Jøøn 14

Kär Cwïnynyu Wëëgu Ränynyö

1'Ba Jecu aköö, ni «Kär cwïnynyu wëëgu ränynyö. Jïëyu ni ŋääthu Jwøk, ni jïëyu ni ŋääthu aani thuwø. 2Kiper po Wära da uudi mo thööth. ?Onää bäŋ tiere daa caana jïïu naa cøøa kuna jiiŋŋa karu? 3'Ba noo cøøa noo jiiŋŋa karu, aano cäŋ duuö, ni lwøra uuni ni käla uuni baŋa, ni kanyo bëëda yie, uuno bëëdö yie thuwø. 4Ni jöör kanyo cøøa yie ŋäyu.» 5'Ba Tøma aköö jïre, ni «Kwäärö, kanyo ciï yie kucwa. ?Jöörögøøni oŋäcwa gø nidïï?» 6Ni kö Jecu jïre, «Beeye aani na jöö, ni näga adïëri, ni näga kwøw. Ni bäŋ ŋat mo ö baŋ Wuuö ni näk eni ba ööi ka raa. 7Onää a ŋäyu, Wära dou ŋääö thuwø. 'Ba køør man ennø, tïme ni ŋäyu, ni you nø neen.»

8'Ba Pilip aköö jïre, «Kwäärö, nyooth Wuuö jïwa, nee cwïnywa pïge piny.» 9Ni kö Jecu jïre, «?Aŋø, a kär bëëdö ki uuni ki kany mo bäär? ?A poot kuyï en, Pilip? Ŋat maa ee neenø, Wuuö ee nø neen. ?Aŋø ni kööï, ni ‹Nyuth wa Wuuö›? 10?Ï paa ojïëy naa ena ri Wuuö, ni ö Wuue ni en raa? Ni luup moa cara jïïu, ba caana ka wïïa keera. 'Ba Wuuö ni wø bëëdö raa, beeye wø tïïc tïïe moe. 11Jïëyu ni ŋääthu aani, naa ena ri Wuuö ni ö Wuue ni en raa. Wala jïëyu ni ŋääthu aani kiper tïïe ki dëëtge.

12«Adïëri møn, a caana gø jïïu, ni ŋat wø jïëy ni ŋääth aani, tïïe moa tïïa otïïe thuwø, ni tïïe mo døøŋŋø geni ki moi otïïe, kiper a cøøa baŋ Wära. 13Gïn wäro pëënynyu ki nyeŋŋa, otïïa, kiper nee Wuuö jïte ka ajiem ki ri Wäädö. 14Noo dee gïn pëënynyu ki nyeŋŋa, otïïa.

Luum Dïkunyi Na Näk Jwïëc Jwøk

15«Ni näk mou mëër ki aani, luupa dou gwøø. 16'Ba Wuuö okwaa, ni mooc uuni ki Dïkunyi mør, nee bëëde ki uuni na bäre bäre, 17na näk beeye Jwïëc Jwøk ni wø nyooth adïëri, na näk jø piny ba doo maara jïëy ki gøøni. Kiper eni ba neen jø pinynyi, ni kucge gøøni. 'Ba uuni, eni ŋäyu kiper eni bëëdö ka uuni, ni eno bëëdö cwïnynyu.

18«U ba wiia ni uuna kïïe. A duua baŋu. 19Ki kany mo thiinh a ba neen jø pinynyi këët, 'ba aano neennu. 'Ba kiper na kwøa, uuno kwøw thuwø. 20'Ba dïcäŋöca oŋäyu naa ena ri Wära, ni enu raa, ni ena røgu. 21'Ba ŋat wø ŋäc luupa ni gwøk geni beeye ŋat wø mëër ki aani. 'Ba ŋat wø mëër ki aani, Wära omëëyi ki gø, ni ööa ni mëëya ki eni ni nyoodha raa jïre.»

22'Ba Juudac mør, mo patha Ickarïët, aköö jïre, ni «?Kwäärö, aŋø noo nyoothï riï jïwa keerwa, ni patha jï jø piny?»

23Ni løgi ya Jecu jïre, ni «Ni näk mo dhaanhø mëër ki aani, luumma gwøe gwøø, ni ö Wära ni mëëye ki gø, ni öwa baŋe ni bëëtwa ki eni na aciel. 24'Ba ŋat wø ba mëër ki aani, luupa bäŋ wø gwøe. 'Ba luupa wïnynyu, paa 'moa keere, 'ba beege mo Wära na jääŋ aani.

25«Moøgø bëët acaana jïïu, kany pooda naa bëëdö ka uuni en. 26'Ba Dïkunyi na näk Jwïëc Jwøk na en kur keere, ŋato jääŋ Wuue ki nyeŋŋa, uuno pwönynye ki jammi bëët, ni par wïthu ki jammi bëët moa kwøŋa caan jïïu. 27Bëët-mëër wø wëëga uuni, ni bëët-mëër mara wø cïba cïbö jïïu. Ni man wø cïba jïïu en, ba caal mana doo cïp pinynyi jïïu. Kär cwïnynyu wëëgu ränynyö, ni ba lwäyu. 28Awïnynyu na kööa jïïu, na ‹A aay, ni duua baŋu.› Onää u mëër ki aani, yïthu doo mïnnö, kiper a cøøa baŋ Wuuö. Kiper Wuuö dwøŋŋa eni ki aani. 29'Ba kawaane, anø caana jïïu kany poode ni poot kär tägö en, kiper kanyo täge nou jïëyu ni ŋäädhu. 30'Ba a ba cäänö ki luup mo thööth ki uuni këët, kiper kwäärö mar piny man en öö. 'Ba eni jïre bäŋ teek bääta. 31'Ba a tïïya mana caan Wära jïra, kiper nee ŋäc jø pinynyi naa mëër ki Wuuö. Ööu, cøø aa.»

Currently Selected:

Jøøn 14: AnyuB

Highlight

Copy