മറ്‌ക്കോസ് 12
12
മുന്തിരി ദോട്ട കദെ
1അച്ചെ ഏസു അവാര്‌ക്ക് കദെ ദിന്‌സിലി സൊല്ലികൊണ്ട് പഡിസ്യ പ്‌ഡിത്താ്: <<ഒരുത്താ് ഒരു മുന്തിരി ദോട്ട ഉണ്ടാക്കി സുറ്റുമ് ബേലി കെ്ട്ടി മുന്തിരിന മെ്ട്ടി സാര എ്ഡ്‌ക്ക്യ അറേക്കെ ഒരു കുയ്യി ഉണ്ടാക്കിനാ്. പ്‌റ കാവപന്താമ് ബെത്താ്. അദ്‌ക്ക് പ്‌റ അയാള് മുന്തിരി ദോട്ടണ ഗുത്തഗെക്കാറാര്‌ക്ക് ഗുത്തഗേക്ക് കൊഡുത്ത് ബേ്റെ ണാഡ്‌ക്ക് പോനാ്. 2മുന്തിരി പഗ പറ്‌ക്ക ഗള്യെ ആഗാട്ട്യെല്ല മുന്തിരി ദോട്ടക്കാറാ് തനാക്കുള്ള പങ്ക്‌ണ ഏറ്റ് ബര്യ തന്ന്‌ദ് ഒരു ബേലെക്കാറാന ഗുത്തഗെക്കാറാര് പട്ട്‌ക്കെ സൊല്ലിബ്‌ട്ടാ്. 3ആന അവാര് അയാള്‌ണ പ്‌ഡിത്ത് അഡി എന്ത് അഡിത്ത് ബെ്റ്‌ങ്കയ്യോഡെ ബ്‌ട്ടാര്. 4അയാള് പിന്നേമ് ബേ്റൊരു ബേലെക്കാറാന ഗൂഡി സൊല്ലിബ്‌ട്ടാ്. അവാര് അവാന തലേന അഡിത്ത് ഗായ ആക്കി ണാണഗെ്ഡ്‌സി ബ്‌ട്ടാര്. 5പിന്നേമ് ഒരുത്താന ഗൂഡി സൊല്ലിബ്‌ട്ടാ്. അവാര് അവാന കൊന്റെക്കിനാര്. അച്ചെ എത്തിന്യൊ ബേലെക്കാറാര്‌ണ ബ്‌ട്ടാ്. അവാര്‌ദിലി പഗ്‌ദി ആള്‌ഗണ അഡിത്ത്‌മ് പഗ്‌ദി ആള്‌ഗണ കൊല്ലാമ് സെയ്‌ദാര്.
6ഇനി സൊല്ലിബ്‌ഡ്യ മിഞ്ചി ഇര്‌ക്കാദ് ഒരുത്താ്ത്തെ; അദ്‌മ് താന് റമ്പ സീവാ് ബ്‌ഡ്‌റ തന്ന് മഗാ്ത്തെ. <എന്ന് മഗാന അവാര് മദിക്കുവാര്> എന്ത് സൊല്ലി കഡേസിലി തന്ന് മഗാനാമ് അവാര് പട്ട്‌ക്കെ സൊല്ലിബ്‌ട്ടാ്.
7ആന ഗുത്തഗെക്കാറാര് അവാന കണ്ട് അവാര് തമ്മ തമ്മ പേസിനാര്. <ഇവാ്ത്തെ ഈ ദോട്ടാക്ക് ഉരിമെക്കാറാ്. അദ്‌ണാലെ ബായി ണമ്മ ഇവാന കൊന്റെക്കില. അപ്പ്‌ത്തെ ഈ ദോട്ട ണമാക്ക് കെ്ഡേക്കു.> 8അച്ചെ അവാര് അവാനാമ് പ്‌ഡിത്ത് കൊന്റെക്കി മുന്തിരി ദോട്ടാക്ക് അച്ചാരി എ്റിന്തെക്കിനാര്.
9അച്ചാനാക്കി മുന്തിരി ദോട്ടക്കാറാ് എന്ത സെയ്‌വാ്? അയാള് ബന്ത് ഗുത്തഗെക്കാറാര്‌ണ കൊന്റെക്കി അയ്യി ദോട്ടണ ബേ്റെ ആള്‌ഗാക്ക് കൊഡുക്കുവാ്. 10സാമി ബുക്കിലി ഇദ്‌ഗെല്ല ണിമ്മ പഡിത്തിര്‌ക്കേരല്ല?
<കൂരെ ബേലെക്കാറാര് മോസ എന്ത് എ്റിന്തെക്കിന അദേ കല്ല് താനെ
കൂരെ എ്ഡ്‌ക്കാട്ടി എല്ല കല്ല്‌ഗണ ബ്‌ഡ മുക്ക്യമാന കല്ല്#12:10 മുക്ക്യമാന കല്ല് ബേസ്‌മട്ടാദ് മൂലേല്യ കല്ല് എന്തൊ കാവഡിന പാസെ ഇര്‌ക്ക ബാസാക്ക് മേലെ ണഡ്‌ക്കെ ആയി ബെക്ക കല്ല് എന്തൊ ഇദ്‌ണ അര്‌ത്ത ആക്കില. ണമ്മ് ആള്‌ഗ കൂരെ എ്ഡ്‌ക്കാട്ടി പെ്ര്‌ങ്കാ് കമ്പ് കൂരേന ഒറേപ്പാക്കി ബെക്ക പാസെ എഗുദാര് കൂരെ എ്ഡ്‌ക്കാട്ടി ഈ കല്ല്‌ത്തെ അവാര്‌ദ് കൂരേന ഒറേപ്പാക്കി ബെക്കാദ്. ആറ്റ്.
11ഇദ് ആണ്ടവനാലെ ണഡാന്ത്‌ദ്.
അദ് ണമ്മ് കണ്ണ്‌ക്ക് അദിസ്യുള്ള കാര്യ ആയിര്‌ക്ക്‌ദ്.>#സാമി പാട്ട് ബുക്ക് 118:22,23 >>
12ഏസു സൊന്ന കദെ തമാണ പറ്റിത്തെ എന്ത് അവാര്‌ക്ക് തെരിന്ത്‌ദ്. അദ്‌ണാലെ അവാര് ഏസുണ പ്‌ഡിക്ക്യ ണോഡിനാര്. ആന അവാര് ആള്‌ഗണ അഞ്ചി അവാന ബ്‌ട്ട് തള്ളി പോനാര്.
എഗുദ തലെവല ഏസുണ സിക്ക്‌സ്യ ണോഡുറാര്
13അദ്‌ക്ക് പ്‌റ എഗുദ തലെവല ഏസു സൊല്ലുറ ണായാത്തിലി കുറ്റ കണ്ട്‌പ്‌ഡിക്ക്യ എരോദലാദിലി#12:13 എരോദലാദിലിഎരോദാ് അന്തിപാസ് എങ്ക റാജാവോഡ സേന്ത് റോമ ണാഡ് അദിഗാരിഗാദ് സട്ടഗണ കേ്ട്ട് ണഡാന്തിര്‌ന്ത ഒരു കൂട്ട എഗുദാര്‌ത്തെ എരോദല. ഇര്‌ന്ത്‌മ്, പരിസലാദിലി ഇര്‌ന്ത്‌മ് ലേസ ആള്‌ഗണ സൊല്ലിബ്‌ട്ടാര്. 14അവാര് ബന്ത് ഏസുണ കേ്ട്ടാര്: <<ഗുരുവെ, ണീ മന്‌സാര് എന്ത ണെനേക്കുവാര് എന്ത് ഗൂഡി അഞ്ചാദെ സത്ത്യണ തുറാന്ത് സൊല്ലുറവാ് എന്ത് എമാക്ക് തെര്യു. അദ്‌ണാലെ മന്‌സാര് എച്ചെ പെ്ളേത്ത് പോഡൊ എന്ത് സാമി സൊല്ലിര്‌ക്കാദ്‌ണ ഏവാനാമ് മൂഞ്ചിമുഗ ണോഡാദെ ണീ സൊല്ലുറെ. ആന എമ്മ ഒന്റു കേ്ക്കേര്. മോസെ ബെത്ത സാമി സട്ടപഡി റോമ ണാഡ് റാജാവുക്ക് ണ്‌ഗ്‌ദി കൊഡുക്കാദ് സെര്യൊ ഇല്ലെ തപ്പൊ? 15എമ്മ കൊഡുക്കുഡോഗൊ ഇല്ലെ ബേ്ഡാഗൊ.>>
ആന അവാര് ഇച്ചെ കേ്ട്ടാദ് തനാണ സിക്കിസ്യ എന്ത് ഏസുക്ക് തെരിന്ത്‌ദ്. അദ്‌ക്ക് ഏസു സൊന്നാ്: <<ണിമ്മ എനാണ സോദണെ സെയ്യ ണോഡുറാദ് എന്ത്‌ക്ക്? ഒരു ബെ്ള്ളി പണ എ്ഡ്‌ത്ത് ബായി ണാന് ഒന്റു ണോഡുറെ.>> 16അക്കുളെ അവാര് ഒരു ബെ്ള്ളി പണ എ്ഡ്‌ത്ത് കൊഡുത്താര്. <<ഈ പണാത്തിലിര്‌ക്ക മൂഞ്ചിമ് പേര്‌മ് ആര്‌ദ്?>> എന്ത് ഏസു കേ്ട്ടാ്.
അക്കുളെ അവാര്: <<റോമ ണാഡ് റാജാവുദ്>> എന്ത് സൊന്നാര്.
17<<അച്ചാനാക്കി റോമ ണാഡ് റാജാവുക്ക് കൊഡുക്കാദ്‌ണ റോമ ണാഡ് റാജാവുക്ക് കൊഡിരി. സാമിക്ക് കൊഡുക്കാദ്‌ണ സാമിക്ക് കൊഡിരി.>> എന്ത് ഏസു സൊന്നാ്.
അവാര് ഇദ്‌ണ കേ്ട്ട് എത്തറാഗൊ അദിസ്യപട്ടാര്.
സദൂക്യല ഏസുണ മാട്ട്യ ണോഡുറാര്
18സത്തവാര് ഉജുറേ്ഗമാട്ടാര് എന്ത് സൊല്ലുറ സദൂക്യല ഏസു പട്ട്‌ക്ക് പോയി ഇച്ചെ കേ്ട്ടാര്: 19<<ഗുരുവെ, ഒരുത്താ് പെ്ണ്ണ് സേന്ത് മക്കഗ ഇല്ലാദെ സത്താക്കി അവാന്‌ദ് അണ്ണതമ്പിലാദിലി ആരാറ്റ് സത്തവാന്‌ദ് പെ്ണ്ട്‌ണ എ്ഡ്‌ത്ത് അവാന്‌ദ് കാല്‌ക്ക് മക്ക പ്‌റാത്തുഡൊ എന്ത് മോസെ എ്ള്‌ദിര്‌ക്കാനല്ല. 20ഒരു പട്ടിലി ഏ്ള് അണ്ണതമ്പില ഇര്‌ന്താര്. അദിലി തലെകോഡില്യവാ് പെ്ണ്ണ് എ്ഡ്‌ത്ത് പ്‌ള്ളെഗ പ്‌റാക്കാദെ സത്ത്‌കൊണ്ട് പോനാ്. 21അയാള്‌ക്ക് അഡ്യസാരില്യവാന്‌മ് അയ്യി മ്‌ണ്ടേസിന എ്ഡ്‌ത്ത് പ്‌ള്ളെഗ ഇല്ലാദെ സത്ത്‌കൊണ്ട് പോനാ്. അദ്‌ക്ക് അഡ്യസാരില്യവാന്‌ക്ക്‌മ് അച്ചെത്തെ ആറ്റ്. 22അച്ചെ അണ്ണതമ്പില ഏ്ള് ആള്‌മ് അവാണ എ്ഡ്‌ത്ത് പ്‌ള്ളെഗ ഇല്ലാദെ സത്ത്‌കൊണ്ട് പോനാര്. കഡേസി അവാമ് സത്ത്‌കൊണ്ട് പോന. 23സത്തവാര് ഉജുറേ്ഗാട്ടി ഇവ ഈ ഏ്ള് ആളിലി ആര്‌ക്ക് പെ്ണ്ടാവ? ഏ്ള് ആള്‌ക്ക്‌മ് ഇവ പെ്ണ്ടായിര്‌ന്താളല്ല?>>
24ഏസു ഇച്ചെ അവാര്‌ക്കെ: <<സാമി ബുക്കിലി എ്ള്‌ദിര്‌ക്കാദ്‌ണാമ് സാമി എല്ലാദ്‌മ് സെയ്യ മുഡിരവാ് എന്ത് ണിമാക്ക് തെര്യാത്താദ്‌ണാലേമ് അല്ലഗ ഈ തപ്പ് ണിമാക്ക് ബന്തിര്‌ക്കാദ്? 25ആന സത്തവാര് ഉജുറെ്ന്ത്‌ഗാട്ടി ആള്‌ഗ പെ്ണ്ണ് എ്ഡ്‌ക്കാദ്‌മില്ലെ, പെ്ണ്ണ് കൊഡുക്കാദ്‌മില്ലെ. അവാര് മേലോഗാത്തില്യ ദൂദലണ പാസെത്തെ ആവാര്. 26കത്തികൊണ്ടിര്‌ക്ക മുള്ളുഗുമ്പിലി സാമി ബെ്ളിപട്ടാദ്‌ണ മോസെ എ്ള്‌ദിര്‌ക്കാ്. അദിലി സത്തവാര് ഉജുറെ്ന്ത്‌റാദ്‌ണ പറ്റി ണിമ്മ പഡിക്കാലേഗ? അദ് ഇച്ചെത്തെ: <ണാന് അവുറഗാമ്‌ദ്‌മ്, ഇസാക്ക്‌ദ്‌മ് ആക്കോവുദ്‌മ് സാമിത്തെ>#പയണ 3:6 എന്ത് സാമി മോസേക്കെ സൊന്നാ്. 27ഈ മൂണ് പാട്ടല സത്തിര്‌ന്താല്‌മ് സാമിക്ക് അവാര് സാഗാലെ. ആന സാമി സത്തവാര്‌ദ് സാമി അല്ല ഉജുറിര്‌ക്കവാര്‌ദ് സാമിത്തെ. ണേര്‌മായിമ് ണിമാക്ക് തപ്പ് ബന്ത്‌ദ്.>>
ബെല്ല്യ കല്‌പനെ
28ഏസുമ് സദൂക്യലാമ് ഇച്ചെ തറ്‌ക്കി കൊണ്ടിര്‌ക്കാട്ടി ബേദ ബാത്ത്യലാദി ഒരുത്താ് ഏസു പട്ട്‌ക്ക് ബന്താ്. അക്കുളെ സദൂക്യല കേ്ക്ക കേ്ള്‌വിക്ക് മൂട്ടുക്ക് മൂട്ടുക്ക് ബദ്‌ള് ഏസു സൊല്ലികൊഡുക്കാ് എന്ത് അയാള്‌ക്ക് തെരിന്ത്‌ദ്. അദ്‌ണാലെ അയാള് ഏസുണ ഇച്ചെ കേ്ട്ടാ്: <<സാമി സൊല്ലിര്‌ക്ക കല്‌പനേലി മുക്ക്യമാന കല്‌പനെ ഏദ്?>>
29അക്കുളെ ഏസു സൊന്നാ്: << <ഇസ്‌റേലെ കേ്ളിരി! സാമി ണമ്മ്‌ദ് ആണ്ടവാ്ത്തെ; ഈ സാമിത്തെ ഒരേ ഒരു ആണ്ടവാ്. ഈ സാമി അല്ലാദെ ബേ്റെ ഒരു സാമി ഇല്ലെ. 30എല്ലാദ്‌ണാമ് ബ്‌ഡ ണമ്മ് ആണ്ടവനാന സാമിന സീവാ് ബ്‌ഡുഡൊ. അദ് എച്ചെന്ത, ണമ്മ് മനേസ്സാറ സാമിന സീവാ് ബ്‌ഡുഡൊ. ണമ്മ് ഉജുറുക്കുജുറ സാമിന സീവാ് ബ്‌ഡുഡൊ. ണമ്മ് ണെനേവിലി എപ്പ്‌മ് സാമി ഇര്‌ക്കുഡൊ. ണമ്മ് മുജുവുണ മുച്ചുഡ സാമി ബേലേക്ക് കൊഡുക്കുഡൊ.>#മറ്‌ദെ സൊല്ലുറ സട്ട 6:4,5 ഇദ്‌ത്തെ മുക്ക്യമാന കല്‌പനെ. 31<ണിനാണ സീവാ് ബ്‌ഡ്‌റ പാസെതാനെ അഡ്‌ത്തവാര്‌ണാമ് സീവാ് ബ്‌ഡുഡൊ.>#ലേവ്യാര് 19:18 ഇദ്‌ത്തെ റണ്ടാവദ് കല്‌പനെ. ഈ റണ്ട് കല്‌പനേന ബ്‌ഡ ബേ്റെ ഒരു കല്‌പനെമില്ലെ.>>
32അയ്യി ബേദ ബാത്ത്യാ് ഏസുക്കെ ഇച്ചെ സൊന്നാ്: <<ഗുരുവെ, ണീ സൊന്നാദ് സെരിത്തെ; സാമി ഒരുത്താ്ത്തെ. ഈ സാമി അല്ലാദെ ബേ്റെ സാമില്ലെ. 33എല്ലാദ്‌ണ ബ്‌ഡ ണമ്മ് ആണ്ടവനാന സാമിന സീവാ് ബ്‌ഡുഡൊ. അദ് എച്ചെന്ത, ണമ്മ് മനേസ്സാറ സാമിന സീവാ് ബ്‌ഡുഡൊ. ണമ്മ് ണെനേവിലി എപ്പ്‌മ് സാമി ഇര്‌ക്കുഡൊ. ണമ്മ് മുജുവുണ മുച്ചുഡ സാമി ബേലേക്ക് കൊഡുക്കുഡൊ. ണിനാണ സീവാ് ബ്‌ഡ്‌റ പാസെതാനെ അഡ്‌ത്തവാര്‌ണാമ് സീവാ് ബ്‌ഡുഡൊ. ഈ റണ്ട് കല്‌പനേന കേ്ട്ട് ണഡാക്കാദ്‌ത്തെ ബേ്ണ്ട്‌ഗണ സുട്ടു ബൂദി ആക്ക്‌റാദ്‌ണാമ് ണേര്‌സെ പലി കൊഡുക്കാദ്‌ണാമ് ബ്‌ഡ മുക്ക്യമാനാദ്.>>
34ണല്ല ബുദ്ദ്യോഡെ അയാള് സൊന്ന ബദ്‌ള്‌ണ കേ്ട്ട് ഏസു അയാള്‌ക്കെ സൊന്നാ്: <<സാമി ആള്‌റാദ്‌ക്ക് പക്ക ണീ എജ്ജിര്‌ക്കെ.>> അദ്‌ക്ക് പ്‌റ ആര്‌മ് ഏസോഡെ എന്താറ്റ് കേ്ക്ക്യ അഞ്ചിനാര്.
ക്‌റ്‌സ്‌ത്ത്‌ണ പറ്റി കേ്ള്‌വി കേ്ക്കാര്
35സാമികൂരേക്ക് പോയി സാമി സൊല്ലുസുലാക്ക ഏസു സൊല്ലികൊഡുക്കാട്ടി ഇച്ചെ കേ്ട്ടാ്: <<ക്‌റ്‌സ്‌ത്ത് ദാവീദ് കാല്‌ക്ക് പട്ടവാ് എന്ത് ബേദ ബാത്ത്യല എച്ചെ സൊല്ലുവാര്? 36സാമിണിഗാല് സൊല്ലിസി ദാവീദ് താനെ ഇച്ചെ സൊല്ലിര്‌ക്കാ്,
<ആണ്ടവാ് എന്ന് ആണ്ടവാന്‌ക്കെ സൊന്നാ്,
<<ണാന് ണിന്ന് പോട്ടിക്കാറാര്‌ണ ണിന്ന് കാല്‌ക്കഡി ആക്ക്‌റമാട്ട്‌ക്ക്
ണീ എന്ന്‌ദൊപ്പ ഇര്‌ന്ത് ആളുഡൊ.>> >#സാമി പാട്ട് ബുക്ക് 110:1
37ദാവീദ് താനെ ക്‌റ്‌സ്‌ത്ത്‌ണ ആണ്ടവാ് എന്ത് ഒളേക്കദാനാക്കി പിന്നെ എച്ചെ ക്‌റ്‌സ്‌ത്ത് ദാവീദ് കാല്‌ക്ക് പട്ടവാനാവാ്?>>
ബേദ ബാത്ത്യലണ സൂസാരിക്കുഡൊ
എത്തിന്യൊ ആള്‌ഗ ഏസുദ് ബുദ്ദിണായണ പിര്യപിര്യാത്ത് കേ്ട്ടിര്‌ന്താര്.
38അവാര്‌ക്കെ ബുദ്ദിണായണ സൊല്ലികൊഡുക്കാട്ടി ഏസു ഇച്ചെ സൊന്നാ്: <<ബേദ ബാത്ത്യലണ ണിമ്മ സൂസാരിത്ത് ഇര്‌ക്കുഡൊ. അവാര് ണല്ല ണല്ല ജൊഗെ ഇക്കി ണഡാക്ക്യ ആസെപഡ്‌റാര്. സന്തേക്ക്‌റാഗ ആള്‌ഗ തമാണ മദിക്ക്യ ആസെപഡ്‌റാര്. 39എഗുദാര് പരേസ്‌റ കൂരെക്ക്‌റാഗ മുക്ക്യമാന എ്ഡേലി കുക്കാക്ക്യാമ് അവാര് ആസെപഡ്‌റാര്. ബിര്‌ന്ത് പട്ടിലി മുന്തുക്ക് കുക്കാക്ക്യാമ് അവാര് ആസെപഡ്‌റാര്. 40അവാര് മ്‌ണ്ടേസിഗാദ് മുദാല്‌മൂഡ്യഗണ ഊഗത്തോഡെ ഏമാത്തി എ്ഡ്‌ക്കാര്. അദ്‌ക്ക് പ്‌റ ണല്ലവാര് എന്ത് കാട്ട്യ ബേ്ണ്ടി എത്തറാഗൊ ഗള്യെ പരേസാമ് സെയ്‌രാര്. ബേ്റെ ആള്‌ഗണ ബ്‌ഡ ഇവാര്‌ഗാക്കെല്ല ണല്ല ദണ്ടണെ കെ്ഡേക്കു.>>
ഒരു മ്‌ണ്ടേസി കാണിക്കെ ബീ്ത്ത്‌റ
41ഏസു സാമികൂരേല്യ ഉണ്ട്യെ അര്‌ഗെ കുക്കാന്ത് ആള്‌ഗ കാണിക്കെ ബീ്ത്ത്‌റാദ്‌ണ ണോഡികൊണ്ടിര്‌ന്താ്. പണക്കാറാര്‌ഗ പല ആള്‌ഗാമ് മൊത്ത്‌മൊത്തന കാണിക്കെ ബീ്ത്തിനാര്. 42ആന ഒരു ഏ്ളെ ആയിര്‌ക്ക മ്‌ണ്ടേസി ബന്ത് ബെലെ കൊറേന്ത റണ്ട് ഒട്ടി പണണ ബീ്ത്തിന.
43അക്കുളെ ഏസു തന്ന് സൊല്ലുപഡി ണഡാക്കവാര്‌ണ ഒളേത്ത് ഇച്ചെ സൊന്നാ്: <<ണേര്‌മായിമ് ണാന് ണിമാക്കെ സൊല്ലുറെ, ഈ ഏ്ളെ ആയിര്‌ക്ക മ്‌ണ്ടേസി തന്നോഡെ ഇര്‌ന്ത റണ്ട് പണണ ഉണ്ട്യേക്ക് ബീ്ത്തിന. ആന എല്ലാര്‌ണ ബ്‌ഡ ഇവാത്തെ അദിഗ ബീ്ത്തിര്‌ക്കാദ്. 44ആള്‌ഗ ഒട്ടുക്ക് തമ്മ് സൊത്തിലിര്‌ന്ത്‌ത്തെ ബീ്ത്തിനാദ്. ആന ഈ ഏ്ളെ ആയിര്‌ക്ക മ്‌ണ്ടേസി താന് ഒന്റുമില്ലാത്തവ ആയിര്‌ന്ത് ഗൂഡി തനാക്ക് ഇര്‌ക്കാദ്‌ണ മുച്ചുഡ ബീ്ത്തിര്‌ക്ക. തനാക്ക് പെ്ളേത്ത് പോയ ഇര്‌ക്കാദ്‌ണ മുച്ചുഡ ബീ്ത്തിര്‌ക്ക.>>
Currently Selected:
മറ്‌ക്കോസ് 12: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
