Luk 21

Luum Muuy Mana Cïp Cï Thøø

(Maak 12:41-44)

1'Ba kanyøgø Jecu alwïthö ni neen jøøa no okwär ni ge kïtha muuce moge yi gïn wø cïp muuce yie. 2Ni neen cï thøø mo can, ni eni kïtha mïlïïne ariiø yi gø. 3Ni kööe, na «Adïëri møn, a caana gø jïïu, ni nyijøøgø ni can na cï thøø enø, acïpö ki jammi mo kaala jap jøøgø bëët. 4Kiper jøøgø bëët, ge lwöta ri japa thööth na en jïge. 'Ba nyijøøgø, këël na cane, japa dee bëënnö bëët akïth yi gø.»

Luum Ŋïïce Moo Nyooth Cuŋ Piny

(Mathiew 24:1-21; Maak 13:1-19)

5'Ba bääge møøk atïmö ni ge cara gïr Øt Jwøk Mana Dwøŋ keda mana näk odøøc mo mïërö ki kïte ma wøpe ki jëëthe. 6'Ba Jecu aköö, ni «Nee per gïïo ni neennu yøø, cääŋŋe oööi, kanyo bäŋe kïdi aciel kany mo dööŋ bäät watge ni ba leeŋ piny.» 7Ni pëënyge Jecu, ni «?Dïpööy, a wäne noo täk gïïögø, na agïnaŋø noo näk ŋïï kanyo tïm gïïögø ni karge cään ki tägö?» 8Ni kööe, ni «Gwøgu rou, nee wïthu ba maaŋŋi. Kiper jiy mo thööth oööi ki nyeŋŋa, ni köge, ni ‹Beeye aani na eni,› ni ‹Kanya wäŋŋi acäännö.› Kär nou cøøa køørge. 9'Ba kanyo wïnynyu lenye ko oduuru, kär nou bwøk. Kiper gïïögø kwøŋa tägö, 'ba cuŋ piny ba laar öö.»

10Kanyøgø Jecu aköö jïge, ni «Paac mør dëëre othïïŋe ri paac mør, ni ö nyeya mørri ni thïïŋ ree ri nyeya mør. 11Ni tïm kwör mo thööthi ni jäŋŋi døc, ni jït mïëri møøk ki meele ki gïï mo leth, ni jït pinynyi ki jap böök ki ŋïïce mo døøŋŋø mo ööi ki maal. 12'Ba kanyo poot gïïögø bëët, uuno maaŋge, ni caange uuni, ni cïpge uuni ceŋ jø uut acook lam ki uut twöc. 'Ba uuno kïthge nyïm nyeye ki nyïm kwääri kiper nyeŋŋa. 13Kanyøca nø, beeye kanyo caannu gïra. 14'Ba cïbu cwïnynyu piny nø, ni bäŋe gïn mo lääŋŋu ennø kiper gïno dwøgu jïge. 15Kiper uuno mooa ki dhøk ki leec wïc, mo ba maar lønyø jï nyïïmännu ki man duunge uuni, wala man piemge gø. 16'Ba këël jøøa nywøl uuni, ki nyïïmëëgu, ki tuuŋu, ki nyïïawäätu, uuno kïthge ceŋ jø møøk, ni 'näkge møøk dïïu. 17Ni ö jiyi bëët ni mänge ki uuni kiper nyeŋŋa. 18'Ba bäŋ jëën wïthu mo ränynyi. 19'Ba jwïëyu ojootu ki køør jïëny gïï mo leth moo jwørru.

20«'Ba kanyo jootu Jerucalem no ociel jø tøŋŋi, kanyøgønø, wär ŋäyu ni kar ränynye ocäännö. 21Kanyøca nø, jøw oen Judia, wär bwøkge bäät kïte, ni ö jø wø en dï pääny, ni aage wøk yie. Ni ö jø wø en ŋää pääny wøk, ni ba cige yie. 22Kiper nïrögøøni beege nïro cool kwöri yïthge, kiper nee luup moa näk ogöörö nee thurge karge bëët. 23'Ba otïmö ni leth døc jï määro yïthge da jiy, ki määro dhwödhö yïth nïröke. Kiper gïï mo leth døc ööa yi ŋöömö man, ni ena bäät jøøi ii, 24ni 'näk geni ko opëëlle, ni peec geni dï mïëri bëët. 'Ba Jerucalem onyak juurre ni macge gø, këël mano ö kwör juurre moa wäŋŋi noo thurge karge.

Luum Ööny Wär Dhaanhø

(Mathiew 24:29-35; Maak 13:24-31)

25«'Ba dëër cäŋ ki dwääy ki ceer ojïti ki ŋïïce; 'ba yi pinyi en, mïëri ojïti ki bëëtö mo leth, ni thäŋ yïthge ki lwör mar naama dwøŋ ka athage. 26'Ba jiy obääp lwärri, ni ge lwäära gïïo tägi piny. Kiper gïïa näk jïge da teek maal di jäŋö. 27'Ba kanyøgønø, Wär Dhaanhø ojootge ni öö ki yi pöölö, ki teek ka ajiem mo dwøŋ. 28'Ba kanyo täk gïïögø, tïŋŋu wïthu ni neennu maal, kiper pïëm mano piem uuni ki gø, kare onø cäännö.»

29Ni cään ge ki luubö mo keda leer, ni kööe, ni «Neennu olaam ki jenni bëët. 30Kany wø jït bäätge ki bøøge, jootu joodø ki dëëtu keeru, ni ŋäyu gø ni dhikøth kare onø cäännö. 31Kaawat manøgø thuwø, kanyo neennu gïïögø ni tägö, oŋäyu ni buc Jwøk kare acäännö. 32Adïëri møn, a cäänna uuni, ni beenhnhi en ba doo pöödhö ni gïïögø bëët poot kär cööp karge. 33Maal ki piny opöödhi, 'ba luupa ba dak.

34«Gwøgu dëëtu. Kanymør cwïnynyu tïmö ni ena køør caammi, ki meeye, ki lääŋ jap kwøwi en, ni ö cäŋöce ni laar ö bäätu ni caala abïëp. 35Kiper cäŋöce ööa bäät jiy bëët moi ni bëëdö wï ŋöömö bäre en. 36'Ba kuru cooth, nou lämö nee lønye jïïu ki man bøthu ri gïïo tägi bëët, nou cuŋŋu nyïm Wär Dhaanhø.»

37'Ba ena tïmö ni pöö yi Øt Jwøk Mana Dwøŋ cooth. 'Ba wø näk wäär, eni aay ni but bäät kïnna cwøl ni Kïn Ølip. 38'Ba wø tïme na amöölla, jiy bëët ööa baŋe yi Øt Jwøk Mana Dwøŋ kuna wïnyge mare.

Currently Selected:

Luk 21: AnyuB

Highlight

Copy