KALAQAMA 4
4
QAAYEELINNA ABEELI
1Hakkunni gedensaanni, Addaami galtesi ledo goxi; iseno godobbe, labbaa beetto iltu. «Kaaliiqi kaa'lonni labbaa beetto afi'rumma» yite, «Qaayeeli»#4:1 Qaayeeli yaa Ibiraawootu afiinni afi'rate yaate. yite su'ma fushshitusi. 2Aanchite rodoosi Abeeli iltu. Abeeli ge'reewo allaalannoho; Qaayeeli baatto loosi'rannoho. 3Mitto barra Qaayeeli loosi'rinohunni baattote laalchinni Kaaliiqira kakkalo shiqishi. 4Abeeli qole ge'reewu giddonni umihanna coominoha kakkalo asse shiqishi; Kaaliiqi Abeelinna kakkalosi widira lae, shiqishi'rinore adhi. 5Qaayeeliwanna kakkalosi widira kayinni dilaino; kunnira, Qaayeeli lowo geeshsha giirami; albisino kolishshi'ri. 6Hatte yannara Kaaliiqi Qaayeelira, «Mayira giiramitto? Albikkino mayira kolishshi'ri? 7Dancha assoottoha ikkoommero albikki xawanno; dancha assa hoogittoro kayinni cubbu waalchikkira rie agarannohe; hasattosino ate amadateeti; ati kayinni qeelattora hasiisannohe» yiisi.
8Qaayeeli rodoosi Abeeli, «Amo xawo ha'nona» yiisi; xawo hadheenna Qaayeeli rodoosi Abeeli gawajje shiisi.
9Kaaliiqi Qaayeeli, «Rodiikki Abeeli mama no?» yee xa'misi.
Qaayeeli, «Mama nooro diafoommo; ani rodii'yara agaraanchohoni?» yee dawari.
10Kaaliiqi Qaayeelira, «Togo mayira assitto? Macciishshi; du'nantinoti rodiikki mundee rabbate baattotenni anewa higge raartanni no. 11Kunnira, du'nantinota rodiikki mundee aggara afoose fantino baatto aana ati rumamoottoha ikki. 12Baatto loosi'ratto yannara mitto laalchono diuyitannohe; baattote aana tultaawanna raataawattoha ikkatto» yiisi.
13Qaayeeli Kaaliiqira, «Cubbi'ya qorichi duqqammora dandeemmokkihonna lowoho; 14kuneeti techo baattote aaninni shorroottoe; albikkinni ho'leemmo; baattote aana tultaawanna raataawoommoha ikkeemmo; afiehu baalu shaannoe» yiisi.
15Kaaliiqi isira, «Dee'ni dihattooti! Kunni ka'a ate shaannohura baalaho lamala ero rabba iillitannosi» yiisi. Kaaliiqi Qaayeeli afihu baalu shaannosikki gede malaate worisi. 16Qaayeeli Kaaliiqi albinni kae ha'ri; Edenira soojjaatoonni Noodi#4:16 Noodi yaa Ibiraawootu afiinni raataawate yaate. yinanni gobbara hee'ri.
QAAYEELI SIRCHO
17Qaayeeli galtesi ledo goxi; iseno godobbe Heenooki iltu. Isino katama mini; katamaho beettisi su'minni «Heenooki» yee su'ma fushshi. 18Heenooki Iiraadi ili; Iiraadi Mehuyaeeli ili; Mehuyaeeli Matusaeeli ili; Matusaeeli Laamehi ili; 19Laamehi lame meento adhi; umiti Aadaati; layinkiti Tsiila yinannite; 20Aada Yaabaali iltu; Yaabaali saada allaa'litanni dukkanaho heedhannori annaati. 21Isi rodii Yuubaali suusulle ufuuffannorinna bagana gantannori annaati. 22Tsiila, «Tubalqayini» yinanniha labbaa beetto iltu; isi camotenninna siwiilunni addi addi uduunne seekkannoho. Tubalqayinira Naima yinanni rodoo noosi.
23Laamehi lamunku meentisira,
«Aadanna Tsiila! Hanni macciishshe"e;
mittu manchi madiisseennae,
shiimu beetti ganeennae shoommo;
24Qaayeeli shaannohura lamala ero rabba iillitannosi yiniro,
ane Laamehi shaannohura kayinni lamalayina lamala ero rabba iillitannosi» yiinsa.
SEETINNA HEENOOSI
25Addaami galagale galtesi ledo goxi; labbaa beettono iltusi; iseno, «Qaayeeli shiinohu Abeeli darga Maganu labbaa beetto uyinoe» yite su'masi, «Seeti»#4:25 Seeti yaa Ibiraawootu afiinni uyi yaate. yitu. 26Seetino labbaa beetto ile, su'ma Heenoosi yee fushshi; mannu Kaaliiqa magansi'ranna qullaawa su'masi woshsha hanafinohu hatte yannaraati.
Currently Selected:
KALAQAMA 4: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
