Wïlöölö 31
31
Kanya Ö Jeekapi Na Päär Wøk Ni Mare Døø Poge
1'Ba Jeekap luup moa car wäät Leeban awïnynye, kanya köge, ni «Jeekap jammi bëët mo wääwa alwøre, ni beege jammi mo wääwa ni kwäre ki geni yøø.» 2Ni ö Jeekapi ni neen bëëtö mar Leeban no odak, ni nëëni ni ba mëër ki eni ni caala mana dïkwøŋ.
3Køøre Wuuö Jwøk aköö jï Jeekap, ni «Døø po wäru baŋ tuuŋu; 'ba aani, aano en buutï.»
4Ni ö Jeekapi ni jääk baŋ Reecal ki Liia nee öge baŋe paap kanya en dïëki moe yie, 5ni kööe jïge, ni «Bëëtö mar wääu ajooda no odak, ni nëëni ni ba mëër ki aani ni caala mana dïkwøŋ; 'ba Jwø wära ena buuta. 6Ennø, ŋäyu ni wääu atïnynya ki teek mana en jïra bäre. 7'Ba wääu bëëdö ni møønna aani, ni wel jammi mo wø maa kwöre apaar; 'ba ena män Jwøki ki man tïïe ki gïn mo raac dëëra. 8Ni näk mo eno köö, ni ‹Nyïïdïëk moo nywøl ni dëëtge da kït bëët tïmö na moï,› køøre nyïïdïëk moo nywøl tïmö ni dëëtge da kït bëët. Ni näk mo köö eni, ni ‹Moa näk apøøli bëët tïmö na moï,› køøre nyïïdïëk moo nywøl tïmö na apøøli bëët. 9Ki køør manøgø nø, Jwøk dïëk mo wääu alwøre ni cïp ge jïra.
10«'Ba kanya tïme na kar käädö mar dïëk, aana lägö ni jooda nyööi ni käädö, ni nyööi moa käädö dëëtge da kït, ni møøk apøøli. 11Køøre nyïïatwiel Jwøk aköö jïra ki yïth lääk, ni ‹Jeekap,› ni kööa, ni ‹Aani en.› 12Ni kööe, ni ‹Ennø, tïŋ wïïï maal, ni neenï nyööi moø ni käädö bëët yøø. Nyööi moøgø dëëtge da kït, ni møøk apøøli; gïnögø atïïa kiper aani gïïa tïïc Leeban dëërï bëët ajooda. 13Aana Jwøa nyooth dëëre jïrï Bëthël, kanya thiiï maaw bäät kïnna cwödhï piny na nyuudhi, ni beeye kanya kööŋï jïra yie. 'Ba ennø, ö maal ni weyï paani, ni døøï paana nywøl ïïni yie.› »
14'Ba aløk Reecalli ki Liia ni köge jï Jeekap, na «?Aŋø, da thäk jap wääwa mo odööŋ jïwa yi øt wääwa këët cøøn? 15?Aŋø, wa ba nëëni kaamar jiy mo path jaak ki baŋe? Kiper eni waana ŋeee, ni cam jammi yie jaak moa køøl køørwa. 16Kiper manøgø nø, jap kwärö bëët moa lwør Jwøki baŋ wääwa yøø beege mowa ko obwöre mowa. 'Ba ennø, gïna caan Jwøki jïrï enø, tïïyï.»
17Køøre Jeekap aput ö maal ni cïp obwöre moe ki määre bäät athïrööle; 18ni køøl lääc paac moe bëët nyïme, ni aae ki jap paare bëët moa joode Padan-Aram, ni täge ki wääth ki man ci baŋ wänni ma Aydhak yi ŋööm Keenan.
19'Ba kar kaaca Leeban oci kuna nyaar jïëc dïëk moe; ni ö Reecalli ni kwal gïï lam moa näk mo wänni. 20'Ba Jeekap Leeban nyï Aram anøøne, ni bäŋ gïr wääth mo ee caanø jïgø ki man näk eni päära wøk. 21Ni put päär wøk ki jammi moa en jïre bëët; ni aae ni ŋøl naama cwøl ni Upareeti, ni aae ni coonya paana näk po kïte na cwøl ni Gelät.
Kanya Ö Leeban Na Läp Køør Jeekap
22'Ba na tïme na dää nïne, acaan jï Leeban ni Jeekap opäär wøk. 23Ni ö Leeban ni lwør tuuŋge, ni läpge køør Jeekap ki wääth mo caath ka nïne abïriiø; ni ö Leeban ni maa Jeekap Gelät, paana näk po kïte. 24'Ba Jwøk aö bäät Leeban nyï Aram ki wäär yïth lääk, ni kööe jïgø, ni «Gwøk riï ki man ba cäänï ki Jeekap ki gïn mo mäna wääth mare.»
25'Ba Leeban Jeekap amaae ni Jeekap oduŋkaare moe ee nø gur piny paana näk po kïte, ni ö Leeban ki tuuŋge ni gurge oduŋkaare moge piny Gelät na näk po kïte thuwø. 26Køøre Leeban aköö jï Jeekap, na «?Aŋø na nøønï aani en, ni päärï wøk ki nyïïa ni käärï geni kaamar jiy mo omaaø ki tøŋ? 27?Aŋø na päärï wøk niï kwala riï, ni nøønï aani ni wääth kärï caanø jïra en? Kiper ï daa wëëk wääth ki met ec, ni jø wär ki dudi, ni buri ki thøme di pwödö. 28?Aperŋø na mänï aani ki man määdha nyïïkwaaya ki nyïïa en? Gïna tïïyï enøgø, atïïyï ni wïïï kärï caarø. 29Doo da gïn mo tïïa tïïö dëëtu ennø na bëëde ki køør teek mana en jïra, 'ba Jwø wääu acäänö ki aani ki yïth lääk yawïtïni, ni kööe, ni ‹Gwøk riï ki man ba cäänï ki Jeekap ki gïn mo mäna wääth mare.› 30Kawaane ennø møn, ïïna aay kiper cwïnyï atïmö ni lääŋŋa man døøï po wäru. ?'Ba aperŋø na kwalï gïï lam moa näk 'moa?»
31Køøre aløk Jeekapi ni kööe jï Leeban, ni «Päär wøk mara beeye kiper mana lwäya ni kanymør nyïïï kälï kälö ki teek baŋa. 32'Ba ennø, ŋato jootï gïï lam moa näk moï baŋe, wär thøøe. Beerra man ŋeyï gïïa näk moï røk japa nyïm tuuŋø, ni lwørï geni.» 'Ba kanya ö Jeekapi na caan gïnögø, kuue ni gïïögø okwal Reecalli.
33Køøre Leeban aci yo oduŋkaara mar Jeekap, ki yo oduŋkaara mar Liia, ki yo oduŋkaara mar nyïga näk jø tïïc moa näk ariiø, 'ba gïï lam moa näk moe käre joodø. Køøre ena duny wøk ki yo oduŋkaara mar Liia ni døny yo oduŋkaara mar Reecal. 34'Ba Reecal gïï lam moøgø ee nø lwør, ni kïth geni tier køøm man wø kïth bäät athïrööl, ni pï piny bäätge. 'Ba kanya ö Leeban na bäp yo oduŋkaara bäre, geni käre joodø.
35Ni kö Reecalli jï wänni, na «Awuuö, kärï wëër kiper mana kära ö maal nyïmï, kiper aani gïr mään otägö dëëra.» Køøre Leeban amäänyö døc, 'ba gïï lam moøgø käre joodø.
36Køøre Jeekap awëër døc ni jääl Leeban; ni ö Jeekapi ni dwøk gø, ni kööe jï Leeban, na «?Agïnaŋø na baaa? ?Gïna raac na tïïa, agïnaŋø, na rïŋŋï køøra ki teeŋ öönynyögø enø? 37?Këël mana bäpï jammi 'moa bëët, agïnaŋø na jootï røk jap paarï? Cïp piny dïër kany nyïm tuuŋa ki tuuŋï, kiper nee yi luubö manøgø neenge yïthakiyø riet ki ïïni. 38Cwiiyi na pïërariiø bëët ii abeeda ki ïïni; mädhi mo rööm moï ki mädhi mo atëëe moï bäŋgø mo obwön wøk ri nywøl marge, ni bäŋ nywø røømmø mo ya lwørø ri pïïth dïëk moï nee cama. 39Ni kany wø dee diel mo wø cam cwienynyi camø, aani ki dëëra wø coola coolø, naa ba ö baŋï ki gøøni nee nyoodha jïrï. Ni këël diel mo okwalø ki dïcäŋ wala wäär, a wø pëënynyï pëënynyö kipere. 40Ni bëëda ni cäŋ ki kööc wäär bäre 'näga aani, ni bäŋ niine nyeŋŋa. 41Cwiiyi na pïërariiø bëët ii abeeda paarï; ni beege cwiiri apaar kurŋween na tïnynya ïïni ki ge kiper nyïïï na näk ariiø, ki cwiiri abïciel moa tïnynya ïïni kiper naa jïta ki dïëk baŋï. 'Ba jammi mo wø maa awellï kwöre apaar. 42A onää Jwø kwara ma Eeberam, na näk Jwø wø lwär wära ma Aydhak ki gø, ba en buuta, caana gø naa diï wëëk wääth ki ceŋŋa jaak møn. 'Ba Jwøk can mara ki öölö mar tïïc mana tïïa ajoode, ni beeye na jook ïïni yawïtïni enø.»
Luubö Mana Tuut Leeban Ki Jeekap
43Køøre aløk Leeban ni kööe jï Jeekap, ni «Mään moøgø ni jïrï yøø beege nyïïa, no obwöre moøgø poot na 'moa, ni dïëk moøgø beege dïëk 'moa, këël gïïögø ni neetï bëët yøø beege 'moa. ?Aŋø, agïnaŋø na daa tïïö dïcäŋi en dëët nyïïa ko obwöre moge na nywølge? 44Ennø, beerra man ööï nee ø tudø ki luubö mo bëëdö na gïn ma nyuudhi yïthakiyø ki ïïni.»
45Køøre Jeekap alwötö ki kïdi ni cwöth gø piny na nyuudhi. 46Ni kö Jeekapi jï tuuŋge, ni «Kännu ki kïte.» Ni ö jøøgø ni känge ki kïte ni löörge gø kanya ciel, ni cämge buut kïte moa löörge kanya ciel kaace. 47Ni ö Leeban ni cwøl nyeŋ gø ni Jagar-Caadutha.#31:47 Jagar-Caadutha ki dhi jø Aram tiere beeye kïte moa näk olöör piny na nyuudhi. 'Ba acwøl Jeekapi ni Galïït.#31:47 Gelät ki dhi Ibaru tiere beeye kïte moa näk olöör piny na nyuudhi.
48Ni kö Leeban, ni «Kïte moi no olöör kanya ciel ii, ki mano täge dïcäŋi, obëëdö na gïn ma nyuudhi yïthakiyø ki ïïni.» Kiper manøgø nø, nyeŋŋe aput cwøl ni Galïït. 49Ni cwøli ni Micpa#31:49 Micpa ki dhi Ibaru tiere beeye kar neen mo jammi bëët nëënö ki yie na karge. thuwø, kiper mana kö Leeban, ni «Beerra man ö Wuuö Jwøki ni neet øøni bëët, kany wø tøør wati maya buut wati maya. 50Ni näk mo da gïn mo raac mo tïïyï tïïö dëët nyïïa, wala marï nywöm ki mään møøk nee meedï bäät nyïïa, këël na bäŋe dhaanhø mo nut buutø, manøgø wär ŋäyï ni beeye Jwøk noo bëëdö yïthakiyø ki ïïni na lïŋi.»
51Køøre Leeban aköö jï Jeekap, ni «Ennø, neen kïte moi moa näk olöör kanya ciel ki kïdi mana näk yaa cwöth piny na nyuudhi yïthakiyø ki ïïni. 52Kïte moi no olöör kanya ciel ii bëëdö na nyuudhi; këël kïdi mana näk ocwöth piny na nyuudhi bëëdö na gïn ma nyuudhi thuwø, ni nyootha gø ni kïte moi ba daa kaalø ki man pöönhnha baŋï naa tïïa ki gïn mo raac dëërï; ni ïïni thuwø kïte moi ki kïnna näk ocwöth piny na nyuudhi ba diï kaalø ki man pöönhnhï baŋa niï tïïï ki gïn mo raac dëëra. 53Jwøa näk Jwø Eeberam ki Neeyör, obëëdö na dïŋut luup yïthakiyø.» Ni ö Jeekapi ni put kööŋ ri nyeŋ Jwø wø lwäär wänni ma Aydhak. 54Køøre Jeekap acïpö ko olämi, ni ŋaal gø kanya bëëtge yie bäät kïdi, ni cwøl tuuŋge baŋ cam, ni cämge ni putge but bäät kïdi dïwäänögø.
55'Ba na tïme na amöölla cøøn Leeban aö maal, ni määth nyïïkwaaye ki nyïïe ni gwïëth geni. Køøre Leeban aay ni døø paare.
Currently Selected:
Wïlöölö 31: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
