LUQAASI 22

YESUUSIRA GANNOONNI GANO

(Mat 26:1-5; 14:16; Maq 14:1-2; 10:11; Yoh 11:45-53)

1Agure Sa"ate Ayyaanaati yinanniha Timu Ayyaana ayirrinsanni yanna iillite no. 2Qeesootu roorrootinna Seeru rosiisaano manna waajjitino daafira Yesuusa amadde shitanno doogo hasidhanni no.

YIHUDI YESUUSA SAYISE AARA AMAALAMI

(Mat 26:14-16; Maq 14:10-11)

3Hatte yannara tonaa lamente rosaanosi giddonni mittu Asiqorootichu Yihudira Sheexaanu ei. 4Kunnira Yihudi qeesootu roorrootiwanna Qullaawu Mini agaraasine hajajjannoriwa mare Yesuusa hiitto asse sayise aannonsaro insa ledo amaalami. 5Insano konne coye macciishshite, lowo geeshsha hagiidhite, woxe uyitasira sumuu yitu. 6Isino sumuu yiihu gedensaanni sayise aate, injo hasi'ranni agari.

YESUUSI AGURE SA"ATE AYYAANI HURBAATE ROSAANOSI LEDO ITI

(Mat 26:17-25; Maq 14:12-21; Yoh 13:21-30)

7Hakkunni gedensaanni Agure Sa"ate Ayyaani ge'recho gorri'nannihu Timu Ayyaani iilli. 8Yesuusi, «Agure Sa"ate Ayyaaniha hashshi hurbaate inteemmowa hadhine biddi assenke» yee Pheexiroosinna Yohaannisi soyi. 9Insano, «Mamiicho biddi assinammora hasi'ratto?» yite xa'mitusi.

10Isino, «Katama e'inanni woyite, wayi gambayicho duhe noo mancho affinannina isi faana hadhine, eanno minira marre. 11Minu annano, ‹Rosiisaanchinke, «Rosaano'ya ledo Agure Sa"ate Ayyaaniha hashshi hurbaate iteemmo mini hiikkonneeti?» yiino› yiiyye. 12Isino minu aana minnoonnihura layinki minira karre qixxeessinoonniha hala'lado darga leellishanno'nena, hakko biddi assenke» yee soyi. 13Lamunku rosaanosi marte, baalunku coyi Yesuusi yiinonsa gede ikke nooha affu. Agure Sa"ate Ayyaani hurbaateno hakko qixxeessitu.

MOOTICHU HURBAATE

(Mat 26:26-30; Maq 14:22-26; 1Qor 11:23-25)

14Intanni yanna iillituta Yesuusi soqqamaasinesi ledo sagalete ofolli. 15Soqqamaasinesirano, «Qarru iillaera albaanni ki'ne ledo konne Agure Sa"ate Ayyaani hurbaate itammora halchoommo. 16Kuleemmo'nena, Maganu Gashshooti giddo xawo fula geeshsha, kunni ka'a konne Agure Sa"ate Ayyaani hurbaate horontanni di"iteemmo» yiinsa.

17Hakkunni gedensaanni Yesuusi finiinchono haa're, galatu huuccatto asse kaihu gedensaanni, «Hii'e, konne beeqqe! 18Halaale kuleemmo'nena, xaanni kayise Maganu Gashshooti daa geeshsha konne woyinete laalonni qixxeessinoonni agatto diageemmo» yiinsa.

19Yesuusi timano haa're, galatu huuccatto asse, hiiqqaqqe, «Hii'e, kuni ki'nera aamaminohu maala'yaati; konne ane qaaggora assidhe!» yiinsa. 20Hurbaatu gedensaanni finiinchono kayise, «Kuni finiinchi ki'ne daafira du'nantanno mundee'yahu haaro gondoorooti.#Erm 31:31-34 lai.

21«Ikkollana, kuneeti sayise aannoe manchi ane ledo sagalete ofolle no.#Far 41:9 lai. 22Manchi Beetti alba hirqinoonni garinni reyanno; ikkollana Manchi Beetto sayise aannohura hakko manchira kayinni aanne'e!» yii.

23Insano, «Ninke giddonni konne coye assannohu ayeti?» yitanni mimmito xa'mitu.

WO'MANKA ROORANNOHU AYETI?

24Qolteno, «Baalunkunni roorannohu ayeti?» yitanni insa insanaawa yekkeerantu. 25Yesuusi kayinni, «Tenne gobba moottoolla mannu aana roorre afidhino. Gashshaanono mannaho danchare assitannoreeti yinanninsa. 26Ki'ne kayinni insa gede ikka dihasiissanno'ne. Ki'ne giddo jawa ikkara hasi'rannohu, shiimiidiha ikko. Roorre afi'rinohu soqqamaanchu gede ikko. 27Ofolle itannohunna uurre soqqamannohu woyite jawu hiikkonneeti? Jawaho yinannihu ofolle itannoha di"ikkino? Ani kayinni ki'ne mereero soqqamaanchu gedeeti. 28Ki'ne qarri'ya yannara ane ledo kaajjitine uurritinoonni. 29Kunnira anni'ya ane shoominte gede, anino ki'ne shoomeemmo'ne. 30Gashshooti'ya giddo ane ledo ofoltine ittinanninna agginanni; ayirradu barcimira ofoltine tonaa lamente Israeelete ga'rera yoo yitinanni» yiinsa.

PHEEXIROOSI BADHE WODHANNOSITA YESUUSI BALAXE HIMANI

(Mat 26:31-35; Maq 14:27-31; Yoh 13:36-38)

31Yesuusi qole, «Simiooni! Simiooni! Kuneeti, qamade sorrannihu gede Sheexaanu ki'ne sorara hasi'rino. 32Ikkollana ammanakki ba'annokki gede ate daafira huucceemmo. Galagalte daatto woyite roduuwakki kaajjishi!» yii.

33Pheexiroosi, «Mooticha'ya! Usuramateno ikko reyateno ledokki ha'rammora qixxaawaho» yii.

34Yesuusi kayinni, «Pheexiroosi! Halaale kuleemmohena, techo hashsha lukkichu ganikkinni sase higge, ‹Iso diegennoommo› yaattoe» yiisi.

35Hakkunni gedensaanni Yesuusi rosaanosi, «Womaashsha qoraho, ogoro, koatteno adhitinikkinni soyummo'ne yannara xei'neri nooni?» yiinsa.

Insano, «Xeinonkeri mitturino dino» yite qoltu.

36Yesuusi, «Xa kayinni noosihu womaashsha qoraho, ogorono amado; bise afi'rinokkihu uddanosi hire bise hidho! 37Kuleemmo'nena, ‹Bunshe assitannori ledo kiirroonnisi› yine Qullaawu Maxaafi giddo borreessinoonnihu wo'ma hasiissannohura ane daafira borreessinoonniri baalu wo'manno» yiinsa.#Isa 53:12 lai.

38Rosaanosi qolte, «Mooticha! Kuneeti, kawiicho lame bise no!» yitu.

Isino, «Ikkitanno!» yiinsa.

YESUUSI GEETESEMAANETE HUUCCATTO ASSI'RI

(Mat 26:36-46; Maq 14:32-42)

39Yesuusi katamunni fule rosisi gede Ejedhete Ilaala kae ha'ri. Rosaanosino ledosi hadhu. 40Hakkiira iillituta Yesuusi rosaanosira, «Jifamate giddora e'inannikki gede huuccidhe!» yiinsa.

41Hakkunni gedensaanni kincho olleenna iillanno geeshshiwa insawiinni fafe ha're guluphe, 42«Anna'ya! Ati baxittoro konne qarru finiincho anewiinni hoolie; kayinnilla, ati baxoottori ikkinnina, ani baxoommori ikkoonke» yii. 43Hattenne yannara jawaachishanno sokkaasinchi gordunni dirre leellisi. 44Wodana lowo geeshsha yaadino daafira duu're huucci'ranni no. Hunkuuno mundeete gede ikke uullate aana coccoi.

45Huuccattotewiinni kae rosaanosiwa dayi. Yaaddote batinyinni kainohunni goxxe noore afe, 46«Mayira goxxinoonni? Jifamate giddora e'inannikki gede ka'ine huuccidhe» yiinsa.

YESUUSI AMADAMA

(Mat 26:47-56; Maq 14:43-50; Yoh 18:3-11)

47Yesuusi konne coye coyi'ranni hee'reenna lowo manni kae dayi. Tonaa lame rosaano giddohu Yihudi albaanni ha'ranni no. Isino Yesuusa sunqara shiqqi yii. 48Yesuusi kayinni, «Yihuda! Manchi Beetto sunqite sayisse aatto?» yiisi.

49Yesuusi ledo noo rosaano ikkitote gara la'e, «Mooticha, bisetenni gannoni?» yitu. 50Insa giddonni mittu qeesootu qari soqqamaanchira bisetenni qiniiticho macca gane tayisi.

51Yesuusi kayinni, «Aguri! Togoo coye layinkimeeshsho assitooti!» yii. Manchu maccano amammade hursi.

52Hakkunni gedensaanni Yesuusi amaddasira daggurira qeesootu roorrootira, Qullaawa Mine agartanno hajajaanoranna gobbate geerrira, «Mulqi'rannoha amandannihu gede ane amadate bisenna dulla adhitine daggini? 53Barru baala Qullaawa Mine rosiisanni ki'ne ledo hee'rummo geeshsha diamaddinoonnie. Xa kayinni tini ki'ne yannaatinna tunsichu gashshaanchi yannaati» yiinsa.

PHEEXIROOSI YESUUSA KAADI

(Mat 26:57-58,69-75; Maq 14:53-54,66-72; Yoh 18:12-18,25-27)

54Hakkunni gedensaanni mannu Yesuusa amade qeesootu roorrooti minira haa're massi. Pheexiroosi xeerti're ha'runsanni no. 55Mannu hoowete giddo giira giire mitteenni ofolle no. Pheexiroosino daye insa ledo ofolli. 56Pheexiroosi giirate mule ofolle hee'reenna mitte borojjicho giira xabbeenna iso ikkinota affe qasse la'e, «Kunino Yesuusi ledoho» yitu. 57Pheexiroosi kayinni, «Tee mancho! Ani ati yaattaha diegennoommo!» yee kaadi. 58Shiima yanna gedensaanni wolu manchino Pheexiroosi lae, «Atino insa ledoho» yii.

Pheexiroosi qole, «Ko mancho! Ani isi ledoha di"ikkoommo!» yii.

59Mitte saate ikkitanno yanna gedensaanni mittu manchi Pheexiroosi, «Kuni manchi Galiilunniho; addanko isi ledo nooho» yee duu're coyi'ri. 60Pheexiroosi kayinni, «Koo mancho! Ati yaattore diafoommo!» yii. Hatto yee coyi'ranni hee'reenna lukkichu gani. 61Hatte yannara Mootichu caaqqi yee Pheexiroosi lai. Pheexiroosira, « ‹Techo lukkichu ganikkinni sase higge diegennoommosi› yaattoe» yee Yesuusi coyi'rino coyi qulli yiisi. 62Gobbara fule hururame wi'li.

63Hatte yannara Yesuusa amaddinosiri qacifattanninna gantanni noosi. 64Alba guggushshite, «Ganihehu ayeti? Hanni himani!» yitusi. 65Isi aana lowo coye coyidhanni xontusi.

YESUUSI YOOTE DARGIRA SHIQI

(Mat 26:59-66; Maq 14:55-64; Yoh 18:19-24)

66Soodita dagate geerri, qeesootu roorrootinna Seeru rosiisaano mitteenni gamba yitu. Yesuusano songonsawa abbite, 67«Hanni ati Kiristoosaatiro kulinke!» yitusi.

Isi kayinni, «Kulummo'nero diammantinannie. 68Xa'mummo'nerono diqoltinannie. 69Xaanni kayise kayinni Manchi Beetti wolqaataamu Magani qiniiteenni ofollanno» yiinsa. 70Baalunku mitteenni, «Anfina ati Maganu Beettootiyya?» yite xa'mitusi.

Isi qole, «Ee, ki'ne yitini gedeeti» yiinsa. 71Insano, «Kunni ka'a mayi naqaashshe hasiissannonke? Kuneeti, afiisinni fulino qaale ninke uminke macciishshinoommo!» yitu.

Currently Selected:

LUQAASI 22: QulMax

Highlight

Copy