മറ്‌ക്കോസ് 13
13
സാമികൂരെ ഇല്ലാദെ ആരാദ്‌ണ പറ്റി സൊല്ലുറാ്
1ഏസു സാമികൂരേന ബ്‌ട്ട് പോഗാട്ടി തന്ന് സൊല്ലുപഡി ണഡാക്കവാരിദിലി ഒരുത്താ് ഏസുക്കെ ഇച്ചെ സൊന്നാ്: <<ഗുരുവെ, ഈങ്ക് ണോഡുത്തെ; എത്തത്തറ കല്ല്‌ഗ! അയ്യി സാമികൂരേന എത്തറ അളാഗിലി കെ്ട്ടി ബെത്തിര്‌ക്കാര്.>>
2അക്കുളെ ഏസു അവാന്‌ക്കെ ഇച്ചെ സൊന്നാ്: <<ണീ മ്‌ഗ്‌ന്ത ദിന്‌സിലി കെ്ട്ടിര്‌ക്ക ഈ സാമികൂരേന കാണ്‌റാദില്ലേഗ? ഇദിലി കെ്ട്ടിര്‌ക്ക കല്ല്‌ഗ, കല്ല്‌ക്കുദ്ദാക്ക് ഒരു കല്ല് ബീസാക്ക് ഇര്‌ക്കാദെ ഇ്ഡിന്ത് പൊളിന്തെക്കു.>>
കജട്ടാമ് കൊഡിമേമ്
3അദ്‌ക്ക് പ്‌റ ഏസു ഒലിവ് മലേക്കെ ബന്ത് സാമികൂരേക്ക് ണേരെ കുക്കാന്തിര്‌ന്താ്. അക്കുളെ പത്ത്‌റോസ്, ആക്കോവു, ഓഗന്നാ്, അന്ത്‌റോസ് ഇവാര് പോയി ഏസുണ സൂഗാന കേ്ട്ടാര്: 4<<ണീ സൊന്ന ഈ കാര്യഗെല്ല എപ്പ് ണഡാക്കു എന്ത് എമാക്ക് സൊല്ലു? ഇദ്‌ഗെല്ല ണഡാന്ത് മുഡ്യ പോദ് എന്ത് കാട്ട്‌റ അഡ്യാള എന്തെല്ല എന്ത് എമാക്ക് സൊല്ലു.>>
5ഏസു അവാര്‌ക്കെ ഇച്ചെ സൊന്നാ്: <<ആര്‌മ് ണിമാണ ഏമാത്താദെ ഇര്‌ക്ക്യ ണിമ്മ സൊക്കാന സൂസാരിത്ത് കൊള്ളുഡൊ. 6<ണാന്‌ത്തെ ക്‌റ്‌സ്‌ത്ത്> എന്ത് സൊല്ലി എത്തിന്യൊ ആള്‌ഗ എന്ന് പേരിലി ബരുവാര്. അച്ചെ അവാര് എത്തിന്യൊ ആള്‌ഗണ ഏമാത്തുവാര്. 7ണിമ്മ ജുദ്ദഗണാമ്, ജുദ്ദ ണഡാക്ക സേദിഗണാമ് കേ്ക്കുവേര്. അദ്‌ഗാക്കെല്ല ണിമ്മ അഞ്ച ബേ്ഡ. അച്ചെല്ല ണഡാക്കുഡൊ. ആനാല്‌മ് അദ് എല്ലാദ്‌ക്ക്‌മ് കഡേസി എന്ത് ണിമ്മ ണെനേക്ക ബേ്ഡ. 8ഒരൊരു ജാദിഗ ആങ്കീങ്ക് ജുദ്ദ സെയ്‌വാര്. ഒരൊരു റാജ്യഗ ആങ്കീങ്ക് ജുദ്ദ സെയ്‌വാര്. ഒരൊരു എ്ഡേക്ക്‌റാഗ ബൂമിക്കുലുക്കഗാമ്, പഞ്ചാമ് ഉണ്ടാവു; ഇദ്‌ഗെല്ല പ്‌ള്ളെ ഉറുസ്‌ളാഗ്‌റ ബിജാണ പാസെത്തെ.
9ആന ണിമ്മ ണിമാണ താനെ സൂസാരിത്ത് ബെത്ത് കൊള്ളുഡൊ. അവാര് ണിമാണ പ്‌ഡിത്ത് എഗുദാര് ഗോഡ്‌ദിക്ക് എ്ഡ്‌ത്ത് പോവാര്. എഗുദാര് പരേസ്‌റ കൂരെക്ക്‌റാഗ ബെത്ത് ണിമാണ സാട്ടെബാറിലി അഡിക്കുവാര്. എന്ന് പേരിലി അവാര് ണിമാണ ണാഡ് തലെവല പട്ട്‌ക്ക്‌മ് റാജാവുഗാദ് പട്ട്‌ക്ക്‌മ് എ്ഡ്‌ത്ത് പോയി ണില്ല്‌സുവാര്. അക്കുളെ ണിമ്മ എന്ന് ണല്ല സേദിന അവാര്‌ക്കെ സൊല്ലുവേര്. 10ആന സാമി എല്ലാദ്‌ണാമ് ഇല്ലാദെ ആക്ക്‌റാദ്‌ക്ക് മുദ ഈ ണല്ല സേദി ഉലഗ മുച്ചുഡ സൊല്ലുവാര്. 11അവാര് ണിമാണ പ്‌ഡിത്ത് എ്ഡ്‌ത്ത് പോയി എഗുദാര് ഗോഡ്‌ദിക്ക് ണില്ല്‌സ്‌ഗാട്ടി അവാര്‌ക്കെ ണിമ്മ എന്ത സൊല്ലുഡൊ എന്ത് ണെനേത്ത് അര്‌ക്കപഡ ബേ്ഡ. അയ്യി ഗള്യേക്ക് ണിമ്മ് ബായിക്ക് ബരാദ്‌ണ സൊല്ലിരി. അച്ചെ സൊല്ലുറാദ് ണിമ്മ അല്ല, സാമിണിഗാല്‌ത്തെ.
12പെറ്റ്‌പ്‌റാപ്പ് തന്ന് പെറ്റ്‌പ്‌റാപ്പ്‌ണ താനേമ് അപ്പാ് തന്ന് മഗാനാമ് കൊല്ല്യ കൊഡുക്കുവാര്. മക്കമറിഗ അവ്വപ്പലോഡെ പോട്ടിക്ക് ണിന്റ് അവാര്‌ണ കൊല്ല്യ കൊഡുക്കുവാര്. 13ണിമ്മ എനാണ പറ്റി സൊല്ലുറാദ്‌ണാലെ ആള്‌ഗ മുച്ചുഡ ണിമാണ തൊറേന്ത് എക്കുവാര്. ആന കഡേസി മാട്ട്‌മ് ണമ്പിക്കേലി ഒറേത്ത് ണില്ല്‌റവാ് ദെങ്കുവാ്.>>
റമ്പ കെ്ട്ട കാര്യ
14<< <എല്ലാദ്‌ണാമ് അളിത്ത് തള്ള്‌റ റമ്പ കെ്ട്ട കാര്യ>#ദാനീയേല് 9:27; 11:31; 12:11 സുത്താപ്പ് ഇര്‌ക്ക എ്ഡേലി കാണ്യ പാങ്കില്ലെ. ആന ണിമ്മ അദ്‌ണ അദിലി കാണുവേര്. (പഡിക്കവാ് ഇദ്‌ദ് പൊറുള് എന്തായെന്റ് ണെപ്പ്‌കെ്ഡേസി കൊള്ളുഡൊ) അക്കുളെ എഗുദേലി ഇര്‌ക്കവാര് മലേക്ക്‌റാഗ ഓഡി പോഡൊ. 15കൂരെ മ്‌ഗാള്‌ക്കുദ്ദാക്ക് ഇര്‌ക്കവാ് എന്താറ്റൊന്റു എ്ഡ്‌ക്ക്യ അഡി ഇ്റാങ്ക്യാഗൊ കൂരെക്കുള്ളുക്ക് പുക്ക്യാഗൊ പാങ്കില്ലെ. 16ഗദ്ദേലി ബേലെ എ്ഡ്‌ക്കവാ് തന്ന് ണല്ല സീലെന എ്ഡ്‌ക്ക്യ കൂരേക്കെ തിലിമ്പി പോഗ ബേ്ഡ. 17അയ്യി കാലാത്തിലി ബേ്റ്‌ക്കാറാര്‌ക്ക്‌മ് പച്ചെ പ്‌ള്ളെക്കാറാര്‌ക്ക്‌മ് സെറ്റെ കജട്ട കജട്ടത്തെ. 18ഇദ്‌ഗെല്ല സളി ഗള്യേക്ക് ണഡാക്കാദിര്‌ക്ക്യ പരേസിരി. 19അയ്യി കാലാക്ക് ബര കജട്ട സാമി ബൂമിന ദ്‌ട്ടിസിനാദിലിര്‌ന്ത് ഇന്നാരമാട്ട്‌ക്ക്‌മ് ഇര്‌ക്ക കജട്ടഗണ ബ്‌ഡ കഡ്‌പ്പത്തെ. ഇദേപാസെ ഒരു കജട്ട ഇനി ബരാഗെമാട്ട. 20ആന ആണ്ടവാ് അയ്യി ണാള്‌ഗണ കമ്മി ആക്കാദെ ഇര്‌ന്ത ആര്‌ക്ക്‌മ് താങ്ക്യ മുഡ്യമാട്ട. എന്താല്‌മ് താന് തെരിന്തെ്ഡ്‌ത്തവാര്‌ണ ണെനേത്ത് അയ്യി ണാള്‌ഗണ കമ്മി ആക്കിര്‌ക്കാ്. 21അയ്യി ഗള്യേക്ക് ണിമാണ ആരാറ്റ് <അദാ അദിലിത്തെ ക്‌റ്‌സ്‌ത്ത്> എന്തൊ, <ണോഡ്, ഇദാ ഇദിലിത്തെ ക്‌റ്‌സ്‌ത്ത്> എന്തൊ സൊന്നാക്കി ണിമ്മ ണമ്പ ബേ്ഡ. 22പഗ്‌ദി ആള്‌ഗ തമ്മാത്തെ ക്‌റ്‌സ്‌ത്ത് എന്ത്‌മ് പഗ്‌ദി ആള്‌ഗ തമ്മാത്തെ സാമിദാസ്‌ഗ എന്ത്‌മ് ഉറുട്ടു സൊല്ലി ബരുവാര്. അവാര് സാമി പട്ടിലിര്‌ന്ത് ബന്തവാര് എന്ത് കാട്ട്യ ബേ്ണ്ടി അദിസ്യഗാമ് അഡ്യാളഗാമ് സെയ്‌വാര്. മുഡിരദാനാക്കി സാമി തെരിന്തെ്ഡ്‌ത്ത് ഇര്‌ക്കവാര്‌ണ ഗൂഡി ഏമാത്ത്യ ഇദ്‌ഗെല്ല അവാര് സെയ്‌വാര്. 23അദ്‌ണാലെ ണിമ്മ സൂസാരിത്തിര്‌ക്കുഡൊ. ഇദ്‌ഗെല്ല ണാന് ണിമാക്കെ മുദതാനെ സൊല്ലിര്‌ക്കെ.>>
മന്‌സാനായി പ്‌റാന്തവാ് പിന്നേമ് ബരുവാ്
24<<ഈ കജട്ടഗെല്ല തീന്ത പ്‌റ, അയ്യി കാലാത്തിലി
<ണേര ഇ്റ്‌ണ്ടെക്കു,
ണിലാവുദ് ബെ്ള്‌സ ഇല്ലാദായി ബരു,
25ബാനാത്തിലിര്‌ന്ത് ബെ്ള്ളിഗ അലേന്ത് കൊണ്ട് ഇര്‌ക്കു,
ബാനാത്തിലി ഇര്‌ക്ക എല്ലാദ്‌ണാമ് അദ്‌റ്‌സി എ്ഡ്‌ത്തെക്കു.>#എസയ്യാ് 13:10; 34:4
26അക്കുളെ മന്‌സാനായി പ്‌റാന്തവാ് മഞ്ചിലി ണല്ല മുജുവോഡേമ് മദ്‌പ്പോഡേമ് ബരാദ്‌ണ അവാര് കാണുവാര്. 27അവാ് തന്ന് ദൂദലണ ബൂമിദ് മുക്ക് മൂലെഗാക്കെല്ല സൊല്ലിബ്‌ട്ട് താന് തെരിന്തെ്ഡ്‌ത്തവാര്‌ണ ണാല് സാരിര്‌ന്ത് ഒന്റായി സേത്തുവാ്.>>
അത്തി മര തര പാഡ
28<<അത്തി മര ണിമാണ ഒരു കാര്യ പഡ്‌സ്‌ദ്. അത്തി മര താറ്‌ഗ സില്ല് പൊട്ടി തള്‌ക്കാട്ടി ബേസഗെ പ്‌റാക്ക്യ പോദ് എന്ത് ണിമാക്ക് തെര്യു. 29ഇദേപാസെ ണാന് സൊന്ന കാര്യഗെല്ല ണഡാക്കാദ് ണിമ്മ കാണ്‌ഗാട്ടി അവാ് ബരാദ്‌ക്കുള്ള ണേര എജ്ജിറ്റ് എന്ത് ണിമാക്ക് തെര്യു. 30ഈ കാര്യഗെല്ല ണഡാന്ത് തീരമാട്ട്‌ക്ക് ഇപ്പേത്ത കാലാത്തില്യവാര് ഇല്ലാദാഗമാട്ടാര് എന്ത് ണേര്‌മായിമ് ണാന് ണിമാക്കെ സൊല്ലുറെ. 31ബാന്‌മ് ബൂമിമ് അളിന്തെക്കു. ആന എന്ന്‌ദ് സൊല്ലുസുലാക്ക ഒരു ണാള്‌മ് അളിന്തെക്കമാട്ട.>>
അയ്യി ണാളൊ ഗള്യേഗൊ ആര്‌ക്ക്‌മ് തെര്യമാട്ട
32<<അയ്യി ബര്യ പോര ണാള്‌മ് ഗള്യേമ് എപ്പെന്ത് ആര്‌ക്ക്‌മ് തെര്യമാട്ട. മേലോഗാത്തിലിര്‌ക്ക ദൂദലാക്കൊ സാമിമഗാന്‌ക്കൊ അദ് തെര്യമാട്ട. അദെല്ല അപ്പനാന സാമി ഒരുത്താന്‌ക്ക്‌ത്തെ തെര്യു. 33അയ്യി ഗള്യെ എപ്പെന്ത് ണിമാക്ക് തെര്യമാട്ട. അദ്‌ണാലെ ണിമ്മ സൊക്കാന സൂസാരിത്തിര്‌ക്കുഡൊ. 34ഇദ്‌ണ ണാന് ണിമാക്ക് ഒരു കദേക്ക് എ്ണേത്ത് സൊല്ലി തരെ. ഒരുത്താ് തന്ന് ബേലെക്കാറാര്‌ക്ക് കൂരേന ണോഡ്യ സൊല്ലി ഒരു ബയ്യിക്ക് പോരാ്. ഒരൊരു ആള്‌ക്ക് ഒരൊരു ബേലെനാമ് സെയ്യ കൊഡുത്ത് ബാസ കാവക്കാറാന സൊക്കാന ണോഡ്യ സൊല്ലി പോനാ്.
35കൂരെക്കാറാ് മിഞ്ചന്ത്യെക്കൊ ണഡുഗൂറു ജാമാക്കൊ കോയിജാമാക്കൊ ബെ്ഡ്യാകാലാക്കൊ ഏദ് ഗള്യെ ബരാ് എന്ത് ണിമാക്ക് തെര്യാത്താദ്‌ണാലെ ണിമ്മ ഉറാങ്കാദെ സൂസാരിത്ത് ഇര്‌ന്ത് കൊള്ളി. 36ഒരു ബേ്ള്യെ കൂരെക്കാറാ് ദ്‌ഡീരന ബന്ത് കഡാന്താക്കി ണിമാണ ഉറാങ്ക്‌റവാരായി കാണ്‌റാക്കില്ലെ. 37ണാന് ണിമാക്ക് എന്തണ സൊന്നെനൊ അദ്‌ണാത്തെ എല്ലാര്‌ക്ക്‌മ് സൊല്ലുറെ. <ഉറാങ്കാദെ സൂസാരിത്ത് ഇര്‌ക്കുഡൊ!> >>
Currently Selected:
മറ്‌ക്കോസ് 13: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
