ലൂക്കോസ് 4
4
ഏസുക്ക് ബന്ത സോദണെ
1ഏസുണ തണ്ണിക്ക് മുളുഗിസിന പ്‌റ സാമിണിഗാല് ണഡാത്ത്‌റവാനായി അവാ് ഓറ്‌ദ്ദാ് ബാനിലിര്‌ന്ത് പോനാ്. അച്ചെ അവാന സാമിണിഗാല് ബെ്ട്ടെകാഡ്‌ക്കെ കൂട്ടി പോറ്റു. 2അദിലി ണാപ്പദ് ണാള് ഏസുണ സെയിത്ത്യാ് സോദണെ സെയ്‌ദാ്. അയ്യി ണാപ്പദ് ണാള്‌മ് ഏസു ഒന്റുമ് തിന്നാഗെ ഇല്ലെ. അച്ചെ ണാപ്പദ് ണാള് കളിന്ത പ്‌റ ഏസുക്ക് പജി പ്‌ഡിത്ത്‌ദ്.
3അക്കുളെ സെയിത്ത്യാ് ഏസുക്കെ സൊന്നാ്: <<ണേര്‌മായിമ് ണീ സാമിദ് മഗാ് ആയിര്‌ന്താക്കി ഈ കല്ല്‌ണ അഡെ ആയ സൊല്ലു.>>
4അദ്‌ക്ക് ഏസു: << <മന്‌സാ് ഉജുറു പെ്ളേസ്‌റാദ് അഡേന താനെ തിന്തല്ല>#മറ്‌ദെ സൊല്ലുറ സട്ട 8:3 എന്ത് സാമി ബുക്കിലി എ്ള്‌ദിര്‌ക്ക്‌ദ്>> എന്ത് സൊന്നാ്.
5അദ്‌ക്ക് പ്‌റ സെയിത്ത്യാ് ഏസുണ ഒരു ഉജാന്ത പട്ട്‌ക്കെ കൂട്ടി പോയി ഉലഗാത്തില്യ മുച്ചുഡ ണാഡ്‌ഗണാമ് ഒരു സെറ്റെ ണേര കൊണ്ട് കാട്ടി എ്ഡ്‌ത്തെക്കിനാ്. 6പ്‌റ സെയിത്ത്യാ് ഏസുക്ക്: <<ഈ മുച്ചുഡ ണാഡ്‌ഗാദ് മദ്‌പ്പ്‌ണാമ് അദ്‌ണ ആള്‌റാദ്‌ക്കുള്ള എല്ല അദിഗാരണാമ് ണാന് ണിനാക്ക് തരെ. എന്ത്‌ക്കെന്റ ഇദ്‌ദ് അദിഗാര ഇപ്പ് എന്ന് കയ്യിലിര്‌ക്ക്‌ദ്. എനാക്ക് പിര്യ ഇര്‌ക്കവാന്‌ക്ക് ഇദ്‌ഗണ മുച്ചുഡ ണാന് കൊഡുക്കുവെ. 7അദ്‌ണാലെ ണീ എനാണ കുമ്മുഡ്‌റദാനാക്കി ഈ അദിഗാരണ മുച്ചുഡ ണിനാക്ക് കെ്ഡേസില>> എന്ത് സെയിത്ത്യാ് സൊന്നാ്.
8അദ്‌ക്ക് ഏസു: << <ണിന്ന് സാമി ആന ആണ്ടവാന കുമ്മുഡികൊണ്ട്‌മ് അയ്യി സാമിക്ക് പ്‌ഡിക്ക കാര്യഗണമാട്ട് സെയ്‌ദ് കൊണ്ട്‌മ് ണഡാക്കുഡൊ>#മറ്‌ദെ സൊല്ലുറ സട്ട 6:13 എന്ത് എ്ള്‌ദിര്‌ക്ക്‌ദല്ല>> എന്ത് സൊന്നാ്.
9അദ്‌ക്ക് പ്‌റ സെയിത്ത്യാ് ഏസുണ എര്‌സലേമ്‌ക്കെ കൂട്ടി പോയി, സാമികൂരേദ് ഒരേപെ്ട്ട് മ്‌ഗാള്‌ക്കുദ്ദാക്ക് ണല്ല ഉജാന്ത പട്ട്‌ക്ക് ണില്ലിസിര്‌ന്ത്: <<ണീ സാമിദ് മഗാ് ആനക്കന ഇദിലിര്‌ന്ത് അഡി ഗുദി 10എന്ത്‌ക്കെന്റ,
<ണിനാണ സൊക്കാന പാദ്‌ഗാപ്പോഡെ ബെക്ക്യ
സാമി തന്ന് ദൂദലാക്കെ സൊല്ലുവാ്.
11അവാര് ണിന്ന് കാല് കല്ല്‌ക്കെ തട്ടാദെ ഇര്‌ക്ക്യ ബേ്ണ്ടി
ണിനാണ കയ്യിക്കെ താങ്കി എ്ഡ്‌ക്കുവാര്>#സാമി പാട്ട് ബുക്ക് 91:11,12
എന്ത് എ്ള്‌ദിര്‌ക്ക്‌ദല്ല>> എന്ത് സൊല്ലിറ്റ്.
12ആന ഏസു: << <ണിന്ന് സാമി ആന ആണ്ടവാന സോദണെ സെയ്യ ബേ്ഡ എന്ത്‌മ്>#മറ്‌ദെ സൊല്ലുറ സട്ട 6:16 എ്ള്‌ദിര്‌ക്ക്‌ദല്ല>> എന്ത് സൊന്നാ്.
13അച്ചെ സെയ്യ മുഡിര എല്ല ദിന്‌സ് സോദണെഗണാമ് സെയിത്ത്യാ് സെയ്‌ദ് മുഡിത്ത പ്‌റ സോദണെ സെയ്‌രാദ്‌ക്കുള്ള ണല്ലൊരു തഞ്ച കെ്ഡേക്കമാട്ട് ഏസു പട്ട്‌ക്ക് അണ്ടാദെ ഇര്‌ന്ത്‌ദ്.
ഏസു ഗെലീലേലി തന്ന് ബേലെന സെയ്യ പ്‌ഡിക്കാ്
14സാമിണിഗാല് ണഡാത്ത്‌റവാനായി ഏസു ഗെലീലെ ണാഡ്‌ക്കെ തിലിമ്പി പോനാ്. ഗെലീലെ ണാഡില്യ എല്ല എ്ഡേക്ക്‌റാഗ ഇര്‌ക്ക ആള്‌ഗാമ് ഏസുണ പറ്റി ആങ്കീങ്ക് സൊല്ല്യ പ്‌ഡിത്താര്. 15ഏസു എഗുദാര് പരേസ്‌റ കൂരെക്ക്‌റാഗ പോയി പഡിസ്യ പ്‌ഡിത്താ്. എല്ലാര്‌മ് അവാന പെര്‌മെപട്ടാര്.
ണസറത്ത്‌ക്കാറാര് ഏസുണ തള്ള്‌റാര്
16അച്ചെ ഏസു താന് ബളാന്ത് ബെല്ല്യാദാന ണസറത്ത്‌ക്കെ പോയി, താന് എപ്പ്‌മ് സെയ്‌ര പാസെ ഒയിവു ണാള് എഗുദാര് പരേസ്‌റ കൂരേക്കെ പോനാ്. അവാ് സാമി സൊല്ലുസുലാക്ക പഡിക്ക്യ എ്ന്ത് ണിന്റാ്. 17അക്കുളെ എസയ്യാ് സാമിദാസ്‌ദ് ബുക്ക്‌ണ അവാന്‌ക്കെ കൊഡുത്താര്. അദ്‌ണ തുറാന്ത് ണോഡുഗാട്ടി, അദിലി ഇച്ചെ എ്ള്‌ദിര്‌ക്കാദ്‌ണ കണ്ടാ്:
18<<ആണ്ടവാന്‌ദ് ണിഗാല് എന്നോഡെ ഇര്‌ക്ക്‌ദ്.
അദ്‌ണാലെ ഏ്ളെഗാക്ക് ണല്ല സേദിന സൊല്ല്യ
ആണ്ടവാ് എനാണ എ്ഡ്‌ത്ത് ബെത്തിര്‌ക്കാ്.
പ്‌ഡിത്ത് ബെത്തിര്‌ക്കവാര്‌ണ ബ്‌ഡ്‌സ്‌റ സേദിന സൊല്ല്യാമ്,
കുറുഡാര്‌ക്ക് പാര്‌വെ കൊഡുക്ക്യാമ്,
കൊഡിമെപഡ്‌റവാര്‌ണ ബ്‌ഡ്‌സി ബ്‌ഡ്യാമ്,
19ആണ്ടവാ് തന്ന് ആള്‌ഗണ കാപാറ്റ്‌റാദ്‌ക്കുള്ള ണേര ബന്തിര്‌ക്ക്‌ദ് എന്ത് സൊല്ല്യ ബേ്ണ്ടിമ്
ആണ്ടവാ് എനാണ സൊല്ലിബ്‌ട്ടിര്‌ക്കാ്.>>#എസയ്യാ് 61:1,2
20പ്‌റ അയ്യി ബുക്ക്‌ഗണ അഡേത്ത് അദ്‌ണ എ്ഡ്‌ത്ത് ബെക്കവാന്‌ക്കെ കൊഡുത്ത് അദ്‌ക്കെ താനെ കുക്കാന്താ്. അദിലിര്‌ന്ത ആള്‌ഗ മുച്ചുഡ അയാള്‌ണ താനെ സൊക്കാന ണോഡിര്‌ന്താര്. 21അച്ചെ ഏസു അവാര്‌ക്കെ ഇച്ചെ സൊല്ല്യ പ്‌ഡിത്താ്: <<ണിമ്മ ഈ സൊല്ലുസുലാക്ക കേ്ട്ട്‌കൊണ്ടിര്‌ക്കാട്ടി താനെ സാമി ബുക്കിലി ഈ എ്ള്‌ദിര്‌ക്കാദ് ണഡാന്ത്‌കൊണ്ടിര്‌ക്ക്‌ദ്.>>
22അദിലിര്‌ന്തവാര് ഒട്ടുക്ക് ഏസുണ പെര്‌മെപഡ്‌സി കൊണ്ട്, അയാള് സൊന്ന അരിമെ ആന ണായണ കേ്ട്ട് അദിസ്യപട്ട്: <<ഇവാ് ഓസേപ്‌ദ് മഗാ്ത്തേഗൊ?>> എന്ത് സൊന്നാര്.
23ഏസു അവാര്‌ക്കെ: << <ബയ്യിദ്യ, ണീ ണിനാണ താനെ തെ്ള്‌സ്> എന്ത് സൊല്ലുറ പള്യ സൊല്ലുണാമ് കവറ്‌ണഗൂമിലി ണീ സെയ്‌ദെ എന്ത് എമ്മ കേ്ട്ട കാര്യഗണ ണിന്ന് സൊന്ത ണാഡിലിമ് സെയ്‌ഡൊ എന്ത്‌മ് ണിമ്മ കണ്ടിപ്പായി സൊല്ലുവേര്>> എന്ത് സൊന്നാ്.
24ഏസു പിന്നേമ് അവാര്‌ക്ക് ഇച്ചെ സൊന്നാ്: <<ഒരു സാമിദാസ്‌ക്ക് സൊന്ത ഊരിലി മദ്‌പ്പ് കെ്ഡേക്കമാട്ട എന്ത് ണേര്‌മായിമ് ണാന് ണിമാക്കെ സൊല്ലുറെ. 25ഒരു സത്ത്യണ ണാന് ണിമാക്കെ സൊല്ലുറെ, ഏല്യാവുദ് കാലാത്തിലി മൂണരെ ബര്‌സ മാട്ട് മഗെ അഡിക്കാദെ ഇര്‌ക്കാട്ടി ഇസ്‌റേല് ണാഡ് മുച്ചുഡ കഡാന്ത പഞ്ച ബന്ത്‌ദ്. അയ്യി ഗള്യേലി മൊത്തന മ്‌ണ്ടേസിഗാമ് അദിലിര്‌ന്താര്. 26ആന ഇസ്‌റേല് ണാഡില്യ മ്‌ണ്ടേസ്യാര് പട്ട്‌ക്കെ ഏല്യാവുണ സൊല്ലിബ്‌ഡാദെ സീദോനില്യ സാരപത്ത് എങ്ക പട്ടണാത്തില്യ എഗുദാര് ജാദി അല്ലാത്ത ഒരു മ്‌ണ്ടേസി പട്ട്‌ക്ക്‌ത്തെ സൊല്ലിബ്‌ട്ടാദ്. 27ഏലിസ സാമിദാസ്‌ദ് കാലാത്തിലിമ് ഇസ്‌റേലിലി എത്തിന്യൊ കുസ്‌ട്ട ണോയിക്കാറാര് ഇര്‌ന്താര്. ആന എഗുദാര് ജാദി അല്ലാത്ത സ്‌റ്യക്കാറനാന ണയ്യിമാന്‌ദ് ണോയിത്തെ തെ്ളിന്താദ്.>>
28ഇദ്‌ണ കേ്ക്കാട്ടി എഗുദാര് പരേസ്‌റ കൂരേലിര്‌ന്തവാര്‌ക്ക് റമ്പ മൊനെ ബന്ത്‌ദ്. 29അവാര് ഗുബ്‌റ്‌ക്കാന എ്ന്താദ്‌മ് ഏസുണ പ്‌ഡിത്ത് ബലിത്തെ്ഡ്‌ത്ത് കൊണ്ട് പട്ടണാക്ക് ബെ്ള്യെ എ്ഡ്‌ത്ത് ബന്താര്. പ്‌റ അയ്യി പട്ടണ ഉണ്ടാക്കിര്‌ക്ക മലേദ് ബക്ക്‌ക്ക് അവാന ഉന്തി എ്ഡ്‌ത്ത് പോയി അഡി ഉന്തി ബീ്ത്ത്യ ണോഡിനാര്. 30ആന അവാ് അവാര്‌ദ് എ്ഡെ മേലെ താനെ കഡാന്ത് എമ്മാട്ടൊ ദൂര പോനാ്.
ഏസു കെ്ട്ടജാദി തട്ടിര്‌ക്കവാന തെ്ള്‌സ്‌റാ്
31പ്‌റ ഏസു ഗെലീലെ ണാഡിലിര്‌ക്ക ബേ്റെ ഒരു പട്ടണ ആന കവറ്‌ണഗൂമ് പട്ടണാക്കെ പോയി, ഒയിവു ണാള് ആള്‌ഗാക്ക് സാമി സൊല്ലുസുലാക്കണ പഡിസിനാ്. 32അവാര് അവാ് സൊന്ന ബുദ്ദിണായണ കേ്ട്ട് ബായി പൊളിത്തെക്കിനാര്. എന്ത്‌ക്കെന്റ അവാ് അദിഗാരത്തോഡെ ആയിര്‌ന്ത്‌ദ് പഡിസിനാദ്.
33എഗുദാര് പരേസ്‌റ കൂരേലി കെ്ട്ടജാദി തട്ടിര്‌ക്ക ഒരുത്താ് ഇര്‌ന്താ്. അവാ് ബെല്ല്യാദ്‌ക്ക് അഗാറികൊണ്ട് ഇച്ചെ സൊന്നാ്: 34<<അവ്വൊ, ണസറത്ത് ഊര്‌ക്കാറാ് ഏസുവെ, എമ്മോഡെ ണിനാക്ക് എന്ത കാര്യ? ണീ എമാണ ഇല്ലാദാക്ക്യ ബന്തിര്‌ക്കേന? ണീ സാമി സൊല്ലിബ്‌ട്ട പച്ചെപാലഗാ്ത്തെ എന്ത് എമാക്ക് തെര്യു.>>
35ഏസു അയ്യി കെ്ട്ടജാദിന കെഞ്ചി കൊണ്ട്: <<ണീ മ്‌ണ്ടാദെ! അവാന ബ്‌ട്ട് ബെ്ള്യെ കഡ!>> എന്ത് സൊന്നാ്. അയ്യി കെ്ട്ടജാദി അവാന അദിലിര്‌ന്തവാര്‌ദ് മുന്തുക്ക് ഉന്തി ബീ്ത്തി അവാന ഒന്റുമ് സെയ്യ മുഡ്യാദെ അവാന ബ്‌ട്ട് പോറ്റു.
36അക്കുളെ അദിലിര്‌ന്തവാര് അദിസ്യപട്ട്: <<അവ്വൊ! എപ്പോറ് പട്ട ണായ? തട്ടിര്‌ക്ക കെ്ട്ടജാദിഗള്‌ക്കെല്ല അദിഗാരത്തോഡേമ് ണല്ല പവുറോഡേമ് ഇയാള് കല്‌പനെ കൊഡുക്കാ്. അദ്‌ഗ അദേപഡി സെയ്യാമ് സെയ്യ്‌ദ്>> എന്ത് അവാര് തമ്മ തമ്മ സൊന്നാര്. 37അച്ചെ ഏസുണ പറ്റ്യുള്ള സേദി സുറ്റുമുറ്റിര്‌ക്ക ണാഡ് പക്കന പാസിറ്റ്.
ഏസു എത്തിന്യൊ ണോയിക്കാറാര്‌ണ തെ്ള്‌സ്‌റാ്
38ഏസു എഗുദാര് പരേസ്‌റ കൂരേന ബ്‌ട്ട് സീമോന്‌ദ് കൂരേക്കെ പോനാ്. അദിലി സീമോന്‌ദ് മാമ്യച്ചി പനി പ്‌ഡിത്ത് കെ്ഡെമേലായിര്‌ന്താദ്‌ണാലെ, അദിലിര്‌ന്തവാര് ഏസുക്കെ: <<അവാണ സെറ്റെ തെ്ള്‌സുഡോമെ>> എന്ത് സൊന്നാര്. 39ഏസു അവാള്‌ദ് പട്ട്‌ക്കെ പോയി ണോഡി, <<പനി ബ്‌ട്ട് പോ>> എന്ത് സൊന്നാ്. അക്കുളെ പനി ബ്‌ട്ട്‌ദ്. അപ്പ്‌താനെ അവ എ്ന്ത് പോയി അവാര്‌ക്ക് അട്ട്‌സുട്ട് കൊഡുത്ത.
40ണേര ബീ്റ ഗള്യേലി പല ദിന്‌സ് ണോയി ഉള്ള എത്തിന്യൊ ആള്‌ഗണ ഏസു പട്ട്‌ക്ക് ആള്‌ഗ എ്ഡ്‌ത്ത് ബന്താര്. ഏസു ഒരൊരു ആള്‌ക്ക്‌മ് കയ്യി ബെത്ത് അവാര്‌ണ തെ്ള്‌സി ബ്‌ട്ടാ്. 41അദല്ലാദെ താനെ പഗ്‌ദി ആള്‌ഗാദിലിര്‌ന്ത് കെ്ട്ടജാദിഗ: <<ണീ സാമിദ് മഗാ്ത്തെ>> എന്ത് സൊല്ലി അഗാറിഗ്‌ഡ്‌ഗി കൊണ്ട് അവാര്‌ണ ബ്‌ട്ട് പോറ്റു. ആന ഏസു അയ്യി ജാദിഗണ മ്‌ണ്ടാദി എന്ത് കല്‌പനെ കൊഡുത്താ്. എന്ത്‌ക്കെന്റ ആള്‌ഗണ ദെങ്ക്‌സ്യ ബേ്ണ്ടി സാമി സൊല്ലിബ്‌ട്ടവാ്ത്തെ ഏസു എന്ത് അദ്‌ഗാക്ക് തെരിന്തിര്‌ന്ത്‌ദ്.
42ഏസു മറ് ണാള് ബെ്ഡ്യാകാലാത്തിലി താനെ ഒരു ഒട്ടിപ്പാസുള്ള എ്ഡേക്കെ പോനാ്. ആള്‌ഗ അവാന പരാന്ത് അവാ് ഇര്‌ക്ക പട്ട്‌ക്ക് പോനാര്. തമാണ ബ്‌ട്ട് പോഗാദിര്‌ക്ക്യ അവാന അദിലിതാനെ ബെക്ക്യ അവാര് ഓരാഡിനാര്. 43ആന ഏസു അവാര്‌ക്കെ: <<സാമി ആള്‌റാദ്‌ണ പറ്റ്യുള്ള ണല്ല സേദിന ബേ്റെ പട്ടണാക്ക്‌റാഗാമ് ണാന് സൊല്ലുഡൊ. ഇദ്‌ക്ക് ബേ്ണ്ട്യല്ല സാമി എനാണ സൊല്ലിബ്‌ട്ടിര്‌ക്കാദ്>> എന്ത് സൊന്നാ്. 44അച്ചെ എഗുദ ണാഡ്‌ക്ക് പട്ട എല്ല എ്ഡേലിര്‌ക്ക എഗുദാര് പരേസ്‌റ കൂരെക്ക്‌റാഗ ണല്ല ബുദ്ദിണായഗ സൊല്ലികൊണ്ട്‌മ് ണഡാന്താ്.
Currently Selected:
ലൂക്കോസ് 4: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
