ମାତିସ୍ 16
16
ଫାରିସୀଜାମାର୍ ଯୀଶୁସିନ୍ ସରଗ୍ତା ଚିହ୍ନା ନିଆଁଲ୍ନାଏ
(ମାର୍କୁସ୍ ୮:୧୧-୧୩; ଲୁକାସ୍ ୧୨:୫୪-୫୬)
1ଫାରିସୀ ଆରୁ ସାଦ୍ଦୂକୀଜାମାର୍ ଯୀଶୁସ୍କି ଚାହାଗେ ବାରିକିରି ଆସିନ୍ ବିଡ଼୍ଚେ ଏରାଗେ ମେନ୍ଚାର୍, “ଏମାଗେ ସରଗ୍ତା ଏନ୍ଦ୍ରିନ୍ ଅଣ୍ଟା ଚିହ୍ନା ଏଦା।” 2ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ବିଡ଼ି ଅକ୍କନାବାକେନ୍ ନିମ୍ ତେଙ୍ଗ୍ଦାର୍, ‘ପାଗ୍ ବାନେ ରଅ, ଏନ୍ଦେର୍ଗେକା ଆକାଶ୍ ଲାଲ୍ ରାଇ’ 3ଆରୁ ଭୋର୍ ପାଇରି ତେଙ୍ଗ୍ଦାର୍, ‘ଇନ୍ନା ଆନ୍ଧିଧୁକା ବାରଦ୍, ଏନ୍ଦେର୍ଗେକା ଆକାଶ୍ ଲାଲ୍ ଆରୁ ବାଦ୍ଲି କୁଲ୍ଲେଇଚ୍କିଚି।’ ଯଦି ନିମ୍ ଆକାଶ୍ ତା ରଙ୍ଗ୍ଢଙ୍ଗ୍ ଏରିକିରି ଆଦ୍ଘି ଭେଦ୍ଦୁ ତେଙ୍ଗ୍ଦାର୍, ଲେକିନ୍ ସାମାୟଘି ଭେଦ୍ଦୁନ୍ ଏନ୍ଦେର୍ଗେ ତେଙ୍ଗା ପଲ୍ଲଦାର୍? 4ଇ ଯୁଗ୍ତା ଖାରାପ୍ ଆରୁ ପାର୍ମେଶ୍ୱାର୍ସ୍କି ବଚନ୍ ମା ମାନ୍ନାବାଲା ଆଲାର୍ ଚିହ୍ନା ବେଦ୍ଦ୍ନାଏ, ଲେକିନ୍ ଯୁନାସ୍ ନାବୀସ୍କି ଚିହ୍ନାବନ୍ ଆମ୍ବିକିରି ଇବ୍ଡ଼ାର୍ଗେ ଆରୁ ଏନ୍ଦେର୍ହି ଚିହ୍ନା ଚିଆ ମା କାଇ।” ଆରୁ ଯୀଶୁସ୍ ଆବ୍ଡ଼ାରିନ୍ ଆମ୍ବିକିରି ବୁଙ୍ଗେଇଚାସ୍।
ଫାରିସୀ ଆରୁ ସାଦ୍ଦୂକୀ ଜାମାର୍ସ୍ତି ହୁସିୟାର୍ ରା
(ମାର୍କୁସ୍ ୮:୧୪-୨୧)
5ଚେଲାର୍ ହଁସ୍ରାଘି ହାପାଖା ଆଣସିୟାର୍, ତା ଏରିୟାର୍ କା ଆବ୍ଡ଼ାର୍ ଆସ୍ମା ହୁଆଗେ ମଦ୍ରେ ଚିଚ୍ଚକାନାଏ। 6ହୁଦ୍ଘିଲାଗାନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏରା, ଫାରିସୀ ଆରୁ ସାଦ୍ଦୂକୀ ଜାମାର୍ଘି ଖାମୀର୍ସ୍ତି ହୁସିୟାର୍ ରାକେ।” 7ଆବ୍ଡ଼ାର୍ ତାମ୍-ତାମ୍ ବିଚାର୍ କାମାଗେ ଲାଗ୍ଗିୟାର୍, “ନାମ୍ ଆସ୍ମା ମାଲ୍ଲା ଅନ୍ଦ୍ରୁତ୍ ହୁଦ୍ଘିଲାଗାନ୍ ଆସ୍ ଏନ୍ନେ ବାଲ୍ଦାସ୍।” 8ଇବନ୍ ଆହିକିରି ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ହେ କମ୍ ବିଶ୍ୱାସ୍ କାମୁରୋ, ନିମ୍ ନିହ୍ମା ମାଝାନୁ ନାହ୍ମାସାନ୍ ଆସ୍ମା ମାଲ୍ଲାଦିନ୍ ବୁଲି ଏନ୍ଦେର୍ଗେ ତେଙ୍ଗାତେଙ୍ଗି ମାନାଲ୍ଦାର୍? 9ନିମ୍ ଆକ୍କୁନ୍ତକ୍ ମାଲ୍ଲା ବୁଝ୍ରୁର୍ କାଁଏ? ଏନ୍ଦେର୍ ନିମାଗେ ଆ ପାଞ୍ଚ୍ ହାଜାର୍ ଆଲାର୍ଗେ ପାଞ୍ଚେଟା ଆସ୍ମା ମନେ ମାଲ୍ଲାଦିନ୍, ଆରୁ ମନେ ମାଲ୍ଲା କା ନିମ୍ କେତ୍କ ଟୋପା ଆସ୍ମାବନ୍ ଠୁଡ଼ିୟାଚ୍କାଚ୍କାର୍? 10ଆରୁ ଚାର୍ହାଜାର୍ ଆଲାର୍ଗେ ସାତ୍ତେଟା ଆସ୍ମାନ୍, ଆରୁ ନିମ୍ କେତ୍କ ଟୋପା ଠୁଡ଼ିୟାଚ୍କାଚ୍କାର୍? 11ନିମ୍ ଏନ୍ଦେର୍ଗେ ମା ବୁଝ୍ର୍ଦାର୍ କା ଏନ୍ ନିମାନ୍ ଆସ୍ମାଘି ବାରେନୁ ମାଲ୍ଲା ତେଙ୍ଗୁନ୍, ଲେକିନ୍ ଫାରିସୀ ଆରୁ ସାଦ୍ଦୂକୀ ଜାମାର୍ଘି ଖାମୀର୍ସ୍ତି ସାବ୍ଧାନ୍ ରାକେ।” 12ଆଙ୍ଗେନ୍ ଚେଲାର୍ ବୁଝ୍ରା ଅଙ୍ଗିୟାର୍ କା ଯୀଶୁସ୍ ଆସ୍ମାଘି ଖାମୀର୍ସ୍ତି ମାଲ୍ଲା, ଲେକିନ୍ ଫାରିସୀ ଆରୁ ସାଦ୍ଦୂକୀ ଜାମାର୍ଘି ଶିକ୍ଷାତି ସାବ୍ଧାନ୍ ରାଗେ ତେଙ୍କାଚାସ୍।
ପାତ୍ରାସ୍କି ବିଶ୍ୱାସ୍
(ମାର୍କୁସ୍ ୮:୨୭-୩୦; ଲୁକାସ୍ ୯:୧୮-୨୧)
13ଯୀଶୁସ୍ କାଇସିରିଆ ଫିଲିପ୍ପୀ ପ୍ରଦେଶ୍ଗେ ବାର୍ଚାସ୍, ଆରୁ ତାଙ୍ଘା ଚେଲାଜାମାରିନ୍ ମେନାଗେ ଲାଗ୍ଗିୟାସ୍, “ଆଲାର୍ ମୁନୁଷ୍ ହାଦ୍ଦୁସିନ୍ ନେଦ୍ବୁଲି ବାନାଏ?” 14ଆବ୍ଡ଼ାର୍ ତେଙ୍ଗିୟାର୍, “କେତ୍କ ଲୋକ୍ ଆଲାର୍ ଆସ୍ନାନ୍ ଚିଉ ଯୋହାନ୍ସ୍ ବୁଲି ତେଙ୍ଗ୍ନାଏ, ଆରୁ କେତ୍କ ଲୋକ୍ ଆଲାର୍ ଏଲିୟାସ୍ ବାନାଏ ଆରୁ କେତ୍କ ଲୋକ୍ ଆଲାର୍ ଯିରିମିୟା ଚାହେ ନାବୀର୍ସ୍ତି ନେଦିନ୍ ଅର୍ତୁ ବୁଲି ତେଙ୍ଗ୍ନାଏ।” 15ଯୀଶୁସ୍ ଆବ୍ଡ଼ାରିନ୍ ମେନ୍ଚାସ୍, “ଆରୁ ନିମ୍ ଏନ୍ଦେର୍ ବାଦାର୍ କା ଏନ୍ ନେଦ୍?” 16ଶିମୋନ୍ ପାତ୍ରାସ୍ ଯାବାବ୍ ଚିଚ୍ଚାସ୍, “ନିମ୍ ଖ୍ରୀସ୍ତ୍ ଉଜ୍ଜୁ ପାର୍ମେଶ୍ଵାର୍ସ୍କି ହାଦ୍ଦୁର୍।” 17ଆଙ୍ଗେନ୍ ଯୀଶୁସ୍ ଆସିନ୍ ଯାବାବ୍ ଚିଚ୍ଚାସ୍, “ହେ ଶିମୋନ୍, ଯୁନାସ୍କି ହାଦ୍ଦୁ ନିନ୍ ଧଏନ୍; ଏନ୍ଦେର୍ଗେକା ମୁନୁଷ୍ ନିଙ୍ଘାସାନ୍ ଇବନ୍ ପ୍ରକଟ୍ ମାଲ୍ଲା କାମୁସ୍ ବରନ୍ ଏଙ୍ଘାଏ ସରଗ୍ତା ବାଙ୍ଗ୍ସ୍, ଇ କାତ୍ଥାବନ୍ ନିଙ୍ଘାଏନୁ ପ୍ରକଟ୍ କାମ୍ଚ୍କାଦାସ୍। 18ଏନ୍ହି ନିଙ୍ଗାନ୍ ତେଙ୍ଗାଲ୍ଦାନ୍ କା ନିନ୍ ପାତ୍ରାସ୍, ଆରୁ ଇ ଚାଟ୍ଣୀଘି ମିଆଁ ଏନ୍ ଏଙ୍ଘାଏ ମଣ୍ତ୍ଲୀ ବାନାବନ୍, ଆରୁ ନରକ୍ତା ଶକ୍ତି ଆବନ୍ ଜିତା ପଲ୍ଲିଦ୍। 19ଏନ୍ ନିଙ୍ଗା ସରଗ୍ ରାଜୀନ୍ତା ଚାଭିବନ୍ ଚିଅନ୍: ଆରୁ ଏନ୍ଦ୍ରିନ୍ହି ନିନ୍ ଧାନ୍ତାରିନୁ ବନ୍ଦ୍ କାମୟ, ଆଦ୍ ସରଗ୍ନୁହି ବନ୍ଦ୍ ରୋ; ଆରୁ ଧାନ୍ତାରିନୁ ନିନ୍ ଏକାନ୍ ଖୋଲୟ, ଆଦ୍ ସରଗ୍ନୁହି ଖୋଲ୍ରୋ।” 20ଆନ୍ତିନ୍ ଆସ୍ ଚେଲାରିନ୍ ଶକତ୍ ଚେତାବାନୀ ଚିଇକିରି ତେଙ୍ଗିୟାସ୍ ନେକାନ୍ହି ଆମ୍କେ ତେଙ୍ଗା କା ଏନ୍ ଖ୍ରୀସ୍ତ୍।
ଯୀଶୁସ୍ ତାଙ୍ଘା ମରନ୍ଘି ବାରେନୁ ଭବିଷତ୍ କାତ୍ଥା ତେଙ୍ଗାଲ୍ଦାସ୍
(ମାର୍କୁସ୍ ୮:୩୧-୩୩; ଲୁକାସ୍ ୯:୨୨)
21ହୁ ସାମାୟନ୍ତି ଯୀଶୁସ୍ ନିଜର୍ ଚେଲାଜାମାରିନ୍ ତେଙ୍ଗାଗେ ଲାଗ୍ଗିୟାସ୍, “ଏଙ୍ଗାଗେ ଜରୁରୀ ରାଇ କା ଏନ୍ ଯେରୁଶାଲେମ୍ କନ୍, ଆରୁ ପୁର୍ଖାର୍, ମୁଖ୍ୟା ପୁରୋହିତ୍ ଆରୁ ପଣ୍ତିତ୍ଜାମାର୍ଘି ହେଖ୍ଖାସ୍ତି ମୁରୁକ୍ ଦୁଃଖୁ ସାହନ୍; ଆରୁ ଡେମା ପିଟାକୋ; ଆରୁ ତିନ୍ ଦିନ୍ନୁ ଉଜ୍ଜନ୍କନ୍।” 22ଆଙ୍ଗେନ୍ ପାତ୍ରାସ୍ ଆସିନ୍ ଭିନେ ତାରା ହୋଇକିରି କେବ୍ନା ଲେଖା ତେଙ୍ଗିୟାସ୍, “ପ୍ରାଭୁ, ପାର୍ମେଶ୍ୱାର୍ସ୍ ଏନ୍ନେ ମା କାମ୍ନାସ୍! କା ନିହ୍ମାଗାନେ ଏନ୍ନେ ଏକ୍ଲାହି ମା ମାନ୍ନାଦ୍।” 23ଯୀଶୁସ୍ କିର୍ରେଚେ ଏରିକିରି ପାତ୍ରାସ୍ସିନ୍ ତେଙ୍ଗିୟାସ୍, “ହେ ଶାଏତାନ୍, ଏଙ୍ଘା ଚାହାସ୍ତି ବୁଙ୍ଗାକାଲା! ନିନ୍ ଏଙ୍ଗାନ୍ ରୋକ୍ଟୋକ୍ କାମାଲ୍ଦାଏ; ଏନ୍ଦେର୍ଗେକା ନିନ୍ ପାର୍ମେଶ୍ଵାର୍ସ୍କି କାତ୍ଥାନ୍ ମାଲ୍ଲା ସୋଚୁୟ, ଲେକିନ୍ ଆଲାର୍ଘି କାତ୍ଥାବନ୍ ସୋଚ୍ଦାଏ।”
ଯୀଶୁସ୍କି ପାଛ୍ଲି ଏକ୍ନାଘି ମତ୍ଲବ୍
(ମାର୍କୁସ୍ ୮:୩୪—୯:୧; ଲୁକାସ୍ ୯:୨୩-୨୭)
24ହତ୍କବାକେନ୍ ଯୀଶୁସ୍ ତାଙ୍ଘା ଚେଲାଜାମାରିନ୍ ତେଙ୍ଗିୟାସ୍, “ନେଦିନ୍ ଏକ୍ଲା ଏଙ୍ଘା ପାଛ୍ଲି ବାରାଗେ ବେଦ୍ଦଦାସ୍ ତା, ନିଜ୍କେନିଜ୍ ଅସ୍ଵୀକାର୍ କାମସ୍ ଆରୁ ନିଜର୍ କ୍ରୁଶ୍ବନ୍ ଚେଡ଼ସ୍, ଆରୁ ଏଙ୍ଘା ପାଛ୍ଲି-ପାଛ୍ଲି ବାରସ୍। 25ଏନ୍ଦେର୍ଗେକା ନେଦିନ୍ ନିଜର୍ ଜୀଆନ୍ ବାଛାବାଗେ ବେଦ୍ଦ୍ନାଏ, ଆବନ୍ ଆବ୍ଡ଼ାର୍ ଏଫ୍ସୋଚର୍; ଆରୁ ନେଦିନ୍ ଏଙ୍ଘାଲାଗାନ୍ ନିଜର୍ ଜୀଆନ୍ ଚିଅର୍, ଆବ୍ଡ଼ାର୍ ସବୁଦିନ୍ତା ଜୀବନ୍ ହାଖ୍ଖର୍। 26ମୁନୁଷ୍ଗେ ଇତ୍ତି ଏନ୍ଦେର୍ ଫାଏଦା, ଯଦି ଆସ୍ ଦୁନିଆଁନ୍ତା ଜାମାନ୍ ହାଖ୍ଖସ୍, ଲେକିନ୍ ନିଜର୍ ଜୀବନ୍ବନ୍ହି ଏଫ୍ସଚସ୍? ନିଜର୍ ଜୀବନ୍ଘି ବାଦ୍ଲା ମୁନୁଷ୍ ଏନ୍ଦେର୍ ଚିଆ ଅଙ୍ଗସ୍? 27ମୁନୁଷ୍ ହାଦ୍ଦୁସ୍ ତାଙ୍ଘା ସରଗ୍ଦୂଁତ୍ଜାମାର୍ ଗାନେ ତାଙ୍ଘା ବାଙ୍ଗ୍ ପାର୍ମେଶ୍ଵାର୍ସ୍କି ମାହିମାନୁ ବାରସ୍, ହତ୍କବାକେନ୍, ‘ଆସ୍ ଜାମା ଆଲାର୍ଗେ ତାହ୍ମା ନାଲ୍ଖୁଘି ଅନୁସାର୍ ଫଲ୍ ଚିୟସ୍।’ 2824 ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ ମୁନୁଷ୍ ହାଦ୍ଦୁସିନ୍ ନିଜର୍ ରାଜୀନୁ ବାର୍ନାନ୍ ମା ଏର୍ନାତକ୍, ଇସାନ୍ ଇଜ୍ଜକା ଆଲାର୍ଘି ଭିତର୍ନୁ କେତ୍କ ଲୋକ୍ ମା ଖିନାଏ।”
Currently Selected:
ମାତିସ୍ 16: xis
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
