Jøøn 11

Luum Thøw Ladhara

1Kanyøgø, da dhaanhø mo tuu mo cwøl ni Ladhara, ma nyï Bethani po Meeri ki coki ma Martha. 2'Ba Meeri manøgø beeye Meeri mana wïïr Kwäärö ki maaw ni pooc tiet gø ki jïëye, ni beeye coki ma Ladhara na tuu. 3'Ba kanyøgøøni nyïïmii Ladhara na tuu gena jääk baŋ Jecu, ni ge caana gø, ni «Kwäärö, ŋata mëërï ki gø tuu.»

4'Ba na wïnynyi ya Jecu, ena köö, ni «Täwögøøni ba cööp ri thøø, 'ba beeye noo käl ajiem jï Jwøk, kiper nee O Jwøk jiem ri gøøni.»

5'Ba Jecu mëër ki Martha ki coki ma Meeri, ki Ladhara. 6'Ba na wïny gøøni ni Ladhara tuu, ena bëëdö ki nïne ariiø møøk kanya en yie. 7'Ba køør manøgøøni, ena köö jï bääge, ni «Beerra man døø Judia.»

8'Ba bääge aköö jïre, «Dïpööy, kany mo cään en jø Juuth caya man këërge ïïni ki kïte. ?Ï doo cäŋa døø kaace këët?»

9Ni løgi ya Jecu, «?Aŋø, paa kwör caae apaar kurriiø ki yi cäŋ bäre? Ni näk dhaanhø cäädhi ka dïcäŋ, tiete ba dee cwanynyø, kiper tac piny man nëënö jïre. 10'Ba ni näk dhaanhø cäädhi ka wäär, tiete dee cwanynyø, kiper na bäŋe tar jïre.» 11Køøre na nø cääne na enønø, ena luuny köö jïge, «Nyawadø ma Ladhara abutö, 'ba a cøøa kuna jiia gøøni yïth niine.»

12Kanyøgø bääge aköö jïre, «Kwäärö, ni näk mare niine ki täw, dëëre opï piny.» 13'Ba Jecu cäänö kaper thøw Ladhara, 'ba ki baŋge ni Jecu cäänö ni Ladhara jwöma ree yïth niine.

14Kanyøgø acaan Jecu jïge na kare, ni «Ladhara athøw. 15'Ba kiperu yia met na ba ena kaace, kiper nou jïëyu ni ŋäädhu. 'Ba ø cøøa baŋe ennø.»

16'Ba Tøma na cwøl na Acwiek aköö jï bääŋi møga, «Ø cøø thuwø, nee ø thøø ki eni na aciel.»

Luum Tïŋ Jiy Maal Ki Yi Thøø Mana Caan Jecu Jï Martha

17'Ba kanya pïïc Jecu kunöce, Ladhara ajoode no onø jïtö ki nïne aŋween yi bwörö. 18'Ba Bethani kare cään ki Jerucalem ni yaakicge jïtö ki kiïlömethërri adäk. 19'Ba jø Juuth mo thööth oö kuna lïïmge Martha ki Meeri ni cøma cwïnyge kiper thøw cöökge. 20'Ba na wïnynyi ya Martha ni Jecu aöö, ena ci kuna røømge ki gø, ni dööŋ Meeri no opï piny yi øtø. 21Ni kö Martha jï Jecu, «Kwäärö, onää ï ena kany, coka ba doo thøw. 22'Ba këël kawaane ŋääa ni gïno pëënynyï ki Jwøk, ocïp Jwøki jïrï.»

23Kanyøgø Jecu aköö jïgø, ni «Cöögu ocäŋ ö maal.»

24'Ba Martha aköö jïre, «Ŋääa ni eno cäŋ ö maal kanyo tïŋ jiy maal ki yi thøø, cäŋo cuŋ pinynyi yie.»

25Ni kö Jecu jïgø, ni «Beeye aani wø tïŋ jiy maal ki yi thøø ni näga kwøw. Ŋat wø jïëy ni ŋääth aani, këël doo thøw, eni doo cäŋa kwøwø. 26'Ba ŋat mo kwøw, mo ojïëy ni ŋääth aani, ba thøw bäre bäre. ?Manøgø kärï jïëö?»

27Ni løgi ya Martha jïre, «Kare møn, Kwäärö, aana jïëy ni beeye ïïni na Krictø na näk O Jwøk, ŋata wäŋŋi ni ööa piny.»

Kanya Ö Meeri Baŋ Jecu

28Køøre Martha, na nø caan luummögø, ena cøø ni cwøl coki ma Meeri ni caan gø jï gø mëëth, ni «Dïpööy ena kany, ni pëënynya ïïni.»

29'Ba na wïnynyi ya Meeri, ena laar ö maal ni ci baŋ gø. 30'Ba Jecu poot kär ci dï paac, 'ba poot ena kanya røømge yie ki Martha. 31'Ba jø Juuth na en yi øtø ki Meeri ni cøma cwïny gøøni, na jootge Meeri no olaar ö maal ni cøøa wøk, gena läp køøre; ki baŋge ni eni cøøa kuna jwöŋe bäät bwörö. 32Kanyøgø na pïïc Meeri kanya en Jecu yie ni joot gø, ena päth tiet gø, ni kööe jïgø, «Wui Kwäärö, onää ï ena kany, coka ba doo thøw.»

33'Ba Jecu na joot Meeri ni jwöŋö ki jø Juuth moa öö ki eni na aciel, cwïnye apädhö døc ni kïmme. 34Ni kööe, ni «?Eni you koonya kaa?»

Ni köge jïre, «Ööï, Kwäärö, ö neenï.» 35Ni ö Jecu ni put jwöŋö.

36'Ba kanyøgø jø Juuth aköö, «Neennu mëëye ki gø.»

37'Ba møøk dïge aköö, na «?Aŋø, eni na jap nyeŋ ŋata näk cwør, ŋatøgø ba dee mänö ki thøø?»

Kanya Tïŋ Ladhara Maal Ki Yi Thøø

38Kanyøgø cwïny Jecu acäŋ pädhö døc, ni ci bäät bwörö. 'Ba bwöyögøøni beeye kany mo ŋaam yi kïdi. Ni da kïdi mør mo oŋiel dhee. 39Ni kö Jecu, «Daagu kïdi.»

'Ba Martha na näk cöök ŋata näk othøwi aköö jïre, «Kwäärö, kawaane ennø, dëëre onø kwääö, kiper nïr thøwe oløny na aŋweenø.»

40Ni kö Jecu jïre, «?Aŋø, kära caana jïrï, ni ‹Ni näk ïïno jïëy ni ŋäädhï, ajiem Jwøk diï neenø›?» 41Kanyøgø kïdi adaakge. Ni ö Jecu ni lwïthe maal ni kööe, «Awuuö, a duua met ec jïrï kiper na wïnynyï mara. 42Ni ŋääa ni mara wø wïnynyï wïnynyö cooth. 'Ba man, caana kaper jøøi ni cuŋŋi buuta en, kiper nee jïëcge naa jääŋŋa ïïni.» 43'Ba na nø caan gïnögøøni, ena cwötö ki dwøl mo päl, ni kööe, «Ladhara, ö wøk!» 44Ni put ŋata näk othøwi ö wøk ni ceŋŋe ki tiete omeenø ka abïïe, ni wïïe obøønyø ka abïï mør. Ni kö Jecu jïge, «Pätu eni nee aae.»

Kanya Ö Dïbwöthe Mo Jø Juuth Na Tutge Ki Luubö Bäät Jecu

(Mathiew 26:1-5; Maak 14:1-2; Luk 22:1-2)

45Kanyøgø jø Juuth mo thööth moa öö ki Meeri, na neenge gïna tïïc Jecu, gena jïëy ki eni ni ŋääthge gø. 46'Ba møøk dïge, gena ci baŋ jø Paricith ni waacge gïna tïïc Jecu. 47Køøre kwääc laam ki jø Paricith, kwääc løøe acooŋge kanya ciel, ni köge, na «?Agïnaŋø noo tïïø? Kiper ŋati atïmö ki ŋïïce mo thööth. 48Ni näk mo wiiø wiiø ni tïïö na enøgønø, jiy bëët jïëy ki eni ni ŋääthge gøøni, ni ö jø Römmi ni öge ni nyakge Øt Jwøk marø ki pøø bäre.»

49'Ba dhaanhø aciel dïge mo cwøl ni Keepa, ma Kwääy Lam Mana Dwøŋ cwiinøca, aköö jïge, «Bäŋ gïn ŋäyu møn. 50?Aŋø, kuyu ni doo beerra eni ki mana di dhaanhe acielli thøw kiper jiy, ki man räny paaci bäre?» 51'Ba manøgø käre caanø ki wïïe keere. 'Ba kiper mana näk ena Kwääy Lam Mana Dwøŋ cwiinøca, beeye na caan gø ki køør mana cïp Jwøki cwïnye, ni Jecu doo thøw kiper paac bäre, 52ni paa kiper paac keere, 'ba kiper nee nyïï Jwøk moa näk okeethø tiet mïëri møøk nee cooŋ kanya ciel. 53'Ba dïcäŋöca gena put tïmö ni ge määnyö ki jöö man 'näkge Jecu ki gø.

54Kanyøgø Jecu atïmö ni ba cäädhi dï jø Juuth këët ni ree ee nyoodhø. 'Ba ena dak kanyøgøøni ni ci pääny mør mo cwøl ni Ipariem mo ena ŋäth mïëri møga, ni bëëde kaace ki bääge.

55'Ba kanyøgøøni ajwöm-cam Cäŋa Pööth Thøøe Yie mar jø Juuth kare ocäännö. Ni ö jiyi mo thööth ki dï paac ni cige yi Jerucalem, kanya poot cäŋ Cäŋa Pööth Thøøe Yie ni poodi, kuna jiiŋge dëëtge. 56Ni neetge Jecu, kanya cuŋge yi kal mar Øt Jwøk Mana Dwøŋ, ni ge pëënynya dëëtge, na «?Agïnaŋø na caarru? ?Eni ööa ya ajwöm-cam?» 57'Ba kwääc laam ki jø Paricith onø cïpö ki dwøl, ni noo dee dhaanhø mo ŋäc kanya en yie, wär caane jïge, kiper nee eni makge.

Currently Selected:

Jøøn 11: AnyuB

Highlight

Copy