Wïlöölö 30
30
1'Ba kanya ö Reecalli na joot gø ni bäŋ obwöre mo ege nywølø jï Jeekap, cwïnye ajïtö ki këëny ki coki ma Liia, ni kööe ki Jeekap, «A manynya man nyöötï kööra ko obwöre, 'ba ni näk ï ba nyööt kööra, theemma man thøøa jaak.»
2'Ba Jeekap awëër døc ki Reecal, ni kööe, «?Aŋø, aana Jwøk na män ïïni ki man nyöödï ko obwöre?»
3Ni kö Reecalli, ni «Ŋat tïïc mara ma Bila en; ci baŋe na dhaagø, nee nyööde jïra ko obwöre, kiper naa jïta ko obwöre ki ree.»
4Køøre Reecal Bila na näk ŋat tïïc mare amëëk cwøre ma Jeekap, ni ö Jeekapi ni ci baŋ gø. 5Ni ö Bila ni jït yie ki dhaanhø, ni lwaare ki gø na dïcwøø. 6Køøre Reecal aköö, ni «Jwøk aana ŋunne, ni wïny dwøra møn, ni put aani mooc ki nyilaal ma dïcwøø.» Kiper manøgønø, nyeŋ gø aput cak ni Daan.
7Ni ö Bila na näk ŋat tïïc mar Reecal ni cäŋ yie jïtö ki dhaanhø, ni lwaare ki gø, ni jïtge ki riet nyilaal ma dïcwøø ki Jeekap. 8Kanyøgø Reecal aköö, ni «Waana läädö døc ki coka, ni kaadha cere.» Ni ö Reecalli ni cak nyeŋ nyilaal ni Naptali.
9'Ba na ö Liia na joot gø ni eno cuŋŋö ni ba nyööti, ŋat tïïc mare na näk Dhelpa akäle ni cïp gø jï Jeekap na dhaagø. 10Ni ö Dhelpa ŋat tïïc mar Liia ni nyöötge ki Jeekap ki nyilaal ma dïcwøø. 11Kanyøgø Liia aköö, ni «Dëëra gum møn.» Køøre nyeŋ nyilaal acaae ni Gaat.
12Ni ö Dhelpa ŋat tïïc mar Liia ni cäŋge nyöötö ki Jeekap ki riet nyilaal ma dïcwøø. 13Ni kö Liia, ni «Aana jïtö ki met ec; ennø, met ec mara caan määnni caanø.» Køøre nyeŋ nyilaal acaae ni Acer.
14'Ba kanya tïme na kar kac ki beel, Ruben aci yi pwödhö ni jïte ki nyïïjenni mo ociek, mo caala nyïï ocøøk,#30:14 Teeŋ nyïïjenni moøgø, kar kaaca beege nyïïjenni mo oŋäädhö ni dhaanhø kønye kønyø ki man jïte ki nyilaal. ni käl geni jï menni ma Liia. Ni kö Reecalli jï Liia, na «A kwaya ïïni ki man mooyï aani røk nyïïjenni moa käl wäädï jïrï.»
15'Ba Liia aköö jïgø, «?Aŋø, ki mana mayï cwøra ki jïrï beeye gïn mo jööt jaak? ?A ennø, ï manynya man cäŋï nyïïjer wääda källö thuwø?»
Køøre Reecal aköö, ni «Beerra man but Jeekapi buutï dïwääni na kar nyïïjenni moa käl wäädï noo cïpï jïra.»
16'Ba kanya duu Jeekapi ka abøøya ki yi pwödhö, Liia aci kuna røømge ki gø, ni kööe jïgø, ni «Wärï ö baŋa dïwääni, kiper ïïna ŋeea ki nyïïjenni mo wääda.» Køøre Jeekap aci baŋ Liia dïwäänögø.
17Ni ö Jwøki ni wïny mar Liia, ni ö Liia ni jït yie ki dhaanhø, ni lwaare ki gø, ni jootge bïï obwöre ma dïcwøø ki cwøre ma Jeekap. 18Kanyøgø Liia aköö, ni «Jwøk aana cunne kiper nyaana näk ŋat tïïc mara acïba jï cwøra.» Køøre nyeŋ nyilaal acaae ni Icakar.
19Ni ö Liia ni cäŋ yie jïtö ki dhaanhø ni lwaare ki gø, ni jïtge ki bïcier obwöre ma dïcwøø ki cwøre ma Jeekap. 20Ni kö Liia, ni «Jwøk aana mooe ki muuy mo beer. Ennø, cwøra tïmö ni bëëdö ka aani, kiper waana nyöödö ki gø ko obwöre abïciel.» Køøre nyeŋ nyilaal acaae ni Dhebulan.
21Køøre ena cäŋ nyöötö ki nyakøø ni cak nyeŋ gø ni Dina.
22'Ba Jwøk wïïe acaare kiper Reecal, ni wïny mar gø, ni wëëk gø nyöödö. 23Ni ö Reecalli ni jït yie ki dhaanhø, ni lwaare ki nyilaal ma dïcwøø, ni kööe, ni «Jwøk, lään wïc mara apaanye bääta.» 24Ni cak nyeŋ nyilaal ni Jocep, ni kööe, ni «Beerra man ö Jwøki ni cäŋ nyilaal mør ma dïcwøø meetø jïra.»
Kanya Ö Dïëki Na Nyaacge Jï Jeekap
25'Ba kanya nø ö Reecalli na nywøl Jocep, Jeekap aköö jï Leeban, ni «Wëëk a wääth nø, kiper naa døøa powa kanya käla yie; 26ni cïpï mään ko obwöre 'moa jïra moa tïnynya ïïni kiperge, naa aa nø, kiper tïïc mana tïïa jïrï bäre ŋäyï.»
27'Ba Leeban aköö jïgø, ni «Ni näk mo yiï met ki aani ennø, beerra man bëëdï buuta, kiper ajooda ni Wuuö Jwøk aana gwïëdhe ki køørï.» 28Ni cäŋ Leeban köö, ni «Caan jammi moo magï, kiper nee cïba jïrï.»
29'Ba Jeekap aköö jï Leeban, ni «Ïïni ki dëërï tïïc mana tïnynya ïïni ki gøøni ŋäyï, ni gwøk mana gwøa dïëk moï ki gø thuwø ŋäyï, 30kiper dïkwøŋ nuta dïëk mo nøk keerge jïrï; 'ba kanya ööa, gena nyaay ni tïmge ni thööth, ni ö Wuuö Jwøki ni gwïëth ïïni ki køøra. ?'Ba ennø, aano luunynya tïïc yi wäne thuwø kiper paara?»
31Kanyøgø Leeban aköö, na «?Agïnaŋø noo cïba jïrï nø?»
Ni kö Jeekapi, na «A ba many gïn mør mo cïpï cïbö jïra, 'ba ni näk mo gïrpiny aciel mør kany tïïyï tïïö jïra, aani a puta bëëtö naa kwaaya dïëk moï ni gwøa geni. 32Beerra man wëëgï aani ciin dï pïïth dïëk moï dïcäŋi, kiper nee rööm moa näk dëëtge da kït, ki nyïïrööm moa cøl, ka atëëe moa näk dëëtge da kït bëët nee jiera, nee tïmge na 'moa na kar tïïc mara. 33Yi nyïme thuwø ki man näk mo bëëtö mara adïëri jootï joodø kanyo ööï no liewï dïëk moøgø. Ni näk miï jïtö ka ateea mo dëëre bäŋ kït røk atëëe 'moa, ki nyirøømmø mo ba cøl røk nyïïrööm 'moa, gïnögø wär put kwaan bääta na käw.»
34Ni kö Leeban, «Wøp nø, beerra man tïme kaawat mana caanï enø.» 35Køøre Leeban atëëe bëët moa näk apøøli ki moa näk dëëtge da kït, ki rööm moa cøl bëët, ajiere ni mëëk ge wääte kiper nee gwøkge. 36Ni ö Leeban ni daak dïëk moøgø buut Jeekap, ni kïth ge kany mo bäär mëëth mo caath ka nïne adäk. Ni ö Jeekapi ni dööŋe ni kwaaya dïëk Leeban moa dööŋ.
37Køøre Jeekap alwötö ki bäät jenni mo poot thec røk teeŋ jenni adäk, ni lør geni ni kwör møøk nëënö ni tar. 38Ni ö athøre moa løre ni cïp ge nyïm dïëk yi gïn wø mäth dïëki yie ki pïï, kar maath marge, ni kany wø öge baŋ maath ki pïï, ge käädö. 39Ni ö dïëki ni käätge buut athøre, ni nyöötge ki nyïïdïëk mo dëëtge da kït ni møøk apøøli. 40Ni ö Jeekapi ni pääŋ nyïïrööm ni kïth ge kur keerge, ni cïp dïëk møga kur keerge ni dïët ki dïëk moa näk apøøli ki moa näk kït moge cøl bëët na en dï dïëk Leeban. Ni ö Jeekapi ni cïp dïëk moe kur keerge, ni käre jääbö ki dïëk Leeban. 41'Ba kany wäro tïme ni dïëk moa näk dëëtge teek käädö, Jeekap athøre cïbe nyïmge yi gïn wø mäthge yie ki pïï, kiper nee käätge buut athøre. 42'Ba kiper dïëk moa jägö, athøre ba cïp piny nyïmge. Køøre dïëk moa jägö atïmö ni beege mo Leeban, ni ö moa dëëtge teek ni tïmge na mo Jeekap. 43Køøre Jeekap aput kwärö døc ni jïte ki dïëk mo thööth døc, ni tïme ni jïre da jø tïïc ma cwøw ki mään, ni jïre da athïrööle ka arëëni.
Currently Selected:
Wïlöölö 30: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
