Jøøn 5

Kanya Ö Jecu Na Køny Dhaanhø Bäät Aguula

1'Ba na tïme na køør manøgøøni Jecu aci yi Jerucalem baŋ ajwöm-cam mar jø Juuth. 2Kanyøce yi Jerucalem da aguula mo cwøl ni Bethdhata ki dhi Ibaru, mo bääte da kwör rïc ma abïïc, mo ena buut Dhi Kiir Dïëk. 3Ni yïth kwör rïc moøgø da jiy mo thööth mo obut piny yïthge, mo dëëtge da täwe mo oruu, ni beege cööye ki ŋööte ki jiy moa näk dëëtge obäp.#5:3 Luubö man nut ki dhi Gïrïïk yïth weet Jøøn møøk moa cääŋŋe: ni ge køya kanyo wal pïïyi. 4 Kiper da nyïïatwiel maal mør mo wø cøøa ya aguula ki kwör møøk ni wëëk pïï walli. 'Ba køøre kany wø nø wal pïïyi, ŋat wø kwøŋ ci yie dëëre wø døøa kare ki ŋwello en dëëre. 5'Ba da dhaanhø aciel kanyøce mo dëëre da täw ki cwiiri ma pïëradäk ka abära. 6'Ba na ö Jecu na joot gøøni, ni ŋäc gø ni eni wø bëëdö no obut piny ni eno ruu kanyøce, ena köö jïre, «?Ï caya man køny ïïni?»

7Ni ö ŋata tuuwi ni løk gø jïre, ni kööe, ni «Kwäärö, bäŋ ŋat mo kïth aani ya aguula kany wø wal pïïyi yie, 'ba kany wø pooda naa poot cäädhö, dhaanhø mør laara ci yie naa poodi.»

8'Ba Jecu aköö jïre, ni «Ö maal ni lwørï pïënï ni cäädhï.» 9Ni put dëër ŋatøgø døø kare, ni lwør pïëne ni cäädhe. 'Ba dïcäŋögø beeye cäŋ jwömö.

10Kanyøgøøni jø Juuth aköö jï ŋata näk dëëre odøø kare, ni «Man a cäŋ jwömö. Ba doo beer ki køør ciik ki man käärï pïënï.»

11'Ba aløk ŋatøgø jïge, ni «Ŋata køny aani beeye na caan gø jïra, ni ‹Lwør pïënï ni cäädhï.› »

12'Ba gena köö jïre, na «?Aŋa na caan gø jïrï, ni ‹Lwør pïënï ni cäädhï›?»

13'Ba ŋata dëëre dwøk kare, ŋata køny gø kuue, kiper Jecu onø pööth dï lwaak mana päl kanyøce.

14'Ba na näk køøre, ena joot Jecu yi kal mar Øt Jwøk Mana Dwøŋ ni kööe jïgø, «Neenï, dëërï anø jöönnö. Kär niï bääyö këët, kiper nee bäŋe gïn mo raac mo kaala man mo pïï dëërï.»

15Ni ö ŋatøgø ni aae ni caan gø jï jø Juuth, ki man näk mo beeye Jecu na køny eni. 16Ni beeye gïnögø na ö jø Juuthi na caange Jecu, kiper mana tïïc køny manøgø ki cäŋ jwömö.

17'Ba aløk Jecu jïge, ni «Wära poot tïïö, ni pooda naa tïïö thuwø.» 18'Ba gïna ö jø Juuthi na kääth mana en cwïnyge kipere, ni ge caya man 'näkge gø, beeye kiper mana cwøl Jwøk ni wänni, ni päär ree ni ena aciel ki Jwøk, ni paa kiper mana dhal luum cäŋ jwömö keere.

Luum Teek Mar Wäädö

19'Ba Jecu aköö jïge, na «Adïëri møn, a caana gø jïïu, ni Wäädö bäŋ gïn mo dee maara tïïc ki wïïe keere, 'ba gïn wø neene ni wø tïïc Wuue beeye wø tïïe thuwø. Kiper gïn wø tïïc Wuue beeye wø tïïc Wäädö thuwø. 20Kiper Wuuö mëër ki Wäädö, ni nyooth gïï wø tïïe bëët jïgø. Ni tïïe mo døøŋŋø geni ki moi onyoodhe jïre, nee yïthu thäŋge. 21Kiper kaawat man wø ö Wuue wø tïŋ jøøa no othøw maal ni mooc ge ki kwøw, këël Wäädö thuwø cïpö ki kwøw jï jø wø manynye. 22'Ba Wuuö luup jiy ba ŋøle, 'ba luum ŋøl bäre awëëk Wäädö, 23kiper nee jiy bëët tïmge ni ge wøøra Wäädö, kaawat man wø wøørge Wuuö. 'Ba ŋat wø ba wøør Wäädö, Wuuö na jääŋ eni ba wøøre thuwø. 24Adïëri møn, a caana gø jïïu, ni ŋat wø wïny luumma ni jïëe ki eni na jääŋ aani, ree da kwøw mana näk adïëri mo bäŋ cuŋŋe. Ni eni ba doo cøøa kar ŋøl luup. 'Ba eno nø ö wøk ri thøø ni ci yi kwøw.

25«Adïëri møn, a cäänna uuni, da kany mo öö, ni beeye ennø, kanyo ö jøøa no othøwi noo wïnyge dwør O Jwøk. 'Ba jøw owïny gø, okwøw. 26Kiper kaawat man bëët Wuue ni kwøw ena cere, Wäädö thuwø teek kwøw awii cere. 27Ni wëëk teek mar ŋøl luup cer gø, kiper na näk ena Wär Dhaanhø. 28Kär yïthu thäŋŋö ki luummögø, kiper da kany mo öö, kanyo ö jøw oen yïth bwörri bëët noo wïnyge dwøre, 29ni öge wøk. Ni ö jøøa tïïc gïïa beyø, ni öge wøk ni cige yi kwøw. Ni ö jøøa tïïc gïïa reyø, ni öge wøk ni cige ya ajäla.

Luup Mo Køpa Gïr Jecu

30«Aani bäŋ gïn mo daa maara tïïc ki wïïa keera. 'Ba luup wø ŋøla ki køør mo wø wïnynya baŋ Jwøk, ni ŋøl mara thïïŋ, kiper a ba cac man wø manynya keera, 'ba a wø caya man wø many Ŋata jääŋ aani. 31Ni näk maa køpa dëëra keera, mana caana ba doo naa adïëri. 32'Ba da ŋat mør mo wø køpa gïra, ni ŋääa gø ni mare ni wø care kipera beeye adïëri. 33Uuna jääk baŋ Jøøn, ni ö eni ni køp gïra na adïëri. 34'Ba a ba bëën dwør dhaanhø mo caana gïra. 'Ba gïn caana en, caana kaper nou piem. 35Jøøn na bëëde caala lamba mo onyebø ni liel, ni yïthu met ki man bëëdu yi taye dïciel. 36'Ba gïn wø køp gïra, dwøŋŋa eni ki mar Jøøn, kiper gïïa tïïa ki dëëtge na näk owëëk Wuue aani nee thööra, beege wø køp gïra, naa jääŋŋa Wuue. 37'Ba Wuuö na jääŋ aani, gïra akøbe ki dëëre. 'Ba dwøre käru wïnynyö bäre bäre, ni dëëre käru neenø. 38Ni luumme ba en cwïnynyu, kiper na käru jïëy ki ŋata jääŋŋe ni ŋääthu gø. 39U wø määnyö yïth weet Jwøk, kiper you caarø ni yïth luupögø beeye noo jootu kwøw mana näk adïëri mo bäŋ cuŋŋe. Ni beege geni ni wø køp gïra. 40'Ba u kweeyø ki man ööu baŋa nou jïtu ki kwøw. 41'Ba ajiem mara ba jooda baŋ jiy. 42'Ba aani, u ŋääa, ni ŋääa ni mëëc Jwøk tøørø cwïnynyu. 43Aani, aana öö ki nyeŋ Wära, 'ba a käru jïëö. 'Ba ni näk da ŋat mør mo öö ki nyeŋŋe keere, beeye ŋato jïëyu. 44?Uuno jïëyu nidïï ni näk mou poot caya pwøc dhaanhø mør, nou ba cac pwøc man wø ööi ki baŋ Jwøk na näk aciel keere? 45Käru nou caara gø nou jääla jäälö nyïm Wära, 'ba beeye Modhe ni ŋääthu en, ni wø jääl uuni. 46Onää Modhe you jïëö møn, a dou jïëö, kiper ena göödö kipera. 47?'Ba ni näk moa gööre käru jïëö, uuna dou jïëy ki luupa nidïï?»

Currently Selected:

Jøøn 5: AnyuB

Highlight

Copy