ലൂക്കോസ് 3
3
തണ്ണിക്ക് മുളുഗ്‌സ്‌റ ഓഗന്നാന്‌ദ് സേദി
1തിവര്യൊസ് ബെല്ല്യ റാജാവായി ആണ്ടിര്‌ന്ത പദിനഞ്ചാവദ് ബര്‌സാത്തിലി: പൊന്തിയോസ് പീലത്തോസ് എഗുദ ണാഡ്‌ക്ക് തലെവാന്‌മ്, എരോദാ് ഗെലീലെ ണാഡ്‌ണാമ്, അവാന്‌ദ് തമ്പി പീലിപ്പോസ് ഇത്തൂര്യ, തറക്കോനെറ്റി എങ്ക ണാഡ്‌ണാമ്, ലൂസനാസ് അവിലേന് ണാഡ്‌ണാമ് ആണ്ടിര്‌ന്താര്. 2അയ്യി ഗള്യേലി അന്നാസ്‌മ് കയ്യപ്പാവുമ്‌ത്തെ എഗുദ ബെല്ല്യ പൂസാരിഗ. ഇദേ ഗള്യേലി സെക്കര്യാവുദ് മഗാ് ഓഗന്നാനോഡെ ബെ്ട്ടെകാഡിലി ബെത്ത് സാമി സൊന്നാ്. 3അച്ചെ ഓഗന്നാ് ഓറ്‌ദ്ദാ് ബാനി അര്‌ഗെ ഇര്‌ക്ക എല്ല ണാഡ്‌ക്ക്‌റാഗ പോയി: <<ണിമ്മ പാവ സെയ്‌രാദ്‌ണ തള്ള്യെക്കി തണ്ണിക്കെ മുളുഗുഡൊ. അപ്പ് ണിമ്മ് പാവഗണ സാമി പൊറുക്കുവാ്>> എന്ത് ബെല്ല്യാദ്‌ക്ക് ആലാത്ത് ആലാത്ത് സൊന്നാ്.
4എസയ്യാ് സാമിദാസ് ബുക്കിലി എ്ള്‌ദി ബെത്തിര്‌ക്ക പാസെ ഇച്ചെ ണഡാന്ത്‌ദ്:
<<ബെ്ട്ടെകാഡിലിര്‌ന്ത് ഒരുത്താ് ഇച്ചെ ആലാത്ത് സൊല്ലുറാ്:
<ആണ്ടവാന്‌ക്ക് ബയ്യി ഒരിക്കിരി.
ബയ്യിന അയാള്‌ക്ക് ബേ്ണ്ടി ണേരെ ആക്കിരി.
5എല്ല അഡിവാരഗണാമ് ഒരേ സമ ആക്കുഡൊ,
എല്ല മലെഗണാമ് ഗുഡ്ഡെഗണാമ് ഒരേ ഒപ്പ ആക്കുഡൊ,
അദേപാസെ ബളേന്തിര്‌ക്ക എല്ല റോട്ടുഗണാമ് ണേരെ ആക്കുഡൊ.
കുണ്ട് കുയ്യിര്‌ക്ക റോട്ടുഗണ മൂഡി മിന്‌സ ആക്കുഡൊ.
6സാമി ദെങ്ക്‌സ്‌റാദ് എച്ചെ എന്ത് എല്ല എ്ഡേലിര്‌ക്ക എല്ല മന്‌സാര്‌മ് കാണുവാര്.> >>#എസയ്യാ് 40:3–5
7ഓഗന്നാ് പട്ട്‌ക്കെ തണ്ണിക്ക് മുളുഗ്യ ബന്ത ആള്‌കൂട്ടാക്കെ അവാ് സൊന്നാ്: <<പാമ്പ്‌ണ പാസെ ണഞ്ചിര്‌ക്കവാരെ, ണിമാക്ക് സാമി തര ദണ്ടണേലിര്‌ന്ത് തപ്പിസി കഡാക്ക്യ ആര് ബുദ്ദി സൊല്ലി തന്താദ്? 8ണിമ്മ പാവ സെയ്‌രാദ്‌ണ തള്ള്യെക്കിനേര് എന്ത് സൊല്ലുറദാനാക്കി അദ്‌ക്ക് തഗ്‌ന്ത കാര്യ സെയ്‌ദ് കാട്ടുഡൊ. <അവുറഗാമ്‌ത്തെ എമ്മ് പാട്ടാ്> എന്ത് ണിമ്മ ണിമ്മ് മനേസ്സ്‌ക്കുള്ളുക്ക് സൊല്ലാദി. എന്ത്‌ക്കെന്റ ഈ കല്ല്‌ഗളിലിര്‌ന്ത് അവുറഗാമ്‌ക്ക് മക്കണ ഉണ്ടാക്കി കൊഡുക്ക്യ സാമിക്ക് മുഡ്യു എന്ത് ണാന് ണിമാക്കെ സൊല്ലുറെ. 9ഇപ്പ് താനെ മരാണ ബെ്ട്ട്യ ബേ്ണ്ടി മ്‌ണ്ടേക്കെ കോഡാലി ബെത്ത് മുഡിന്ത്‌ദ്. മോസ കായി കായിക്ക മരഗണെല്ല ബെ്ട്ടി തീക്കിക്കി സുട്ടു എക്കുവാ്.>>
10അക്കുളെ ആള്‌കൂട്ട ഒട്ടുക്ക് ഓഗന്നാന: <<എമ്മ എന്ത സെയ്യ?>> എന്ത് കേ്ട്ടാര്.
11അക്കുളെ ഓഗന്നാ്: <<റണ്ട് സീലെ ഇര്‌ക്കവാ് ഇല്ലാത്തവാന്‌ക്ക് ഒന്റുണ കൊഡുക്കുഡൊ. അദേപാസെ തീനി ഇര്‌ക്കവാ് തീനി കെ്ഡേക്ക്യ ഇല്ലാത്തവാന്‌ക്ക് കൊഡുക്കുഡൊ>> എന്ത് സൊന്നാ്.
12ണ്‌ഗ്‌ദി പിരിക്ക ലേസ ആള്‌ഗ തണ്ണിക്കെ മുളുഗ്യ ബന്ത് ഓഗന്നാന: <<ഗുരുവെ, എമ്മ എന്ത സെയ്യ>> എന്ത് കേ്ട്ടാര്.
13അദ്‌ക്ക് ഓഗന്നാ്: <<ണിമ്മ സട്ടപഡി സൊല്ലിര്‌ക്ക പണാക്ക് മേല് ആരോഡെ ഇര്‌ന്ത്‌മ് അദിഗ പിരിക്ക ബേ്ഡ>> എന്ത് സൊന്നാ്.
14അക്കുളെ ലേസ പഡെയാളിഗാമ്: <<എമ്മ എന്ത സെയ്‌ഡൊ?>> എന്ത് ഓഗന്നാന കേ്ട്ടാര്.
അദ്‌ക്ക് അയാള്: <<ആര്‌ണാമ് മെ്റ്‌ട്ടി പ്‌ഡിത്തൊ, ബെ്റ്‌ദെ കുറ്റക്കാറാനാക്ക്യൊ ആരോഡിര്‌ന്ത്‌മ് പണ ബാങ്കാദെ ണിമാക്ക് കെ്ഡേക്ക കൂലി മദി എന്ത് ണെനേത്ത്‌കൊള്ളിരി>> എന്ത് അവാര്‌ക്ക് സൊന്നാ്.
15തമാണ കാപാറ്റ്യ ക്‌റ്‌സ്‌ത്ത് ബരുവാ് എന്ത് ആള്‌ഗ കാത്തിര്‌ന്താര്. അദ്‌ണാലെ ഓഗന്നാന്‌ത്തേഗൊ ക്‌റ്‌സ്‌ത്ത് എന്ത് എല്ലാര്‌മ് മനേസ്സിലി ണെനേത്ത് കൊണ്ടിര്‌ന്താര്. 16അക്കുളെ ഓഗന്നാ് അവാര്‌ക്ക് ഇച്ചെ സൊന്നാ്: <<ണാന് ണിമാണ തണ്ണിക്കെ മുളുഗ്‌സ്‌റെ. ആന എനാണ ബ്‌ഡ അദിഗാരുള്ളവാ് ബരുവാ്. അയാള് ഇക്കിര്‌ക്ക സെര്‌പ്പ് കണ്ണിന ഉക്ക്യ ഗൂഡി എനാക്ക് തഗ്‌ദില്ലെ. അയാള് ണിമാണ സാമിണിഗാലിലിമ് തീലിമ് മുളുഗ്‌സ്‌വാ്. 17അന്ന കളാത്തില്യ അന്നണ തൂറ്റി പാളെന ബേ്റേമ് മണിന ബേ്റേമ് ആക്ക്‌റ ബീസ്‌ഗൂഡു അയാള്‌ദ് കയ്യിലിര്‌ക്ക്‌ദ്. അയാള് അന്നണ ബല്ലാക്കട്ടി ബെക്കുവാ് പാളെന കെ്ഡാത്ത തീക്കിക്കി സുട്ടെക്കാമ് സെയ്‌വാ്.>> 18ഇദേപാസെ ഓഗന്നാ് അവാര് സെയ്‌ര തെറ്റ്‌കുറ്റഗണ തള്ള്യ ബേ്ണ്ടി റുജകുത്തി കൊഡുത്ത്‌കൊണ്ട് ണല്ല സേദിന സൊന്നാ്.
19ആന തലെവനാന എരോദാ്, തന്ന് അണ്ണാ് പീലിപ്പോസ്‌ദ് പെ്ണ്ട് എരോദിന എ്ഡ്‌ത്ത് ബെത്താദ്‌ണാലേമ് ബേ്റെ പല കെ്ട്ട കാര്യഗ സെയ്‌ദാദ്‌ണാലേമ് അയാള്‌ണ ഓഗന്നാ് സണ്ടെ കൊഡുത്താ്. 20അക്കുളെ എരോദാ് ഓഗന്നാന പ്‌ഡിത്ത് ജെയില്‌ക്കെ അഡേത്താ്. അച്ചെ താന് സെയ്‌ദ കെ്ട്ട കാര്യഗാക്ക് സേത്തി ഈ ഒരു കാര്യ ഗൂഡി സെയ്‌ദാ്.
ഏസുദ് തണ്ണി മുളുക്ക
21ഓഗന്നാ് ആള്‌ഗണെല്ല തണ്ണിക്കെ മുളുഗിസി കൊണ്ടിര്‌ക്കാട്ടി, ഏസുണാമ് അയാള് തണ്ണിക്കെ മുളുഗിസിനാ്. അദ്‌ക്ക് പ്‌റ പരേസ്‌ഗാട്ടി മേലോഗ തുറാന്ത്‌ദ്. 22സാമിണിഗാല് സോറെ പക്കിന പാസെ ഏസുക്കെ ഇ്റാങ്കി ബന്ത്‌ദ്. <<ണീത്തെ എന്ന് മഗാ്. ണാന് ണിനാണ സീവാ് ബ്‌ഡ്‌റെ. ണിന്നാലെ എന്ന് മനേസ്സ് തെ്ളിന്ത്‌ദ്>> എന്ത് മേലോഗാത്തിലിര്‌ന്ത് ഒരു ജദ്ദാമ് കേ്ട്ട്‌ദ്.
ഏസുദ് പാട്ടല
23ഏസു തന്ന്‌ദ് ബേലെ സെയ്യ പ്‌ഡിക്കാട്ടി അവാന്‌ക്ക് ഒരു മുപ്പദ് ബയ്യിസെന്താലിര്‌ക്കു. ആന ആള്‌ഗെല്ല ണെനേത്താദ് ഇവാ് ഓസേപ്‌ദ് മഗാ് എന്ത്‌ത്തെ.
ഓസേപ് ഏലിദ് മഗാ്. 24ഏലി മാത്താന്‌ദ് മഗാ്.
മാത്താ് ലേവിദ് മഗാ്. ലേവി മെലുക്കാന്‌ദ് മഗാ്.
മെലുക്കാ് അന്നായിദ് മഗാ്. അന്നായി ഓസേപ്‌ദ് മഗാ്.
25ഓസേപ് മത്തത്തോസ്‌ദ് മഗാ്. മത്തത്തോസ് ആമോസ്‌ദ് മഗാ്.
ആമോസ് ണാഗൂമ്‌ദ് മഗാ്. ണാഗൂമ് എസ്‌ലാന്‌ദ് മഗാ്.
എസ്‌ലാ് ണാഗ്ഗായിദ് മഗാ്. 26ണാഗ്ഗായി മയ്യാന്‌ദ് മഗാ്.
മയ്യാ് മത്തത്തോസ്‌ദ് മഗാ്. മത്തത്തോസ് സെമായിദ് മഗാ്.
സെമായി ജോസേക്ക്‌ദ് മഗാ്. ജോസേക്ക് ജോദേദ് മഗാ്.
27ജോദെ ജോനാദ് മഗാ്. ജോനാ് രേസാന്‌ദ് മഗാ്.
രേസാ് സെരുവാവേല്‌ദ് മഗാ്. സെരുവാവേല് സെയില്‌തേല്‌ദ് മഗാ്.
സെയില്‌തേല് ണേരാന്‌ദ് മഗാ്. 28ണേരാ് മെലുക്കാന്‌ദ് മഗാ്.
മെലുക്കാ് അദ്ദിദ് മഗാ്. അദ്ദി കോസാമ്‌ദ് മഗാ്.
കോസാമ് എല്‌മാദാമ്‌ദ് മഗാ്. എല്‌മാദാമ് ഏര്‌ദ് മഗാ്.
29ഏര് ഓസ്സുദ് മഗാ്. ഓസ്സു ഏലീസാര്‌ദ് മഗാ്.
ഏലീസാര് ഓരിമ്‌ദ് മഗാ്. ഓരിമ് മാത്താന്‌ദ് മഗാ്.
മാത്താ് ലേവിദ് മഗാ്. 30ലേവി സിമയോന്‌ദ് മഗാ്.
സിമയോന് ജൂദാന്‌ദ് മഗാ്. ജൂദാ് ഓസേപ്‌ദ് മഗാ്.
ഓസേപ് ജോനാമ്‌ദ് മഗാ്. ജോനാമ് എല്യാക്കീമ്‌ദ് മഗാ്.
31എല്യാക്കീമ് മെല്ല്യാവുദ് മഗാ്. മെല്ല്യാവു മെന്നാദ് മഗാ്.
മെന്നാ് മത്തദായിദ് മഗാ്. മത്തദായി ണാദാന്‌ദ് മഗാ്.
ണാദാ് ദാവീദ് മഗാ്. 32ദാവീദ് ഇസ്സായിദ് മഗാ്.
ഇസ്സായി ഓവേദ്‌ദ് മഗാ്. ഓവേദ് ബോവാസ്‌ദ് മഗാ്.
ബോവാസ് സല്‌മോന്‌ദ് മഗാ്. സല്‌മോന് ണാഗസോന്‌ദ് മഗാ്.
33ണാഗസോന് അമീനദാവുദ് മഗാ്. അമീനദാവു അഡ്‌മിദ് മഗാ്.
അഡ്‌മി ആരാമ്‌ദ് മഗാ്. ആരാമ് ഗെസ്‌റാന്‌ദ് മഗാ്.
ഗെസ്‌റാ് പാരേസ്‌ദ് മഗാ്. പാരേസ് എഗുദാന്‌ദ് മഗാ്.
34എഗുദാ് ആക്കോവുദ് മഗാ്. ആക്കോവു ഇസാക്ക്‌ദ് മഗാ്.
ഇസാക്ക് അവുറഗാമ്‌ദ് മഗാ്. അവുറഗാമ് തേരഗ്‌ദ് മഗാ്.
തേരഗ് ണാഗോര്‌ദ് മഗാ്. 35ണാഗോര് സെരൂഗ്‌ദ് മഗാ്.
സെരൂഗ് രെഗുദ് മഗാ്. രെഗു പാലേഗ്‌ദ് മഗാ്.
പാലേഗ് ഏവേര്‌ദ് മഗാ്. ഏവേര് സലാമ്‌ദ് മഗാ്.
36സലാമ് കയിനാന്‌ദ് മഗാ്. കയിനാ് അറ്‌പാസാദ്‌ദ് മഗാ്.
അറ്‌പാസാദ് സേമ്‌ദ് മഗാ്. സേമ് ണോഗേദ് മഗാ്.
ണോഗെ ലാമേക്ക്‌ദ് മഗാ്. 37ലാമേക്ക് മെദുസലേദ് മഗാ്.
മെദുസലെ ആനോക്ക്‌ദ് മഗാ്. ആനോക്ക് ആരേദ്‌ദ് മഗാ്.
ആരേദ് മഗലേല്‌ദ് മഗാ്. മഗലേല് കയിനാന്‌ദ് മഗാ്.
38കയിനാ് ഏനോസ്‌ദ് മഗാ്. ഏനോസ് സേത്ത്‌ദ് മഗാ്.
സേത്ത് ആദാമ്‌ദ് മഗാ്. ആദാമ് സാമിദ് മഗാ്.
Currently Selected:
ലൂക്കോസ് 3: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
