ႁဵတ်းဝၢတ်ႈ 6

1ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 2ပေႃးသေၵေႃႉသေၵူၼ်းၽိတ်းပိူင်ႈပူၼ်ႉလိူဝ်ထႃႇဝရႃႉၽြႃးလႄႈ ႁဵတ်းတၢင်းဢၼ်လၢတ်ႈၵႂၢမ်းမူႉသႃႇတီႈၵေႃႉဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇ လူၺ်ႈလွင်ႈဢုၵ်ႉၸႃႇဢၼ်မၼ်းၼၼ်ႉဢဝ်ဢၢပ်ႈဝႆႉ လူၺ်ႈလွင်ႈဢုၵ်ႉၸႃႇဢၼ်မၼ်းၼၼ်ႉ ပွင်ႇၵမ်ႉဝႆႉ၊ လူၺ်ႈလွင်ႈဢုၵ်ႉၸႃႇဢၼ်ႁိမ်ႁူင်ႇဢဝ်တီႈမၼ်းၼၼ်ႉလႄႈသင်၊ ပေႃးႁဵတ်းတၢင်းဢၼ်ၼိၵ်ႈၸၢၵ်ႈငႅၼ်းသႄးၵေႃႉဢၼ် ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉလႄႈသင်၊- 3မိူဝ်ႈဢၼ်ထူပ်းႁၼ်ဢုၵ်ႉၸႃႇဢၼ်ႁၢႆၼၼ်ႉ ပေႃးႁဵတ်းတၢင်းဢၼ်လၢတ်ႈၵႂၢမ်းမူႉသႃႇသေလႄႈ တိူင်ႇဝႃႈဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉလႄႈသင်၊ ပေႃးႁဵတ်းတူႉၸရိူၵ်ႈၸိူဝ်ႉၼင်ႇၼၼ်သေၸိူဝ်ႉသေပိူင်လႄႈ ၽိတ်းပိူင်ႈၸိုင်၊- 4ၵေႃႉၼၼ်ႉၵွပ်ႈပိူဝ်ႈဢၼ်ၽိတ်းပိူင်ႈလႄႈႁွတ်ႈဢပႅတ်ႈၼၼ်ႉလႄႈ တၵ်းလႆႈဢဝ်ဢုၵ်ႉၸႃႇဢၼ်မၼ်းႁိမ်ႁူင်ႇဢဝ်ၼၼ်ႉ၊ ဢုၵ်ႉၸႃႇဢၼ်ၼိၵ်ႈၸၢၵ်ႈငႅၼ်းသႄးလႄႈလႆႈၼၼ်ႉ၊ ဢုၵ်ႉၸႃႇဢၼ်ပိူၼ်ႈတၢင်ႇၵေႃႉဢဝ်ဢၢပ်ႈဝႆႉ၊ ဢုၵ်ႉၸႃႇဢၼ်ႁၢႆလႄႈ မၼ်းထူပ်းႁၼ်ၼၼ်ႉ၊- 5ဢုၵ်ႉၸႃႇဢၼ်တိူင်ႇဝႃႈဢၼ်ဢမ်ႇၸိုဝ်ႈဢမ်ႇၸႂ်ႈလႄႈလႆႈၼၼ်ႉ ၶိုၼ်းတႅၼ်းပၼ်ဢေႃႈ။ မၼ်းတၵ်းလႆႈဢဝ် တင်းသဵင်ႈတင်းမူတ်းၶိုၼ်းတႅၼ်းပၼ်လႄႈ ဢဝ်ႁႃႈပုၼ်ႈပုၼ်ႈၼိုင်ႈထၢပ်ႈပၼ်ထႅင်ႈဢေႃႈ။ မၼ်းတၵ်းလႆႈဢဝ်ၶိုၼ်းပၼ်တီႈ ၸဝ်ႈဢုၵ်ႉၸႃႇ ၼႂ်းဝၼ်းဢၼ်မၼ်းပုၵ်ႈၸေႃႇယိတ်ႈဢၼ်ၽေႇတူႉၸရိူၵ်ႈၼၼ်ႉဢေႃႈ။- 6မၼ်းတၵ်းလႆႈဢဝ်ယိတ်ႈဢၼ်ၽေႇတူႉၸရိူၵ်ႈဢၼ်ဝႃႈသူဝ်းပေႃႈဢၼ်ဢမ်ႇပႃးဢပႅတ်ႈ ဢၼ်ဢဝ်ၵႃႈၼႂ်းၽုင်သူဝ်း ဢၼ်မႅၼ်ႈၼင်ႇတၢင်းဢၼ်မႂ်းၼပ်ႉဢၢၼ်ႇၼၼ်ႉ မႃးၵႃႈတီႈယိတ်ႈပရေႃးႁဵၵ်ႈ ပုၼ်ႈယိတ်ႈဢၼ်ၽေႇတူႉၸရိူၵ်ႈတီႈထႃႇဝရႃႉၽြႃးဢေႃႈ။- 7ယိတ်ႈပရေႃးႁဵၵ်ႈတၵ်းလႆႈႁဵတ်းတၢင်းဢၼ် ၽေႇဢပႅတ်ႈပုၼ်ႈမၼ်းၵႃႈတီႈၽၢႆႇၼႃႈထႃႇဝရႃႉၽြႃးလႄႈ ဢပႅတ်ႈၵႃႈဢၼ်မၼ်းၽိတ်းပိူင်ႈၼၼ်ႉ တၵ်းလွတ်ႈဢေႃႈ၊ ဝႃႈၼင်ႇၼႆဢေႃႈ။

8ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 9သင်ႇလၢတ်ႈတီႈဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉလႄႈဝႃႈ၊ တြႃးတၢင်းဢၼ်ပုၵ်ႈၸေႃႇယိတ်ႈဢၼ်တုတ်ႇၽႆးၼၼ်ႉၸမ်ႉ၊ တူဝ်ယိတ်ႈဢၼ်တုတ်ႇၽႆးတၵ်းလႆႈမီးၵႃႈၼိူဝ်တီႈဢၼ်ၽႆးမႆႈ ၵႃႈတီႈယိတ်ႈပလၢင်ႇတင်းၶိုၼ်း တေႃႇထိုင်ႁွတ်ႈၶိင်ႇၵၢင်ၼႂ်လႄႈ ၽႆးၵႃႈၼိူဝ်ယိတ်ႈပလၢင်ႇ တၵ်းလႆႈမႆႈယူႇတႃႇသေႇဢေႃႈ။- 10ယိတ်ႈပရေႃးႁဵၵ်ႈတၵ်းလႆႈၼုင်ႈသိူဝ်ႈပိၵ်ႈလႄႈ ဢဝ်ၵူၼ်ပိၵ်ႈၼုင်ႈသေယဝ်ႉ၊ ႁုပ်ႈသိမ်းဢဝ်တဝ်ႈယိတ်ႈ ဢၼ်တုတ်ႇၽႆးဢၼ်မႆႈသုတ်းၵႃႈၼိူဝ်ယိတ်ႈပလၢင်ႇၼၼ်ႉလႄႈ ဝႆႉၵႃႈတီႈႁိမ်းယိတ်ႈပလၢင်ႇဢေႃႈ။- 11မၼ်းသမ်ႉတၵ်းလႆႈထွတ်ႇၶူဝ်းၼုင်ႈမၼ်းၼၼ်ႉလႄႈ ဢဝ်ၶူဝ်းၼုင်ႈတၢင်ႇၽိုၼ်ၼုင်ႈသေယဝ်ႉ၊ ဢဝ်တဝ်ႈၼၼ်ႉၵႂႃႇၵႃႈၼွၵ်ႈတပ်ႉ ၵႃႈတီႈဢၼ်မူတ်းသႂ်ၼၼ်ႉဢေႃႈ။- 12ၽႆးၵႃႈၼိူဝ်ယိတ်ႈပလၢင်ႇယင်းဢမ်ႇလႆႈမွတ်ႇလႄႈ တၵ်းလႆႈမႆႈယူႇတႃႇသေႇဢေႃႈ။ ယိတ်ႈပရေႃးႁဵၵ်ႈတၵ်းလႆႈသႂ်ႇၽိုၼ်းသႂ်ႇၽႆးၵႃႈၼိူဝ်မၼ်းၵူႈၼႂ်လႄႈ ဢဝ်ယိတ်ႈဢၼ်တုတ်ႇၽႆးသိူဝ်ႇဝႆႉၵႃႈၼိူဝ်ၽိုၼ်းဢေႃႈ။ တၵ်းလႆႈဢဝ်ၵွၼ်ႈၶႆၵွၼ်ႈမၼ်းယိတ်ႈမိၵ်ႉသႃႇႁႃယႃႉတုတ်ႇၽႆးၵႃႈၼိူဝ်မၼ်းဢေႃႈ။- 13ၽႆးတၵ်းလႆႈမႆႈယူႇၵႃႈၼိူဝ်ယိတ်ႈပလၢင်ႇတႃႇသေႇဢမ်ႇထၢတ်ႇဢေႃႈ။ ဢမ်ႇလႆႈမွတ်ႇလႃးလႃး။

14တြႃးတၢင်းပုၵ်ႈၸေႃႇၽေႃးၸဵၼ်ႇၸမ်ႉ၊ လုၵ်ႈၸၢႆးဢႃႇရုၼ်ႇၸိူဝ်းၼၼ်ႉတၵ်းလႆႈဢဝ်ပုၵ်ႈၸေႃႇၽၢႆႇၼႃႈထႃႇဝရႃႉၽြႃး ၵႃႈတီႈၽၢႆႇၼႃႈယိတ်ႈပလၢင်ႇဢေႃႈ။- 15မၼ်းတၵ်းလႆႈဢဝ် ၵႃႈၼႂ်းၽွင်ၶဝ်ႈမုၼ်းတၢင်းပုၵ်ႈၸေႃႇၽေႃးၸဵၼ်ႇၼၼ်ႉ ဝၵ်ႉၼိုင်ႈ၊ ၼမ်ႉမၼ်းၵမ်ႈၽွင်ႈ၊ တင်းလေႃႇပၢၼ်ႇ ၵႃႈဢၼ်မီးၵႃႈၼိူဝ်တၢင်းပုၵ်ႈၸေႃႇၽေႃးၸဵၼ်ႇ ဢၼ်ဝႃႈပုၼ်ႈဢၼ်ထႃႇဝရႃႉၽြႃး တၵ်းၶုၵ်းၸႂ်လႆႈၶႆႈၸႂ်ထူပ်းၼၼ်ႉသေလႄႈ တုတ်ႇၽႆးၵႃႈၼိူဝ်ယိတ်ႈပလၢင်ႇ ပုၼ်ႈဢၼ်တၵ်းႁွမ်တၵ်းႁူၺ်းတီႈထႃႇဝရႃႉၽြႃးဢေႃႈ။- 16ဢၼ်ၵိုတ်းဢၼ်ၵျၢၼ်ႇၼၼ်ႉၸိုင်၊ ဢႃႇရုၼ်ႇတင်းလုၵ်ႈၸၢႆးမၼ်းတင်းလၢႆ တၵ်းလႆႈၵိၼ်ဢေႃႈ။ ယင်းဢမ်ႇပႃးၸိူဝ်ႉပႅင်ႈလႄႈ ၶဝ်တၵ်းလႆႈဢွၼ်ၵၼ်ၵိၼ်ၵႃႈၼႂ်းထႃႇၼႃႉတီႈမူတ်းၸၢင်ႇဢေႃႈ။ တၵ်းလႆႈၵိၼ်ၵႃႈတီႈၼႂ်းဝၢင်းမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၼၼ်ႉဢေႃႈ။- 17ဢမ်ႇလႆႈဢဝ်တင်းၸိူဝ်ႉပႅင်ႈႁဵတ်းၶဝ်ႈမုၼ်းၼၼ်ႉ။ ၵဝ်ဢဝ်ၵႃႈၼႂ်းတၢင်းပုၵ်ႈၸေႃႇ ဢၼ်ဢဝ်တင်းၽႆးႁဵတ်းတီႈၵဝ်ၼၼ်ႉ ပၼ်ႁႂ်ႈပဵၼ်ပုၼ်ႈၶဝ်တႃႇၶဝ်ယဝ်ႉ၊ ပဵၼ်ဢၼ်မူတ်းၸၢင်ႇၼႃႇလူင်လၢင် မိူၼ်ၸိူဝ်ႉၼင်ႇယိတ်ႈဢၼ်ၽေႇဢပႅတ်ႈ ဢိၵ်ႇတင်းယိတ်ႈဢၼ်ၽေႇတူႉၸရိူၵ်ႈၼၼ်ႉဢေႃႈ။- 18ၵူၼ်းၸၢႆးၸိူဝ်ႉၶိူဝ်းဢႃႇရုၼ်ႇၸိူဝ်းၼၼ်ႉ တၵ်းလႆႈဢွၼ်ၵၼ်ဢဝ်ၵႃႈၼႂ်းတၢင်းပုၵ်ႈၸေႃႇ ဢၼ်ဢဝ်တင်းၽႆးႁဵတ်းတီႈထႃႇဝရႃႉၽြႃးၸိူဝ်းၼၼ်ႉ ၵူႈၵေႃႉၵူႈၵူၼ်းလႄႈ ပဵၼ်ပိင်းၺၢပ်ႈၸဝ်ႈတီႈမဵဝ်းၸိူဝ်ႉၶိူဝ်းသူသိုပ်ႇသိုပ်ႇတၢမ်းတၢမ်းဢေႃႈ။ ၶဝ်ၸိူဝ်းဢၼ်တိူဝ်ႉယိပ်းတင်းပုၵ်ႈၸေႃႇၸိူဝ်းၼၼ်ႉ တၵ်းလႆႈမူတ်းၸၢင်ႇဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

19ထႃႇဝရႃႉၽြႃး သမ်ႉမီးဢမိင်ႉၵႃႈတီႈမူဝ်းသေႇလႄႈဝႃႈ၊- 20တၢင်းပုၵ်ႈၸေႃႇဢႃႇရုၼ်ႇတင်းလုၵ်ႈၸၢႆးမၼ်းတင်းလၢႆ ဢၼ်ၶဝ်တၵ်းလႆႈပုၵ်ႈၸေႃႇတီႈထႃႇဝရႃႉၽြႃး ၼႂ်းဝၼ်းဢၼ်မၼ်းၶၢမ်ႇၽိၵ်ႈသိၵ်ႈၼၼ်ႉၸမ်ႉ၊ တၵ်းလႆႈပဵၼ်ၽွင်ၶဝ်ႈမုၼ်းဢေးၽႃႇသိပ်းပုၼ်ႈဢဝ်ပုၼ်ႈၼိုင်ႈ၊ ပုၼ်ႈတၢင်းပုၵ်ႈၸေႃႇၽေႃးၸဵၼ်ႇ ဢၼ်တၵ်းလႆႈႁဵတ်းယူႇတႃႇသေႇ၊ ၶိင်ႇၵၢင်ၼႂ်ၶိုင်ႈၼိုင်ႈ ၶိင်ႇၵၢင်ၶမ်ႈၶိုင်ႈၼိုင်ႈဢေႃႈ။- 21ဢဝ်ၼမ်ႉမၼ်းသႂ်ႇသေလႄႈ ႁဵတ်းတီႈၶႅပ်းလဵၵ်းလႄႈ ၶူဝ်ႈလေႃးသေယဝ်ႉ၊ မႂ်းတၵ်းလႆႈဢဝ်မႃးလႄႈ ဢဝ်ဢၼ်ႁၵ်းဢၼ်ပွတ်းတၢင်းပုၵ်ႈၸေႃႇၽေႃးၸဵၼ်ႇ ဢၼ်ႁၵ်းဝိတ်းၼၼ်ႉ ပုၵ်ႈၸေႃႇပုၼ်ႈဢၼ်တၵ်းႁွမ်တၵ်းႁူၺ်းတီႈထႃႇဝရႃႉၽြႃးဢေႃႈ။- 22လုၵ်ႈၸၢႆးမၼ်းဢၼ်ၶၢမ်ႇဢဝ်ၽိၵ်ႈသိၵ်ႈၵႃႈၼႂ်းဢရႃႇမၼ်းၼၼ်ႉၵေႃႈ တၵ်းလႆႈႁဵတ်းတၢင်းပုၵ်ႈၸေႃႇၼၼ်ႉဢေႃႈ။ ပဵၼ်ပိင်းၺၢပ်ႈဢၼ်တႃႇသေႇပုၼ်ႈထႃႇဝရႃႉၽြႃးဢေႃႈ။ တၵ်းလႆႈတုတ်ႇၽႆးတင်းသဵင်ႈတင်းမူတ်းဢေႃႈ။- 23တၢင်းပုၵ်ႈၸေႃႇၽေႃးၸဵၼ်ႇယိတ်ႈပရေႃးႁဵၵ်ႈၼၼ်ႉၵႃႈမီးၼၼ်ႉၸိုင်၊ တၵ်းလႆႈဢဝ်တုတ်ႇၽႆးတင်းသဵင်ႈတင်းမူတ်းဢေႃႈ။ ဢမ်ႇလႆႈၵိၼ်လႃးလႃး၊ ဝႃႈၼင်ႇၼႆဢေႃႈ။

24ထႃႇဝရႃႉၽြႃးသမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 25သင်ႇလၢတ်ႈတီႈဢႃႇရုၼ်ႇ တင်းလုၵ်ႈၸၢႆးမၼ်းတင်းလၢႆလႄႈဝႃႈ၊ တြႃးတၢင်းပုၵ်ႈၸေႃႇယိတ်ႈဢၼ်ၽေႇဢပႅတ်ႈၼၼ်ႉၸမ်ႉ၊ ၵႃႈၼႂ်းတီႈဢၼ်ဢဝ်တူဝ်ယိတ်ႈဢၼ်တုတ်ႇၽႆးတၢႆၼၼ်ႉ တၵ်းလႆႈဢဝ်ယိတ်ႈဢၼ်ၽေႇဢပႅတ်ႈတၢႆၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။ ပဵၼ်ဢၼ်မူတ်းၸၢင်ႇၼႃႇလူင်လၢင်ဢေႃႈ။- 26ယိတ်ႈပရေႃးႁဵၵ်ႈဢၼ်ဢဝ်ပုၵ်ႈၸေႃႇ ပုၼ်ႈဢၼ်တၵ်းၽေႇဢပႅတ်ႈၼၼ်ႉတၵ်းလႆႈၵိၼ်ဢေႃႈ။ တၵ်းလႆႈၵိၼ်ၵႃႈၼႂ်းထႃႇၼႃႉတီႈမူတ်းၸၢင်ႇၵႃႈတီႈၼႂ်းဝၢင်းမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၼၼ်ႉဢေႃႈ။- 27ၵႃႈဢၼ်တိူဝ်ႉထုၵ်ႇၼိူဝ်ႉၼၼ်ႉ ပဵၼ်ဢၼ်မူတ်းၸၢင်ႇဢေႃႈ။ ပေႃးလိူတ်ႈၼၼ်ႉ လႆႈမီးတၢင်းဢၼ် ၽႅတ်းသႂ်ႇမႅၼ်ႈၵႃႈတီႈၶူဝ်းၼုင်ႈၸိုင်၊ မႂ်းတၵ်းလႆႈဢဝ်ၶူဝ်းၼုင်ႈဢၼ်ၶၢမ်ႇတၢင်းဢၼ်လိူတ်ႈၽႅတ်းသႂ်ႇမႅၼ်ႈၼၼ်ႉ၊ သၵ်ႉသၢႆႇၵႃႈၼႂ်းထႃႇၼႃႉတီႈမူတ်းၸၢင်ႇဢေႃႈ။- 28မေႃႈလိၼ်ဢၼ်ဢဝ်တူမ်ႈၼိူဝ်ႉၼၼ်ႉၸိုင်၊ တၵ်းလႆႈဢဝ်တႅၵ်ႇပႅတ်ႈသေဢေႃႈ။ ပေႃးတူမ်ႈၵႃႈၼႂ်းမေႃႈတွင်းလိူင်ၸိုင်၊ တၵ်းလႆႈသီလႄႈ ဢဝ်တင်းၼမ်ႉလၢင်ႉပႅတ်ႈသေဢေႃႈ။- 29ယိတ်ႈပရေႃးႁဵၵ်ႈၵူၼ်းၸၢႆးတၵ်းလႆႈဢွၼ်ၵၼ်ၵိၼ်ၵူႈၵေႃႉၵူႈၵူၼ်းဢေႃႈ။ ပဵၼ်ဢၼ်မူတ်းၸၢင်ႇၼႃႇလူင်လၢင်ဢေႃႈ။- 30ယိတ်ႈဢၼ်ၽေႇဢပႅတ်ႈ ဢၼ်ဢဝ်လိူတ်ႈမၼ်းမႃးၵႃႈၼႂ်းမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈပုၼ်ႈလွင်ႈၼင်ႇႁိုဝ် တၵ်းၽေႇဢပႅတ်ႈၵႃႈၼႂ်းထႃႇၼႃႉတီႈမူတ်းၸၢင်ႇၼၼ်ႉၸိုင်၊ ဢမ်ႇလႆႈၵိၼ်လႃးလႃး။ တၵ်းလႆႈဢဝ်တုတ်ႇၽႆးဢေႃႈ။

Popular Bible Verses from
ႁဵတ်းဝၢတ်ႈ 6

Bible:

Shan

Version: သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး - CBMS