ႁဵတ်းဝၢတ်ႈ 21
21
တၢင်းဢၼ်မူတ်းၸၢင်ႇယိတ်ႈပရေႃးႁဵၵ်ႈ
1ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊ သင်ႇလၢတ်ႈတီႈယိတ်ႈပရေႃးႁဵၵ်ႈ ဢၼ်ပဵၼ်လုၵ်ႈၸၢႆးဢႃႇရုၼ်ႇၸိူဝ်းၼၼ်ႉလႄႈဝႃႈ၊ ၼႂ်းသူၼႆႉ ၽူႈလႂ်သေၵေႃႉသေၵူၼ်းဢမ်ႇလႆႈမီးတၢင်းဢၼ်ၵူဝ်ႈၵိူၵ်ႇ ၵွပ်ႈပိူဝ်ႈဢၼ်ၵူၼ်းမဵဝ်းလဵဝ်ၵၼ်တၢႆၼၼ်ႉ။- 2ၼႂ်းဝႃႈၼၼ်သေၵေႃႈ ၵွပ်ႈပိူဝ်ႈပီႈၼွင်ႉဢွၵ်ႇၵၼ်ဢၼ်ဝႃႈ၊ ပေႃႈ၊ မႄႈ၊ လုၵ်ႈၸၢႆး၊ လုၵ်ႈယိင်း၊ ပီႈၸၢႆး၊ ၼွင်ႉၸၢႆး၊- 3ပီႈၼၢင်း၊ ၼွင်ႉယိင်းဢွၵ်ႇ ဢၼ်ပဵၼ်ၵၼ်ႇၺႃႇဢၼ်မီးယူႇတီႈမၼ်းလႄႈ ဢမ်ႇပႆႇဢဝ်ၽူဝ်ၼၼ်ႉလႄႈ၊ မၼ်းမီးဢၶႂၢင်ႉဢၼ်လႆႈၶၢမ်ႇတၢင်းဢၼ်ၵူဝ်ႈၵိူၵ်ႇဢေႃႈ။- 4ၵွပ်ႈပိူဝ်ႈဢၼ်ပဵၼ်ၵူၼ်းယႂ်ႇၵူၼ်းလူင် ၼႂ်းမဵဝ်းၸိူဝ်ႉၶိူဝ်းလဵဝ်ၵၼ်လႄႈ၊ မၼ်းဢမ်ႇလႆႈဢဝ်တူဝ်ၸဝ်ႈၵဝ်ႇ ၶျႃးတူၵ်းတီႈတႅမ်ႇသေလႄႈ မီးတၢင်းဢၼ်ၵူဝ်ႈၵိူၵ်ႇ။- 5ၶဝ်ဢမ်ႇလႆႈထႃၶူၼ်ႁူဝ်ၶဝ်။ ၼူတ်ႇၵၢင်းၶဝ်ၵေႃႈဢမ်ႇလႆႈထႃ။ ဢမ်ႇလႆႈႁဵတ်းတၢင်းဢၼ်ထိူဝ်ၽၼ်းတီႈၼိူဝ်ႉတီႈၼင်ၶဝ်။- 6ၶဝ်တၵ်းလႆႈမူတ်းၸၢင်ႇပုၼ်ႈၽြႃးပဵၼ်ၸဝ်ႈၶဝ်ဢေႃႈ။ ၶဝ်ဢမ်ႇလႆႈဢဝ်ၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈၶဝ်ၶျႃးတူၵ်းတီႈတႅမ်ႇ။ ၵွပ်ႈပိူဝ်ႈဢၼ်ၶဝ်လႆႈပုၵ်ႈၸေႃႇတၢင်းပုၵ်ႈၸေႃႇ ဢၼ်ဢဝ်တင်းၽႆးပုၵ်ႈၸေႃႇတီႈထႃႇဝရႃႉၽြႃး ဢၼ်ဝႃႈဢႁႃႇရႃႉၶဝ်ႈမုၼ်းၽြႃးပဵၼ်ၸဝ်ႈၶဝ်ၸိူဝ်းၼၼ်ႉလႄႈ ၶဝ်တၵ်းလႆႈပဵၼ်ဢၼ်မူတ်းၸၢင်ႇဢေႃႈ။- 7ၶဝ်ဢမ်ႇလႆႈဢဝ်မႄႈမွၵ်ႇယႃႈ မႄႈယိင်းဢၼ်သီႇလႃႉလူႉၼၼ်ႉႁဵတ်းမေး။ မႄႈယိင်းဢၼ်ၽူဝ်ပႅတ်ႈၼၼ်ႉၵေႃႈ ၶဝ်ဢမ်ႇလႆႈဢဝ်။ မၼ်းပဵၼ်ဢၼ်မူတ်းၸၢင်ႇ ပုၼ်ႈၽြႃးပဵၼ်ၸဝ်ႈတူဝ်ၸဝ်ႈၵဝ်ႇဢေႃႈ။- 8ၵွပ်ႈပိူဝ်ႈဢၼ်မၼ်းလႆႈသၢၵ်ႈၵၢပ်ႈၶဝ်ႈမုၼ်းၽြႃးပဵၼ်ၸဝ်ႈမႂ်းလႄႈ၊ မႂ်းတၵ်းလႆႈႁႂ်ႈမၼ်းမူတ်းၸၢင်ႇလႄႈ၊ မၼ်းတၵ်းလႆႈမူတ်းၸၢင်ႇပုၼ်ႈမႂ်းဢေႃႈ။ လွင်ႈမၼ်းၸမ်ႉ ၵဝ်ထႃႇဝရႃႉၽြႃး ဢၼ်ႁႂ်ႈသူမူတ်းၸၢင်ႇၼႆႉ မူတ်းၸၢင်ႇဢေႃႈ။- 9ပေႃးလုၵ်ႈယိင်းယိတ်ႈပရေႃးႁဵၵ်ႈႁဵတ်းမႄႈမွၵ်ႇယႃႈလႄႈ ၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇၸိုင်၊ မၼ်းၶျႃးပေႃႈမၼ်းတူၵ်းတီႈတႅမ်ႇဢေႃႈ။ မၼ်းၼၼ်ႉၸိုင် တၵ်းလႆႈဢဝ်တုတ်ႇၽႆးပႅတ်ႈသေဢေႃႈ။
10ၵေႃႉဢၼ်ပဵၼ်ၵူၼ်းယိတ်ႈပရေႃးႁဵၵ်ႈၼႂ်းမဵဝ်းၸိူဝ်ႉၶိူဝ်းမၼ်း ဢၼ်ၶၢမ်ႇၽိၵ်ႈသိၵ်ႈတၢင်းဢၼ် ဢဝ်ၼမ်ႉမၼ်းထွၵ်ႇသႂ်ႇၵႃႈၼိူဝ်ႁူဝ်မၼ်းလႄႈ လႆႈၶၢမ်ႇတၢင်းဢၼ်ၶၢၼ်းဝႆႉၼႂ်းဢရႃႇလႄႈ ၼုင်ႈႁၢင်ႈၶိူင်ႈႁၢင်ႈၶူဝ်းၼၼ်ႉ၊ ဢမ်ႇလႆႈၽႄႇၶူၼ်ႁူဝ်မၼ်း။ ဢမ်ႇလႆႈသိၵ်ႇၶူဝ်းၼုင်ႈတၢင်းမႆမၼ်း။- 11ဢမ်ႇလႆႈသုတ်ႉၸပ်းသုတ်ႉၸူးတီႈတူဝ်တၢႆ။ ဢမ်ႇလႆႈၶၢမ်ႇတၢင်းဢၼ်ၵူဝ်ႈၵိူၵ်ႇပုၼ်ႈပေႃႈမႄႈ။- 12ဢမ်ႇလႆႈဢွၵ်ႇသေၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈၼၼ်ႉ။ ဢမ်ႇလႆႈၶျႃးထႃႇၼႃႉတီႈမူတ်းၸၢင်ႇၽြႃးပဵၼ်ၸဝ်ႈမၼ်းတူၵ်းတီႈတႅမ်ႇ။ လွင်ႈမၼ်းၸမ်ႉ မၼ်းမီးဢရႃႇတၢင်းဢၼ်ၶၢၼ်းဝႆႉ ဢၼ်ၸၢပ်ႈသႅင်ႇၵၼ်တင်းၼမ်ႉမၼ်းၽိၵ်ႈသိၵ်ႈၽြႃးပဵၼ်ၸဝ်ႈမၼ်းၼၼ်ႉဢေႃႈ။ ၵဝ်ပဵၼ်ထႃႇဝရႃႉၽြႃးဢေႃႈ။- 13မၼ်းတၵ်းလႆႈဢဝ်သၢဝ်ၵၼ်ႇၺႃႇၸႅတ်ႈၸႅတ်ႈၼၼ်ႉၵူၺ်းဢေႃႈ။- 14မၼ်းဢမ်ႇလႆႈဢဝ်မႄႈမူၵ်းမႄႈမၢႆႈ၊ မႄႈယိင်းဢၼ်ၽၢတ်ႇၵၼ်တင်းၽူဝ်၊ မႄႈယိင်းဢၼ်သီႇလႃႉလူႉ၊ မႄႈမွၵ်ႇယႃႈ။ မၼ်းတၵ်းလႆႈဢဝ်ၽူႈသၢဝ်ၵၼ်ႇၺႃႇၸႅတ်ႈၸႅတ်ႈမဵဝ်းၸိူဝ်ႉၶိူဝ်းလဵဝ်ၵၼ်တင်းမၼ်းဢေႃႈ။- 15မၼ်းဢမ်ႇလႆႈဢဝ်လုၵ်ႈလၢင်းၸိူဝ်ႉၶိူဝ်းမၼ်း ၶျႃးတူၵ်းတီႈတႅမ်ႇၵႃႈၼႂ်းမဵဝ်းၸိူဝ်ႉၶိူဝ်းလဵဝ်ၵၼ်တင်းမၼ်းၼၼ်ႉ။ ၵဝ်ပဵၼ်ထႃႇဝရႃႉၽြႃးဢၼ်ႁႂ်ႈမၼ်းမူတ်းၸၢင်ႇဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 16ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 17မႂ်းသင်ႇလၢတ်ႈတီႈဢႃႇရုၼ်ႇလႄႈဝႃႈ၊ ၼႂ်းမဵဝ်းၸိူဝ်ႉၶိူဝ်းမႂ်းသိုပ်ႇသိုပ်ႇတၢမ်းတၢမ်းၼၼ်ႉ၊ ၵေႃႉဢၼ်မီးဢပႅတ်ႈတီႈတူဝ်မၼ်းယူႇၼၼ်ႉ ဢမ်ႇလႆႈသုတ်ႉၸပ်းသုတ်ႉၸူး ႁႂ်ႈလႆႈသၢၵ်ႈၵၢပ်ႈဢႁႃႇရႃႉၶဝ်ႈမုၼ်းၽြႃးပဵၼ်ၸဝ်ႈမၼ်း။- 18ၵေႃႉဢၼ်မီးဢပႅတ်ႈတီႈတူဝ်မၼ်းဢၼ်ဝႃႈ ၵေႃႉဢၼ်တႃမွတ်ႇ၊ၵေႃႉဢၼ်ၶႃၵႅင်ႉ၊ ၵေႃႉဢၼ်ၶူႈလင်ဢႅပ်း၊ ၵေႃႉဢၼ်ဢၢင်ႇၵႃႇပူၼ်ႉလိူဝ်ၵႂႃႇ၊- 19ၵေႃႉဢၼ်တိၼ်ႁၵ်း၊ ၵေႃႉဢၼ်မိုဝ်းႁၵ်း၊- 20ၵေႃႉဢၼ်လင်ၵွမ်း၊ ၵေႃႉဢၼ်ဢႅၵ်း၊ ၵေႃႉဢၼ်တႃတေႃႈ၊ ၵေႃႉဢၼ်ပဵၼ်ႁိတ်း၊ ၵေႃႉဢၼ်ပဵၼ်ႁဝ်ႈ၊ ၵေႃႉဢၼ်ၶႆႇႁမ်လူႉၼၼ်ႉ ဢမ်ႇလႆႈသုတ်ႉၸပ်းသုတ်ႉၸူး။- 21ၼႂ်းမဵဝ်းၸိူဝ်ႉၶိူဝ်းယိတ်ႈပရေႃးႁဵၵ်ႈဢႃႇရုၼ်ႇၼၼ်ႉ၊ ၵေႃႉဢၼ်ပႃးဢပႅတ်ႈတီႈတူဝ်မၼ်းယူႇၼၼ်ႉ၊ ဢမ်ႇလႆႈသုတ်ႉၸပ်းသုတ်ႉၸူး ႁႂ်ႈလႆႈသၢၵ်ႈၵၢပ်ႈတၢင်းပုၵ်ႈၸေႃႇ ဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးသေၵေႃႉသေၵူၼ်း။ ၵွပ်ႈပိူဝ်ႈဢၼ်ပႃးဢပႅတ်ႈတီႈတူဝ်မၼ်းယူႇလႄႈ မၼ်းဢမ်ႇလႆႈသုတ်ႉၸပ်းသုတ်ႉၸူး ႁႂ်ႈလႆႈသၢၵ်ႈၵၢပ်ႈၶဝ်ႈမုၼ်းၽြႃးပဵၼ်ၸဝ်ႈမၼ်း။- 22ၶဝ်ႈမုၼ်းဢၼ်မူတ်းၸၢင်ႇသေဢမ်ႇဝႃႈ၊ ၶဝ်ႈမုၼ်းဢၼ်မူတ်းၸၢင်ႇၼႃႇလူင်လၢင်သေဢမ်ႇဝႃႈ၊ ၶဝ်ႈမုၼ်းၽြႃးပဵၼ်ၸဝ်ႈမၼ်းၼၼ်ႉၸိုင်၊ မၼ်းတၵ်းလႆႈၵိၼ်ဢေႃႈ။- 23ၵွပ်ႈပိူဝ်ႈဢၼ်ပႃးဢပႅတ်ႈတီႈတူဝ်မၼ်းယူႇလႄႈ လွင်ႈၼင်ႇႁိုဝ်တၵ်းဢမ်ႇလႆႈၶျႃးထႃႇၼႃႉတီႈမူတ်းၸၢင်ႇၵဝ်ၸိူဝ်းၼၼ်ႉတူၵ်းတီႈတႅမ်ႇၸိုင်၊ မၼ်းဢမ်ႇလႆႈၶဝ်ႈၵႃႈၼႂ်းၽႃႈၵင်ႈ။ ဢမ်ႇလႆႈသုတ်ႉၸပ်းသုတ်ႉၸူးယိတ်ႈပလၢင်ႇ။ ၵဝ်ပဵၼ်ထႃႇဝရႃႉၽြႃး ဢၼ်ႁႂ်ႈတီႈၸိူဝ်းၼၼ်ႉမူတ်းၸၢင်ႇဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 24ၼင်ႇၼၼ်လႄႈ မူဝ်းသေႇၼၼ်ႉ သင်ႇလၢတ်ႈဝႆႉတီႈဢႃႇရုၼ်ႇ တင်းလုၵ်ႈၸၢႆးမၼ်းတင်းလၢႆ ဢိၵ်ႇတင်းၵူၼ်းမဵဝ်းဢီႉသရေႇလႃႉ တင်းသဵင်ႈတင်းလူင်ဢေႃႈ။
Currently Selected:
ႁဵတ်းဝၢတ်ႈ 21: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship