Jøøn 15

Kanya Ö Jecu Na Päär Ree Ki Jaath

1'Ba Jecu aköö, ni «Aana jaath mana näk adïëri. Ni Wära beeye ŋat wø tïïc jenni. 2'Ba bäät jenni bëët moa näk 'moa, mo wø ba nywøl ki nyïëdi, wø käla wøk. Ni bäät jenni bëët mo wø nywøl ki nyïëdi, wø goora goorø nee nywølge ki nyïëdi mo thööth. 3Uuna nø tïmö nou waany ki køør luumma caana jïïu. 4Bëëdu dëëra, 'ba aano bëëdö dëëtu. Kiper ba løny jïïu keeru ki man kännu ki nyïëdi ni näk mou ba bëëdö dëëra, kaa mana ba lønye jï bat jaath ki man ŋweele ki nyïëdi keere, ni näk mo ba bëëdö ri jaath. 5Beeye aani na jaath, ni uuna bäät jaath. Ŋat wø bëëdö dëëra, ni bëëda ree beeye wø känni ki nyïëdi mo thööth. Kiper bäŋ gïn mo maaru tïïc ni näk maa tøør. 6Ni näk dhaanhø ba bëëdö dëëra, eni weta wøk keda bat jaath, ni tale. 'Ba teeŋ bäät jenni moøgø ocooŋ kanya ciel ni leeŋi maac ni waaŋ ge. 7Ni näk mou bëëdö dëëra ni bëët luupa cwïnynyu, gïn wäro manynyu, pëënynyu. Otïïc jïïu. 8'Ba beeye gïn wø käl ajiem jï Wära, ni näk mou kännö ki nyïëdi mo thööth ni dëëtu you nyoodhø ni uuna bääga. 9Kaawat mana mëër Wuue ki aani, beeye na mëëra ki uuni. Bëëdu ni mëëya ena bäätu. 10'Ba ni näk luupa you gwøø, uuno bëëdö ni mëëya ena bäätu, keda mana gwøa luup Wära ni bëët mëëye bääta. 11Moi bëët a caana jïïu, kiper nee met ec mara bëëde cwïnynyu, ni ö met eci maru ni kadhe.

12«Man beeye dwøra, ni mëërru ki røgu keda mana mëëra ki uuni. 13Bäŋ dhaanhø mo jïre da mëër mo kaala man ö dhaanhe ni cïp jwïëye kiper nyïïawääte. 14Uuna nyïïawääta ni näk mana caana jïïu tïïyu tïïö. 15U ba cwøla ni uuna laaŋe këët. Kiper laŋŋø gïn wø tïïc kwääye kuue. 'Ba uuna cwøla ni uuna nyïïawääta, kiper jammi bëët moa wïnynya baŋ Wära anyoodha jïïu. 16Paa uuni na jier aani, 'ba beeye aani na jier uuni, ni kwanya uuni nou cou ni kännu ki nyïëdi, ni tïm nyïëdi mou ni bëëdö. Kiper manøgønø, nee gïn wäro pëënynyu Wuuö ki gø ki nyeŋŋa, nee cïbe jïïu. 17Man beeye ni caana jïïu en, ni ‹Mëërru ki røgu.›

Luum Män Mar Piny Ki Jø Jwøk

18«'Ba ni näk piny män ki uuni, wär ŋäyu ni ena kwøŋ männö ki aani kanya poode ni poot kär männö ki uuni. 19Onää uuna mo piny, piny doo mëër ki uuni kiper na nägu moe. 'Ba kiper mana nägu paa mo piny, ni jiera u wøk dï mo piny, beeye na män pinynyi ki uuni. 20Kär wïthu wïl ki luumma caana jïïu, ni ‹Laŋŋø ba dwøŋŋa eni ki kwääye.› Ni näk maa ege caannø, uuno caange thuwø. 'Ba ni näk luumma ege gwøø, luummu ogwøkge thuwø. 21'Ba moøgø bëët otïïcge dëëtu kiper nyeŋŋa, kiper na kucge Ŋata jääŋ aani. 22Onää a kär öö ni cääna ki geni, doo bäŋ ajäla bäätge. 'Ba kawaane bäŋ jöö mo bøthge ki gø ka ajäla kiper raacge. 23'Ba ŋat wø män ki aani, män ka Wära thuwø. 24Onää a kär öö ni tïïa dïge ki tïïe mo ba doo løny ki man tïïyi ya ŋat mørri jaak, dëëtge doo bäŋ ajäla. 'Ba kawaane aana neenge ni mänge ki aani ki Wära bëët. 25Ni beeye kiper luumma näk ogöörö ri ciik Jwøk moge nee thur kare, na køp, ni ‹Gena männö ki aani ki män mo bäŋ tiere.›#Dut Pwøc 35:19; 69:14 26'Ba kanyo ö Dïkunyi mano jääŋŋa baŋu ki buut Wuuö, na näk beeye Jwïëc Jwøk ni wø cïp adïëri, noo ööi ki baŋ Wuuö, gïra okøbe. 27'Ba uuni thuwø, gïra okøpu, kiper uuna bëëdö ki aani ki kanya täga.

Currently Selected:

Jøøn 15: AnyuB

Highlight

Copy