Luk 23

Kanya Kïth Jecu Nyïm Paylat

(Mathiew 27:1-2, 11-14; Maak 15:1-5; Jøøn 18:28-38)

1Kanyøgø jø acooŋa bëët aö maal ni kälge Jecu nyïm Paylat.#23:1 Paylat beeye ŋat Röm mana cïp akwöm Römmi bäät jø Juuth. 2Ni täkge ki man kïthge bääte ki luup, ni köge, ni «Nyeni en ajootwa ni manynya man wëëk powa ageem ka akwöma, ni män wa ki cïp ajwäk jï Cidhar, ni kööe ni eni ki dëëre beeye Krictø, ni ena nyeya.»

3Kanyøgø ena pëëny Paylati, ni «?Bee ïïni na nyeny jø Juuth?»

Ni løk gø jïre, na «Acaanï na kare.»

4Køøre Paylat aköö jï kwääc laam ki lwaae, ni «Bäŋ gïn mo obøth mo yaa joodø baŋ nyeni.»

5'Ba gena reeth ri gø, ni köge, ni «Nyenøgø kiera wïth jiy ki pwöc mare yi Judia bäre, ni täga Galili këël mana këën kany ennø.»

Kanya Kïth Jecu Nyïm Eerat

6'Ba Paylat na wïny gïnögø, ena pëëö ki man näk ŋatøgø nyï Galili. 7'Ba na wïny gø ni ena dhaanh Eerat na näk kwäärö mar Galili, awëëk kïth baŋ Eerat, kiper Eerat atïmö ni ena yi Jerucalem kar kaaca. 8'Ba na ö Eerati na joot Jecu, yie amïnnö døc, kiper eni bëëdö ni lääŋŋa gø ki kany mo bäär nee neene. Kiper gïr gø awïnynye, ni eni manynya man neen gø ni tïïö ki gïn mo rëëma ec. 9Kanyøgø Jecu atete døc. 'Ba dhee käre jaalø. 10'Ba kwääc laam ki dïpööye mo ciik Jwøk acuŋŋö buute ni kïthge bääte ki luup mo thööth, ni geno wëër døc. 11'Ba Eerat ki jø tøŋ moe Jecu acaange døc ni buuge gø. Køøre dëër gø akïthge ka abïï ma wøp døc, ni wëëk gø dwøk baŋ Paylat. 12Ni ö Eerati ki Paylat ni putge tïmö na nyïïawäädi dïcäŋöca kiree. Kiper dïkwøŋ na bëëtge, ge män ki røkge.

Kanya Ŋøl Thøø Bäät Jecu

(Mathiew 27:15-26; Maak 15:6-15; Jøøn 18:39—19:16)

13Kanyøgøøni, kwääc laam ki jaae ki jiy acwöl Paylati kanya ciel. 14Ni kööe jïge, ni «Nyeni akälu baŋa ni ena dhaanhø mo wëëga jiy ageem. 'Ba na teta gø døøc nyïmmu, bäŋ gïn mo yaa joodø mo ee tïïö dëët luupa kïthu bääte, mo doo jäälö kipere. 15Ni Eerat thuwø bäŋ gïn mo ee joodø dëër gø, ni beeye na wëëk gø duun baŋø en. 'Ba neennu, eni bäŋ gïn mo ee tïïö mo doo rømø ki thøø. 16Kiper manøgønø, eni wëëga pwöt ka alaŋŋe, ni päda gø.» [ 17'Ba kany wø näk ra ajwöm-cam mar cäŋ Cäŋa Pööth Thøøe Yie, eni wø pätö jïge ki dhaanhø aciel røk jøøa en øt twöc.]#23:17 Täk luubö man tøør ki dhi Gïrïïk yïth weet Luk møøk moa cääŋŋe.

18'Ba gena put rëëdö bëët ki dwøl aciel, ni «Aayï ki nyeni, ni pännï wa Baraba.» 19'Ba Baraba manøgø okïth øt twöc kiper ageem mo ee tääö dï pääny, ki 'näk jiy.

20Kanyøgø Paylat acäŋ cäännö ki geni, ni manynya man pät Jecu. 21'Ba gena rëëdö døc, ni «Gurï, gurï bäät jaadha no odëëdö!»

22Ni cäŋ geni cäännö ri dääge, na «?Aŋø, agïnaŋø na raac ni ee tïïö? Kiper bäŋ gïn mo yaa joodø mo obøth jïre mo doo rømø ki thøø. Kiper manøgø nø, eni wëëga pwöt ka alaŋŋe, ni päda gø.» 23'Ba gena reeth ri gø døc, ni rëëtge døc, ni ge caana gø, ni eni doo gur bäät jaadha no odëëdö. Ni ö döötge ni jïëy. 24Kanyøgø nø, Paylat acïpö ki dwøl ni mana manyge doo wëëga geni. 25Ni pät ŋata kwacge, na näk okïth øt twöc kiper ageem ki 'näk jiy. 'Ba Jecu acïp ceŋge kaa mana manyge.

Kanya Gur Jecu Bäät Jaadha No Odëëdö

(Mathiew 27:32-44; Maak 15:21-32; Jøøn 19:19-27)

26'Ba kanya kïthge Jecu wøk, ŋat mør mo nyeŋŋe Cayman ma nyï Cayriin mo cäädha jöö mo ööi ka dï paac, amakge ki teek, ni kïthge jaadha no odëëdö bääte, nee kääre køør Jecu. 27'Ba kanyøgø lwaa dhaanhø mo päl aläp køøre, ki mään mo pööta kööthge ni ge jwöŋö kipere. 28'Ba Jecu dëëre aløø baŋge ni kööe, ni «Nyïïakuk Jerucalem, käru jwöŋö kipera, 'ba jwöŋu kiper dëëtu keeru ki nyïïu. 29Kiper da cääŋŋe mo öö, mo jiy köö, ni ‹Meta yïth bwöy, ki yïdhi moa näk kär käädö ki jiy, ki kööthi moa näk kär dhwødhø.› 30'Ba kanyøca geno köö jï kïte, ni ‹Ööu, päthu bäätwa.› Ni luumge thuuri, ni ‹Ööu, rïëpu wa.› 31?Ni näk gïn tïïcge ni jaath poot mar, agïnaŋø noo tägi kanyo tale?»

32'Ba da jiy ariiø møøk thuwø mo da gïï mo ege baa, mo okïth wøk nee 'näk ki eni ciel. 33'Ba na pïïcge kany mo cwøl ni Kar Cuu Wïc, ena gurge bäät jaadha no odëëdö kaace, ki jøøa näk obääyö, na aciel ena bäät cwïïc, ni maya ena bäät caam. 34'Ba Jecu aköö, ni «Wuuö, wëën geni. Kiper gïna tïïcge kucge.» Ni tïïge ki ŋïïce ki ri kwääk ki baw naa abïïk Jecu pääŋge.

35'Ba jiy cuŋŋö ni ge neeta gø. Ni ö jøøa näk kwääri ni buuge eni, ni köge, ni «Eni wø kønya jø møøk. Wär ree kønye keere nø, ni näk ena Krictø mana öö ki baŋ Jwøk, na mare, na näk ee jierø.»

36'Ba ena buu jø tøŋŋi thuwø, ni öge baŋe ni ge manynya man moocge gø ki køøŋ nyïïomøki mo wac. 37Ni ge cäänö, ni «Ni näk bee ïïni na nyeny jø Juuth, piem dëërï.»

38'Ba kaace thuwø da luup mo ogöörö maal wïïe, ni «Ŋati en beeye nyeny jø Juuth.»

39'Ba dhaanhø aciel dëët jøøa näk obääyö na näk ogurö ki eni na aciel, Jecu abuue, ni kööe, na «?Aŋø, ï paa Krictø? Piem riï, ni piemï wa.»

40'Ba ena jook maya, ni kööe, na «?Aŋø, ï ba lwäär ki Jwøk? Kee ï poot ena ya ajäla aciel ki eni. 41'Ba ajäla marø møn beeye kare. Kiper gïna pïï dëëtø en beeye mana näk orømø ki gïïa tïïø. 'Ba ŋati en bäŋ gïn mo raac mo ee tïïö.»

42Ni kööe, ni «Jecu, wär a lääŋŋï kanyo ööï ni ïïna nyeya mo teek.»

43Ni løk gø jïgø, na «Adïëri møn, a cäänna ïïni, ni dïcäŋi en, ïïno en kany mo beer ki aani na aciel.»

Kanya Thøw Jecu

(Mathiew 27:45-56; Maak 15:33-41; Jøøn 19:28-30)

44'Ba kanya tïme na caae apaar kurriiø ki dïcäŋ, piny atïmö ni muudhö bäre, këël caae adäk ka abøøya,#23:44 Caae apaar kurriiø beeye caae abïciel ki dïcäŋ, ni caae adäk beeye caae abïŋween ka abøøya ki kwäänö mar Ithiöpia. 45ni tïm cäŋŋi ni ba rieny; ni ö abïïn Øt Jwøk Mana Dwøŋ ni put jeeø ki dïëre na thäŋi ariiø. 46'Ba kanyøgø Jecu aköök ki dwøl mo päl, na «Awuuö, jwïëya acïba cerï.» 'Ba na nø caan luummögø, ena jwïëy ka aŋuudi.

47'Ba na ö kwääy dïkuye ma dïpa na neen gïna tägö, Jwøk apwøe, ni kööe, na «Adïëri møn, ŋati en, bäŋ gïn mo ee baa.» 48'Ba lwaae bëët moa näk dëëtge ege cooŋø kuna raŋge gø, na nø neenge gïna tägö, gena døø mïëcge, ni ge pööta kööthge. 49'Ba jøøa ŋäc eni bëët, ki mään moa läm køøre ki yi Galili, gena cuŋŋö kany mo bäär ni ge neeta gïïögø.

Kanya Pïël Jecu Yi Bwörö

(Mathiew 27:57-61; Maak 15:42-47; Jøøn 19:38-42)

50'Ba kanyøce da dhaanhø mør mo nyeŋŋe cwøl ni Jocep ma nyï Arimathia, paac mør mo poot na po jø Juuth, mo ena ri kwääc løøe, mo ena dhaanhø ma wøp mo cwïnye beer, 51mo kär jïëy ki mana manyge na tïïcge, ni ena dhaanhø mo bëëdö ni køya buc Jwøk na bëëde. 52Eni, ena ci baŋ Paylat ni kwac dëër Jecu ki gø. 53Ni käl dëër gø piny, ni bøøny gø ka abïï koony, ni pïël gø yi bwöc kïdi mo orøø, mo poot bäŋ dhaanhø mo okoony yie. 54'Ba dïcäŋögø beeye cäŋ jiiŋ røk, ni cäŋ jwömö manynya man täge. 55'Ba mään moa öö ki eni ki yi Galili aläpö, ni neenge bwörö, ki koony mana koonyi ki gø. 56Køøre gena døøk, ni jiiŋge mäth wïïr ma teeŋi mo wø ŋwääi ni met.

'Ba na tïme na cäŋ jwömö røkge ajwömge, keda mana näk ocemø.

Currently Selected:

Luk 23: AnyuB

Highlight

Copy