Luk 22
22
Luumma Tuut Bäät Jecu
(Mathiew 26:1-5, 14-16; Maak 14:1-2, 10-11; Jøøn 11:45-53)
1'Ba kanyøgø ajwöm-cam mar Møga Näk Ree Bäŋ Thømmø na cwøl ni cäŋ Cäŋa Pööth Thøøe Yie, kare acäännö. 2'Ba kwääc laam ki dïpööye mo ciik Jwøk ge caya jöö man 'näkge Jecu ki gø, kiper ge lwäär ki jiy.
3Kanyøgønø, Ceethan aci cwïny Juudac na cwøl ni Ickarïët, ni beeye dhaanhø aciel ki røk bääge na näk apaar kurriiø. 4Ni aae ni cuuŋe ki kwääc laam, ki kwääc jø wø koor Øt Jwøk Mana Dwøŋ, nee jïte ki jöö man cïp Jecu ceŋge ki gø. 5Ni mïn yïthge, ni jïëcge ki man moocge eni ki gwel. 6Ni jïëe, ni määnye ki jöö man cïp Jecu ceŋge ki gø ni lwaak tøør.
Luum Aŋuun Cam Mar Jecu Ki Bääge
(Mathiew 26:17-30; Maak 14:21-26; Jøøn 13:21-30; 1 Körin 11:23-25)
7'Ba kanya tïme na dïcäŋ mana dïkwøŋ mar ajwöm-cam mar Møga Näk Ree Bäŋ Thømmø, ni beeye kany wø 'näk nyidier Cäŋa Pööth Thøøe Yie, 8Jecu Piter ki Jøøn ajääŋŋe, ni kööe, ni «Cou ni jiiŋŋu cam cäŋ Cäŋa Pööth Thøøe Yie kiperø, nee camø.» 9Ni köge jïgø, na «?A kaa ni manynyï nee jiiŋwa yie?» 10Ni kööe jïge, ni «Neennu, kanyo cou paac, uuno røømmi ki nyen mør mo tïëdö ki pïï ki dak. Wäru läpu køøre yi ødo døny yie. 11Ni caannu gø jï wää paaci, ni ‹Dïpööy aköö ki ïïni, ni «?Øt wëëlle age, kanyo cäma yie ki cam cäŋ Cäŋa Pööth Thøøe Yie ki bääga?» › 12'Ba uuno nyuunhnhe ki yi øtø mo laac maal bäät pööki, mo onø peeth. Kanyøce nø, wär jiiŋŋu kiperø.» 13Ni cige, ni jootge gø keda mana caan gø jïge, ni jiiŋge cam cäŋ Cäŋa Pööth Thøøe Yie.
14'Ba na päŋ caae, Jecu apï piny kar cam ki nyïïatwieli na aciel. 15Ni kööe jïge, ni «Beeye gïna manynya døc, ki man cama cam Cäŋa Pööth Thøøe Yie ki uuni na aciel, ni gïna leth poot kär pïï dëëra. 16'Ba a cäänna uuni, ni gïn ba cäŋa cammø këët këël mano thur kare yi buc Jwøk.»
17Ni lwöte ka athöödhi. 'Ba na nø dwøk met ec, ena köö, ni «Lwørru gïn, ni pääŋŋu gø dïïu. 18Kiper a cäänna uuni, ni køør man en nø, a ba mäthi ki pï nyïïomøki këët këël mano cööp buc Jwøki kare.» 19Ni lwöte ki møø, 'ba na nø dwøk met ec, apøte, ni mëëk gø geni, ni kööe, ni «Man beeye dëëra, na cïp kiperu. Tïïyu gïn, nou para aani.» 20'Ba køør cam, athöödhi alwøre, ni kööe, na «Athöönhnhi en beeye luumma nyään na tuut ki køør remma na køny piny kiperu. 21'Ba neennu, ŋato cïp aani ceŋ nyïïmän, cere okuut yi cam ki aani na aciel ennø. 22Kiper Wär Dhaanhø cøø keda mana kwøŋi caan. 'Ba otïmö ni raac jï ŋatøgø noo cïp aani.» 23Kanyøgø bääŋi dëëtge apëënyge keerge, na «?Aŋa dïïø noo tïïc gïnögø?»
Pïëm Kiper Dööŋ-Kar
24Ni ö bääk Jecu ni jït yïthakicge ki pïëm thuwø, ni ge pïëmö na aŋa no orømø dïge ki man tïme ni kare dwøŋŋa eni. 25Ni kö Jecu jïge, ni «Nyec juurre dëëtge ege cuumö bäät jiy moge, ni jø wø näk ocuumö wø cwøl ni jø wø kwöm jiy. 26'Ba maru patha enønø. 'Ba ŋato kare dwøŋŋa eni dïïu, wär dëëre døøc mo thiinhnha eni, ni ö ŋato bwödhö, ni døøc ree ma ŋat mo tïnynya jø møøk. 27?Aŋa nø, ni kare dwøŋŋa eni, beeye ŋat wø näk opï piny kar cam, wala ŋat wø tïny gø? ?Aŋø, patha ŋat wø näk opï piny kar cam na kare dwøŋŋa eni? 'Ba aani, a ena dïïu naa tïnynya jø møøk.
28«'Ba beeye u jøøa bëëdö ki aani dhøk gïïa leth na pääny aani. 29'Ba keda mana ö Wära na mooc a ki bura, beeye thuwø na wëëga gø uuni, 30kiper nou cämu ni mädhu kar cam mara yi buya, ni pïïu piny bäät wäle, nou ŋøla luum tuk Icriel karge paari kurriiø.»
Kanya Caani Ya Jecu Ni Piter Ree Mooŋe Mooŋø
(Mathiew 26:31-35; Maak 14:27-31; Jøøn 13:36-38)
31Ni kööe, ni «Cayman, Cayman, neenï, Ceethan uuna manynye, nee u jeee kaamar beel. 32'Ba aana lämö kiperï nee ŋäädhe marï ba ränynye. 'Ba kanyo cäŋï riï løgø, nyïïmeru wär wëëk tëënnö.»
33Ni kö Caymanni jïgø, «Kwäärö, aano jïëy ki man cøøa øt twöc ki ïïni, këëlla yi thøø.»
34'Ba Jecu aköö, na «A cäänna ïïni, Piter, ni dïcäŋi ni gwienø poot kär köök, riï mooŋï mooŋø ki aani ki kwöre adäk naa kuyï.»
Gïr Gwel, Ko Opïr, Ko Opëëllö
35Ni kö Jecu jïge, ni «?Kanya jääŋŋa uuni wøk ni bäŋ gïr gwel, wala opïr ki war, da gïn mo oläämö jïïu?»
Ni dwøkge gø, ni «Bäŋgø.»
36Ni kööe jïge, «'Ba kawaane, ŋato jïre da gïr gwel, wär käle, këël opïr. 'Ba ŋato jïre bäŋ opëëllö, abïïne wär dwøk pwödhö, ni ŋëëm dëëre ka aciel. 37Kiper a cäänna uuni, ni luummi no ogöörö en doo thura kare dëëra, na køp, ni ‹Eno pääri ki jø wø dhal ciik.›#Aydheea 53:12 Kiper gïna näk ogöörö kipera, doo thura kare.»
38Ni köge, ni «Neenï, Kwäärö, opëëlle ariiø ena kany en.» Ni dwøk gø jïge, «Moøgø thööth nø.»
Kanya Läm Jecu Yi Gecemeni
(Mathiew 26:36-46; Maak 14:32-42)
39Kanyøgø Jecu aö wøk, ni ci bäät Kïn Ølip, keda man wø bëëde cøøn, ni bääŋi cäädha køøre. 40'Ba na pïïe kaace, ena köö jïge, ni «Lämu, kiper nou ba päänynyi.» 41Ni daak ree buutge, ni daa kany mo bäär mëëth ki geni, ni këël cøŋŋe piny ni läme, ni kööe, 42na «Awuuö, ni näk mo ïïno jïëy, wëëk maath athöödhi#22:42 Maath athöödhi man nyootha jwør gïï mo leth, ki thøø mare. man pöödhö bääta. 'Ba paa ki køør mana manynya, 'ba beeye ki køør mana manynyï na doo tïïö.» 43Kanyøgø, nyïïatwiel maal aö baŋe, ni cøm cwïny gø. 44'Ba kiper mana tïme ni cwïnye opädhö døc, ena lämö døc ki cwïnye bäre. Ni ö kwäk mare ni tïme kaamar remø ni tøøna piny. 45'Ba na ö maal ki kar lam ena ci baŋ bääŋi, ni nwän geni ni geno butö, kiper na päth cwïnyge. 46Ni kööe jïge, na «?Aŋø ni butu? Ööu maal, ni lämu, kiper nou ba päänynyi.»
Kanya Cïp Jecu Ceŋ Nyïïmän Ni Puti Mak
(Mathiew 26:47-56; Maak 14:43-45; Jøøn 18:3-11)
47'Ba kanya poot Jecu ni cäänö, lwaak aöö, ni ge bwøtha nyena cwøl ni Juudac Ickarïët na en røk jøøa näk apaar kurriiø. Ni ö buut Jecu kuna nuum dhi gø. 48'Ba Jecu aköö jïgø, ni «?Juudac, Wär Dhaanhø diï cïba ceŋ nyïïmän ki nuum dhøk na enønø?»
49'Ba jøøa en buute na neenge gïno tägi, gena köö, «?Kwäärö, pwötwa ge ko opëëlle?» 50Ni ö dhaanhe aciel dïge ni gøøc laŋ Kwääy Lam Mana Dwøŋ ni cëë ïth cwïï gø wøk.
51'Ba Jecu aköö, ni «Weyu gïnögø.» Ni mul ïth gø ni dwøk gø kare. 52Kanyøgø Jecu aköö jï kwääc laam, ki kwääc jø wø koor Øt Jwøk, ki jaae na ö baŋe, no «?U ö baŋa keda man wø ci baŋ kuu, nou käära opëëlle ka athøre? 53Kany wø bëëda ki uuni cooth yi kal mar Øt Jwøk Mana Dwøŋ, ceŋŋu käru kïth dëëra. 'Ba beeye karu ennø, ni beeye kar teek muudhö.»
Kanya Ö Piterri Na Mooŋ Ree Ki Jecu
(Mathiew 26:57-58, 69-75; Maak 14:53-54, 66-72; Jøøn 18:12-18, 25-27)
54Kanyøgø Jecu amakge ni kälge gø, ni ge kïtha gø yi øt Kwääy Lam Mana Dwøŋ. 'Ba Piter aläp køør gø, ni ree ee jädhö kany mo bäär mëëth. 55'Ba kanya ö jøøgø na äpge ki maac dï kal, ni geno pï piny kanya ciel, Piter apï piny dïge. 56'Ba kanyøgø nyaan ma ŋat tïïc na neen eni, ni eno pï piny däär maac, jïgø aneene døøc, ni kööe, ni «Nyeni thuwø ena buute.»
57'Ba dëëre amooŋe, ni kööe, ni «Nya, eni kuua.»
58'Ba ki nyi kany mo thiinh, acäŋ ŋat mørri jootø, ni kööe, ni «Ï ena røkge thuwø.» 'Ba Piter aköö, «A path, nyie.»
59'Ba na cäŋ bëëtö ki kany mo jïtö ki yi caa, ŋat mør acäŋ öö, ni pïëme, na «Adïëri møn, nyenøgø thuwø, ena buute. Kiper ena nyï Galili.»
60'Ba Piter aköö, ni «Nyie, gïnö ni carï enø, kuua.»
'Ba kanya poode ni cäänö, gwienø aput köö. 61Ni ö Kwäärö ni løk ree ni lwiith Piter. Ni ö Piterri ni put wïïe par ki luumma caan Kwäärö, na kööe jïgø, ni «Dïcäŋi ni gwienø poot kär köök, riï mooŋï mooŋø ki aani ki kwöre adäk naa kuyï.» 62Ni ci wøk ni jwöŋe ni keeya yie.
Kanya Buu Jecu Na Pwödi
(Mathiew 26:67-68; Maak 14:65)
63Kanyøgø jøøa mak Jecu, Jecu abuuge ni pwötge gø. 64Ni twöcge nyeŋ gø thuwø, ni pëënyge eni, ni «Caanï. ?Aŋa na gøøc ïïni?» 65Ni cäänge dëër gø ki luup møøk mo thööth ni ge janynya eni.
Kanya Kïth Jecu Nyïm Jø Løøk
(Mathiew 26:59-66; Maak 14:55-64; Jøøn 18:19-24)
66'Ba kanya ruu øwi, jaae moa en dï jiy gena cuuŋö na aciel, këël kwääc laam ki dïpööye mo ciik Jwøk bëët. Ni kïthge Jecu kar løøk marge, ni köge, 67ni «Ni näk bee ïïni na Krictø, caanï jïwa.»
'Ba Jecu aköö jïge, ni «Noo cäänna uuni, u ba jïëy. 68'Ba ni näk mou pëënynya pëënynyö, ba løgu. 69'Ba køør man ennø, Wär Dhaanhø opï piny bäät cwïï Jwøk kuna en teek Jwøki yie.»
70Ni köge, ge bëët, «?Bee ïïni na O Jwøk, nø?»
Ni dwøk gø jïge, «Beeye ni caannu enø.»
71Ni köge, na «?A luumma ŋø ni poot manynyø këët? Anø wïnynyø dhee kiree, ø ki dëëtø.»
Currently Selected:
Luk 22: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
