Luk 10
10
Jecu Jääŋŋa Jiy Ma Pïërabïriiø Wøk
1'Ba køør manøgø Kwäärö ajëëdö ki jiy ma pïërabïriiø#10:1 Pïërabïriiø. Weeli møøk moa cääŋŋe köö ni pïërabïriiø kurriiø (këël täk luup 17 thuwø). møøk, ni jääŋ geni nyïme no oriewi oriewi, yïth mïëri ki kwöra dee ci yïthge bëët. 2Ni kööe jïge, ni «Pwödhö aciek døc, 'ba jø tïïc nøk. Kiper manøgønø, kwaayu wää pwödhö, nee jääk yi pwödhö mare ki jø tïïc. 3Cou nø. 'Ba neennu, aani, a jääŋŋa u wøk kaamar nyïïdïëk mo ena dï kwäänynye. 4'Ba käru käädö ki gïr gwel, ko opïr, ki war. Ni bäŋe ŋat määthu waŋjöö. 5'Ba øtø mano wäro dønynyu yie, wäru wø kwøŋu köö, ni ‹Bëët-mëër bëëde ødi.› 6'Ba ni näk da ŋat mo bëëdö ka bëët-mëër kaace, bëët mëër maru obëëdö bääte. 'Ba nee bäŋgø, bëët-mëër maru oduu baŋu. 7Ni putu bëëte ødøca, nou cämö ni mädhu ki gïïo mëëkge uuni. Kiper ŋat tïïc wø rømi ka gät tïïc mare. Ni ba dääŋu, nou cøøa ødi nø, ni cou ødi. 8'Ba paano wäro cou yie ni pänhge uuni, cammu gïïo cïp nyïmmu jaak. 9Ni kønynyu jøw otuu yi gø, ni kööu jïge, ni ‹Ennø, buc Jwøk anø ö kany mo cään ki uuni.› 10'Ba paano wäro cou yie, ni ba pänhge uuni, wär uutjïëthe moe caathu, nou köö, 11ni ‹Këël tør pou ni en tietwa en, teeŋwa dëëtu. 'Ba wär ŋäyu ni buc Jwøk anø ö kany mo cään ki uuni.› 12'Ba a cäänna uuni, noo tïmö ni theemma ajäl Cødam ki paanøca dïcäŋöca.
Luum Ajäla Mana Caan Jecu Dëët Mïëri Møøk
(Mathiew 11:20-24)
13«Otïmö ni raac jïrï, ï na Köradhin. Noo tïmö ni raac jïrï, ï na Betheeda. Kiper doo naa tïïe moa døøŋŋø na tïïc dïïu, tïïca yi Tayar ki Caydan, dëëtge doo na ege nø løk cøøn, ni ge käära keece na abïïe ni geno pï piny yi bur. 14'Ba otïmö ni theemma ajäl Tayar ki Caydan ka ajäla maru, kanyo ŋøl luup yie. 15?'Ba ï na Kapernaam, iï caarø niï doo røønyø maal? Beeye kar ajäla noo leeŋ ïïni yie.»
16Ni kö Jecu jï bääge, ni «Ŋato wïny maru, wïnynya mara. Ni ŋato kwier uuni, kwiera aani. 'Ba ŋato kwier aani, kwiera eni na jääŋ aani.»
Kanya Duu Jøøa Näk Pïërabïriiø Na Jääŋŋi
17Ni ö jøøa näk pïërabïriiø ni duuge ni yïthge met, ni köge, ni «Kwäärö, këël anäge atïmö ni lwäär ki waani kany wø wïnyge nyeŋŋï.» 18'Ba Jecu aköö jïge, ni «Ceethan ajooda ni pänhnhö ki maal kaamar agaackøth. 19Neennu, uuna wëëga teek ki man nyøru thwöre ka agarapi, ki teek ki man böötu teek mar nyimän bäre na näk anägö, ni bäŋ gïn mo gwaar uuni. 20'Ba kär yïthu mïnnö kiper mana tïm juuwi moa reyø ni lwäär ki uuni, 'ba yïthu mïnge kiper mana näk mo nyeŋŋu ogöörö maalø.»
Kanya Ö Jecu Na Pwøc Jwøk
(Mathiew 11:25-27; 13:16-17)
21'Ba yi caannøca, Jecu yie amïnnö ki ri Jwïëc Jwøk na en kur keere, ni kööe, ni «Ïïna pwøa, Awuuö, ï na Kwääc maal ki piny, kiper mana mänï gïï ki jøøa wïthge leer na ŋäc jammi, ni nyoothï geni jï obwöre moa mar. Kiper beeye mana manynyï ki met yiï, Awuuö.
22«Jammi bëët onø wëëk Wära aani, ni bäŋ ŋat mo ŋäc Wäädö, 'ba beeye Wuuö keere, ni bäŋe dhaanhø mo ŋäc Wuuö, 'ba beeye Wäädö keere, ki ŋat wø met yi Wäädö ki man nyooth eni jïgø.»
23'Ba kanyøgøøni Jecu aluk baŋ bääge, ni cään ge keerge, ni kööe, ni «Gwïëth en røk nyeŋ wø neen gïï wø neennu. 24Kiper a cäänna uuni, ni nyïïkuk Jwøk mo thööth ki nyeye, gena many man neenge gïï ni neennu ii, 'ba kärge neenø. Ni manyge man wïnyge gïï ni wïnynyu ii, 'ba kärge wïnynyö.»
Luum Gïna Beer Na Tïïc Nyï Cameria
25'Ba kanyøgø, nyen mør ma ŋat wø caan tiet ciik Jwøk aö maal ni päänynya Jecu, ni kööe, ni «?Dïpööy, agïnaŋø noo tïïa naa jïta ki kwøw mana näk bäŋ cuŋŋe?»
26Ni kö Jecu jïgø, na «?Agïnaŋø na näk ogöörö yïth ciik Jwøk? ?Wø kwaanï gø nidïï?»
27Ni løk gø, ni « ‹Ï doo mëër ki Wuuö Jwøk na näk Jwøï ki cwïnyï bäre, ki jwïëyï bäre, ki teegï bäre, ka acaayï bäre. Ni mëërï ki ŋat mør kaawat man wø mëërï ki dëërï.› »#Tiet Ciik 6:5; Ciik Kiper Dïlämme 19:18
28Ni kö Jecu jïgø, na «Aduuï na kare. Put bëëtö niï tïïya gø, niï kwøwï.»
29'Ba na tïme ni manynya man piem dëëre, ena köö jï Jecu, ni «?Ŋat mør aŋa ni daa mëër ki gø?»
30Ni løgi ya Jecu jïre, ni «Da dhaanhø mør mo oaay Jerucalem ni cøøa Jerikö, ni päth ceŋ dïtwïëte, ni twierge eni, ni pwötge gø, ni aacge, ni wiige gø piny ni kare cään ki thøø. 31'Ba kanyøgø da dïlämi mør ma aöö mo cura jöörögø. 'Ba na joot ŋatøgø, kar gø aŋaade. 32Kaawat manøgø thuwø ŋat mør ma ŋat tuuŋ Libay aöö ki kaace ni joot gø, ni cäŋ gø ŋaatø. 33'Ba da nyï Cameria mør ma aöö ki jöörögø thuwø, ni pïïe kanya en ŋatøce yie. 'Ba na joot gø, cwïnye apädhö ki gïr gø, 34ni ci baŋ gø, ni twöc ŋwiit gø ka abïïe, ni maaw ki køøŋ nyïïomøki ee thii nyeŋge. Ni kïth gø bäät arëëne kiree, ni kïth gø øt wëëlle, ni gwøk gø. 35'Ba na näk aruunnø man, akän wøk ki gwel ariiø, ni mëëk ge ŋata en øt wëëlle cere, ni kööe, ni ‹Gwøk eni. 'Ba ni näk moøgø rëëm, ocoola jïrï kanyo duua.› 36?Aŋa nø, na wat nyena päth ceŋ dïtwïëte, dï jøøa na adäk yøø?»
37Ni kö ŋatøgø, ni «Beeye ŋata køny gø.»
Ni kö Jecu jïgø, «Ciï ni tïïï na enøgønø thuwø.»
Kanya Ö Jecu Na Liim Martha Ki Meeri
38'Ba kanyøgø Jecu ki bääge kanya cääthge waŋjöö, ena pïï paac mør, ni pänhnhi ya nyaan mørri mo nyeŋŋe Martha paare. 39'Ba nyaanøgø jïre da coki ma nyakøø mo nyeŋŋe Meeri, na pï tiet Kwäärö ni wïnynya pwöc mo gø. 40'Ba Martha wïïe akiere ki tïïc caammi. Ni ci baŋ Jecu ni kööe, na «?Aŋø Kwäärö, baŋ gïn caarï ki man näk mo coka tïïc caammi ee wëëk aani keera? Caanï jïre naa kønye.»
41'Ba aløk Kwäärö jïgø, ni «Martha, Martha, wïïï akierï ni dëërï ii öölö ki jammi mo thööth. 42'Ba da gïrpiny aciel keere na doo manynyø. 'Ba Meeri mana beer ajiere, mo bäŋ ŋat mo doo käla gø wøk cer gø.»
Currently Selected:
Luk 10: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
