ମାତିସ୍ 15
15
ନିୟମ୍ବନ୍ ମାନ୍ନାଘି ପ୍ରଶ୍ନ
(ମାର୍କୁସ୍ ୭:୧-୧୩)
1ଇଦ୍ଘି ପାଛ୍ଲି ଯେରୁଶାଲେମ୍ ତା କେତ୍କ ଫାରିସୀ ଆରୁ ପଣ୍ତିତ୍ଜାମାର୍ ଯୀଶୁସ୍କି ଚାହାଗେ ବାରିକିରି ତେଙ୍ଗାଗେ ଲାଗ୍ଗିୟାର୍, 2“ନିଙ୍ଘାଏ ଚେଲାର୍ ପୁର୍ଖାର୍ଘି ନିୟମ୍ବନ୍ ଏନ୍ଦେର୍ଗେ ମା ମାନ୍ନାଏ, ଏନ୍ଦେର୍ଗେ ଆବ୍ଡ଼ାର୍ ୟାହୁଦୀ ନିୟମ୍ଘି ଅନୁସାର୍ ହେଖ୍ଖା ମା ନଣ୍ଡ୍ରିକିରି ଆସ୍ମା ମହ୍ଁନାଏ?” 3ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ନିମ୍ହି ନିଜର୍ ରୀତିନୀତିଘି ଲାଗାନ୍ ଏନ୍ଦେର୍ଗେ ପାର୍ମେଶ୍ଵାର୍ସ୍କି ନିୟମ୍ବନ୍ ମା ମାନ୍ଦାର୍? 4ଏନ୍ଦେର୍ଗେକା ପାର୍ମେଶ୍ଵାର୍ସ୍ ତେଙ୍କାଦାସ୍, ‘ନିଜର୍ ଆୟାଙ୍ଗ୍-ବାଙ୍ଗ୍ରିନ୍ ଆଦର୍ମାଇନ୍ କାମ୍କେ’, ଆରୁ ‘ନେଦିନ୍ ଆୟାଙ୍ଗ୍-ବାଙ୍ଗ୍ରିନ୍ ସାର୍ପାନାଏ, ଆବ୍ଡ଼ାରିନ୍ ପିଟାଚାକୋ।’ 5ଲେକିନ୍ ନିମ୍ ଆୟାଙ୍ଗ୍-ବାଙ୍ଗ୍ରିନ୍ ଏନ୍ନେ ତେଙ୍ଗର୍, ‘ଏକାନ୍ ଏଙ୍ଗା ନିମାଗେ ଚିନାରାଇ ଆବ୍ଡ଼ା ଜାମାନ୍ ପାର୍ମେଶ୍ଵାର୍ସ୍କେ ଭେଁଟ୍ ଚାଢ଼ାବାଚେଚ୍କାଦାନ୍, ହୁଦ୍ଘିଲାଗାନ୍ ନିହ୍ମାଏ ମଦେତ୍ କାମା ପଲ୍ଲଦାନ୍’, 6ତା ଆବ୍ଡ଼ାର୍ ତାଙ୍ଘାଏ ବାଙ୍ଗ୍ସ୍କି ଆଦର୍ମାଇନ୍ ମା କାମ୍ନାଏ, ଏନ୍ନେନିନ୍ ନିମ୍ ନିଜର୍ ରୀତିନୀତିଘି ଲାଗାନ୍ ପାର୍ମେଶ୍ୱାର୍ସ୍କି ବଚନ୍ବନ୍ ମା ମାନ୍ଦାର୍। 7ହେ କପ୍ଟୀରୋ, ନିହ୍ମା ବାରେନୁ ପାର୍ମେଶ୍ୱାର୍ସ୍ ଇଶାୟାହ୍ସ୍ ନାବୀସ୍କି ଦ୍ୱାର୍ନୁ ତେଙ୍କାଦାସ୍:
8‘ଇବ୍ଡ଼ା ଆଲାର୍ ତା ଥୁମ୍ଣାତି ଏଙ୍ଘାଏ ଆଦର୍ମାଇନ୍ କାମ୍ନାଏ, ଲେକିନ୍ ଇବ୍ଡ଼ାର୍ଘି ମନ୍ଦ୍ ଏଙ୍ଘାସ୍ତି ଗେଚ୍ଛା ରାଇଦ୍।
9ଆରୁ ଇବ୍ଡ଼ାର୍ ବେକାର୍ନୁ ଏଙ୍ଘାଏ ସେବା ଆରାଧାନା କାମ୍ନାଏ, ଏନ୍ଦେର୍ଗେକା ଆଲାର୍ଘି ନିୟମ୍ବନ୍ ଧରମ୍ ଉପ୍ଦେଶ୍ ବାଣୀ ବୁଲି ଶିଖାବାନାଏ।’”
ଅଶୁଦ୍ଧ୍ କାମ୍ନାବାଲା କାତ୍ଥା
(ମାର୍କୁସ୍ ୭:୧୪-୨୩)
10ଆନ୍ତିନ୍ ଯୀଶୁସ୍ ଆଲାରିନ୍ ତାଙ୍ଘା ଚାହା ମେହିଁକିରି ଆବ୍ଡ଼ାରିନ୍ ତେଙ୍ଗିୟାସ୍, “ମେନା ଆରୁ ବୁଝ୍ରା: 11ଏକାଦ୍ ଥୁମ୍ଣାନୁ କାଇ, ଆଦ୍ ଆଲାରିନ୍ ଅଶୁଦ୍ଧ୍ ମା କାମି, ଲେକିନ୍ ଏକାଦ୍ ଥୁମ୍ଣାନ୍ତି ଉର୍ଖି, ଆଦ୍ ଆଲାରିନ୍ ଅଶୁଦ୍ଧ୍ କାମି।” 12ଆନ୍ତିନ୍ ଚେଲାର୍ ବାରିକିରି ଆସିନ୍ ତେଙ୍ଗିୟାର୍, “ନିମ୍ କାଁଏ ଆହ୍ଦାର୍ କା ଫାରିସୀଜାମାର୍ ଇ ବଚନ୍ବନ୍ ମେନିକିରି ଖୀସାରାଚାର୍ କେରାର୍?” 13ଆଙ୍ଗେନ୍ ଯୀଶୁସ୍ ଯାବାବ୍ ଚିଚ୍ଚାସ୍, “ଆ ଜାମା ହୋପ୍ପାନ୍ ଏକାନ୍ ଏଙ୍ଘାଏ ସରଗ୍ତା ବାଙ୍ଗ୍ସ୍ ମାଲ୍ଲା ଇଦୁସ୍, ଆଦିନ୍ ଚାଡ଼ାକୋ। 14ଆବ୍ଡ଼ାରିନ୍ କାଲା ଚିଆ; ଆବ୍ଡ଼ାର୍ କାଁଣାରିନ୍ ପାବୁ ଏଦୁ କାଁଣାର୍ ଆରୁ କାଁଣାସ୍ ଯଦି କାଁଣାସିନ୍ ପାବୁ ଏଦସ୍, ହାଲେ ଦୁହି ଲୋକ୍ ଗାଡ୍ଡିନୁ ଖାତ୍ରର୍।”
15ଇବନ୍ ମେନିକିରି ପାତ୍ରାସ୍ ଆସିନ୍ ତେଙ୍ଗିୟାସ୍, “ଇ ନମୁନାବନ୍ ଏମାନ୍ ବୁଝାବା।” 16ଆଙ୍ଗେନ୍ ଯୀଶୁସ୍ ତେଙ୍ଗିୟାସ୍, “ନିମ୍ହି ଆକ୍କୁନ୍ତକ୍ ମାଲ୍ଲା ବୁଝ୍ରୁର୍ କାଁଏ? 17ନିମ୍ କାଁଏ ବାଲ୍ଦାରିନ୍ କା ଏକାଦ୍ ଥୁମ୍ଣାନୁ କାଇ ଆଦ୍ କୁଲୁନୁ କାଇ, ଆରୁ ଆଦ୍ ଶରୀର୍ତି ବାହ୍ରି ଉର୍ଖି? 18ଲେକିନ୍ ଏକାଦ୍ ଥୁମ୍ଣାନ୍ତି ଉର୍ଖି, ଆଦ୍ ମନ୍ନ୍ତି ଉର୍ଖି, ଆରୁ ଆଦିନ୍ ଆଲାସିନ୍ ଅଶୁଦ୍ଧ୍ କାମି। 19ଏନ୍ଦେର୍ଗେକା ଖାରାପ୍ ସୋଚ୍, ପିଟ୍ଟନା, ବେଭିଚାର୍, ରାଣ୍ଡିବାଜି ନାଲ୍ଖୁ କାମ୍ନା, ହାଡ଼୍ନା, ଝୁଟ୍ଟୁ ସାକ୍ଷୀ ଚିନା, ଠାକ୍ନା ଆରୁ ନିନ୍ଦା କାମ୍ନା ମନ୍ତି ଉର୍ଖି। 20ଇଦିନ୍ ଆଲାରିନ୍ ଅଶୁଦ୍ଧ୍ କାମି, ଲେକିନ୍ ହେଖ୍ଖା ମା ନଣ୍ଡ୍ରିକିରି ମାଣ୍ଡି ଅଣ୍ଡ୍କୁନ୍ ଆଲାରିନ୍ ଅଶୁଦ୍ଧ୍ ମା କାମି।”
କାନାନୀ ଜାତିନ୍ତା ମାଏକିନିଆଁଘି ବିଶ୍ଵାସ୍
(ମାର୍କୁସ୍ ୭:୨୪-୩୦)
21ଯୀଶୁସ୍ ଆସ୍ତି ଉର୍ଖିକିରି, ସୋର୍ ଆରୁ ସିଦୋନ୍ ପ୍ରଦେଶ୍ଗେ ବୁଙ୍ଗାସ୍ କେରାସ୍। 22ଆ ପ୍ରଦେଶ୍ତା ଅଣ୍ଟା କାନାନୀ ମାଏକିନିଆଁ ବାର୍ଚା, ଆରୁ ଚିର୍ରା ରାଇକିରି ତେଙ୍ଗାଗେ ଲାଗ୍ଗିୟା, “ହେ ପ୍ରାଭୁ! ଦାଉଦ୍ସ୍କି ହାଦ୍ଦୁ, ଏଙ୍ଘା ମିଆଁ ଦାୟା କାମା! ଏଙ୍ଘା ହାଦ୍ଦୁନ୍ ଭୁତ୍ତୁଦ୍ ମୁରୁକ୍ ସାତାବାଲି।” 23ଲେକିନ୍ ଆସ୍ ଆଦିନ୍ ଏନ୍ଦେର୍ହି ଯାବାବ୍ ମା ଚିଚ୍ଚାସ୍। ଆନ୍ତିନ୍ ଆସ୍କି ଚେଲାର୍ ବାରିକିରି ଆସିନ୍ ଆର୍ଜୀବିନ୍ତି କାମିକିରି ତେଙ୍ଗିୟାର୍, “ଇଦିନ୍ ବିଦା କାମା ଏନ୍ଦେର୍ଗେକା ଆଦ୍ ନାହ୍ମା ପାଛ୍ଲି-ପାଛ୍ଲି ଚିର୍ରାରାତେ ବାରାଲି।” 24ଆସ୍ ଯାବାବ୍ ଚିଚ୍ଚାସ୍, “ଏନ୍ ଇସ୍ରାଏଲ୍ ବାଉଁଶାର୍ଘି ଏଫ୍ସ୍ର୍କା କେର୍କା ଭେଡ଼ିନ୍ ଆମ୍ବିକିରି ଆରୁ ନାନ୍ନାର୍ଘି ଲାଗାନ୍ ମାଲ୍ଲା ବାରୁନ୍।” 25ଲେକିନ୍ ଆଦ୍ ବାର୍ଚା, ଆରୁ ଯୀଶୁସିନ୍ ଯୋହାର୍ କାମିକିରି ତେଙ୍ଗାଗେ ଲାଗ୍ଗିୟା, “ହେ ପ୍ରାଭୁ, ଏଙ୍ଗାନ୍ ଦାୟା କାମା।” 26ଇସ୍ରାଏଲ୍ ଆଲାରିନ୍ ହାଦ୍ଦୁର୍ ଗାନେ ଆରୁ ବିନାୟାହୁଦୀ ଆଲାରିନ୍ ଆଲ୍ଲାଘି ରୂପ୍ନୁ ତୁଲ୍ନା କାମିକିରି ଯୀଶୁସ୍ ଯାବାବ୍ ଚିଚ୍ଚାସ୍, “ହାଦ୍ଦୁର୍ଘି ଆସ୍ମାବନ୍ ହୋଇକିରି ଆଲ୍ଲାଘି ଆଘ୍ଲି ଚିନା ବାନେ ମାଲ୍ଲିଦ୍।” 27ଆଦ୍ ତେଙ୍ଗିୟାଦ୍, “ହଁ ପ୍ରାଭୁ ସତ୍ତୁନ୍, ଲେକିନ୍ ଆଲ୍ଲାଦ୍ ନିଜର୍ ମାଲିକ୍ସ୍କି ଟେବୁଲ୍ କିୟାଁ ଖାତ୍ର୍କା ଟୁକ୍ଡ଼ାଗୁଠିନ୍ ମହିଁଦ୍।” 28ଆଙ୍ଗେନ୍ ଯୀଶୁସ୍ ଆବନ୍ ଯାବାବ୍ ଚିଚ୍ଚାସ୍, “ହେ ଆଲି, ନିଙ୍ଘାଏ ବିଶ୍ୱାସ୍ଦ୍ ବାଡ଼୍କାଦ୍। ଏସ୍କେ ନିନ୍ ଚାହଁଦିନ୍, ହନ୍ନେନ୍ ନିଙ୍ଘାଲାଗାନ୍ ମାନ୍ନାଦ୍।” ଆରୁ ଆଦ୍ଘି ହାଦ୍ଦୁଦ୍ ଆଖାନେନ୍ ବାନେ ମାନ୍ଚାକେରା।
ଯୀଶୁସ୍ ଢେର୍ ବେହ୍ମରିୟାରିନ୍ ବାନେ କାମାଲ୍ଦାସ୍
29ଯୀଶୁସ୍ ଆସ୍ତି ଗାଲିଲୀ ହଁସ୍ରା ଚାହାଗେ ବାର୍ଚାସ୍, ଆରୁ ପାର୍ତ୍ତାନୁ ଆର୍ଗିକିରି ଆସାନ୍ ଅକ୍କିୟାସ୍। 30ଆଙ୍ଗେନ୍ ଢେର୍ ଆଲାର୍ ଆସ୍କି ଚାହାଗେ ବାର୍ଚାର୍। ଆବ୍ଡ଼ାର୍ ତାହ୍ମାଗାନେ ଲେଙ୍ଗ୍ଡ଼ାରିନ୍, କାଁଣାରିନ୍, ଲୁହ୍ଲାରିନ୍, କୋନ୍ଦାରିନ୍ ଆରୁ ଦୁସ୍ରା ଢେର୍ ବେହ୍ମରିୟାରିନ୍ ଆସ୍କି ଚାହାଗେ ଅନ୍ଦ୍ରାର୍, ଆରୁ ଆବ୍ଡ଼ାର୍ ଆସ୍କି ହେଡ୍ଡମୁଲିନୁ ଅକ୍କତେଇଚାର୍, ଆରୁ ଆସ୍ ଆବ୍ଡ଼ାରିନ୍ ବାନେ କାମ୍ଚାସ୍। 31ଯେତ୍କବାକେନ୍ ଆଲାର୍ ଏରିୟାର୍ କା କୋନ୍ଦାର୍ କାତ୍ଥା କାମାଲ୍ନାଏ, ଆରୁ ଲୁହ୍ଲାର୍ ବାନେ ମାନାଲ୍ନାଏ, ଆରୁ ଲେଙ୍ଗ୍ଡ଼ାର୍ ଏକାଲ୍ନାଏ, ଆରୁ କାଁଣାର୍ ଏରାଲ୍ନାଏ ତା ଆବ୍ଡ଼ାର୍ ଆଚ୍ମିତ୍ ମାନିକିରି ଇସ୍ରାଏଲୀର୍ଘି ପାର୍ମେଶ୍ଵାର୍ସ୍କି ସ୍ତୁତି କାମ୍ଚାର୍।
ଯୀଶୁସ୍ ଚାର୍ହାଜାର୍ ଆଲାରିନ୍ ମହଁତାନା
(ମାର୍କୁସ୍ ୮:୧-୧୦)
32ଯୀଶୁସ୍ ତାଙ୍ଘା ଚେଲାଜାମାରିନ୍ ମେହିଁୟାସ୍ ଆରୁ ତେଙ୍ଗିୟାସ୍, “ଏଙ୍ଗା ଇ ଭିଡ଼୍ବନ୍ ଏରିକିରି ସୋଗ୍ଗେ ଲାଗ୍ଗାଲି, ଏନ୍ଦେର୍ଗେକା ଇବ୍ଡ଼ାର୍ ତିନ୍ ଦିନ୍ ମାନ୍ଚାଦିନ୍ ଏଙ୍ଘାଗାନେ ରାନାଏ, ଆରୁ ଇବ୍ଡ଼ାର୍ସାନ୍ ମହାଁଗେ ଏନ୍ଦେର୍ହି ମାଲ୍ଲାଦିନ୍। ଏନ୍ ଇବ୍ଡ଼ାରିନ୍ କିଡ଼ାତି ବିଦା କାମାଗେ ମା ଚାହଁଦାନ୍, ଏକାସାନ୍ ଏନ୍ନେ ମା ମାନ୍ନାଦ୍ କା ପାବୁନୁ ଥାକ୍ରିକିରି ବେହସ୍ ମାନର୍କର୍।” 33ଚେଲାଜାମାର୍ ଆସିନ୍ ତେଙ୍ଗିୟାର୍, “ନାମାଗେ ଇ ଶୁନ୍ଶାନ୍ ଆଡ୍ଡାନୁ ଏକାସ୍ତି ଏତ୍କ ଆସ୍ମା ହାଖ୍ରୋକା ନାମ୍ ଏତ୍କ ବାଡ଼୍କା ଭିଡ଼୍ବନ୍ ଉଡ଼୍ତା ଅଙ୍ଗତ୍?” 34ଯୀଶୁସ୍ ଆବ୍ଡ଼ାରିନ୍ ମେନ୍ଚାସ୍, “ନିହ୍ମାସାନ୍ ୟୋଁଟା ଆସ୍ମା ରାଇ?” ଆବ୍ଡ଼ାର୍ ତେଙ୍ଗିୟାର୍, “ସାତ୍ତେଟା, ଆରୁ ଥୋଡ଼େ ଛୋଟେ ଇଞ୍ଜୋ ରାଇ।” 35ଆଙ୍ଗେନ୍ ଆସ୍ ଆଲାରିନ୍ କିୟାଁ ଅକ୍କାଗେ ହୁକୁମ୍ ଚିଚ୍ଚାସ୍। 36ଆରୁ ଆ ସାତ୍ତେଟା ଆସ୍ମା ଆରୁ ଇଞ୍ଜୋନ୍ ଅଚ୍ଚାସ୍, ଆରୁ ଧାନ୍ୟାବାଦ୍ ଚିଇକିରି ଖିଣ୍ଡିୟାସ୍, ଆରୁ ତାଙ୍ଘାଏ ଚେଲାର୍ଗେ ଚିତେକେରାସ୍, ଆରୁ ଚେଲାର୍ ଆଲାର୍ଗେ ଚିତେକେରାର୍। 37ଏନ୍ନେନିନ୍ ଜାମାର୍ ମହିଁକିରି ଉଚ୍ଛିୟାର୍ କେରାର୍ ଆରୁ ଚେଲାଜାମାର୍ ଏଙ୍ଗ୍ର୍କା ଟୁକ୍ଡ଼ାଗୁଠିନ୍ ସାତ୍ତେଟା ଡାଲାନୁ ଉଇୟାର୍। 38ମହୁଁର୍ଘି ଭିତର୍ନୁ ମାଏକିନିଆଁ ଆରୁ ହାଦ୍ଦୁରିନ୍ ଆମ୍ବିକିରି ଚାର୍ହାଜାର୍ ମାର୍ଦ୍ନାର୍ ରାଚାର୍। 39ଆନ୍ତିନ୍ ଯୀଶୁସ୍ ଭିଡ଼୍ବନ୍ ବିଦା କାମିକିରି ଡଙ୍ଗାନୁ ଆର୍ଗିୟାସ୍, ଆରୁ ମାଗ୍ଦାନ୍ ପ୍ରାଦେଶ୍ ତା ସୀମାଗେ ବାର୍ଚାସ୍।
Currently Selected:
ମାତିସ୍ 15: xis
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
