LUQAASI 23

YESUUSA PHILAAXOOSIWA HAADHE MASSITUSI

(Mat 27:1-2,11-14; Maq 15:1-5; Yoh 18:28-38)

1Hakkiicho gamba yee noo manni baalu Yesuusa haa're Philaaxoosiwa masse, 2«Kuni manchi mannanke so'risiisanna anfoommo; Roomu Moote Qeesaarirano giwire baantannikki gede hoolanni no. Qoleno, ‹Ani moote Kiristoosaati› yee coyi'rino» yite bushiishshusi.

3Philaaxoosino Yesuusa «Ati Ayihudete Mooteetini?» yee xa'mi.

Yesuusino, «Atinni yootto» yiisi.

4Hatte yannara Philaaxoosi qeesootu roorrootiranna mannaho, «Kunni manchi aana mitte saono diafoommo» yii.

5Insa kayinni, «Kuni manchi Galiilunni kayise Yihudu gobba baalate rosiisanni manna giwanshiishanno» yitanni kaajjishshe bushiishshusi.

YESUUSI HEEROODISI ALBIRA SHIQI

6Philaaxoosi Galiila yaanno qaale macciishshe, «Kuni Galiilu manchootini?» yee xa'mi. 7Yesuusi Heeroodisi gashshooti giddonni dayinota afe, Yesuusa Heeroodisiwa soyi. Hatte yannara Heeroodisi Yerusaalamete no. 8Heeroodisi Yesuusa afi woyite lowo geeshsha hagiidhi. Kunni albaanni Yesuusire macciishshe, Iso la"ara halchanni keeshshino. 9Kunnira Heeroodisi Yesuusa batinye xa'mo xa'mi. Yesuusi kayinni mittoreno diqolinosi. 10Qeesootu roorrootinna Seeru rosiisaano hakkiicho uurrite Iso duudhe bushiishshanni no. 11Heeroodisino olantosi ledo mishe qacifatisi. Biifado uddano uddisiise Philaaxoosiwa qole soyisi. 12Hakko barrinni kayisse Philaaxoosinna Heeroodisi mimmitoho ilantu; hakkunnira albaanni kayinni komatenni heedhannoreeti.

YESUUSIRA REYOTE YOO YITU

(Mat 27:15-26; Maq 15:6-15; Yoh 18:39—19:16)

13Hakkunni gedensaanni Philaaxoosi qeesootu roorroota, gobbate geerranna manna mitteenni woshshe, 14«Konne mancho, ‹Manna giwanshiishanno› yitine anewa abbitinoonni. Kune alba'neenni xa'me bushiishshinisi coyi giddonni kunni manchi aana mitte saono diafoommo» yiinsa. 15Heeroodisino mitte bunshe aanasi afinokki daafira qole ninkewa soyino. «Kuni manchi reyote iillishannore mittoreno diassino. 16Kunnira lichetenni gansiise kae agureemmo» yiinsa. 17[Agure Sa"ate Ayyaani daanno kiiro Philaaxoosi mannaho mitto usuranya tira rosoho.]

18Kunnira mannu baalu, «Konne mancho huni! Barbaani kayinni tirinke!» yaanni mitteenni canci. 19Barbaani katamu giddo gibbo kalaqatenninna manna shaatenni kainohunni usuramino manchooti.

20Philaaxoosi Yesuusa tire agura hasi're mannaho lede coyi'ri. 21Mannu kayinni, «Suti! Suti!» yaanni canci.

22Philaaxoosi sayikkimeeshsho, «Kuni manchi assino bunshe maati? Ani reyote iillishannore aanasi mittoreno diafoommo. Kunnira lichetenni gansiise agureemmo» yiinsa.

23Insa kayinni qoonqonsa naggi assite, «Suti!» yitanni cancitu. Mannunna qeesootu roorrooti canci bati'ri. 24Kunninni kainohunni Philaaxoosi xa'midhinori wo'mannonsa gede assi. 25Gibbo kalaqeennanna manna sheenna usurroonniha Barbaani xa'midhino garinni tirinsa. Yesuusa kayinni hasidhino garinni sayise uyinsa.

YESUUSI SUTAMA

(Mat 27:32-44; Maq 15:21-32; Yoh 19:17-27)

26Hakkunni gedensaanni Yesuusa haadhe hadhanni heedheenna Qereenu gobba manchi Simiooni, katamu gobbayidinni daanna affe, Yesuusi masiqala duhisiisse hoodesi ha'ranno gede assitu.

27Lowo manni Yesuusi hoode ha'ranni no. Hakko manni giddo gagaso ga'nanni wi'lanno meenti no. 28Yesuusi kayinni insa widira caaqqi yee lae, «Ki'ne Yerusaalamete meento, umi'neranna ooso'nera wi'le ikkinnina anera wi'litinoonte! 29‹Gaana meento, iltinokki otoottuwanna qannoonnikki unuunna hiitto ba'raa'rinoreeti!› yinanni barri daanno. 30Hattenne yannara mannu ilaalla, ‹Aananke ubbe!› Gaarrano, ‹Maaxxenke!› yaanno. #Hos 10:8; Aju 6:16 lai. 31Kuni baalu coyi shamu haqqi aana togo ikkannoha ikkiro moolu haqqi aana hiitto ikka ikka?» yii.

32Wole lame addifulootano Yesuusi ledo shitara haadhe hadhu. 33Golgoota woy Umu Qooncho yinanni darga iillite Yesuusa hakkiicho suttu. Lamenka addifulootano Yesuusira guraanninna qiniiteenni suttu. 34Hakkunni gedensaanni Yesuusi, «Anna'ya! Diaffe assitanni noona saonsa aguri» yii. Uddanosino hixa tuqqite beeqqitu.#Far 22:18 lai.

35Lowo manni uurre la"anni no. Yihudu roorrooti, «Wole gatisino; isi Maganu doorinoha Kiristoosa ikkinoro hanni umosi gatisossiyya» yitanni masifattusi.#Far 22:7 lai.

36Olantono qacifattanni shiqqi yite shiisha uyitusi.#Far 69:21 lai. 37Qolteno, «Ati Ayihudete Moote ikkoottoro hanni umokki gatisi» yitusi.

38«Kuni Ayihudete mooteeti» yitanno borro borreessite Yesuusira umoonni qolte masiqalu aana gantu.

YESUUSI LEDO SUTANTINORE LAME ADDIFULOOTA

(Mat 27:38-44; Maq 15:27-32)

39Yesuusi ledo sutantinori giddonni mittu addifuli Yesuusa, «Ati Kiristoosa di"ikkootto? Hanni umokkinna ninke gatisi» yaanni xonisi.

40Layinkihu kayinni, «Ati umikkira togoo yoo agarte heedheennahe Magano diwaajjatto? 41Ninke assinoommo saora malinonke qoricha adhinoommo; kuni manchi kayinni mitte saono diassino» yee rufi. 42Qoleno Yesuusa, «Mooticha'ya! Gashshootikkinni daatto woyite qaagie» yii.

43Yesuusino, «Halaale kuleemmohena, techonni ane ledo Gannate eatto» yiisi.

YESUUSI REYO

(Mat 27:45-56; Maq 15:33-41; Yoh 19:28-30)

44Kuni ikkinohu barrunni lee saate ikkanno hedoraati; hatte yannanni kayisse honse saate geeshsha baatto baala tunsitu. 45Arrishsho xo'u; Qullaawu Mini dukko alinni eeli geeshsha dadhante lamewa fultu.#Ful 26:31-33 lai.

46Yesuusi qoonqosi naggi asse, «Anna! Kuneeti, lubbo'ya Atera eeggo uyi'roommo!» yii. Hatto yiihu gedensaanni foolu fuli.#Far 31:5 lai.

47Hakkiicho noohu xibbe olanto roorrichi tenne ikkito lae, «Kuni manchi halaalintanni keeraanchoho» yee Magano ayirrisi.

48Ikkannore la"ara hakkiicho gamba yiino manni baalu ikkino coye lae dadille gagaso ga'nanni mine minesi higi. 49Yesuusa egennino manni baalunna Galiilunni kayise Isi hoode ha'ranni noo meenti fafowa uurre konne coye la"anni no.

YESUUSA MADAARROONNI GARA

(Mat 27:57-61; Maq 15:42-47; Yoh 19:38-42)

50Ayihudete katamira Armaatiyaho hee'rannohu mittu Yooseefi yinanni manchi no. Isi keeraanchohonna dancha manchooti. Ayihudete songorano miilaho. 51Ikkollana Ayihudootu amaaleranna ganonsara dikarsamino. Isi Maganu gashshoote hexxotenni agadhanni noo manchooti. 52Kuni manchi Philaaxoosiwa shiqe, Yesuusi reeshsha aannosi gede xa'mi'ri. 53Reeshshano dirrise, shaalado haarrete uddanonni kafane, ayeno madaarroonnikkiwa kincho kurkurre seekkinoonni waamma giddo madaari. 54Konne assinohu Ayihudete Fooliishsho Barrira qixxaambanni hee'noonni yannaraati.

55Galiilunni Yesuusi hoode dayino meenti Yooseefi ledo mare waamma lai. Reeshsha assine waammoonni garano lai. 56Mininsara hige reeshshaho buurranni shitto qixxeessi. Seeru garinni Fooliishshote Barra fooliishshi're hosi.

Currently Selected:

LUQAASI 23: QulMax

Highlight

Copy