ഓഗന്നാ് 15
15
മുന്തിരി കൊഡിമ് സില്ല്‌ഗാമ്
1<<ണാന് സെരിക്കുള്ള മുന്തിരി കൊഡിമ് എന്ന്‌ദ് അപ്പനാന സാമി ദോട്ടക്കാറാന്‌മ്‌ത്തെ. 2എന്നോഡെ ഇര്‌ന്ത് സില്ല് ബ്‌ട്ട് പോയിര്‌ക്ക കായി ബ്‌ഡാത്ത സില്ല്‌ഗണെല്ല ദോട്ടക്കാറാ് ബെ്ട്ടി എക്ക്‌റാ്. കായി ബ്‌ഡ്‌റ സില്ല്‌ഗണെല്ല ണല്ല പല പ്‌ഡിക്ക്യ ബേ്ണ്ടി അവാ് കവാത്ത് എ്ഡ്‌ത്ത് ബ്‌ഡ്‌റാ്. 3ണാന് ണിമാക്കെ സൊന്ന ണായണാലെ ണിമ്മ മുദാഗെ സുത്താപ്പുള്ളവാര് ആയിര്‌ക്കേര്. 4ണിമ്മ എന്ന്‌ദ് ഒപ്പ ഒന്റായി ഇരിരി, അപ്പ് ണാന്‌മ് ണിമ്മ്‌ദ് ഒപ്പ ഒന്റായി ഇര്‌ക്കുവെ. സില്ല്‌ഗാക്ക് മുന്തിരി കൊഡിലി മൂണ്ടിര്‌ക്കാദെ പോന തന്യെ കായി ബ്‌ഡ്യ മുഡ്യമാട്ട. അദേപാസെ ണിമ്മാമ് എന്ന്‌ദ് ഒപ്പ ഒന്റായി ഇര്‌ക്കാദെ പോന ണിമാക്ക് കായി ബ്‌ഡ്യ മുഡ്യമാട്ട.
5ണാന് മുന്തിരി കൊഡിമ് ണിമ്മ സില്ല്‌ഗാമ്‌ത്തെ. ഒരുത്താ് എന്നിലിമ് ണാന് അവാനിലിമ് ഇര്‌ന്താക്കി അവാ് എത്തിന്യൊ കായി ബ്‌ഡുവാ്. ആന എനാണ തള്ളി ണിമാക്ക് ഒന്റുമ് സെയ്യ മുഡ്യമാട്ട. 6ആരാറ്റ് എന്നിലി ഇര്‌ക്കാദെ പോന അവാന മുറുത്ത് തള്ളിന ഒരു സില്ല്‌ണ പാസെ എ്ഡ്‌ത്ത് ബെ്ള്യെ എക്കുവാര്. അദ് ഉണാന്തെക്കു. അദ്‌ഗണെല്ല പൊറിക്കി കൂട്ടി തീക്കെ ഇക്കുവാര്. അച്ചെ അദ് ബെന്തെക്കു. 7ണിമ്മ എന്നിലിമ് ണാന് സൊന്ന ണായഗ ണിമ്മ് കുള്ളുക്കുമ് ഇര്‌ന്താക്കി ണിമ്മ ആസെപഡ്‌റാദ് എന്ത കേ്ട്ടാല്‌മ് ണിമാക്ക് കെ്ഡേക്കു. 8ണിമ്മ റമ്പ കായി ബ്‌ഡ്‌ഗാട്ടി ണിമ്മ എന്ന് സൊല്ലുപഡി ണഡാക്കവാര് ആവേര്. അച്ചെ എന്ന്‌ദ് അപ്പനാന സാമിക്ക് മദ്‌പ്പ് കെ്ഡേക്കു.
9എന്ന്‌ദ് അപ്പനാന സാമി എന്നോഡെ സീവാ് ബ്‌ട്ട് ണഡാക്ക പാസെ ണാന്‌മ് ണിമ്മോഡെ സീവാ് ബ്‌ട്ട് ണഡാക്കെ. ണാന് ണിമ്മോഡെ ബ്‌ട്ടിര്‌ക്ക സീവാനിലി ഇരിരി. 10എന്ന്‌ദ് അപ്പനാന സാമി എനാണ സെയ്യ സൊന്ന കാര്യഗണ ണാന് അദേപാസെ സെയ്‌ദ് എന്ന്‌ദ് അപ്പനാന സാമി എന്നോഡെ ബ്‌ട്ടിര്‌ക്ക സീവാനിലി ഇര്‌ക്ക പാസെ ണിമ്മാമ് ണാന് സെയ്യ സൊന്ന കാര്യഗണ അദേപാസെ സെയ്‌രദാനാക്കി ണാന് ണിമ്മോഡെ ബ്‌ട്ടിര്‌ക്ക സീവാനിലി ണിമ്മ ഇര്‌ക്കുവേര്. 11എനാക്ക് ഇര്‌ക്ക പിര്യ ണിമ്മ് കുള്ളുക്ക് ഇര്‌ക്ക്യാമ് അച്ചെ ണിമാക്കിര്‌ക്ക പിര്യാക്ക് കൊറെ ബരാദിര്‌ക്ക്യാമ് ണാന് ഇദ്‌ണ ണിമാക്കെ സൊല്ലിര്‌ക്കെ. 12ണാന് ണിമാണ സീവാ് ബ്‌ഡ്‌റ പാസെ, ണിമ്മാമ് ആങ്കീങ്ക് സീവാ് ബ്‌ട്ട് ണഡാക്കുഡൊ. ഇദ്‌ത്തെ ണാന് തര കല്‌പനെ. 13എ്ണേവുക്കാറാന്‌ക്ക് ബേ്ണ്ടി തന്ന് ഉജുറുണ കൊഡുക്കാദ്‌ത്തെ എല്ലാദ്‌ണ ബ്‌ഡ ബെല്ല്യ സീവാ്. 14ണാന് ണിമാക്കെ സെയ്യ സൊന്നാദ്‌ണ ണിമ്മ സെയ്‌രദാനാക്കി ണിമ്മ എന്ന്‌ദ് എ്ണേവുക്കാറാര്‌ത്തെ. 15പണ്ണാഡി സെയ്‌രാദ്‌ണ ബേലെക്കാറാന്‌ക്ക് തെര്യാത്താദ്‌ണാലെ ണാന് ണിമാണ ഇനി ബേലെക്കാറാര് എന്ത് ഒളേക്കമാട്ടെ. ണാന് എന്ന്‌ദ് അപ്പനാന സാമ്യോഡെ ഇര്‌ന്ത് കേ്ട്ടാദ്‌ണ ഒട്ടുക്ക് ണിമാക്കെ സൊല്ലിര്‌ക്കെ. അദ്‌ണാലെ ണിമാണ ണാന് എന്ന്‌ദ് എ്ണേവുക്കാറാര് എന്ത് ഒളേത്തിര്‌ക്കെ. 16ണിമ്മ എനാണ തെരിന്തെ്ഡ്‌ക്കാലെ. ണാന്‌ത്തെ ണിമാണ തെരിന്തെ്ഡ്‌ത്തിര്‌ക്കാദ്. ണിമ്മ പോയി കായി ബ്‌ഡ്യാമ് അയ്യി ബ്‌ഡ്‌റ കായി എപ്പെപ്പേക്ക്‌മ് കൊട്ടാദിര്‌ക്ക്യാമ് ണാന് ണിമാണ എ്ഡ്‌ത്ത് ബെത്തിര്‌ക്കെ. അപ്പ് ണിമ്മ എന്ന് പേരിലി കേ്ക്കാദ് ഒട്ടുക്ക്‌മ് ണിമാക്ക് എന്ന്‌ദ് അപ്പനാന സാമി തരുവാ്. 17ണിമ്മ ആങ്കീങ്ക് സീവാ് ബ്‌ട്ട് ണഡാക്കുഡൊ. ഇദ്‌ത്തെ ണാന് ണിമാക്ക് തര കല്‌പനെ.>>
ഉലഗാത്തില്യവാര് ണിമാണ തൊറേവാര്
18<<ഉലഗാത്തില്യവാര് ണിമാണ തൊറേന്ത് തള്ളിനാക്കി ണിമാക്ക് മുദ എനാണ തൊറേന്ത് തള്ളിനാര് എന്ത് ണിമ്മ തെരിന്ത് കൊള്ളിരി. 19ണിമ്മ ഉലഗാക്ക് പട്ടവാര് ആയിര്‌ന്താക്കി അവാര് ണിമാണ തമാക്ക് സൊന്ത എന്ത് സൊല്ലി സീവാ് ബ്‌ട്ടിര്‌ന്തിര്‌ക്കുവാര്. ആന ണിമ്മ ഉലഗാക്ക് പട്ടവാര് അല്ലാത്താദ്‌ണാലേമ് ണാന് ണിമാണ ഉലഗാത്തിലിര്‌ന്ത് തെരിന്തെ്ഡ്‌ത്താദ്‌ണാലേമ് അവാര് ണിമാണ തൊറേന്ത് തള്ള്‌റാര്. 20<ബേലെക്കാറാ് തന്ന് പണ്ണാഡിന ബ്‌ഡ ബെല്ല്യവാനല്ല>#ഓഗന്നാ് 13:16 എന്ത് ണാന് ണിമാക്കെ സൊന്ന ണായണ ണെനേവു ബെത്ത്‌കൊള്ളിരി. അവാര് എനാണ കൊഡിമെപഡ്‌സിനാര്. അദേപാസെ ണിമാണാമ് കൊഡിമെപഡ്‌സുവാര്. അവാര് എന്ന്‌ദ് സൊല്ലുപഡി ണഡാന്തിര്‌ന്തിര്‌ന്ത ണിമ്മ്‌ദ് സൊല്ലുപഡിക്ക്‌മ് ണഡാക്കുവാര്. 21ആനാല്‌മ് എനാണ സൊല്ലിബ്‌ട്ടവാന അവാര്‌ക്ക് തെര്യാത്താദ്‌ണാലേമ് ണിമ്മ എന്ന് ആള്‌ഗ ആനാദ്‌ണാലേമ് ഇദെല്ലാമെ ണിമാക്ക് അവാര് സെയ്‌വാര്. 22ണാന് ബന്ത് അവാര്‌ക്കെ സൊല്ലാദെ ഇര്‌ന്തിര്‌ന്ത അവാര്‌ക്ക് പാവ ഇല്ലെ. ആന ഇനി, അവാര് സെയ്‌ര പാവാക്ക് എന്താറ്റ്‌ക്ക് സാട്ടി അവാര്‌ക്ക് തപ്പ്‌സി കഡാക്ക്യ മുഡ്യമാട്ട. 23എനാണ തൊറേരവാര് എന്ന്‌ദ് അപ്പനാന സാമിനാമ് തൊറേരാര്. 24ബേ്റെ ആര്‌മ് സെയ്യാത്ത കാര്യഗണ ണാന് അവാര്‌ദ് പട്ടിലി സെയ്യാദെ ഇര്‌ന്തിര്‌ന്ത അവാര്‌ക്ക് പാവ ഇല്ലെ, ആന ഇപ്പ് അവാര് ഈ കാര്യഗണെല്ല കണ്ട്‌മ് ഇര്‌ക്കാര്. എനാണാമ് എന്ന്‌ദ് അപ്പനാന സാമിനാമ് തൊറേന്ത്‌മ് ഇര്‌ക്കാര്. 25<അവാര് ഒരു കാര്യ ഇല്ലാദെ എനാണ തൊറേന്തെക്കിര്‌ക്കാര്>#സാമി പാട്ട് ബുക്ക് 35:19; 69:4 എന്ത് അവാര്‌ക്ക് മോസെ ബെത്ത സാമി സട്ടാത്തിലി എ്ള്‌ദി ബെത്തിര്‌ക്കാദ് അദേപാസെ ണഡാക്ക്യ ബേ്ണ്ടിത്തെ ഇച്ചെ ണഡാന്താദ്.
26സാമിന പറ്റ്യുള്ള സത്ത്യണ ബെ്ളിപഡ്‌സി തര സാമിണിഗാല് എന്ത് സൊല്ലുറ തൊണെക്കാറാന ണാന് സാമി പട്ടിലിര്‌ന്ത് ണിമ്മ് പട്ട്‌ക്ക് സൊല്ലിബ്‌ഡുവെ. അവാ് സാമി പട്ടിലിര്‌ന്ത് ണിമ്മ് പട്ട്‌ക്ക് ബന്ത് ണാന് ആര് എന്ത് സൊല്ലി തരുവാ്. 27ണിമ്മാമ് മുദ ഇര്‌ന്തെ എന്നോഡെ ഇര്‌ക്കാദ്‌ണാലെ എനാണ പറ്റി സൊല്ലിരി.>>
Currently Selected:
ഓഗന്നാ് 15: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
