കെ ബന്താ്. എന്ത്‌ക്കെന്റ അയാള്‌മ് ആള്‌ഗാമ് എജേന്ത് അപ്പൊസലലാക്കെ പലി കൊഡുക്ക്യ ആസെപട്ടാദ്‌ണാലെത്തെ ഇച്ചെ എ്ഡ്‌ത്ത് ബന്താദ്.
14പവുലോസ്‌മ് ബറ്‌ണവാസ്‌മ് ഈ സേദിന കേ്ട്ട് തമ്മ് സീലെന ക്‌ണ്ട്കൊണ്ട് ആള് കൂട്ടാദ് ണഡ്‌ക്കെ ഓഡി പോയി ബെല്ല്യാദ്‌ക്ക് ആലാത്ത് കൊണ്ട് ഇച്ചെ സൊന്നാര്. 15<<ഇദായി ആള്‌ഗാളെ ണിമ്മ ഇദ് എന്ത സെയ്‌രേര്? എമ്മാമ് ണിമാണ പാസെ മന്‌സാര്‌ത്തെ. അര്‌ത്ത ഇല്ലാത്ത ഈ ബേലെഗണെല്ല തള്ള്യെക്കി ബൂമിനാമ്, ബാന്‌ണാമ്, കഡാല്‌ണാമ് ഇദിലി ഇര്‌ക്ക എല്ലാദ്‌ണാമ് ദ്‌ട്ടിസിന, ഉജുറുള്ള സാമി സാരി ണിമ്മ ബരുഡൊ. ഈ ണല്ല സേദിന സൊല്ല്യാത്തെ എമ്മ ഇദ്‌ക്കെ ബന്തിര്‌ക്കാദ്. 16മുന്തുക്കേത്ത കാലാത്തിലി സാമി എല്ല മന്‌സാര്‌ണാമ് അവാനവാന്‌ദ് ആസെപഡി ണഡാക്ക്യ ബ്‌ട്ടാ്. 17ആനാല്‌മ് സാമി താന് ഇപ്പ്‌മ് ഉജുറോഡെ ഇര്‌ക്കെ എന്ത് കാട്ട്യ ബേ്ണ്ടി എപ്പ്‌മ് ണല്ല കാര്യഗ സെയ്‌ദ് കൊണ്ടിര്‌ക്കാ്, അവാ് ണിമാക്ക് ബാനാത്തിലിര്‌ന്ത് മഗേമ്, അദാദ് ഗള്യേക്ക് ബെ്ള്ളാമേമ് തരാ്. അവാ് ണിമാക്ക് തീനിനാമ് തരാ്. ണിമ്മ് മനേസ്സ്‌ക്ക് ണല്ല പിര്യണാമ് തരാ്.>> 18ഇച്ചെല്ല സൊല്ലി ണോഡി ഗൂഡി അവാര് അപ്പൊസലലാക്കെ പലി കൊഡുക്കാദ്‌ണ തള്ളി എക്ക്യ അപ്പൊസലല സെര്യാന പാഡ്‌പട്ടാര്.
19അക്കുളെ അന്തൊക്ക്യ പട്ടണാത്തിലിര്‌ന്ത്‌മ്, ഇക്കോനി പട്ടണാത്തിലിര്‌ന്ത്‌മ് ലേസ എഗുദാര് അദ്‌ക്കെ എജ്ജിനാര്. ഇവാര് ആള്‌ഗണ തമ്മ് സാരി സേത്തി പവുലോസ്‌ണ കല്ല് എ്റിന്താര്. അയാള് സത്താനെന്ത് ണെനേത്ത് അവാര് പവുലോസ്‌ണ പട്ടണാത്തിലിര്‌ന്ത് ബെ്ള്യെ ബലിത്ത് എ്ഡ്‌ത്ത്‌കൊണ്ട് പോനാര്. 20ആന ഏസുക്കാറാര് പവുലോസ്‌ണ ഗുമ്പ്‌കൂഡി ണില്ല്‌ഗാട്ടി അയാള് എ്ന്ത് ണിന്റ് പട്ടണാക്ക് തിലിമ്പി പോനാ്. മറ് ണാള് ആഗാട്ട്യെല്ല ബറ്‌ണവാസ്‌ദൊപ്പ ദറ്‌വെ എങ്ക എ്ഡേക്ക് പോനാ്.
സ്‌റ്യേലി ഇര്‌ക്ക അന്തൊക്ക്യാക്കെ പോരാര്
21പവുലോസ്‌മ് ബറ്‌ണവാസ്‌മ് ദറ്‌വെ പട്ടണാത്തിലിമ് സാമിദ് ണല്ല സേദിന സൊല്ലി എത്തിന്യൊ ആള്‌ഗണ ഏസുദ് സൊല്ലുപഡി ണഡാക്കവാരാക്കി തീത്താര്. അദ്‌ക്ക് പ്‌റ അവാര് ലുസ്‌റെ, ഇക്കോനി, പിസിദ്യേലിര്‌ക്ക അന്തൊക്ക്യ ഈ മൂണ് പട്ടണഗാക്ക് തിലിമ്പി പോനാര്. 22അദിലി ഇര്‌ക്ക ഏസുദ് സൊല്ലുപഡി ണഡാക്കവാര് തമാക്ക് ഏസോഡെ ഇര്‌ക്ക ണമ്പിക്കേന കയ്യി ബ്‌ഡാദെ ണല്ല ഒറേപ്പോഡെ ഇര്‌ക്കുഡൊ എന്ത് സൊന്നാര്. പ്‌റ ണിമാക്ക് ഇര്‌ക്ക ണമ്പിക്കേലി ണല്ല ണേര്‌മോഡെ ഇര്‌ക്കുഡൊ എന്ത് സൊല്ലി അവാര്‌ണ ദയ്യിരപഡ്‌സിനാര്. <<ണമ്മ സാമി ആള്‌റ ണാഡ്‌ക്കെ പോയി എജ്ജ്‌റദാനാക്കി പല പല ദിന്‌സിലി കങ്കേഞ്ചിപഡുഡൊ>> എന്ത്‌മ് അവാര്‌ണ പഡിസിനാര്. 23അച്ചെ ഒരൊരു ഏസുക്കാറാര് കൂട്ടാക്ക്‌മ് മൂപ്പലഗണ അവാര് എ്ഡ്‌ത്ത് ബെത്താര്, അവാര് മൂപ്പലാക്ക് ബേ്ണ്ടി തീനി തിന്നാത്ത പരേസ പരേസി, തമ്മ ണമ്പിന ആണ്ടവാന്‌ദ് കയ്യിക്ക് അവാര്‌ണ ഒപ്പഡിത്താര്. 24പിന്നെ അവാര് പിസിദ്യെ ണാഡ് മേലെ കഡാന്ത് പമ്പുല്യ ണാഡ്‌ക്ക് എജ്ജിനാര്. 25പെ്റ്‌ഗെ പട്ടണാത്തിലി സാമി സൊല്ലുസുലാക്കഗണ സൊന്ന പ്‌റ കഡാലോരാത്തിലിര്‌ക്ക അത്തില്യ പട്ടണാക്ക് പോനാര്.
26അദിലി ഇര്‌ന്ത് അവാര് സ്‌റ്യേലിര്‌ക്ക അന്തൊക്ക്യ പട്ടണാക്ക് കപ്പാല്‌ക്ക് ഏ്റി പോനാര്. ഇദിലി ബെത്ത്‌ത്തെ പവുലോസ്‌മ് ബറ്‌ണവാസ്‌മ് ഇന്നാരമാട്ട്‌ക്ക്‌മ് സെയ്‌ദ് തീത്ത ബേലേലി സാമിദ് പാദ്‌ഗാപ്പ്‌മ് ഉദാവിമ് കെ്ഡേക്ക്യ ഏസുക്കാറാര് പരേസി അവാര്‌ണ സാമി കയ്യിക്ക് ഒപ്പഡ്‌സിനാദ്. 27അവാര് അന്തൊക്ക്യാക്കെ പോയി എജ്ജിന പ്‌റ അദില്യ ഏസുക്കാറാര് കൂട്ടാത്തിലിര്‌ക്ക ആള്‌ഗണ ഒളേത്ത് ബര്‌സിനാര്. അവാര്‌ക്ക് സാമി തമ്മ്‌ദൊപ്പ ഇര്‌ന്ത് സെയ്‌ദ കാര്യഗണ ഒട്ടുക്ക്‌മ്, എഗുദാര് അല്ലാത്ത ജാദിഗ ഏസുണ ണമ്പ്യ സാമി കയ്യിതാങ്കിനാദ്‌ണ പറ്റിമ് സൊല്ലികൊഡുത്താര്. 28പവുലോസ്‌മ് ബറ്‌ണവാസ്‌മ് ഏസുക്കാറാര്‌ദൊപ്പ അദിലി എത്തിന്യൊ കാല ഇര്‌ന്താര്.
Currently Selected:
അപ്പൊസലല 14: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
