Wïlöölö 24
24
Dhaagø Mana Joot Jï Aydhak
1'Ba Eeberam atïmö na jaal ni cwiiri moe thööth døc, ni eno gwïëth Wuuö Jwøki ki yïth jammi bëët. 2Kanyøgø Eeberam acäänö ki ŋat tïïc mare mana dwøŋŋa eni dï jø paare, na en jammi moe bëët cere, ni kööe jïgø, ni «Beerra man cïbï cerï bäät ääma,#24:2 Ki baŋ jøøgø, ki man cïp cenø bäät ääm nyootha kööŋ mo ba kääŋi ki man tïïi. 3kiper a manynya ïïni niï kööŋï ki nyeŋ Wuuö Jwøk, Jwø maal ki piny, ki man ba nyöömmï wääda ki dhaagø røk nyïïakuk Keenan ni bëëda dïge en; 4'ba ï doo cøøa powa baŋ tuuŋwa, ni kännï ki dhaagø jï wääda ma Aydhak.»
5Køøre ŋat tïïc aköö jï Eeberam, «?A ni näk mo dhaaŋŋøca ba jïëy ki man öwa ki gøøni pööthi, wäädï wär lwøra ni dwøga gø pou kanya ööï ki yie?»
6Ni kö Eeberammi jïgø, ni «Ba doo løny na bäre bäre ki man dwøgï wääda kunöce. 7Wuuö Jwøk, Jwø maal, ŋata käl aani wøk ki po wära yïth ŋøøpa nywøl aani yie, na cäänö na buŋ aani na köö, ni ‹Ŋöömö man omëëga nyïïkwaayï,› eni ki dëëre nyïïatwiel maal mare jääŋŋe jääŋŋö nyïmï, ni ö ïïni ni jïtï ki dhaagø jï wääda kaace. 8'Ba ni näk mo dhaaŋŋøca ba jïëy ki man ööu ki gøøni, kööŋ mana wëëga ï kööŋ ki gø otïmö ni ba en bäätï këët. 'Ba wääda keere kär niï dwøga gø kunöce.» 9Kanyøgø ŋat tïïc cere acïp bäät ääm kwääye ma Eeberam ni kööŋe jïgø kiper luummögø.
10Køøre ŋat tïïc alwötö ka athïrööle apaar røk athïrööle mo kwääye, ni lwør jammi moa beyø beyø røk jap kwääye, ni tïŋŋe ni ci Mecöpatemia, ni pïïe pääny mana bëët Neeyörri yie. 11Ni ö eni ni wëëk athïrööle but piny buut iith ŋää paac wøk. 'Ba kar kanyøca piny oløny na abøøya, ni beeye kar kany wø um määnni ki pïï.
12Kanyøgø ena köö, «Wui Wuuö Jwøk, ï na Jwø kwääya ma Eeberam, a kwaya ïïni ki man wëëgï gïna ööa kipere thur kare jïra dïcäŋi, ni nyoothï mëëyï ni wø ba jøøl jï kwääya ma Eeberam. 13Ennø, a cuŋŋa lak iith, ni nyïïakuk paani ööa wøk kuna umge ki pïï. 14'Ba nyakøønno kööa ki gø, ni ‹Cïp daaï piny ni mooyï aani ki pïï naa mätha,› ni duunne jïra, ni kööe, ni ‹Mäthï, na athïrööle moï maadha thuwø,› beerra man tïm nyakøønneca ni beeye dhaaŋŋa jierï jï dhaanhnhï ma Aydhak. Ni näk mo teeŋ gïnögø tïmö na kare, puta ka ŋäc møn ni mëëyï ni wø ba jøøl iï nyoodhø jï kwääya.»
15'Ba kanya poode ni eni poot cäänö, Rebëëka nyi Batuël o Milka aput öö ni dak mare kääre ka göönne. 'Ba Milka beeye cï Neeyör cöök Eeberammi. 16Rebëëka beeye nyakøø mo kïte mïërö døc mo dëër dïcwøø poot kuue. Ena ci yi iith ni pääŋ daae ki pïï ni duu wøk.
17Kanyøgø ŋat tïïc aput reŋ baŋ gø kuna røømge ki gø, ni kööe, na «A kwaya ïïni naa mätha ki pïï mo thenh yi daaï.»
18Ni kö Rebëëka, «Mäthï nø, Awuuö.» Ni ö Rebëëka ni put dak mare jøl ki cere, ni mooc ŋatøgø ki pïï mo maadhe.
19'Ba kanya lønye ki mooc ŋatøgøøni ki pïï, ena köö, na «A døøa kuna umma ki pïï jï athïrööle moï thuwø këël mano rømge bëët ki maath.» 20Køøre pïï moa en yi dak alaar køny yi pöö yi gïn wø mäth dhäki yie, ni laar døø bäät iith kuna umme ki pïï, ni tööm athïrööle moe bëët ki pïï. 21'Ba ŋatøgø bëëdö ni lïŋö jaak ni neeta jï nyaanøgø, kiper eni manynya man ŋäc gø ki man näk wääth mare owëëk Wuuö Jwøki thur kare wala jïre bäär.
22'Ba kanya løny athïrööle ki maath pïï, ŋatøgø akän wøk ki gwel warkey mo peek mare thääŋ rumi, ni kän wøk thuwø ko oguudi ariiø mo warkey mo peek marge jïtö ki rumme apaar, kiper nee kïth ceŋŋe. 23Ni pëëny gø, ni kööe, ni «?Ïïna nyi ŋa?» Ni cäŋ gø pëënynyö, ni «?Da kany mo wa røma yie yi øt wäru kiper kar niine? Beerra man caanï gø jïra.»
24Ni kö nyaanøgø jïgø, ni «Aana nyi Batuël, Batuël o Milka na nywølge ki Neeyör.» 25Ni cäŋ nyaanøgø köö, ni «Jïwa da luum mo orømø ki cam mar lääy, ki kar niine thuwø.»
26Kanyøgø ŋatøgø wïïe akuul piny ni wøør nyeŋ Wuuö Jwøk. 27Ni kööe, ni «Pwøc en jï Wuuö Jwøk, Jwø kwääya ma Eeberam. Eni adïëri mare ki mëëye ni wø ba jøøl käre paanyø bäät kwääya. Eni thuwø aana bwødhe ni kïth aani yi øt jø tuuŋ kwääya.»
28Køøre Rebëëka areŋ paac ni caan gïïögø bëët jï menni ki jøøa en buute. 29'Ba Rebëëka jïre da coki ma dïcwøø mo nyeŋŋe cwøl ni Leeban. Kanyøgø Leeban areŋ wøk baŋ ŋatøgø bäät iith, 30ni ci baŋ gø kanya joot gwel warkey ko oguudi ceŋ coki ma Rebëëka, ni wïny luup thuwø moa caan coki kiper luupa caan ŋatøce jïre; ni ö Leeban ni joot ŋatøgø ni cuŋŋö buut athïrööle bäät iith. 31Ni kö Leeban, ni «Ööï, ø aa paayø, ïïni no ogwïëth Wuuö Jwøki en. ?Aŋø ni cuŋŋï wøk en? Aani øtø yaa nø jiiŋŋø jïrï, këël kar athïrööle thuwø yaa nø jiiŋŋø.»
32Kanyøgø ŋatøgø aci paayø, ni ö Leeban ni pät jammi wøk bäät athïrööle, ni mooc geni ki luum mo otal ki gïï wø cam lääyi. Ni mooc ŋatøce ki pïï mo lwøk tiete ki ge, ni mooc jøøa cäädhö ki eni thuwø ki pïï mo lwøkge tietge ki ge. 33'Ba kanya cïp gïn cam nyïme kiper nee cäme, ena köö, ni «Aani a ba laar cam dituru, këël mano caana tier gïna ööa kipere jïïu.»
Ni kö Leeban, ni «Caanï nø.»
34Køøre ena köö, ni «Aani, aana ŋat tïïc mar Eeberam. 35Wuuö Jwøk, kwääya ma Eeberam ee gwïëdhö døc, ni tïme na dhaanhø mo kare dwøŋ, ni mooc gø ki dïëk ki dhäk ki warkey ki jø tïïc ma cwøw ki mään ka athïrööle ka arëëni. 36Ni ö Ceera cï kwääya ni nyöötge ki kwääya ki dhaanhø ma dïcwøø ni eno nø jalø. Ni ö Eeberammi ni cïp jammi bëët moa en jïre jï wääde. 37'Ba kwääya aana wëëk kööŋ, ni kööe, ni ‹Wääda ba diï nyöömmö røk nyïïakuk Keenan, paan bëëda yie en, 38'ba ï doo cøøa po wära baŋ tuuŋwa ni kännï ki dhaagø jï wääda.›
39«Køøre aana köö jï kwääya, ‹?A ni näk ma nyakøønnaca ba jïëy ki man öwa ki gø?›
40«Køøre ena köö jïra, ni ‹Wuuö Jwøk, ŋata bëëda naa caatha køøre, nyïïatwiel maal mare ojääŋŋe ki ïïni kiper nee gïna aayï kipere wëëk thur kare, ni kännï ki dhaagø jï wääda røk tuuŋwa na näk jø po wära; 41køøre kar kaaca nø, kööŋ mara tïmö ni ba en bäätï këët; kiper no ciï baŋ tuuŋwa, no ba cïpge dhaagø jïrï, kööŋ mara tïmö ni tøør bäätï këët.›
42«Ni beeye tiere ennø ni ööa bäät iith dïcäŋi en, ni kööa, ni ‹Wui Wuuö Jwøk, Jwø kwääya ma Eeberam, ni näk mo tier gïna ööa kipere wëëgï thur kare nø, 43ennø, a cuŋŋa bäät iith; beerra man ö nyakøønno ummi ki pïï no cääna ki gø no kwaa, ni «Mooc aani ki pïï mo thiinh yi dak marï mo maadha,» 44ni løk gø jïra, ni «Mäthï; aano ummi thuwø jï athïrööle moï;» beerra man tïm nyakøønnaca ni beeye mana jier Wuuö Jwøki jï o kwääya.›
45«'Ba kanya poode naa poot cäänö ki yi cwïnya, Rebëëka aput öö ni dak mare kääre ka göönne, ni ci yi iith ni töömme ki pïï. Ni kööa jïre, na ‹A kwaya ïïni, mooc aani ki pïï mo maadha.›
46«Ni ö eni ni laar dak mare jiee piny, ni kööe, ni ‹Mäthï; athïrööle moï thuwø omaadha.› Kanyøgø aana mäthö, ni ö eni ni maath athïrööle thuwø.
47«Køøre ena pëënynya, ni kööa, ni ‹?Ïïna nyi ŋa?›
«Ni kööe, ni ‹Aana nyi Batuël o Neeyör na nywøle ki cïïe ma Milka.›
«Kanyøgø gwelø aputa kïth ume ni kïtha oguudi ceŋŋe, 48ni kuulla wïïa piny ni wøøra nyeŋ Wuuö Jwøk, ni pwøa Wuuö Jwøk na näk Jwø kwääya ma Eeberam na bwøth aani ki øtjöö ma kare ki man jïta ki nyakøø røk tuuŋ kwääya jï wääde. 49'Ba ennø, ni näk mo gïn mo beer ki gïn ma adïëri tïïyu tïïö kiper kwääya, wala ba tïïyu, wär caannu jïra nee ŋääa, kiper nee gïna daa tïïö nee ŋääa.»
50Køøre Leeban ki Batuël marge acaange, ni köge, ni «Gïnögø käla baŋ Wuuö Jwøk; 'ba ennø, bäŋ gïn mør mo caanwa jïrï këët. 51Ennø, Rebëëka nutö nyïmï. Lwørï ni aayï ki gøøni, nee tïme na cï o kwääyï, kaawat mana caani ya Wuuö Jwøki.»
52'Ba kanya ö ŋat tïï Eeberammi na wïny luup moa caan jøøgø, wïïe akuul piny ni wøør nyeŋ Wuuö Jwøk. 53Køøre ena kän wøk ki jap warkey ka abïïe ni wëëk ge Rebëëka. Ni mooc mii Rebëëka thuwø ki coki ki jammi mo perge leth.
54Køøre eni ki jøøa cäädhö ki eni bëët gena cämö ni mäthge, ni butge kaace. 'Ba kanya päcge ka amöölla, ena köö, ni «Wëëgu aani wääth, naa døøa baŋ kwääya.»
55'Ba cöök Rebëëka ki menni aköö, ni «Beerra man dööŋ nyilaalli ki waani dituru ki nïne mo nøk jaak mo jïtö ki kar apaar, køøre nø eno ööi.»
56'Ba ŋat tïï Eeberam aköö jïge, ni «Kär aani gaalu këët; kiper Wuuö Jwøk gïna ööa kipere anø wëëk thur kare. Wëëgu aani wääth kiper naa døøa baŋ kwääya.»
57Kanyøgø gena köö, ni «Nyilaal cwølwa cwølø, na acaara mare pëënywa dituru.» 58Køøre Rebëëka acwølge, ni pëënyge gø, ni köge, ni «?Ï aay ki ŋati?»
Ni løk gø, na «A aay ki gøøni.»
59Kanyøgø nyige ma Rebëëka ki ŋat tïïc mare na pïr gø aputge wec nee aacge ki ŋat tïï Eeberam ki jøøa cäädhö ki eni bëët. 60Ni gwïëthge nyige ma Rebëëka, ni köge,
«Nya nyiwa, ïïno tïmö na mii jiyi ma kum kum,
ni ö nyïïkwaayï ni maanyge mïëc nyïïmän moge.»
61Køøre Rebëëka atïŋŋö ki nyïïakuue moa näk jø tïïc moe, ni ge cäädhi ka bäät athïrööle, ni cige køør ŋat tïïc mar Eeberam; ni ö ŋat tïïci mar Eeberam ni käl Rebëëka ni aacge.
62'Ba kar kanyøgø Aydhak onø duuö ki Bëër-Laay-Röi, kiper kar bëëtö mare ena Nëgëp. 63'Ba waŋcäŋ aciel ka abøøya ena cääth yi pwöla ni cädö ki cwïnye. 'Ba na tïŋ wïïe maal, ena lwïthö ni joot athïrööle ni cäänhnhö. 64'Ba kanya ö Rebëëka na lwïthe, Aydhak ajoode, ni put ïnh piny ki bäät athïrööl. 65Ni pëëny ŋat tïïc mar Eeberam, ni kööe, na «?Aŋa ni cäänhnhi ice dï pwöla ni ö kun røømme ki øøni?»
Ni kö ŋat tïïci, ni «Beeye kwääya.» Kanyøgø Rebëëka abïï mare alwøre ni loop wïïe ni bøøny dëëre bäre.
66'Ba ŋat tïïc gïïa tïïe bëët acaane jï Aydhak. 67Køøre Aydhak Rebëëka alwøre ni kïth gø yo oduŋkaany menni ma Ceera, ni put tïmö na dhaagø mare ni mëër ki gø. Køøre Aydhak ajïtö ki cøm cwïny køør thøw menni ma Ceera.
Currently Selected:
Wïlöölö 24: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
Wïlöölö 24
24
Dhaagø Mana Joot Jï Aydhak
1'Ba Eeberam atïmö na jaal ni cwiiri moe thööth døc, ni eno gwïëth Wuuö Jwøki ki yïth jammi bëët. 2Kanyøgø Eeberam acäänö ki ŋat tïïc mare mana dwøŋŋa eni dï jø paare, na en jammi moe bëët cere, ni kööe jïgø, ni «Beerra man cïbï cerï bäät ääma,#24:2 Ki baŋ jøøgø, ki man cïp cenø bäät ääm nyootha kööŋ mo ba kääŋi ki man tïïi. 3kiper a manynya ïïni niï kööŋï ki nyeŋ Wuuö Jwøk, Jwø maal ki piny, ki man ba nyöömmï wääda ki dhaagø røk nyïïakuk Keenan ni bëëda dïge en; 4'ba ï doo cøøa powa baŋ tuuŋwa, ni kännï ki dhaagø jï wääda ma Aydhak.»
5Køøre ŋat tïïc aköö jï Eeberam, «?A ni näk mo dhaaŋŋøca ba jïëy ki man öwa ki gøøni pööthi, wäädï wär lwøra ni dwøga gø pou kanya ööï ki yie?»
6Ni kö Eeberammi jïgø, ni «Ba doo løny na bäre bäre ki man dwøgï wääda kunöce. 7Wuuö Jwøk, Jwø maal, ŋata käl aani wøk ki po wära yïth ŋøøpa nywøl aani yie, na cäänö na buŋ aani na köö, ni ‹Ŋöömö man omëëga nyïïkwaayï,› eni ki dëëre nyïïatwiel maal mare jääŋŋe jääŋŋö nyïmï, ni ö ïïni ni jïtï ki dhaagø jï wääda kaace. 8'Ba ni näk mo dhaaŋŋøca ba jïëy ki man ööu ki gøøni, kööŋ mana wëëga ï kööŋ ki gø otïmö ni ba en bäätï këët. 'Ba wääda keere kär niï dwøga gø kunöce.» 9Kanyøgø ŋat tïïc cere acïp bäät ääm kwääye ma Eeberam ni kööŋe jïgø kiper luummögø.
10Køøre ŋat tïïc alwötö ka athïrööle apaar røk athïrööle mo kwääye, ni lwør jammi moa beyø beyø røk jap kwääye, ni tïŋŋe ni ci Mecöpatemia, ni pïïe pääny mana bëët Neeyörri yie. 11Ni ö eni ni wëëk athïrööle but piny buut iith ŋää paac wøk. 'Ba kar kanyøca piny oløny na abøøya, ni beeye kar kany wø um määnni ki pïï.
12Kanyøgø ena köö, «Wui Wuuö Jwøk, ï na Jwø kwääya ma Eeberam, a kwaya ïïni ki man wëëgï gïna ööa kipere thur kare jïra dïcäŋi, ni nyoothï mëëyï ni wø ba jøøl jï kwääya ma Eeberam. 13Ennø, a cuŋŋa lak iith, ni nyïïakuk paani ööa wøk kuna umge ki pïï. 14'Ba nyakøønno kööa ki gø, ni ‹Cïp daaï piny ni mooyï aani ki pïï naa mätha,› ni duunne jïra, ni kööe, ni ‹Mäthï, na athïrööle moï maadha thuwø,› beerra man tïm nyakøønneca ni beeye dhaaŋŋa jierï jï dhaanhnhï ma Aydhak. Ni näk mo teeŋ gïnögø tïmö na kare, puta ka ŋäc møn ni mëëyï ni wø ba jøøl iï nyoodhø jï kwääya.»
15'Ba kanya poode ni eni poot cäänö, Rebëëka nyi Batuël o Milka aput öö ni dak mare kääre ka göönne. 'Ba Milka beeye cï Neeyör cöök Eeberammi. 16Rebëëka beeye nyakøø mo kïte mïërö døc mo dëër dïcwøø poot kuue. Ena ci yi iith ni pääŋ daae ki pïï ni duu wøk.
17Kanyøgø ŋat tïïc aput reŋ baŋ gø kuna røømge ki gø, ni kööe, na «A kwaya ïïni naa mätha ki pïï mo thenh yi daaï.»
18Ni kö Rebëëka, «Mäthï nø, Awuuö.» Ni ö Rebëëka ni put dak mare jøl ki cere, ni mooc ŋatøgø ki pïï mo maadhe.
19'Ba kanya lønye ki mooc ŋatøgøøni ki pïï, ena köö, na «A døøa kuna umma ki pïï jï athïrööle moï thuwø këël mano rømge bëët ki maath.» 20Køøre pïï moa en yi dak alaar køny yi pöö yi gïn wø mäth dhäki yie, ni laar døø bäät iith kuna umme ki pïï, ni tööm athïrööle moe bëët ki pïï. 21'Ba ŋatøgø bëëdö ni lïŋö jaak ni neeta jï nyaanøgø, kiper eni manynya man ŋäc gø ki man näk wääth mare owëëk Wuuö Jwøki thur kare wala jïre bäär.
22'Ba kanya løny athïrööle ki maath pïï, ŋatøgø akän wøk ki gwel warkey mo peek mare thääŋ rumi, ni kän wøk thuwø ko oguudi ariiø mo warkey mo peek marge jïtö ki rumme apaar, kiper nee kïth ceŋŋe. 23Ni pëëny gø, ni kööe, ni «?Ïïna nyi ŋa?» Ni cäŋ gø pëënynyö, ni «?Da kany mo wa røma yie yi øt wäru kiper kar niine? Beerra man caanï gø jïra.»
24Ni kö nyaanøgø jïgø, ni «Aana nyi Batuël, Batuël o Milka na nywølge ki Neeyör.» 25Ni cäŋ nyaanøgø köö, ni «Jïwa da luum mo orømø ki cam mar lääy, ki kar niine thuwø.»
26Kanyøgø ŋatøgø wïïe akuul piny ni wøør nyeŋ Wuuö Jwøk. 27Ni kööe, ni «Pwøc en jï Wuuö Jwøk, Jwø kwääya ma Eeberam. Eni adïëri mare ki mëëye ni wø ba jøøl käre paanyø bäät kwääya. Eni thuwø aana bwødhe ni kïth aani yi øt jø tuuŋ kwääya.»
28Køøre Rebëëka areŋ paac ni caan gïïögø bëët jï menni ki jøøa en buute. 29'Ba Rebëëka jïre da coki ma dïcwøø mo nyeŋŋe cwøl ni Leeban. Kanyøgø Leeban areŋ wøk baŋ ŋatøgø bäät iith, 30ni ci baŋ gø kanya joot gwel warkey ko oguudi ceŋ coki ma Rebëëka, ni wïny luup thuwø moa caan coki kiper luupa caan ŋatøce jïre; ni ö Leeban ni joot ŋatøgø ni cuŋŋö buut athïrööle bäät iith. 31Ni kö Leeban, ni «Ööï, ø aa paayø, ïïni no ogwïëth Wuuö Jwøki en. ?Aŋø ni cuŋŋï wøk en? Aani øtø yaa nø jiiŋŋø jïrï, këël kar athïrööle thuwø yaa nø jiiŋŋø.»
32Kanyøgø ŋatøgø aci paayø, ni ö Leeban ni pät jammi wøk bäät athïrööle, ni mooc geni ki luum mo otal ki gïï wø cam lääyi. Ni mooc ŋatøce ki pïï mo lwøk tiete ki ge, ni mooc jøøa cäädhö ki eni thuwø ki pïï mo lwøkge tietge ki ge. 33'Ba kanya cïp gïn cam nyïme kiper nee cäme, ena köö, ni «Aani a ba laar cam dituru, këël mano caana tier gïna ööa kipere jïïu.»
Ni kö Leeban, ni «Caanï nø.»
34Køøre ena köö, ni «Aani, aana ŋat tïïc mar Eeberam. 35Wuuö Jwøk, kwääya ma Eeberam ee gwïëdhö døc, ni tïme na dhaanhø mo kare dwøŋ, ni mooc gø ki dïëk ki dhäk ki warkey ki jø tïïc ma cwøw ki mään ka athïrööle ka arëëni. 36Ni ö Ceera cï kwääya ni nyöötge ki kwääya ki dhaanhø ma dïcwøø ni eno nø jalø. Ni ö Eeberammi ni cïp jammi bëët moa en jïre jï wääde. 37'Ba kwääya aana wëëk kööŋ, ni kööe, ni ‹Wääda ba diï nyöömmö røk nyïïakuk Keenan, paan bëëda yie en, 38'ba ï doo cøøa po wära baŋ tuuŋwa ni kännï ki dhaagø jï wääda.›
39«Køøre aana köö jï kwääya, ‹?A ni näk ma nyakøønnaca ba jïëy ki man öwa ki gø?›
40«Køøre ena köö jïra, ni ‹Wuuö Jwøk, ŋata bëëda naa caatha køøre, nyïïatwiel maal mare ojääŋŋe ki ïïni kiper nee gïna aayï kipere wëëk thur kare, ni kännï ki dhaagø jï wääda røk tuuŋwa na näk jø po wära; 41køøre kar kaaca nø, kööŋ mara tïmö ni ba en bäätï këët; kiper no ciï baŋ tuuŋwa, no ba cïpge dhaagø jïrï, kööŋ mara tïmö ni tøør bäätï këët.›
42«Ni beeye tiere ennø ni ööa bäät iith dïcäŋi en, ni kööa, ni ‹Wui Wuuö Jwøk, Jwø kwääya ma Eeberam, ni näk mo tier gïna ööa kipere wëëgï thur kare nø, 43ennø, a cuŋŋa bäät iith; beerra man ö nyakøønno ummi ki pïï no cääna ki gø no kwaa, ni «Mooc aani ki pïï mo thiinh yi dak marï mo maadha,» 44ni løk gø jïra, ni «Mäthï; aano ummi thuwø jï athïrööle moï;» beerra man tïm nyakøønnaca ni beeye mana jier Wuuö Jwøki jï o kwääya.›
45«'Ba kanya poode naa poot cäänö ki yi cwïnya, Rebëëka aput öö ni dak mare kääre ka göönne, ni ci yi iith ni töömme ki pïï. Ni kööa jïre, na ‹A kwaya ïïni, mooc aani ki pïï mo maadha.›
46«Ni ö eni ni laar dak mare jiee piny, ni kööe, ni ‹Mäthï; athïrööle moï thuwø omaadha.› Kanyøgø aana mäthö, ni ö eni ni maath athïrööle thuwø.
47«Køøre ena pëënynya, ni kööa, ni ‹?Ïïna nyi ŋa?›
«Ni kööe, ni ‹Aana nyi Batuël o Neeyör na nywøle ki cïïe ma Milka.›
«Kanyøgø gwelø aputa kïth ume ni kïtha oguudi ceŋŋe, 48ni kuulla wïïa piny ni wøøra nyeŋ Wuuö Jwøk, ni pwøa Wuuö Jwøk na näk Jwø kwääya ma Eeberam na bwøth aani ki øtjöö ma kare ki man jïta ki nyakøø røk tuuŋ kwääya jï wääde. 49'Ba ennø, ni näk mo gïn mo beer ki gïn ma adïëri tïïyu tïïö kiper kwääya, wala ba tïïyu, wär caannu jïra nee ŋääa, kiper nee gïna daa tïïö nee ŋääa.»
50Køøre Leeban ki Batuël marge acaange, ni köge, ni «Gïnögø käla baŋ Wuuö Jwøk; 'ba ennø, bäŋ gïn mør mo caanwa jïrï këët. 51Ennø, Rebëëka nutö nyïmï. Lwørï ni aayï ki gøøni, nee tïme na cï o kwääyï, kaawat mana caani ya Wuuö Jwøki.»
52'Ba kanya ö ŋat tïï Eeberammi na wïny luup moa caan jøøgø, wïïe akuul piny ni wøør nyeŋ Wuuö Jwøk. 53Køøre ena kän wøk ki jap warkey ka abïïe ni wëëk ge Rebëëka. Ni mooc mii Rebëëka thuwø ki coki ki jammi mo perge leth.
54Køøre eni ki jøøa cäädhö ki eni bëët gena cämö ni mäthge, ni butge kaace. 'Ba kanya päcge ka amöölla, ena köö, ni «Wëëgu aani wääth, naa døøa baŋ kwääya.»
55'Ba cöök Rebëëka ki menni aköö, ni «Beerra man dööŋ nyilaalli ki waani dituru ki nïne mo nøk jaak mo jïtö ki kar apaar, køøre nø eno ööi.»
56'Ba ŋat tïï Eeberam aköö jïge, ni «Kär aani gaalu këët; kiper Wuuö Jwøk gïna ööa kipere anø wëëk thur kare. Wëëgu aani wääth kiper naa døøa baŋ kwääya.»
57Kanyøgø gena köö, ni «Nyilaal cwølwa cwølø, na acaara mare pëënywa dituru.» 58Køøre Rebëëka acwølge, ni pëënyge gø, ni köge, ni «?Ï aay ki ŋati?»
Ni løk gø, na «A aay ki gøøni.»
59Kanyøgø nyige ma Rebëëka ki ŋat tïïc mare na pïr gø aputge wec nee aacge ki ŋat tïï Eeberam ki jøøa cäädhö ki eni bëët. 60Ni gwïëthge nyige ma Rebëëka, ni köge,
«Nya nyiwa, ïïno tïmö na mii jiyi ma kum kum,
ni ö nyïïkwaayï ni maanyge mïëc nyïïmän moge.»
61Køøre Rebëëka atïŋŋö ki nyïïakuue moa näk jø tïïc moe, ni ge cäädhi ka bäät athïrööle, ni cige køør ŋat tïïc mar Eeberam; ni ö ŋat tïïci mar Eeberam ni käl Rebëëka ni aacge.
62'Ba kar kanyøgø Aydhak onø duuö ki Bëër-Laay-Röi, kiper kar bëëtö mare ena Nëgëp. 63'Ba waŋcäŋ aciel ka abøøya ena cääth yi pwöla ni cädö ki cwïnye. 'Ba na tïŋ wïïe maal, ena lwïthö ni joot athïrööle ni cäänhnhö. 64'Ba kanya ö Rebëëka na lwïthe, Aydhak ajoode, ni put ïnh piny ki bäät athïrööl. 65Ni pëëny ŋat tïïc mar Eeberam, ni kööe, na «?Aŋa ni cäänhnhi ice dï pwöla ni ö kun røømme ki øøni?»
Ni kö ŋat tïïci, ni «Beeye kwääya.» Kanyøgø Rebëëka abïï mare alwøre ni loop wïïe ni bøøny dëëre bäre.
66'Ba ŋat tïïc gïïa tïïe bëët acaane jï Aydhak. 67Køøre Aydhak Rebëëka alwøre ni kïth gø yo oduŋkaany menni ma Ceera, ni put tïmö na dhaagø mare ni mëër ki gø. Køøre Aydhak ajïtö ki cøm cwïny køør thøw menni ma Ceera.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia