ମାତିସ୍ 17
17
ଯୀଶୁସ୍କି ରୂପ୍ ବାଦ୍ଲାରାନା
(ମାର୍କୁସ୍ ୯:୨-୧୩; ଲୁକାସ୍ ୯:୨୮-୩୬)
1ଛଦିନ୍ଘି ପାଛ୍ଲି ଯୀଶୁସ୍ ପାତ୍ରାସ୍ ଆରୁ ୟାକୁବ୍ ଆରୁ ଆସ୍କି ଭାଇ ଯୋହାନ୍ସିନ୍ ସାଙ୍ଗେନ୍ ଅଚ୍ଚାସ୍, ଆରୁ ଆବ୍ଡ଼ାରିନ୍ ଭିନେ ତାରା ହୋଇକିରି ଅଣ୍ଟା ମେଚ୍ଛା ପାର୍ତ୍ତା ମିଆଁ ଅଚ୍ଚାସ୍ କେରାସ୍। 2ଆସାନ୍ ଆବ୍ଡ଼ାର୍ଘି ଚାହାନୁ ଯୀଶୁସ୍କି ରୂପ୍ ବାଦ୍ଲାରାଚା କେରା ଆରୁ ଆସ୍କି ଚେହେରା ବିଡ଼ି ଲେଖା ବିଲ୍ଚାଗେ ଲାଗ୍ଗିୟା ଆରୁ ଆସ୍କି ଚିଢ଼ା ବିଲ୍ଲୀ ଲେଖା ପାଣ୍ତ୍ରୁ ମାନ୍ଚାକେରା। 3ଆରୁ ଏରା ମୁଶା ଆରୁ ଏଲିୟାସ୍ଗାନେ ଯୀଶୁସ୍କି କାଚ୍ନେଖ୍ର୍ନାଦ୍ ଚେଲାଜାମାର୍ଗେ ଏଥ୍ରାଦ୍।
4ଆନ୍ତିନ୍ ପାତ୍ରାସ୍ ଯୀଶୁସିନ୍ ତେଙ୍ଗିୟାସ୍, “ହେ ପ୍ରାଭୁ, ନାମାଗେ ଇସାନ୍ ରାନାଦ୍ କେତ୍କ ବାନେ ମାନଦ୍ନେ। ଯଦି ନିମ୍ ଚାହଁର୍ ହାଲେ ଏନ୍ ଇସାନ୍ ମୁନ୍ଟା ତାମ୍ବୁ ଗାଡ଼ନ୍ନେ; ଅଣ୍ଟା ନିମାଗେ, ଅଣ୍ଟା ମୁଶାସ୍କେ, ଆରୁ ଅଣ୍ଟା ଏଲିୟାସ୍କେ।” 5ଆସ୍ ତେଙ୍ଗାଲିୟାସିନ୍ କା ଆଖାନେନ୍ ଅଣ୍ଟା ବିଲ୍ଚ୍ନା ବାଦ୍ଲିଦ୍ ଆବ୍ଡ଼ାରିନ୍ କୁଲ୍ଲେଇଚା, ଆରୁ ଆ ବାଦ୍ଲିନ୍ନ୍ତି ଅଣ୍ଟା ଶବଦ୍ ମେନ୍ଦ୍ରା: “ଇସ୍ ଏଙ୍ଘାଏ ଦୁଲାଡ଼ି ହାଦ୍ଦୁସ୍, ଇସ୍କି ମିଆଁ ଏନ୍ ମୁରୁକ୍ ଖୁସ୍ ରାଦାନ୍: ଇସ୍କି କାତ୍ଥାନ୍ ମେନା।” 6ଇବନ୍ ମେନିକିରି ଚେଲାଜାମାର୍ ହୁମ୍କୁଡ଼ିଆ ମାନିକିରି ଖାତ୍ରାର୍ କେରାର୍ ଆରୁ ମୁରୁକ୍ ଏଲ୍ଚିୟାର୍ କେରାର୍। 7ଯୀଶୁସ୍ ଚାହାଗେ ବାରିକିରି ଆବ୍ଡ଼ାରିନ୍ ଏସ୍ରିୟାସ୍ ଆରୁ ତେଙ୍ଗିୟାସ୍, “ଉସ୍କାରା, ଆମା ଏଲ୍ଚା।” 8ଆନ୍ତିନ୍ ଆବ୍ଡ଼ାର୍ ମିଆଁ ଏରିକିରି ଆସାନ୍ ଯୀଶୁସିନ୍ ଆମ୍ବିକିରି ଆରୁ ନେକାନ୍ହି ମା ଏରିୟାର୍।
9ଯେତ୍କବାକେନ୍ ଆବ୍ଡ଼ାର୍ ପାର୍ତ୍ତାନ୍ତିନ୍ କିୟାଁ ଏତ୍ତାଲିୟାର୍ ହତ୍କବାକେନ୍ ଯୀଶୁସ୍ ଆବ୍ଡ଼ାରିନ୍ ହୁକୁମ୍ ଚିଇକିରି ତେଙ୍ଗିୟାସ୍, “ଯେତ୍କତକ୍ ମୁନୁଷ୍ ହାଦ୍ଦୁସ୍ କେଚ୍ଚକାସ୍ତି ମା ଉଜ୍ଜସ୍ ହତକ୍ତକ୍ ନିମ୍ ଇ ଦର୍ଶନ୍ଘି କାତ୍ଥାନ୍ ନେକାନ୍ହି ଆମ୍କେ ତେଙ୍ଗା।” 10ଆଙ୍ଗେନ୍ ଚେଲାଜାମାର୍ ଆସିନ୍ ମେନ୍ଚାର୍, “ହାଲେ ପଣ୍ତିତ୍ଜାମାର୍ ଏନ୍ଦେର୍ଗେ ତେଙ୍ଗ୍ନାଏ କା ଖ୍ରୀସ୍ତ୍ସ୍କି ଆଘ୍ଲି ଏଲିୟାସ୍ ନାବୀସ୍କି ବାର୍ନା ଦାର୍କାର୍ ରାଇ?” 11ଯୀଶୁସ୍ ଯାବାବ୍ ଚିଚ୍ଚାସ୍, “ଏଲିୟାସ୍ ନାବୀସ୍ ଜରୁର୍ ବାରସ୍ ଆରୁ ଜାମାନ୍ ସୁଧ୍ରସ୍। 12ଲେକିନ୍ ଏନ୍ ନିମାନ୍ ତେଙ୍ଗାଲ୍ଦାନ୍ କା, ଏଲିୟାସ୍ ନାବୀସ୍ ତା ବାର୍ଚାସ୍ କେର୍କାଦାସ୍, ଆରୁ ଆଲାର୍ ଆସିନ୍ ମା ଚିହ୍ନିକିରି ଆସ୍କି ମିଆଁ ଏସ୍କେ ମନ୍ ଆନ୍ନେ କାମ୍ଚାର୍; ଏନ୍ନେନିନ୍ ମୁନୁଷ୍ ହାଦ୍ଦୁସ୍ ଆବ୍ଡ଼ାର୍ଘି ହେଖ୍ଖାନ୍ନ୍ତି ଦୁଃଖୁ ସାହସ୍।” 13ଆଙ୍ଗେନ୍ ଚେଲାଜାମାର୍ ବୁଝ୍ରାର୍ କେରାର୍ କା ଯୀଶୁସ୍ ଆସ୍ନାନ୍ ଚିଉ ଯୋହାନ୍ସ୍କି ବାରେନୁ ତେଙ୍ଗାଲ୍ଦାସ୍।
ଯୀଶୁସ୍ ଭୁତ୍ତୁଲାକ୍କା ହାଦ୍ଦୁସିନ୍ ବାନେ କାମାଲ୍ଦାସ୍
(ମାର୍କୁସ୍ ୯:୧୪-୨୯; ଲୁକାସ୍ ୯:୩୭-୪୩)
14ଯେତ୍କବାକେନ୍ ଆବ୍ଡ଼ାର୍ ଭିଡ଼୍ଘି ଚାହାନୁ ଆଣସିୟାର୍, ତା ଅଣ୍ଟା ଆଲାସ୍ ଯୀଶୁସ୍କି ଚାହାଗେ ବାର୍ଚାସ୍, ଆରୁ ହାଁଠୁୱାରାଇକିରି ତେଙ୍ଗାଗେ ଲାଗ୍ଗିୟାସ୍, 15“ହେ ପ୍ରାଭୁ, ଏଙ୍ଘା ହାଦ୍ଦୁସ୍କି ମିଆଁ ଦାୟା କାମା! ଏନ୍ଦେର୍ଗେକା ଆସ୍ ଘୋଣ ହାପୁ ବେମାର୍ତି ଦୁଃଖୁ ସାହାଲ୍ଦାସ୍; ଆରୁ ଆସ୍ ଧିୟାନ୍-ଧିୟାନ୍ ଚିଚ୍ଚୁନୁ ଆରୁ ଧିୟାନ୍-ଧିୟାନ୍ ଆମ୍ମୁନୁ ଖାତ୍ର୍ଦାସ୍। 16ଏନ୍ ଆସିନ୍ ନିହ୍ମା ଚେଲାଜାମାର୍ଘି ଚାହାଗେ ଅନ୍ଦ୍ର୍କାଚ୍କାନ୍, ଲେକିନ୍ ଆବ୍ଡ଼ାର୍ ଆସିନ୍ ବାନେ କାମା ପଲ୍ଲିଆରିନ୍।” 17ଯୀଶୁସ୍ ଯାବାବ୍ ଚିଚ୍ଚାସ୍, “ହେ ଅବିଶ୍ୱାସୀ ଆରୁ ବଦ୍ମାସ୍ ପିଢ଼ି, ଏନ୍ ନିହ୍ମାଗାନେ କେତ୍କ ଉଲ୍ ରନ୍? କେତ୍କ ଉଲ୍ ନିମାନ୍ ସାହ୍ତେ ରନ୍? ଆସିନ୍ ଏଙ୍ଘା ଚାହାଗେ ଅନ୍ଦ୍ରା।” 18ଯୀଶୁସ୍ ଭୁତ୍ତୁବନ୍ ଧାମ୍କାଚାସ୍ ଆରୁ ଆଦ୍ ଆସ୍ତି ଉର୍ଖାକେରା; ଆରୁ ଆ ହାଦ୍ଦୁସ୍ ଆଖାନେନିନ୍ ବାନେ ମାନ୍ଚାସ୍କେରାସ୍।
19ଆନ୍ତିନ୍ ଚେଲାଜାମାର୍ କାଡ଼େ-କାଡ଼େ ଯୀଶୁସ୍କି ଚାହାଗେ ବାରିକିରି ତେଙ୍ଗିୟାର୍, “ଏମ୍ ଆବନ୍ ଏନ୍ଦେର୍ଗେ ଅଥ୍ରା ପଲ୍ଲକାମ୍?” 20ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିହ୍ମା ବିଶ୍ଵାସ୍ଘି ଘାଟିଘି ଲାଗାନ୍, ଏନ୍ଦେର୍ଗେକା ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍। ଯଦି ନିହ୍ମା ବିଶ୍ଵାସ୍ ମାନିଘି ଅଣ୍ଟା ମାଞ୍ଜି ଲେଖା ରୋତା, ଇ ପାର୍ତ୍ତାବନ୍ହି ତେଙ୍ଗା ଅଙ୍ଗର୍, ‘ଇସ୍ତି ହାପାଖା ଘୁଚ୍ରୁ କାଲ୍’, ତା ଆଦ୍ ଘୁଚ୍ରକୋ; ଆରୁ ଏନ୍ଦେର୍ କାତ୍ଥାହି ନିମାଗେ ମୁସ୍କିଲ୍ ମା ମାନି। 21(ଲେକିନ୍ ବିନ୍ତି ଆରୁ ଉପାସ୍ ବିନାଦୁସ୍ରା ଏନ୍ଦ୍ରିନ୍ ଉପାୟତି ଇବ୍ଡ଼ା ଭୁତ୍ତୁଗୁଠିଦ୍ ମା ଉର୍ଖି।)”
ଯୀଶୁସ୍ ତାଙ୍ଘାଏ ମରନ୍ଘି ବାରେନୁ ଆରୁଅହନ୍ ଭବିଷତ୍ କାତ୍ଥା କାମାଲ୍ଦାସ୍
(ମାର୍କୁସ୍ ୯:୩୦-୩୨; ଲୁକାସ୍ ୯:୪୩-୪୫)
22ଯେତ୍କବାକେନ୍ ଯୀଶୁସ୍ ଗାଲିଲୀନୁ ରାଚାସ୍ ତା, ଆସ୍ ଚେଲାରିନ୍ ତେଙ୍ଗିୟାସ୍, “ମୁନୁଷ୍ ହାଦ୍ଦୁସ୍ ଆଲାର୍ଘି ହେଖ୍ଖାନୁ ଧାର୍ତାଚା କୋସ୍; 23ଆବ୍ଡ଼ାର୍ ଆସିନ୍ ପିଟର୍, ଆରୁ ଆସ୍ ତିନ୍ ଦିନ୍ନୁ ଉଜ୍ଜସ୍କସ୍।” ଇବନ୍ ମେନିକିରି ଚେଲାଜାମାର୍ ବହୁତ୍ ଦୁଃଖୁ ମାନ୍ଚାର୍ କେରାର୍।
ୟାହୁଦୀ ମନ୍ଦିର୍ଘି ଲାଗାନ୍ ମାଲ୍ଗୁଜାରୀ ଚିନା
24ଯେତ୍କବାକେନ୍ ଯୀଶୁସ୍ ତାଙ୍ଘା ଚେଲାର୍ଗାନେ କାଫାର୍ନାହୁମ୍ ସହର୍ଗେ ଆଣ୍ସିୟାସ୍ ତା, ମନ୍ଦିର୍ତା ମାଲ୍ଗୁଜାରୀ ଉକ୍ରୁ ଆଲାର୍ ପାତ୍ରାସ୍କି ଚାହାଗେ ବାରିକିରି ମେନ୍ଚାର୍, “ନିହ୍ମା ଗୁରୁସ୍ ମନ୍ଦିର୍ଗେ ମାଲ୍ଗୁଜାରୀ ମା ଚିଦାସ୍ କାଁଏ?” 25ଆସ୍ ତେଙ୍ଗିୟାସ୍, “ହଁ, ଚିଦାସ୍।” ଯେତ୍କବାକେନ୍ ପାତ୍ରାସ୍ ଆଡ଼୍ପାଗେ ବାର୍ଚାସ୍ ତା, ଯୀଶୁସ୍ ଆସିନ୍ ପହ୍ଲେ ତେଙ୍ଗିୟାସ୍, “ହେ ଶିମୋନ୍, ନିନ୍ ଏନ୍ଦେର୍ ସୋଚ୍ଦାଏ? ଦୁନିଆଁନ୍ତା ରାଜାଜାମାର୍ ନେଖାସ୍ତି ମାଲ୍ଗୁଜାରୀ ହୋନାଏ? ନିଜର୍ ହାଦ୍ଦୁର୍ସ୍ତିକା ପର୍ଦେଶୀୟାର୍ସ୍ତି?” 26ପାତ୍ରାସ୍ ଯୀଶୁସିନ୍ ଯାବାବ୍ ଚିଚ୍ଚାସ୍, “ପର୍ଦେଶୀୟାର୍ସ୍ତି।” ଆଙ୍ଗେନ୍ ଯୀଶୁସ୍ ଆସିନ୍ ତେଙ୍ଗିୟାସ୍, “ତା ହାଦ୍ଦୁର୍ ମାଲ୍ଗୁଜାରୀ ଚିନାନ୍ତି ବାଛ୍ରାର୍ କେରାର୍। 27ନାମ୍ ଆବ୍ଡ଼ାର୍ଘି ରୋକ୍ଟୋକ୍ଘି କାରଣ୍ ମା ମାନତ୍, ଆଦ୍ଘି ଲାଗାନ୍ ନିନ୍ ହଁସ୍ରା ଖାଁଣିଗେ କାଇକିରି ବାନ୍ଶି ଆଚ୍ଛା, ଆରୁ ପହ୍ଲେ ଏକା ଇଞ୍ଜୋ ବାଝ୍ରୋ, ଆ ଇଞ୍ଜୋଘି ଥୁମ୍ଣାନ୍ ଆଙ୍ଗ୍ଲ୍ତୟ ହାଲେ ଅଣ୍ଟା ରୂପା ପାଏସା ହାଖ୍ଖୟ, ଆବନ୍ ହୋଇକିରି ଏଙ୍ଘା ତାର୍ତି ଆରୁ ନିହ୍ମା ତାର୍ତି ଆବ୍ଡ଼ାର୍ଗେ ଚିଆ।”
Currently Selected:
ମାତିସ୍ 17: xis
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
