അപ്പൊസലല 15
15
എര്‌സലേമിലി മദ്ദേസ കൂഡ്‌റാര്
1എഗുദ ണാഡിലിര്‌ന്ത് ലേസ ആണ്‌മക്കഗ അന്തൊക്ക്യ പട്ടണാക്ക് ബന്ത് ഏസുക്കാറാര്‌ണ ഇച്ചെ പഡിസ്യ പ്‌ഡിത്താര്: <<മോസെ ബെത്ത സാമി സട്ടപഡി സുന്നത്ത് സാത്ത്‌റ കളിക്കാദെ പോന സാമിക്ക് ണിമാണ കാപാറ്റ്യ മുഡ്യമാട്ട.>> 2പവുലോസ്‌മ് ബറ്‌ണവാസ്‌മ് ഈ ണായണ എദ്‌ത്ത് അവാരോഡെ സെരിക്ക്‌മ് തറ്‌ക്കിനാര്. അദ്‌ണാലെ ഈ ണായണ പറ്റി എര്‌സലേമിലി ഇര്‌ക്ക അപ്പൊസലലണാമ് മൂപ്പലണാമ് കേ്ക്ക്യ അവാര് ണെനേത്താര്, അദ്‌ക്ക് പവുലോസ്‌ണാമ് ബറ്‌ണവാസ്‌ണാമ് അന്തൊക്ക്യാത്തില്യ ലേസ ആള്‌ഗണാമ് എര്‌സലേമ്‌ക്ക് ബ്‌ഡ്യ അവാര് മുഡിവെ്ഡ്‌ത്താര്. 3അച്ചെ അദില്യ ഏസുക്കാറാര് കൂട്ട അവാര്‌ണ എര്‌സലേമ്‌ക്ക് സൊല്ലിബ്‌ട്ടാര്. അവാര് പൊയിനിക്ക്യ മേലേമ് സമര്യ മേലേമ് പോഗാട്ടി, അദിലി ഇര്‌ക്ക ഏസുക്കാറാര്‌ക്ക് എഗുദാര് അല്ലാത്ത ജാദിഗ ഏസുക്ക് എജേന്താദ്‌ണ പറ്റി സൊന്നാര്. ഈ സേദിന കേ്ട്ട് അവാര് ഒട്ടുക്ക് റമ്പ പിര്യപട്ടാര്. 4പവുലോസ്‌മ് ബറ്‌ണവാസ്‌മ് അവാര്‌ദൊപ്പ പോനവാര്‌മ് എര്‌സലേമ്‌ക്ക് എത്തിനാദ്‌മ് അദിലി ഇര്‌ക്ക ഏസുക്കാറാര് കൂട്ടാമ് അപ്പൊസലലാമ്, മൂപ്പലാമ്, അവാര്‌ണ കണ്ട് ബരവളിക്ക്യ പോനാര്. സാമി തമ്മ്‌ദൊപ്പ ഇര്‌ന്ത് സെയ്‌ദ കാര്യണ പറ്റി അവാര് അവാര്‌ക്ക് സൊന്നാര്.
5ആന പരിസല കൂട്ടാത്തിലിര്‌ന്ത് ഏസുക്ക് എജേന്തവാര് എ്ന്ത് ണിന്റ് ഇച്ചെ സൊന്നാര്: <<എഗുദാര് അല്ലാത്ത ജാദിഗ സുന്നത്ത് സാത്ത്‌റ കളിക്കുഡൊ, മോസെ ബെത്ത സാമി സട്ടപഡി ണഡാക്കാമ് സെയ്യുഡൊ.>>
6ഈ ണായണ പറ്റി പേസ്യ അപ്പൊസലലാമ്, മൂപ്പലാമ് ഒന്റായി കൂഡിനാര്. 7റമ്പ ഗള്യെ തറ്‌ക്കിന പ്‌റ പത്ത്‌റോസ് എ്ന്ത് ണിന്റ് ഇച്ചെ സൊന്നാ്: <<ഏസുക്കാറാരെ, എഗുദാര് അല്ലാത്ത ജാദിഗ ണല്ല സേദിന കേ്ട്ട് ണമ്പ്യ അവാര്‌ക്ക് അദ്‌ണ സൊല്ല്യ സാമി എനാണ എപ്പോതാനെ ണിമ്മ് പട്ടിലിര്‌ന്ത് തെരിന്തെ്ഡ്‌ത്തിര്‌ക്കാ്. അദ് ണിമാക്ക് തെര്യുമല്ല. 8എല്ല മന്‌സാര്‌ദ്‌മ് മനേസ്സ്‌ണ തെരിര സാമി, ണമാക്ക് തന്ത പാസെതാനെത്തെ എഗുദാര് അല്ലാത്ത ജാദിഗാക്ക്‌മ് സാമിണിഗാല്‌ണ കൊഡുത്താ്. അദ്‌ണാലെ എഗുദാര് അല്ലാത്ത ജാദിഗാമ് ഏസുണ ണമ്പ്‌റാദ് സെരിത്തെ എന്ത് സാമി കാട്ടി തന്തിര്‌ക്കാ്. 9അവാര്‌മ് ണമ്മാമ് സാമിക്ക് ഒരേ പാസെത്തെ. അവാര് സാമിന ണമ്പിനാദ്‌ണാലെ അവാര്‌ദ് പാവഗണെല്ല സാമി പൊറുത്താ്. 10ആന ണമ്മ്‌ദ് പാട്ടലാക്കൊ, ണമാക്കൊ സെയ്യ മുഡ്യാത്ത കാര്യണ ഏസുക്കാറാരാന എഗുദാര് അല്ലാത്ത ജാദിലിപട്ടവാര് തലേക്ക് കെ്ട്ടി ബെക്ക്യ ണിമ്മ ആസെപഡ്‌റേര്. അച്ചെ ആസെപട്ട് ണിമ്മ സാമിന സോദണെ സെയ്‌രാദ് എന്ത്‌ക്ക്? 11അദല്ല ഏസു ആണ്ടവാന്‌ക്ക് ണമ്മോഡെ ബേ്റ്‌വെന്താദ്‌ണാലെത്തെ സാമി ണമാണ കാപാറ്റിനാ് എന്ത് ണമ്മ ണമ്പ്‌റാമ്. അദേപാസെത്തെ അവാര്‌മ് ണമ്പ്‌റാര്.>>
12അദ്‌ക്ക് പ്‌റ സാമി തമ്മോഡിര്‌ന്ത് എഗുദാര് അല്ലാത്ത ജാദിഗാദ് എ്ഡേലി സെയ്‌ദ അദിസ്യഗണാമ് അഡ്യാളഗണാമ് ബറ്‌ണവാസ്‌മ് പവുലോസ്‌മ് അവാര്‌ക്ക് സൊക്കാന സൊല്ലികൊഡുത്താര്. അക്കുളെ അദിലിര്‌ക്ക ആള്‌ഗ മുച്ചുഡ മ്‌ണ്ടാദെ കേ്ട്ട് ഇര്‌ന്താര്. 13അവാര് സൊല്ലി തീന്താദ്‌മ് ആക്കോവു ഇച്ചെ സൊന്നാ്: <<ഏസുക്കാറാരെ, ണാന് സൊല്ലുറാദ്‌ണ കേ്ളിരി, 14എഗുദാര് അല്ലാത്ത ജാദിഗളിലിര്‌ന്ത് ഒരു ലേസ ആള്‌ഗണ സാമി തനാക്ക് ബേ്ണ്ടി തെരിന്തെ്ഡ്‌ത്ത് തനാക്ക് എജേത്താ്. അച്ചെ സാമി അവാരോഡെ മുദമുദായി തന്ന്‌ദ് സീവാ്ന കാട്ടിനാദ്‌ണ പറ്റി സീമോന് സൊക്കാന സൊല്ലി തന്താനല്ല. 15സാമിദാസ്‌ഗ സൊല്ലിര്‌ക്കാദ് സെരിക്ക്‌മ് ഈ കാര്യഗണ പറ്റിത്തെ. അദ് സൊല്ലിര്‌ക്കാദ് ഇച്ചെത്തെ.
16<ആണ്ടവാ് ഇച്ചെ സൊല്ലുറാ്, അദ്‌ക്ക് പ്‌റ ണാന് തിലിമ്പി ബരുവെ,
സിന്തസിദാറ ആയി എക്കിര്‌ക്ക ദാവീദ് ബങ്കേസണ ണാന് ഒന്റായി സേത്തുവെ,
അവാര്‌ഗാദ് എന്തെല്ല ഇല്ലാദെ ആയി എക്കിര്‌ക്ക്‌ദൊ അദ്‌ഗണെല്ല ണാന് അവാര്‌ക്ക് കൊഡുക്കുവെ,
അച്ചെ ണാന് അവാര്‌ണ ഒറേപ്പ് ഇര്‌ക്കവാരായി തീക്കുവെ.
17മിഞ്ചിന ആള്‌ഗ,
എന്ന് സൊന്തക്കാറാര് ആയിര്‌ക്ക്യ ണാന് തെരിന്തെ്ഡ്‌ത്തിര്‌ക്ക എഗുദാര് അല്ലാത്ത ജാദിഗ പക്കാനാമ് എന്ന് പട്ട്‌ക്ക് ബരുവാര്.
18അച്ചെ ഇദ്‌ഗണെല്ല മുദതാനെ തെരിന്തിര്‌ക്ക ആണ്ടവാ് സൊല്ലുറാ്.>#ആമോസ് 9:11,12
19അദ്‌ണാലെ സാമി സാരി ബര എഗുദാര് അല്ലാത്ത ജാദിഗണ തൊന്തറെ സെയ്‌രാക്കില്ലെ എന്ത്‌ത്തെ എനാക്ക് ണിമ്മോഡെ സൊല്ല്യ ഇര്‌ക്കാദ്. 20ആന അവാര്‌ക്ക് ഇച്ചെ ഒരു എ്ള്‌ത്ത് എ്ള്‌ദി ബ്‌ഡുഡൊ. സെലെഗാക്ക് മേല്‌സ ബെത്താദ്‌ണാലെ അദ്‌ഗ സുത്താപ്പ്‌ഗെ്ട്ട്‌ദ്. അദ്‌ണാലെ അയ്യി തീനിഗ തിന്ന്‌റാക്കില്ലെ, ബേസ്യാഡ്‌റാക്കില്ലെ, മൂസ് മുട്ടി സത്ത ബേ്ണ്ട്‌ദ് സോരെ ഒഗുദ് എക്കാത്താദ്‌ണാലെ അയ്യി ബേ്ണ്ട്‌ദ് കറിന തിന്ന്‌റാക്കില്ലെ, ഏദ് ബേ്ണ്ട്‌ദ് സോരെനാമ് കുഡിക്കാക്കില്ലെ എന്ത് അവാര്‌ക്ക് എ്ള്‌ദിന മദി. 21മുദാത്തിലിര്‌ന്തെ ഒയിവു ണാള്‌ഗ ഒപ്പ എഗുദാര് പരേസ്‌റ കൂരെക്ക്‌റാഗ മോസേദ് സട്ടണ പഡിത്ത് കാട്ടിര്‌ന്താര്. എല്ല പട്ടണാത്തിലിമ് ഇദ്‌ണ പഡിസിമ് കൊഡുത്തിര്‌ന്താര്.>>
എഗുദാര് അല്ലാത്ത ജാദിഗളിലിര്‌ന്ത് ഏസുണ ണമ്പിനവാര്‌ക്ക് എ്ള്‌ത്ത് ബ്‌ഡ്‌റാര്
22അപ്പൊസലലാമ്, മൂപ്പലാമ് ഏസുക്കാറാര് കൂട്ടാത്തില്യ മൊത്തന ആള്‌ഗോഡെ സേന്ത് ഇച്ചെ മുഡിവു എ്ഡ്‌ത്താര്: തമ്മ് കൂട്ടാത്തിലിര്‌ന്ത് ലേസ ആണ്‌മക്കഗണ തെരിന്തെ്ഡ്‌ത്ത് പവുലോസ്‌ദ്‌മ് ബറ്‌ണവാസ്‌ദ്‌മ് ഒപ്പ അന്തൊക്ക്യാക്കെ സൊല്ലി ബ്‌ഡുഡൊ. അച്ചെ അവാര് ഏസുക്കാറാരിലി മുഗേനിഗ ആയിര്‌ക്ക ബറ്‌സേവാസ് എങ്ക ജൂദാനാമ് സീലാസ്‌ണാമ് തെരിന്തെ്ഡ്‌ത്താര്. 23അച്ചെ അവാര് കയ്യിക്ക് ഒരു എ്ള്‌ത്ത്‌ണാമ് കൊഡുത്ത് അന്‌പ്പിനാര്. അയ്യി എ്ള്‌ത്തിലി ഇച്ചെ എ്ള്‌ദിര്‌ന്ത്‌ദ്:
<<ണിമാണ പാസെ ഏസുക്കാറാര് ആയിര്‌ക്ക അപ്പൊസലലാമ്, മൂപ്പലാമ് സേന്ത്
അന്തൊക്ക്യ, സ്‌റ്യ, കിലിക്ക്യ എങ്ക എ്ഡെഗാളിലിര്‌ക്ക എഗുദാര് അല്ലാത്ത ജാദിഗളിലിര്‌ന്ത് ഏസുക്കാറാര് ആയിര്‌ക്കവാര്‌ക്കുള്ള എ്ള്‌ത്ത്:
ണിമ്മ എല്ലാര്‌മ് ണലമായി ഇര്‌ക്കേര് എന്ത് എമ്മ ണെനേക്കേര്.
24എമ്മ്‌ദ് കൂട്ടാത്തിലി പട്ട ലേസ ആള്‌ഗ ണിമ്മ് പട്ട്‌ക്ക് ബന്ത് ണിമാണ തൊന്തറെ പഡ്‌സിനാര് എന്ത്‌മ് അവാര് സൊന്ന കാര്യഗ ണിമാണ റമ്പ അര്‌ക്കപ്‌ഡിസിറ്റ് എന്ത്‌മ് എമ്മ കേ്ട്ടേര്. ആന അദ് എമ്മ സൊല്ലിസ്യാല്ല അവാര് അച്ചെ സെയ്‌ദാദ്. 25അദ്‌ണാലെ എമ്മെല്ലാര്‌മ് സേന്ത് ഒന്റൊ റണ്ടൊ ആണ്‌മക്കഗണ തെരിന്തെ്ഡ്‌ത്ത് ണിമ്മ് പട്ട്‌ക്ക് അന്‌പ്പ്‌ഡൊ എന്ത് മുഡിവെ്ഡ്‌ത്ത് ഇര്‌ക്കേര്. അവാര്‌ണ ണമ്മ് സൊന്ത പവുലോസ്‌ദ്‌മ് ബറ്‌ണവാസ്‌ദ്‌മ് ഒപ്പ അന്‌പ്പ്‌റേര്. 26പവുലോസ്‌മ് ബറ്‌ണവാസ്‌മ് ണമ്മ് ആണ്ടവാ് ഏസു ക്‌റ്‌സ്‌ത്ത്‌ക്ക് ബേ്ണ്ടി അവാര് ബേലെ സെയ്‌ഗാട്ടി ആള്‌ഗ എത്തിന്യൊ ജമ്പ് അവാര്‌ണ കൊല്ല്യപട്ടാര്. 27അച്ചെ ജൂദാനാമ് സീലാസ്‌ണാമ് ണിമ്മ് പട്ട്‌ക്ക് ബ്‌ഡ്‌റേര്. അവാര് ബന്ത് എമ്മ എ്ള്‌ദിര്‌ക്കാദ്‌ണ ണിമാക്ക് സൊല്ലുവാര്. 28ണിമാക്ക് അദിഗ ബാര ആക്ക ബേ്ഡ എന്ത് സാമിണിഗാല്‌മ് എമ്മാമ് ഒരേപാസെ സെരി എന്ത് കണക്കാക്ക്‌റേര്. അദ്‌ണാലെ ണിമ്മ ഇദിലി എ്ള്‌ദിര്‌ക്ക സട്ടഗണമാട്ട് സെയ്‌ദ മദി. 29സെലെഗാക്ക് മേല്‌സ ബെത്താദ്‌ണ തിന്ന്‌റാക്കില്ലെ, ബേസ്യാഡ്‌റാക്കില്ലെ, മൂസ് മുട്ടി സത്ത ബേ്ണ്ട്‌ദ് സോരെ ഒഗുദ് എക്കാത്താദ്‌ണാലെ ബേ്ണ്ട്‌ദ് കറിന തിന്ന്‌റാക്കില്ലെ, ഏദ് ബേ്ണ്ട്‌ദ് സോരെനാമ് കുഡിക്കാക്കില്ലെ. ഇദ്‌ഗെല്ല സെയ്യാദെ ഇര്‌ന്ത ണിമാക്ക് ണല്ലാദ്.
ണിമാക്ക് എല്ലാര്‌ക്ക്‌മ് ണല്ലാദ് ബരുഡൊ!>>
30അച്ചെ അവാര്‌ണ എര്‌സലേമിലിര്‌ന്ത് അന്തൊക്ക്യാക്കെ അന്‌പ്പി ബ്‌ട്ടാര്. അവാര് ആങ്ക് പോയി എജ്ജിന പ്‌റ അദില്യ മുച്ചുഡ ഏസുക്കാറാര്‌ണാമ് ഒളേത്ത് ബര്‌സിനാര്. അദ്‌ക്ക് പ്‌റ അവാര്‌ദ് കയ്യിക്ക് അയ്യി എ്ള്‌ത്ത്‌ണ കൊഡുത്താര്. 31എ്ള്‌ത്ത്‌ണ ആള്‌ഗ പഡിക്കാട്ടി അയ്യി എ്ള്‌ത്തിലി തമാണ ദയ്യിരപഡ്‌സ്‌റ സേദിന കേ്ട്ട് അവാര്‌ക്ക് ദ്‌ഡ്‌ക്കെന്ത്‌ദ്. 32സാമിദാസ്‌ഗ ആയിര്‌ക്ക സീലാസ്‌മ്, ജൂദാന്‌മ് സാമി സൊല്ലുസുലാക്കാത്തിലിര്‌ന്ത് എത്തിന്യൊ ണല്ല ണല്ല കാര്യണ സൊല്ലി ഏസുക്കാറാര്‌ണ ണല്ല ദയ്യിരപഡ്‌സിനാര്. 33ആന അവാര് ഒരു ലേസ ബാര അദിലി തങ്കിനാര്. അദ്‌ക്ക് പ്‌റ ഏസുക്കാറാരാന അന്തൊക്ക്യക്കാറാര് ഇവാര്‌ണ അന്‌പ്പിനവാര് പട്ട്‌ക്കെ താനെ ണല്ല പിര്യത്തോഡെ അന്‌പ്പി ബ്‌ട്ടാര്.#15:33മുദ എ്ള്‌ദി ബെത്തിര്‌ന്താദ്‌ണ ണോഡി എ്ള്‌ദിന പഗ്‌ദി കായിദാത്തിലി മുപ്പത്തിണാലാവദ് സൊല്ലുസുലാക്ക സേത്തി എ്ള്‌ദി ഇര്‌ക്ക്‌ദ്. അദ് ഇച്ചെത്തെ: ആന സീലാസ് അദിലിതാനെ ഇര്‌ക്ക്യ മുഡിവെ്ഡ്‌ത്താ്.
35പവുലോസ്‌മ് ബറ്‌ണവാസ്‌മ് അന്തൊക്ക്യാലിതാനെ ഒരു ലേസ മാസ ഇര്‌ന്താര്. അച്ചെ അവാര്‌മ് അദില്യ ബേ്റെ ആള്‌ഗാമ് സേന്ത് ആണ്ടവാന്‌ദ് സൊല്ലുസുലാക്കഗണ അന്തൊക്ക്യാക്ക്‌റാഗ സൊല്ലാമ് സെയ്‌ദാര് പഡ്‌സാമ് സെയ്‌ദാര്.
പവുലോസ്‌മ് ബറ്‌ണവാസ്‌മ് പ്‌റ്‌റാര്
36ലേസ മാസഗ പോന പ്‌റ പവുലോസ് ബറ്‌ണവാസ്‌ക്കെ: <<ണമ്മ ആണ്ടവാന്‌ദ് സേദി സൊന്ന പട്ടണാക്ക്‌റാഗ പോയി അദിലിര്‌ക്ക ഏസുക്കാറാര് എച്ചെ ഇര്‌ക്കാര് എന്ത് ണോഡില>> എന്ത് സൊന്നാ്. 37ബറ്‌ണവാസ് മറ്‌ക്കോസ് എങ്ക ഓഗന്നാനാമ് തമ്മ്‌ദ് ഒപ്പ കൂട്ടി പോഡൊ എന്ത് ആസെപട്ടാ്. 38ആന ഇയാള് പമ്പുല്യേലി ബെത്ത് ഇവാര്‌ദൊപ്പ ഇര്‌ന്ത് ബേലെ സെയ്യ ണില്ലാദെ പ്‌റ്‌ന്ത് പോഗാമ് സെയ്‌ദാ്. അദ്‌ണാലെ ഇയാള്‌ണ കൂട്ടി എ്ഡ്‌ത്ത പോരാദ് സെരി അല്ല എന്ത് പവുലോസ് ണെനേത്താ്. 39അച്ചെ അദ്‌ണ സൊല്ലി പവുലോസ്‌ക്ക്‌മ് ബറ്‌ണവാസ്‌ക്ക്‌മ് തറ്‌ക്ക ബന്ത്‌ദ്. അച്ചെ ഇവാര് റണ്ട് ആള്‌മ് പ്‌റ്‌ന്താര്, ബറ്‌ണവാസ് മറ്‌ക്കോസ്‌ണ കൂട്ടി കപ്പാല്‌ക്ക് ഏ്റി സുറ്റുമ് തണ്ണിര്‌ക്ക കുപുറോസ് ണാഡ്‌ക്ക് പോനാ്. 40ആന പവുലോസ് സീലാസ്‌ണ തെരിന്തെ്ഡ്‌ത്ത് പോഗാട്ടി അദില്യ ഏസുക്കാറാര് കൂട്ട അവാര്‌ക്ക് ആണ്ടവാന്‌ദ് ഉദാവിമ് പാദ്‌ഗാപ്പ്‌മ് കെ്ഡേക്ക്യ ബേ്ണ്ടി അവാര്‌ണ സാമി കയ്യിക്കെ ഒപ്പഡിത്താര്. 41അവാര് സ്‌റ്യ, കിലിക്ക്യ എങ്ക ണാഡ്‌ഗാക്കെല്ല പോയി അദിലിര്‌ക്ക ഏസുക്കാറാര് കൂട്ടഗണ ബിലപഡ്‌സിനാര്.
Currently Selected:
അപ്പൊസലല 15: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
