Jøøn 13

Kanya Ö Jecu Na Lwøk Tiet Bääŋi

1'Ba kanya cään kar ajwöm-cam Cäŋa Pööth Thøøe Yie, aŋäc Jecu ni kanyo aae pinyi en noo ci baŋ Wuuö kare acäännö. Ni eni mëër ki jiye na en piny, ni bëëdö ni mëër ki geni këël aŋuun kwøw mare. 2'Ba kanya pootge ni ge ena kar cam, na anägö gïn mør ee nø kïth cwïny Juudac Ickarïët na näk o Cayman nee Jecu cïbe ceŋ nyïïmänne, 3Jecu na ŋäc gø ni jammi bëët ocïp Wuue cere, ni eni ööi ka baŋ Jwøk, ni eni cäŋa døø baŋ Jwøk, 4aö maal kar cam, ni cïp abïïge piny, ni lwöte ki puutha, ni dwøl gø dëëre. 5Køøre pïï akøny ya athäänh ni täge ki man lwøk tiet bääge, ni pooc geni ki puunhnha näk ee dwøl dëëre. 6Ni ö baŋ Cayman Piter. Ni kö Piterri jïre, na «?Aŋø Kwäärö, tieta diï lwøø?»

7Ni løgi ya Jecu jïre, «Man tïïa en kuyï ennø, 'ba noo näk køøre tiere ojootï.»

8Ni kö Piterri jïre, «Ïïni tieta ba diï lwøø na bäre.»

Ni løgi ya Jecu jïre, «Ni näk ï ba lwøa, jïrï bäŋ karï buuta.»

9Ni kö Caymanni Piter jïre, «Kwäärö, paa tieta keerge noo lwøgï, 'ba këël ceŋŋa ki wïïa thuwø.»

10Ni kö Jecu jïre, ni «Ŋat mo onø lwøk, ba many lwøk këët, 'ba beeye tiete keerge na dee lwøø, kiper dëëre bäre waany. Ni uuni, dëëtu waany, 'ba paa u bëët.» 11Kiper eni ŋato cïp eni ceŋ nyïïmänne ŋääe. Beeye na caan luummi, ni «Paa dëëtu bëët ni waany.»

12'Ba na lønye ki lwøk tietge, ni lwør abïïge ni døø kare, ena köö jï bääge, «?Gïna tïïa jïïu en tiere ŋäyu? 13A wø cwøllu cwølø ni Dïpööy, ni cwøllu a ni Kwäärö, ni beeye kare, kiper beeye aani. 14Ni näk aani na näk Kwääyu, ni näga Dïpööy, tietu yaa lwøø, uuni thuwø ŋati man nø tiet watge dee lwøø. 15Kiper man beeye nyuudhi mana cïba jïïu, nee tïïyu thuwø kaawat mana tïïa gø jïïu. 16Adïëri møn, a caana gø jïïu, ni ŋat tïïc ba dwøŋŋa eni ki kwääye, wala eni na jääŋŋi ba dwøŋŋa eni ki ŋata jääŋ gø. 17Ni näk mo gïïögø ŋäyu, uuno gwïëth kany wø tïïyu geni. 18A ba cäänö kaperu bëët. Aani moa jiera ŋääa. 'Ba mana no ogöörö thura kare, na en nø, ni ‹Eni na cam møga, aana cääbe ko opunye.›#Dut Pwøc 41:9 19'Ba a caana gïn jïïu kawaane, kany poode ni poot kär tägö, kiper kanyo täge nee u jïëyu ni beeye aani na Eni. 20Adïëri møn a caana gø jïïu, ni ŋat wäro jïëc ŋato jääŋŋa, jïëya aani; ni ŋato wäro jïëc aani, jïëya eni na jääŋ aani.»

Kanya Ö Jecu Na Nyooth Ŋato Cïp Eni Ceŋ Nyïïmänne

(Mathiew 26:20-25; Maak 14:17-21; Luk 22:21-23)

21'Ba na løny Jecu ki caan luummögø, cwïnye apädhö, ni put dwøre caan, ni kööe, na «Adïëri møn, a caana gø jïïu, ni dhaanhø aciel dïïu aano cïp ceŋ nyïïmän.» 22Ni ö bääge ni neetge nyeŋge, ni ŋata cääne kipere kucge. 23'Ba dhaanhø aciel dï bääge mana mëër Jecu ki gøøni, ree ee nyaaŋ piny na akicge cään ki Jecu.

24Kanyøgø Cayman Piter amuuŋ bäät ŋatøgø ni kööe, «Caan ŋata cääne kiper gø jïwa.»

25Køøre ŋata näk ree ee nyaaŋ piny na akicge cään ki Jecu aköö, ni «?Kwäärö, aŋa na wärï?»

26Ni løgi ya Jecu, ni «Beeye ŋato cïba møgo cwenya en jïre.» 'Ba na nø cweny møø, amëëk Juudac o Cayman Ickarïët. 27'Ba køør møgøgø, Ceethan aput døny cwïnye. Ni kö Jecu jïre, «Gïno tïïyï, laar tïïc nø.» 28'Ba bäŋ dhaanhø aciel kar cam mo oŋäc tier gïna caane jï ŋatøgø. 29'Ba jø møøk acädö ni Jecu caana gø jïre, ni «Ci ŋëëwï ki gïï wø manynyi kiper ajwöm cam,» wala caana gø nee ci kuna cïpe ki gïrpiny jï jøøa can, kiper mana näk opïr gwel ena cere, e na Juudac. 30Køøre Juudac na nø lwør møgøgø, ena put aa wøk. 'Ba piny a wäär.

Luumma Caan Jecu Ni Mëërru Ki Røgu

31'Ba na nø aa Juudac wøk, Jecu aköö, ni «Kawaane, ajiem Wär Dhaanhø aci kare, ni ö Jwøki ni jïte ka ajiem ki ree. 32'Ba ni näk Jwøk ojiemø ki ree, eno jiem Jwøki thuwø ka ajiem mana en jïre, ni put gø jiem. 33Nyïïobwöre, a poot en buutu ka kany mo thiinh. Aani, aano cayu, 'ba kanyo cøøa yie, u ba doo maara ö yie, kaawat mana caana gø jï jø Juuth. Ni beeye ni caana jïïu en. 34'Ba a wëëga uuni ciik mo nyään, ni mëërru ki røgu, keda mana mëëra ki uuni, kiper nou tïmu nou mëër ki røgu thuwø. 35Beeye noo ŋäyi ya jø bëëti ni uuna bääga, ni näk mou mëër ki røgu.»

Kanya Caani Ya Jecu Ni Piter Ree Mooŋe Mooŋø

(Mathiew 26:31-35; Maak 14:27-31; Luk 22:31-34)

36'Ba Cayman Piter aköö jïre, ni «?Kwäärö, a kaa ŋø noo ciï yie?»

Ni løgi ya Jecu, ni «Kanyo cøøa yie en, ï ba doo ööa køøra. 'Ba ïïno läm køøra cään.»

37Ni kö Piterri jïre, ni «?Kwäärö, aŋø ni ba ööa køørï ennø? Jwïëya ocïba kiperï.»

38Ni løgi ya Jecu, na «?Aŋø, ïïni jwïëyï diï cïbö kipera? Adïëri møn, a caana gø jïrï, ni gwienø ba doo köök, ni riï poot kärï mooŋø ki aani kwöre adäk naa kuyï.»

Currently Selected:

Jøøn 13: AnyuB

Highlight

Copy