Luk 11

Kanya Ö Jecu Na Pwöny Bääge Ki Lam

(Mathiew 6:9-13; 7:7-11)

1Dïcäŋ aciel Jecu alämö kanymør. 'Ba kanya lønye ki lam, bääŋe aciel aköö jïgø, ni «Kwäärö, pwöny wa ki lam, kaamar Jøøn na pwöny bääge.» 2Ni kööe jïge, ni «Kany wø lämu, wäru wø kööu,

«ni ‹Wääwa, nyeŋŋï wøør. Buyï ööe. 3Mooc wa ki cam man wø manywa ki yïth nïne bëët. 4Ni weyï moa bacwa, kiper waani thuwø, jø wø bääö dëëtwa bëët wø wecwa wiiø. Ni ba bwøthï wa kany mo wa di päänynyö yie.› »

5Ni kö Jecu jïge, na «?Aŋa dïïu ni jïre da nyawatge mo doo cøøa baŋe ki dï wäär, ni kööe jïgø, ‹Nyawat, a mänynyö baŋï ki muunni adäk, 6kiper da nyawatwa mo oöö, mo käla kany mo bäär, 'ba atïmö ni bäŋ gïn cam mo cïba nyïme.› 7Ni dee gø løø ki yi øtø, ni ‹Kär a öölï. Dhi øtø onø cïëgö, naa ena bäät pëëm ki nyïïa. Ba løny jïra ki man ööa maal niï mooa ki gïrpiny.› 8A cäänna uuni, ni këël eni ba doo ööa maal ni mooc gø ki gïrpiny kiper na näk nyawatge, eni doo ööa maal kiper mana reeth ree ni mooc gø ki gïno cane.

9«'Ba a cäänna uuni, pëëu, ocïp jïïu. Cääu, ojootu. Dööŋu, ojap jïïu. 10Kiper jiy bëët mo wø pëëö, wø di cïbö jïge, ni ŋat wø määnyö, wø joode joodø. Ni ŋat wø dööŋö, wø di jabø jïre. 11?A uune mane ni en dïïu, ni näk mo opëëny wääde ki rëëö, ni mooc gø ki thwöl na kar rëëö? 12?Wala eni pëënynya tøŋ gwienø, ni mooc gø ka agarap na kar tøŋø? 13?'Ba ni näk u na näk jø raay muuö ŋäyu ki man cïpu ki muuce mo beyø jï nyïïu, a Wääu ni en maal nø, okääŋe nidïï ki man cïp Jwïëc Jwøk na en kur keere jï jø wø pëëny eni?»

Anäge Wø Rïëm Wøk Ka Teek Bieldhebap

(Mathiew 12:22-30; Maak 3:20-27)

14'Ba kanyøgø Jecu rëëmma wøk ka anägö mo dhaanhø ee tïïö ni ba cäänö. 'Ba kanya ö anäŋŋögø wøk, ŋata näk ba cäänö atïmö ni cäänö, ni thäŋ yïth jiyi.

15'Ba jø møøk dïge aköö, ni «Eni anäge wø rïëm wøk ka teek Bieldhebap, na näk kwääy anäge.»

16'Ba jø møøk aköö ni ge manynya ŋïï baŋe mo ööi ki maal, ni ge päänynya eni.

17'Ba moa caarge ŋääe, ni kööe, ni «Mïëri bëët mo wø pääŋ rege, bëëdö no ränynyö, ni ö jø dhi øtø mo wø pääŋ rege ni päthge. 18?'Ba ni näk Ceethan thuwø dëëre ee pääŋŋö keere, buye a dee cuŋŋö nidïï? Kiper uuna köö, na anäge wø riema wøk ka teek Bieldhebap. 19?'Ba ni näk ma anäge wø riema wøk ka teek Bieldhebap, a jø pou nø, wø rëëmge wøk ki nyeŋ ŋa? Beeye geni noo ŋøl maru piny. 20'Ba ni näk cer Jwøk beeye wø riema anäge wøk ki gø, beeye buc Jwøk na ö bäätu. 21Kany wø dee dhaanhø mo teek mo cere da tøŋ mo koora paare, jape ba ränynyi. 22'Ba ni näk da ŋat mør mo teeka eni ki gø mo öö, ni päär bäät gø ni bööt gø, jap lenye na näk ee ŋäädhö lwøre lwørø, ni twier jap gø ni pääŋ gïïe na twiere. 23Ŋat wø ba en kura, män ki aani, ni ŋat wø ba cuuŋö ki aani, mare keth.

24«Kany wø ö jwøa raaci wøk dëër dhaanhø, eni wø wïïra kany mo bäŋ pïï ni manynya kar jwöm. 'Ba wø ba jïte, eni wø köö, na ‹A døøa øda, kanya kwøŋa bëëtö yie.› 25'Ba noo ööe, cwäne cwänö no onø jwiec no ojiiŋŋø. 26Kanyøgønø, eni wø aay ni känne ki juu abïriiø møøk mo kadha rääö marge ki mare, ni dønyge yie, ni putge bëëtö kaace. Ni ö bëët ŋatøca ni tïme ni raac døc ni kaala mana dïkwøŋ.»

Luum Gwïëth Mana Näk Adïëri

27'Ba na caan gïnögø, nyijø mør mo ena dï lwaak dwøre atïŋ maal, ni kööe jïgø, ni «Gwïëth en ri yia käär ïïni, ki kööra dhøøthï.» 28'Ba aløøe ni kööe, ni «Gwïëth doo ena ri jø wø wïny luum Jwøk ni gwøkge gø.»

Kanya Ö Jecu Na Jääl Jøøa Many Ŋïï

(Mathiew 12:38-42)

29'Ba na tïm lwaae ni thöönhnhö, Jecu aköö, ni «Beenhnhi en, gena jiy mo reyø. Ge manynya ŋïï, 'ba bäŋ ŋïï mo nyooth jïge, 'ba beeye ŋïï mar Joona keere. 30Kiper Wär Dhaanhø otïmö na ŋïï jï beenhnhi en, keda mana ö Joona na tïme na ŋïï jï jø Nineba. 31'Ba nyenynya näk dhaagø mar paana en jï løø tier-piny, ocuŋŋi ki beenhnhi en dïcäŋo ŋøl luup yie, ni jääl geni. Kiper eni ööi ka kany mo bäär døc kuna wïny leec wïc mar Cølöman. 'Ba ennø, da gïn mo dwøŋŋa eni ki Cølöman mo ena kany. 32'Ba jø Nineba, geno cuŋŋi ki beenhnhi en kanyo ŋøl luup yie, ni jäälge geni. Kiper geni cwïnyge aløkge kanya ö Joona na køp luum Jwøk jïge. 'Ba kawaane da gïn mo dwøŋŋa eni ki Joona mo ena kany.

Pwöc Mana Caan Na Leer Ki Ri Lamba

(Mathiew 5:15; 6:22-23)

33«Bäŋ ŋat mo nyep lamba ni cäŋ gø kïth yi buur wala tier dak, 'ba wø cïbe bäät tharabëëta, kiper nee jø wø duny øtø nee tar jootge. 34Waŋï beeye lamba mar dëërï. Ni näk waŋï tøŋ, dëërï bäre orømø ki tar. 'Ba ni näk mo waŋï oränynyö, dëërï bäre orømø ki muudhö. 35Kiper manøgøøni, gwøk dëërï nee tayø ni en dëërï enø ba tïme na muudhö. 36'Ba ni näk dëërï orømø ki tar ni bäŋ kany mo cøl, dëërï bäre ena yi tar møn, keda man wø ö lamba wø meeny ïïni ki taye.»

Kanya Ö Jecu Na Jääl Jø Paricith

(Mathiew 23:1-36; Maak 12:38-40)

37'Ba kanya løny Jecu ki cäänö, ena pëëny ŋat Paricithi mør nee ö paare baŋ cam. Ni cøøe ni pï piny kar cam. 38'Ba kanyøgø ŋat Paricith manøgø yie athäŋŋö kiper mana neen gø, ni ceŋŋe käre kwøŋ lwøk kiper cam ki køør kööŋŋö mar jø døøŋŋø. 39'Ba Kwäärö aköö jïgø, ni «U na jø Paricith, u wø peny ŋää awal ki ŋää athaa, 'ba yïthu päŋ ki møt ki raay. 40?U ni bäŋ wïdhi, aŋø, ŋata cwääc ŋää gïrpiny, yi gø käre tïïö thuwø? 41'Ba beerra man cïpu jï jøøa can røk gïï wø en ya athaa. Kanyøgø nø, jammi bëët tïmö ni waany jïïu.

42«'Ba otïmö ni raac jïïu, u jø Paricith. Kiper u wø cïpa paac wïth jammi na jëëthe røk gïï wø thenh thenh wø piith bëët,#11:42 Gïï wø thenh thenh moøgø beege gïï wø ŋwääi ni met ni wø kïth yi kadø. ni weyu mëëc Jwøk ki ŋøl luup ma kare na caane. Gïïögø beege gïïa dou tïïö, ni ba weyu moøgø thuwø. 43Otïmö ni raac jïïu, u jø Paricith, kiper yïthu wø met ki kwör bëëte moa beyø geni yïth uut acook lam, nou manynya man määth uuni kwör gath. 44'Ba otïmö ni raac jïïu, kiper u caala bwör mo ba nëëni mo jiy cäädhö ki bäätge jaak ni kucge.»

45'Ba aløk nyen mørri mo ena røk jø wø caan tiet ciik Jwøk, ni kööe, ni «Dïpööy, na caanï gïnögø ï geela waani thuwø.»

46Ni kö Jecu, no «Otïmö ni raac jïïu thuwø, u wø caan tiet ciik Jwøk. Kiper beeye u wø kïth tëër bäät jiy mo peek ki man tïëti, ni u ki dëëtu gïïö peek yøø ba maaru gut këël ki lweetu oceele. 47Otïmö ni raac jïïu, kiper uuni, uut bwör mo nyïïkuk Jwøk wø geerru geerø, jøøa 'näk kwäyu. 48Kiper manøgønø, u nyootha dëëtu ni uuno jïëy ki gïïa tïïc kwäyu. Kiper beeye kwäyu na 'näk geni, ni ö uuni ni geerru uut bwöcge. 49Ni beeye na caani ya Jwøki ki leec wïïe, ni ‹Aano jääk baŋge ki nyïïkuk Jwøk ki nyïïatwieli. 'Ba møøk dïge onäkge, ni caange møøk,› 50kiper nee kwöc nyïïkuk Jwøk bëët na nääŋŋi ki kanya täk pinynyi, nee cool ri beenhnhi en, 51ni tägi ka rem Eebel këël mano këët ri rem Dhekaraya,#2 Luup Nyeye 24:20-21 ŋata nää yaakic gïn wø cïp olämme bääte ki Øt Jwøk. Adïëri møn, a cäänna uuni, ni kwöri moøgø ocool ri beenhnhi en. 52Otïmö ni raac jïïu, u wø caan tiet ciik Jwøk. Kiper muktää man wø jap jöör adïëri ki gø, alwørru. Uuni ki dëëtu, u kär ci yie, ni tïmu nou gëëŋŋa jøøa doo dønyø.»

53'Ba kanya aac Jecu kaace, dïpööye mo ciik Jwøk ki jø Paricith gena tïmö ni eni ege bïdhö døc, ni ge menna gø ki pïëc kiper jammi mo thööth, 54ni ge køya gøøni, nee jïtge ki luubö mo caane mo maage gø ri gø.

Currently Selected:

Luk 11: AnyuB

Highlight

Copy