അപ്പൊസലല 22
22
1<<എന്ന് കൂട്ടാരാന ഇസ്‌റേല്‌ക്കാറാരെ, ണാന് കുറ്റക്കാറാ് അല്ല എന്ത് കാട്ട്യ എനാക്ക് സൊല്ല്യ ഇര്‌ക്കാദ്‌ണ സെറ്റെ ണിമ്മ കേ്ക്കുഡോമെ.>>
2അയാള് എവുറാര് ണായാത്തിലി സൊല്ലുറാദ്‌ണ കേ്ട്ടാദ്‌മ് അവാര്‌ഗ ഒന്റുഗൂഡി പേസാദാനാര്. അയാള് പിന്നേമ് ഇച്ചെ സൊല്ല്യ പ്‌ഡിത്താ്.
3<<കിലിക്ക്യ ണാഡിലിര്‌ക്ക തറ്‌സീസ് പട്ടണാത്തിലി പ്‌റാന്ത ഒരു എഗുദാ്ത്തെ ണാന്. ആന ബളാന്താദ് മുച്ചുഡ എര്‌സലേമ് എങ്ക ഈ പട്ടണാത്തിലിമ്. ണമ്മ് പാട്ടലാദ് സട്ടഗണ എച്ചെ കേ്ട്ട് ണഡാക്കുഡൊ എന്ത് ണാന് സൊക്കാന പഡിത്തെ്ഡ്‌ത്താദ് ഗമാല്യേല് എങ്ക ബാത്ത്യാനോഡിര്‌ന്ത്‌ത്തെ. ഇപ്പ് ണിമ്മ സാമിക്ക് ബേ്ണ്ടി ണിമാക്ക് മുഡിര അളാവുക്ക് മീ്റി ബേലെ സെയ്‌രേര്. അദേപാസെ താനെത്തെ ണാന്‌മ് സെയ്‌ദിര്‌ന്തെ. 4ആണ്ടവാ് കാട്ടി തന്ത ബയ്യിമേലെ ണഡാന്തിര്‌ന്ത പെ്ണ്ണ്‌മക്കഗണാമ്, ആണ്‌മക്കഗണാമ് പ്‌ഡിത്തെ്ഡ്‌ത്ത് പോയി ജെയില്‌ക്ക് ഇക്കിനെ. അദ്‌താനെമല്ല ണാന് അവാര്‌ഗണ കൊഡിമേമ് പഡിസിര്‌ക്കെ പഗ്‌ദി ആള്‌ഗണ കൊല്ല്യാമ് കൊഡുത്തിര്‌ക്കെ. 5അദ്‌ക്ക് തെ്ളുവു എഗുദ ബെല്ല്യ പൂസാരിമ് എഗുദ ഗോഡ്‌ദില്യ മൂപ്പലാമ്‌ത്തെ. ണാന് അവാരോഡിര്‌ന്ത് ദമാസ്‌ക്കോസിലിര്‌ക്ക എഗുദാര്‌ക്ക് കൊഡുക്ക്യ ഒരു എ്ള്‌ത്ത് ബാങ്കിനെ. അച്ചെ ദമാസ്‌ക്കോസിലിര്‌ക്ക ഏസുക്കാറാര്‌ണ പ്‌ഡിത്ത് കെ്ട്ടി എര്‌സലേമ്‌ക്ക് എ്ഡ്‌ത്ത് ബന്ത് ദണ്ടണെ കൊഡുക്ക്യ ണാന് ആങ്കെ പോനെ.>>
ഏസുണ എച്ചെ ണമ്പിനെ എന്ത് പവുലോസ് സൊല്ലുറാ്
6<<അച്ചെ ണാന് ദമാസ്‌ക്കോസ്‌ദ് അര്‌ഗെ എജ്ജ്യ ആഗാട്ട്യെല്ല ബാനാത്തിലിര്‌ന്ത് ദിഗിരന ബെല്ല്യ ഒരു ബെ്ള്‌സ സുറ്റുമ് ജില്ലാന അഡിത്ത്‌ദ്. അക്കുളെ ണേര ണഡ് ഉച്ചി ആയിര്‌ന്ത്‌ദ്. 7ണാന് അപ്പ്‌താനെ മണ്ണ്‌ക്കെ ബ്‌ന്തെ. <സവുലെ, സവുലെ ണീ എന്ത്‌ക്ക് എനാണ കൊഡിമെപഡ്‌സ്‌റെ?> എന്ത് എനാക്ക് സൊല്ലുറ ഒരു ജദ്ദണ ണാന് കേ്ട്ടെ.
8<ആണ്ടവാനെ ണീ ആര്?> എന്ത് ണാന് കേ്ട്ടെ.
അക്കുളെ: <ണീ കൊഡിമെപഡ്‌സികൊണ്ട് ഇര്‌ക്ക ണസറത്ത് ഊര്‌ക്കാറാ് ഏസുത്തെ ണാന്> എന്ത് അയാള് എനാക്ക് സൊന്നാ്. 9എന്ന്‌ദൊപ്പ ഇര്‌ന്തവാര് അയ്യി ബെ്ള്‌സണ കണ്ടാര്, ആന എന്നോഡെ പേസിന ആള്‌ദ് ജദ്ദണ അവാര് കേ്ക്കാലെ.
10ണാന് കേ്ട്ടെ: <ആണ്ടവാനെ, ണാന് എന്ത സെയ്യ?>
അക്കുളെ ആണ്ടവാ് എനാക്ക് സൊന്നാ്: <ണീ എ്ന്ത് ണേരെ ദമാസ്‌ക്കോസ്‌ക്ക് പോ, അദിലി ണീ സെയ്യ സാമി മുഡിവെ്ഡ്‌ത്ത് ബെത്തിര്‌ക്കാദ്‌ണ ഒട്ടുക്ക് ണിനാക്ക് സൊല്ലി തരുവാര്.> 11അയ്യി ബെ്ള്‌സാത്തിലി ഇര്‌ന്ത് റമ്പ ബെ്ള്‌സ അഡിത്താദ്‌ണാലെ എന്ന് കണ്ണ് കെ്ട്ടെക്കിറ്റ്. അദ്‌ണാലെ എന്ന്‌ദൊപ്പ ഇര്‌ന്തവാര് എന്ന് കയ്യിന പ്‌ഡിത്ത് എനാണ ദമാസ്‌ക്കോസ്‌ക്ക് കൂട്ടി പോനാര്.
12ദമാസ്‌ക്കോസ് പട്ടണാത്തിലി അനനാസ് എങ്ക ഒരുത്താ് ഇര്‌ന്താ്. അയാള് എഗുദാര്‌ക്കെല്ല ണല്ല മദ്‌പ്പ് ഇര്‌ക്കവാന്‌മ് മോസെ ബെത്ത സാമി സട്ടപഡി ണഡാക്കവാന്‌മ്, സാമിന കുമ്മുഡി ണഡാക്കാദിലി ഒരു കുറ്റകൊറെ കാണ്യ മുഡ്യാത്തവാന്‌മ് ആയിര്‌ന്താ്. 13അയാള് എന്ന് പട്ട്‌ക്ക് ബന്ത് ഇച്ചെ സൊന്നാ്: <അയ്യ സവുലെ, ണിനാക്ക് ഇപ്പ് താനെ പാര്‌വെ കെ്ഡേക്കുഡൊ> അപ്പ്‌ താനെ എനാക്ക് പാര്‌വെ കെ്ഡേക്കാമ് സെയ്‌ദ്‌ദ്. ണാന് അയാള്‌ണ കാണാമ് സെയ്‌ദെ.
14അയാള് എനാക്ക് ഇച്ചെ സൊന്നാ്: <ണമ്മ് പാട്ടലാദ് സാമി ആസെ ബെത്തിര്‌ക്ക കാര്യഗണ ണീ തെരിന്തിര്‌ക്ക്യാമ്, സാമി സൊല്ലുറ കാര്യഗണ അദേപാസെ സെയ്‌ര തന്ന് ണല്ല ബേലെക്കാറാന കാണ്യാമ് അയാള് സൊന്ന ജദ്ദണ അയാള് ബായാലെ കേ്ക്ക്യാമ് ണിനാണ തെരിന്ത് എ്ഡ്‌ത്ത് ബെത്തിര്‌ക്കാ്. 15ണീ അവാന പറ്റി കണ്ട കാര്യഗണാമ് കേ്ട്ട കാര്യഗണാമ് എല്ല ആള്‌ഗാക്ക്‌മ് സൊല്ലുവെ. 16ഇനി എന്ത്‌ക്ക് ണീ കാക്കാദ്? എ്ന്ത് പോയി തണ്ണിക്ക് മുളുഗ്, സാമി ണിന്ന് തെറ്റ്‌കുറ്റഗണ കച്ച്യെക്കുഡൊ, ണിനാണ കാപാറ്റ്യ ബേ്ണ്ടി ആണ്ടവാന്‌ദ് പേരിലി ബേ്ണ്ടികൊള്ള്.> >>
പവുലോസ്‌ണ എഗുദാര് അല്ലാത്ത ജാദിഗാക്കെ ണല്ല സേദി സൊല്ല്യ ബ്‌ഡ്‌റാര്
17<<ണാന് എര്‌സലേമ്‌ക്കെതാനെ തിലിമ്പി പോനെ. അദ്‌ക്ക് പ്‌റ സാമികൂരേലി പരേസി കൊണ്ടിര്‌ക്കാട്ടി എനാക്ക് ഒരു തോറ്റ കാട്ടിറ്റ്. 18അയ്യി തോറ്റാത്തി ണാന് ആണ്ടവാന കണ്ടെ. <ണീ എനാണ പറ്റി സൊല്ലുറ കാര്യഗണെല്ല ഇദിലിര്‌ക്ക ആള്‌ഗ ബെലെ ബെക്കമാട്ടാര്. അദ്‌ണാലെ സട്ടന എര്‌സലേമ്‌ണ തള്ളി പോ> എന്ത് ആണ്ടവാ് എനാക്ക് സൊന്നാ്.
19അക്കുളെ ണാന് സൊന്നെ: <ആണ്ടവാനെ, ണാന് എഗുദാര് പരേസ്‌റ കൂരെക്ക്‌റാഗ പോയി ണിനാണ ണമ്പിര്‌ക്കവാര്‌ണ പ്‌ഡിത്ത് അഡിക്കാമ് സെയ്‌ദെ, ജെയില്‌ക്ക് അഡേക്കാമ് സെയ്‌ദെ എന്ത് അവാര്‌ക്ക് ണലമായി തെര്യു. 20ണിന്ന് കാര്യഗണ പറ്റി സൊല്ലുറ തേപാനോസ്‌ണ കൊല്ലുഗാട്ടി ണാന്‌മ് അയാള്‌ണ കൊല്ലുഡൊ എന്ത് സൊന്നെ. അദ്‌താനെമല്ല തേപാനോസ്‌ണ കൊന്റവാര്‌ദ് ഉഡുപ്പുഗണ പ്‌ഡിത്ത് അര്‌ഗെ ണിന്റ് ഇര്‌ക്കാമ് സെയ്‌ദിര്‌ക്കേനല്ല.>
21അക്കുളെ ആണ്ടവാ് എനാക്ക്: <ണീ പോ! ണാന് ണിനാണ എമ്മാട്ടോയിര്‌ക്ക എഗുദാര് അല്ലാത്ത ജാദിഗ പട്ട്‌ക്ക് സൊല്ലിബ്‌ഡുവെ> >> എന്ത് സൊന്നാ്.
22അന്നാരമാട്ട്‌മ് പവുലോസ് സൊല്ലുറാദ്‌ണ അവാര് സൊക്കാന കേ്ട്ടിര്‌ന്താര്. ആന എഗുദാര് അല്ലാത്ത ജാദിഗാദ് പട്ട്‌ക്ക് പോഡൊ എന്ത് സൊന്നാദ്‌ണ കേ്ട്ടാദ്‌മ് അവാര് ബെല്ല്യാദ്‌ക്ക് ആലാത്ത് കൊണ്ട് ഇച്ചെ സൊന്നാര്: <<ഇച്ച്‌ളവാനെല്ല ബൂമിലി ബെക്കാക്കില്ലെ. ഇവാനെല്ല പെ്ളേത്തിര്‌ക്ക്യ ബ്‌ഡ്‌റാക്കില്ലെ.>>
23അവാര് ആലാത്ത് കൊണ്ട് തമ്മ് സീലെഗണെല്ല സൂറെ ബ്‌ട്ട് മണ്ണ്‌ണ ബാരി മേല് ഇലാസാമ് സെയ്‌ദാര്.#22:23സീലെഗണെല്ല സൂറെ ബ്‌ട്ട് മണ്ണ്‌ണ ബാരി മേല് ഇലാസാമ് സെയ്‌ദാര്: അവാര്‌ക്ക് എത്തറ മൊനെ ഇര്‌ക്ക്‌ദ് എന്ത് കാട്ട്യ ബേ്ണ്ടിത്തെ അവാര് ഇച്ചെ സെയ്‌ദാദ്. 24അക്കുളെ പഡെതലെവാ് തമ്മ തങ്ക്‌റ കോട്ടേക്ക് പവുലോസ്‌ണ എ്ഡ്‌ത്ത് പോയ പഡെയാളിഗാക്ക് സൊന്നാ്. ആള്‌ഗ അയാള്‌ക്ക് ണേരെ അഗാറി പ്‌റ്‌റാദ് എന്ത്‌ക്ക് എന്ത് തെര്യ പവുലോസ്‌ണ സാട്ടെബാറിലി അഡിത്ത് കേ്ക്ക്യ പഡെതലെവാ് സൊന്നാ്. 25അവാര് തനാണ സാട്ടെബാറിലി അഡിക്ക്യ കെ്ട്ട്‌ഗാട്ടി അര്‌ഗെ ണിന്റ് ഇര്‌ന്ത ണൂറ് പഡെയാളിഗാദ് പഡെതലെവന പവുലോസ് കേ്ട്ടാ്: <<റോമ ണാഡ്‌ക്ക് പട്ടവാനാന ഒരു ആള്‌ണ കേ്ള്‌വി കേ്ക്കാദേമ് കുറ്റക്കാറാ് എന്ത് തെര്യാദേമ് സാട്ടെബാറിലി അഡിക്കാദ് ണായഗ?>>
26ഇദ്‌ണ കേ്ട്ടാദ്‌മ് ണൂറ് പഡെയാളിഗാദ് പഡെതലെവാ് ആയിര പഡെയാളിഗാദ് തലെവാന്‌ക്ക് പോയി: <<ണീ എന്ത സെയ്യ പോരെ? അയാള് റോമ ണാഡ്‌ക്ക് പട്ട ഒരു ആളമ്പ!>> എന്ത് സൊന്നാ്.
27അദ്‌ണാലെ ആയിര പഡെയാളിഗാദ് തലെവാ്, പവുലോസ്‌ണ പോയി കേ്ട്ടാ്: <<ണീ റോമ ണാഡ്‌ക്ക് പട്ടവാ്ന, എനാക്ക് സൊല്ലു.>>
അക്കുളെ പവുലോസ്: <<ഈ്>> എന്ത് സൊന്നാ്.
28അക്കുളെ പഡെതലെവാ്: <<ണാന് മൊത്തന പണ കൊഡുത്ത്‌ത്തെ റോമ ണാഡ്‌ക്ക് പട്ടവാനായി തീന്താദ്>> എന്ത് സൊന്നാ്.
അക്കുളെ പവുലോസ്: <<ആന ണാന് പ്‌റാന്താദിലിര്‌ന്തെ റോമ ണാഡ്‌ക്ക് പട്ടവാ്ത്തെ>> എന്ത് സൊന്നാ്.
29അദ്‌ണാലെ അയാള്‌ണ കേ്ള്‌വി കേ്ക്ക്യ ണോഡിനവാരെല്ല അപ്പ്‌താനെ തള്ള്യെക്കിനാര്. പവുലോസ് റോമ ണാഡിലി പട്ടവാനെന്ത് പഡെതലെവാന്‌ക്ക് തെരിന്ത്‌ദ്. അദ്‌ണാലെ അയാള്‌ണ സങ്കിളിക്ക് കെ്ട്ടി ബെത്താക്ക് പഡെതലെവാന്‌ക്ക് കോവെ പ്‌ഡിത്ത്‌ദ്.
പവുലോസ് എഗുദാര് ഗോഡ്‌ദിലി
30മറ് ണാള് എഗുദാര് പവുലോസ്‌ണ കുറ്റ സാട്ട്‌റാദ് ണേരൊ പൊയ്യൊ എന്ത് തെര്യ ആയിര പഡെയാളിഗാദ് തലെവാ് ആസെ ബെത്താ്. അച്ചെ എഗുദ പൂസാരി തലെവലണാമ് എഗുദാര് ഗോഡ്‌ദില്യ മുച്ചുഡ ആള്‌ഗണാമ് ബന്ത് ഒന്റായി കൂഡ്യ സൊന്നാ്. പ്‌റ പവുലോസ്‌ണ കെ്ട്ടിര്‌ന്ത സങ്കിളിന ഉക്കി അവാര്‌ദ് പട്ട്‌ക്ക് എ്ഡ്‌ത്ത് ബന്ത് ണില്ലിസിനാര്.
Currently Selected:
അപ്പൊസലല 22: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
