ငဝ်ႈၵမ်ႇၽႃႇ 6
6
လွင်ႈဢၼ်ႁၢႆႉဢၼ်မိူၵ်ႈၵူၼ်း
1မိူဝ်ႈဢၼ်ၵူၼ်းတင်းလၢႆယႂ်ႇၽႄႈၼမ်ၵိုၼ်းမႃး ၵႃႈၼိူဝ်ၼႃႈလိၼ်ၼၼ်ႉၸိုင်၊ ၶဝ်လႆႈလုၵ်ႈယိင်းဢေႃႈ။- 2လုၵ်ႈၸၢႆးၽြႃးပဵၼ်ၸဝ်ႈတင်းလၢႆ ႁၼ်လွင်ႈဢၼ်လုၵ်ႈယိင်းၵူၼ်းၸိူဝ်းၼၼ်ႉႁၢင်ႈလီၼၼ်ႉလႄႈ ဢွၼ်ၵၼ်ဢဝ်ၸွမ်းၵႃႈၼင်ႇဢၼ်ဢလူဝ်ႇတူဝ်ၸဝ်ႈၵဝ်ႇမီးၼၼ်ႉဢေႃႈ။- 3ထႃႇဝရႃႉၽြႃးဝႃႈ၊ ဝီႉၺိၺ်ႇၵဝ်ဢမ်ႇလႆႈသင်ႇသွၼ်ယူႇၵႃႈတီႈၵူၼ်းသေႇသေႇ။ လွင်ႈမၼ်းၸမ်ႉ ၵူၼ်းၸိုင်ပဵၼ်ၼိူဝ်ႉဢေႃႈ။ ဢသၢၵ်ႈမၼ်းၵေႃႈ ႁႂ်ႈပဵၼ်ပၢၵ်ႇပၢႆသၢဝ်းပီႊသေ၊ ဝႃႈၼင်ႇၼႆဢေႃႈ။- 4မိူဝ်ႈၵႃႇလႃႉယၢမ်းၼၼ်ႉ၊ ၵႃႈၼိူဝ်လိၼ်မိူင်းၼႆႉ မီးၵူၼ်းဢၼ်တူဝ်ယႂ်ႇႁႅင်းယႂ်ႇၼၼ်ႉၵမ်ႈၽွင်ႈဢေႃႈ။ လိုၼ်းၼၼ်ႉၵေႃႈ၊ လုၵ်ႈၸၢႆးၽြႃးပဵၼ်ၸဝ်ႈၸိူဝ်းၼၼ်ႉ သိူၵ်ႈသမ်ႇၵၼ်တင်းလုၵ်ႈယိင်းၵူၼ်းတင်းလၢႆလႄႈ လုၵ်ႈဢၼ်လႆႈၼၼ်ႉ ပဵၼ်ၵူၼ်းဢၼ်ႁႅင်းယႂ်ႇ၊ ၵူၼ်းဢၼ်သႃႈႁၢဝ်ႈႁူင်ႁၢင်း ၸႃႉၸဵမ်မိူဝ်ႈၶိင်ႇၵႃႇလႃႉဢွၼ်ၼႆႉၼၼ်ႉဢေႃႈ။
5ၽြႃးပဵၼ်ၸဝ်ႈႁူႉႁၼ်လွင်ႈဢၼ် ဢပႅတ်ႈၵူၼ်းၵႃႈၼိူဝ်လိၼ်မိူင်းၼႆႉယႂ်ႇၼႃႇလႄႈ တၢင်းၵျၢမ်ႇတၢင်းပွင်ႁူဝ်ၸႂ်မၼ်းၵႃႈမီးတင်းသဵင်ႈတင်းလူင် ပဵၼ်ဢၼ်ႁၢႆႉယုတ်ႈၵူၺ်းၵူၺ်း ၵူႈမိုဝ်ႉၵူႈဝၼ်းတႃႇသေႇဢမ်ႇထၢတ်ႇၼၼ်ႉသေယဝ်ႉ၊- 6ၶုၵ်းၸႂ်လႆႈမႆႈၸႂ်လူၺ်ႈလွင်ႈဢၼ်ႁဵတ်းပဵၼ်ၵူၼ်းၵႃႈၼိူဝ်လိၼ်မိူင်းၼႆႉလႄႈ ႁူဝ်ၸႂ်မၼ်းၸဝ်ႈ မႆႈႁွၼ်ႉၼႅင်ၸႂ်ယူႇဢေႃႈ။- 7ထႃႇဝရႃႉၽြႃးၵေႃႈဝႃႈ၊ ၵဝ်တၵ်းယႃႉၽဵဝ်ႈၵူၼ်းဢၼ်ၵဝ်ၽၢၼ်ႇသၢင်းႁဵတ်းပဵၼ် ၸႃႉၸဵမ်ၵူၼ်းလႄႈတူဝ်ထိူၼ်ႇလႂ်၊ တရိၵ်ႈသၢၼ်ႇဢၼ်ၸၢင်ႈၵႂႃႇၸၢင်ႈၵၢၼ်းလႂ်၊ ၼူၵ်ႉၵၢင်ႁၢဝ်လႂ် ပႅတ်ႈသေၵႃႈၼိူဝ်ၼႃႈလိၼ်ၼႆႉဢေႃႈ။ လွင်ႈမၼ်းၸမ်ႉ ၵဝ်ၶုၵ်းၸႂ်လႆႈမႆႈၸႂ် လူၺ်ႈလွင်ႈဢၼ်ၵဝ်ႁဵတ်းပဵၼ်ၶဝ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။- 8ၼူဝ်းဢႃႇၸမ်ႉ၊ ပဵၼ်ၵေႃႉဢၼ်ထူပ်းၵျေးၸူးသိုဝ်ႈၼႃႈတႂ်ႈတႃထႃႇဝရႃႉၽြႃးဢေႃႈ။
ပိုၼ်းလွင်ႈၼူဝ်းဢႃႇ
9ဢထုၵ်ႉပတ်ႈတီႉ လွင်ႈၼူဝ်းဢႃႇၼၼ်ႉၸမ်ႉ၊ ၼူဝ်းဢႃႇၼၼ်ႉပဵၼ်ၵေႃႉဢၼ်သိုဝ်ႈတေႃႇ၊ ၵေႃႉဢၼ်ၸေးၸုမ်ႇ ၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။ ၼူဝ်းဢႃႇၼၼ်ႉၵႂႃႇၵႂႃႇမႃးမႃးလူၺ်ႈၵၼ်တင်းၽြႃးပဵၼ်ၸဝ်ႈဢေႃႈ။- 10ၼူဝ်းဢႃႇၼၼ်ႉမီးလုၵ်ႈၸၢႆးသၢမ်ၵေႃႉဢၼ်ဝႃႈ သေႇမႃႉ၊ ႁႃႇမႃႉ၊ တင်းယႃႇၽႅတ်ႈဢေႃႈ။- 11မိူဝ်ႈၼၼ်ႉ လိၼ်မိူင်းတူႇၼဝ်ႈယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။ လိၼ်မိူင်းၸေးၸုမ်ႇတင်းဢမူႉဢႃႉထမ်ႇမႃႉဢေႃႈ။- 12ၽြႃးပဵၼ်ၸဝ်ႈတူၺ်းလိၼ်မိူင်းလႄႈ ႁၼ်လွင်ႈဢၼ်တူႇၼဝ်ႈယူႇၼၼ်ႉဢေႃႈ။ လွင်ႈမၼ်းၸမ်ႉ ၵူၼ်းၵႃႈၼိူဝ်လိၼ်မိူင်းတင်းသဵင်ႈတင်းလူင် ႁွတ်ႈထိုင်တၢင်းဢၼ်တူႇဢၼ်ၼဝ်ႈယဝ်ႉ။
13မိူဝ်ႈၼၼ်ႉ ၽြႃးပဵၼ်ၸဝ်ႈလၢတ်ႈတီႈၼူဝ်းဢႃႇၼၼ်ႉလႄႈဝႃႈၸမ်ႉ၊ တီႈသုတ်းတီႈၵွႆသတ်ႉတဝႃႇတင်းသဵင်ႈတင်းလူင် ပေႃႇမႃးၵႃႈတီႈၽၢႆႇၼႃႈၵဝ်ယဝ်ႉ။ လိၼ်မိူင်းပျေႉၸုမ်ႇတၢင်းဢႃႉထမ်ႇမႃႉၵွပ်ႈပိူဝ်ႈၶဝ်ၼၼ်ႉဢေႃႈ။ တူၺ်းလူး၊ ၵဝ်တၵ်းယႃႉၽဵဝ်ႈၶဝ် ဢိၵ်ႇလူၺ်ႈၵၼ်တင်းလိၼ်မိူင်းပႅတ်ႈဢေႃႈ။- 14ဢဝ်မႆႉၵူဝ်ႇၽရႃႉလႄႈႁဵတ်းႁိူဝ်းသၢင်းၽေႃးပုၼ်ႈမႂ်းတႃႉ။ ၵႃႈတီႈၽၢႆႇၼႂ်းၵေႃႈႁဵတ်းပဵၼ်လုၵ်းပဵၼ်လုၵ်းဝႆႉတႃႉ။ ဢဝ်ယၢင်ပႅၵ်ႇတႃးၵႃႈတီႈၽၢႆႇၼွၵ်ႈၵႃႈတီႈၽၢႆႇၼႂ်းတင်းသဵင်ႈတင်းလူင်တႃႉ။- 15ပုင်ႇႁၢင်ႈဢၼ်တၵ်းလႆႈႁဵတ်းၸမ်ႉ၊ ႁိူဝ်းသၢင်းၽေႃးၼၼ်ႉၼႃႈယၢဝ်းမၼ်း တၵ်းလႆႈမီးသၢမ်ပၢၵ်ႇသွၵ်ႇ၊ ၼႃႈပွတ်းမၼ်းႁႃႈသိပ်းသွၵ်ႇ၊ ဢၼ်သုင်မၼ်းသၢမ်သိပ်းသွၵ်ႇဢေႃႈ။- 16ႁူးပုၼ်ႈဢၼ်တၵ်းလႅင်းၵေႃႈ၊ တၵ်းလႆႈႁဵတ်းဢေႃႈ။ ႁူးၼၼ်ႉတၵ်းလႆႈႁဵတ်းႁႂ်ႈမီးသွၵ်ႇၼိုင်ႈၵႃႈၼိူဝ်ဢေႃႈ။ ၵႃႈတီႈပဵမ်ႉႁိူဝ်းသၢင်းၽေႃးၽၢႆႇၼိုင်ႈ၊ တၵ်းလႆႈႁဵတ်းၽၵ်းတူဢေႃႈ။ တၵ်းလႆႈႁဵတ်းႁႂ်ႈမီးႁၢၼ်ႉတႂ်ႈႁၢၼ်ႉၵၢင်ႁၢၼ်ႉၼိူဝ်သၢမ်ႁၢၼ်ႉဢေႃႈ။- 17ၵဝ်တူဝ်ၸဝ်ႈၵဝ်ႇတၵ်းႁႂ်ႈၼမ်ႉထူမ်ႈလိၼ်မိူင်း ႁႂ်ႈလႆႈယႃႉၽဵဝ်ႈသတ်ႉတဝႃႇဢၼ်ဢသၢၵ်ႈလိပ်းယူႇ ၵႃႈမီးတင်းသဵင်ႈတင်းလူင်ပႅတ်ႈသေၵႃႈတႂ်ႈၽႃႉၵၢင်ႁၢဝ်လႄႈ ၵႃႈဢၼ်မီးၵႃႈၼိူဝ်လိၼ်မိူင်းတင်းသဵင်ႈတင်းလူင်တၵ်းလႆႈတၢႆဢေႃႈ။- 18တီႈမႂ်းၸမ်ႉ၊ ၵဝ်တၵ်းႁႂ်ႈပတီႉၺိၺ်ႇၵဝ်တႄႇဢေႃႈ။ ၸႃႉၸဵမ်မႂ်းလႄႈလုၵ်ႈၸၢႆးမႂ်း၊ မေးမႂ်းတင်းလုၵ်ႈပႂ်ႉမႂ်းတင်းလၢႆ တၵ်းလႆႈၶဝ်ႈၵႃႈၼႂ်းႁိူဝ်းသၢင်းၽေႃးၼၼ်ႉဢေႃႈ။- 19ၵႃႈၼႂ်းတရိၵ်ႈသၢၼ်ႇဢၼ်ဢသၢၵ်ႈလိပ်းၵူႈၸိူဝ်ႉၵူႈပိူင်ၼၼ်ႉ မႂ်းတၵ်းလႆႈဢဝ်တူဝ်ပေႃႈတူဝ်မႄႈၵူပ်ႉၵူႈၵၼ်လႄႈ သႂၢင်းသႂ်ႇၵႃႈၼႂ်းႁိူဝ်းသၢင်းၽေႃးႁႂ်ႈၶဝ်လႆႈဢသၢၵ်ႈလိပ်း ၶျၢမ်းသႃႇလူၺ်ႈၵၼ်တင်းမႂ်းဢေႃႈ။- 20ၼူၵ်ႉၵေႃႈမဵဝ်းလႂ်မဵဝ်းၼၼ်ႉ၊ တူဝ်ထိူၼ်ႇၵေႃႈမဵဝ်းလႂ်မဵဝ်းၼၼ်ႉ၊ တရိၵ်ႈသၢၼ်ႇဢၼ်ၸၢင်ႈၵႂႃႇၸၢင်ႈၵၢၼ်းၵေႃႈမဵဝ်းလႂ်မဵဝ်းၼၼ်ႉ၊ တူဝ်ပေႃႈတူဝ်မႄႈၵူပ်ႉၵူႈၵၼ်လႄႈ တၵ်းဢွၼ်ၵၼ်မႃးၸူးၵႃႈတီႈမႂ်းႁႂ်ႈဢသၢၵ်ႈလႆႈလိပ်းၶျၢမ်းသႃႇဢေႃႈ။- 21မႂ်းတၵ်းလႆႈဢဝ်တၢင်းၵိၼ် ဢၼ်လီၵိၼ်ၵူႈၸိူဝ်ႉၵူႈပိူင်လႄႈ ၸူႉသိမ်းဝႆႉတီႈမႂ်းဢေႃႈ။ တၵ်းပဵၼ်ပုၼ်ႈဢၼ်တူဝ်မႂ်းတၵ်းၵိၼ်ဢိၵ်ႇတင်းပုၼ်ႈဢၼ်တရိၵ်ႈသၢၼ်ႇတင်းလၢႆတၵ်းၵိၼ်ဢေႃႈ၊ ဝႃႈၼင်ႇၼႆဢေႃႈ။- 22ၸွမ်းၵႃႈၼင်ႇဢၼ်မၼ်းၸဝ်ႈသင်ႇလၢတ်ႈဝႆႉၼၼ်ႉၵေႃႈ ၼူဝ်းဢႃႇႁဵတ်းဢေႃႈ။
Currently Selected:
ငဝ်ႈၵမ်ႇၽႃႇ 6: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
