ၼႂ်းထိူၼ်ႇ 16
16
တၢင်းဢၼ်ၵေႃးရႃႉ၊ တႃႇသၼ်ႇ၊ ဢၽီႉရမ်ႇ၊ လုၵ်ႉၽိုၼ်ႉ
1 ၵေႃးရႃႉ လုၵ်ႈၸၢႆးဢီႉသႁႃႇ ဢၼ်ပဵၼ်လုၵ်ႈၸၢႆးၵေႃႇႁတ်ႉ ၵူၼ်းမဵဝ်းလေႇဝီႉ ဢိၵ်ႇတင်းတႃႇသၼ်ႇ တင်းဢၽီႉရမ်ႇ လုၵ်ႈၸၢႆးဢေးလျႃႇၽႃႉ၊တင်းဢေႃးၼႃႉ လုၵ်ႈၸၢႆးပေးလိတ်ႉ ၵူၼ်းမဵဝ်းရူႉပိၼ်ႇၸိူဝ်းၼၼ်ႉ ၸူႉၽူႈၸူႉၵူၼ်းသေလႄႈ၊- 2ဢွၼ်ၵၼ်လုၵ်ႉယူႇၵႃႈတီႈၽၢႆႇၼႃႈမူဝ်းသေႇ ႁူမ်ႈလူၺ်ႈၵၼ်တင်းၵူၼ်းမဵဝ်းဢီႉသရေႇလႃႉသွင်ပၢၵ်ႇႁႃႈသိပ်း ဢၼ်ႁဵတ်းၶုၼ်ၵႃႈၼႂ်းပရဵၵ်ႈသၢတ်ႈ ဢၼ်မုၵ်ႉၵူၼ်းၸိူဝ်းၵူၼ်းၽွမ်ႉၵၼ်လိူၵ်ႈၵဵပ်းဢဝ်ႁွင်ႉဢဝ်၊ ဢၼ်ၸိုဝ်ႈဢွၵ်ႇသဵင်ဢွၵ်ႇၼၼ်ႉဢေႃႈ။- 3ၶဝ်ၼၼ်ႉ ၸူႉၵၼ်တုမ်ၵၼ်ယူႇၽၢႆႇၼိုင်ႈတင်းမူဝ်းသေႇ ဢိၵ်ႇတင်းဢႃႇရုၼ်ႇသေလႄႈ ဢွၼ်ၵၼ်လၢတ်ႈဝႃႈ၊ သူပေႃးတႃႉ။ ပရဵၵ်ႈသၢတ်ႈၵႃႈမီးတင်းသဵင်ႈတင်းလူင်ၸိုင် မူတ်းၸၢင်ႇယူႇၵူႈၵေႃႉၵူႈၵူၼ်းဢေႃႈ။ ထႃႇဝရႃႉၽြႃးမီးယူႇၼႂ်းၶဝ်ဢေႃႈ။ ပိူဝ်ႈၼႆလႄႈ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူယုၵ်ႉယွင်ႈတူဝ်ၸဝ်ႈၵဝ်ႇၵႃႈတီႈၼိူဝ်ပရဵၵ်ႈသၢတ်ႈထႃႇဝရႃႉၽြႃးၼင်ႇႁိုဝ်။ ဝႃႈၼင်ႇၼႆဢေႃႈ။- 4မူဝ်းသေႇ ငိၼ်းၵႂၢမ်းၼၼ်ႉသေယဝ်ႉ၊ မူပ်ႇတဵတ်ႇသေလႄႈ ယူႇဢေႃႈ။- 5လႆႈသမ်ႉ မၼ်းလၢတ်ႈတီႈၵေႃးရႃႉ ဢိၵ်ႇတင်းမူႇၵူၼ်းၽုင်ၵူၼ်းမၼ်းၼၼ်ႉလႄႈဝႃႈ၊ ဝၼ်းမိူဝ်ႈၽုၵ်ႈ ထႃႇဝရႃႉၽြႃးတၵ်းၼႄပျႃးလွင်ႈဢၼ် ၽူႈလႂ်ပဵၼ်ၵူၼ်းမၼ်းၸဝ်ႈ၊ ၽူႈလႂ်မူတ်းၸၢင်ႇ၊ တၵ်းႁႂ်ႈၽူႈလႂ်သုတ်ႉၸပ်းသုတ်ႉၸူးတီႈမၼ်းၸဝ်ႈၼၼ်ႉဢေႃႈ။ မၼ်းၸဝ်ႈတၵ်းႁႂ်ႈၵေႃႉဢၼ်မၼ်းၸဝ်ႈလိူၵ်ႈၵဵပ်းဢဝ်ၼၼ်ႉ သုတ်ႉၸပ်းသုတ်ႉၸူးၵႃႈတီႈမၼ်းၸဝ်ႈဢေႃႈ။- 6ၵေႃးရႃႉ ဢိၵ်ႇတင်းမုၵ်ႉၵူၼ်းၸိူဝ်းၵူၼ်းမၼ်းၵႃႈမီးၶဝ်ဢိူၺ်း၊ လွင်ႈတၢင်းဢၼ်သူတၵ်းလႆႈႁဵတ်းၸမ်ႉ၊ သူဢွၼ်ၵၼ်ဢဝ်လၢင်ႇပၢၼ်းသေလႄႈ၊- 7ဝၼ်းမိူဝ်ႈၽုၵ်ႈ ဢဝ်ၽႆးသႂ်ႇၵႃႈၼႂ်းမၼ်းလႄႈ ဢဝ်ၼၢမ်ႇသႃႇတၢင်ႇသႂ်ႇၵႃႈၼိူဝ်ၼၼ်ႉ ၵႃႈတီႈၽၢႆႇၼႃႈထႃႇဝရႃႉၽြႃးတႃႉ။ မိူဝ်ႈၼၼ်ႉ ၵေႃႉဢၼ်ထႃႇဝရႃႉၽြႃးလိူၵ်ႈၵဵပ်းဢဝ်ၼၼ်ႉ တၵ်းပဵၼ်ၵေႃႉဢၼ်မူတ်းၸၢင်ႇဢေႃႈ။ သူဢၼ်ပဵၼ်ၵူၼ်းမဵဝ်းလေႇဝီႉၶဝ်ဢိူၺ်း၊ သူပေႃးတႃႉ၊ ဝႃႈၼင်ႇၼႆဢေႃႈ။- 8မူဝ်းသေႇ သမ်ႉလၢတ်ႈတီႈၵေႃးရႃႉလႄႈဝႃႈ၊ သူဢၼ်ပဵၼ်ၵူၼ်းမဵဝ်းလေႇဝီႉ ၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းတႃႉ။- 9သူႁဵတ်းဢမ်ႇပေႃးၼင်ႇႁိုဝ်တီႈၵျေးၸူးတၢင်းဢၼ်ၽြႃးပဵၼ်ၸဝ်ႈ ၵူၼ်းမဵဝ်းဢီႉသရေႇလႃႉတင်းလၢႆၽႄဢဝ်သူဢွၵ်ႇသေၵႃႈၼႂ်းပရဵၵ်ႈသၢတ်ႈ မဵဝ်းဢီႉသရေႇလႃႉလႄႈ ဢဝ်သူဝႆႉၵႃႈတီႈႁိမ်းမၼ်းၸဝ်ႈလႄႈ ႁႂ်ႈသူလႆႈပွင်ႁဵတ်းဢမူႉသုမ်ႉထဵင်ထႃႇဝရႃႉၽြႃးယူႇသေလႄႈ ႁႂ်ႈသူလႆႈၸုၵ်းယူႇၵႃႈတီႈၽၢႆႇၼႃႈပရဵၵ်ႈသၢတ်ႈသေယဝ်ႉ၊ ပႂ်ႉဢမူႉၶဝ်ၼၼ်ႉ၊- 10ဢိၵ်ႇတင်းဢဝ်ပီႈၼွင်ႉမႂ်းၵူၼ်းမဵဝ်းလေႇဝီႉ တင်းသဵင်ႈတင်းလူင် ဝႆႉၵႃႈတီႈႁိမ်းမၼ်းၸဝ်ႈၼၼ်ႉလႄႈ ဢွၼ်ၵၼ်ႁႃဢဝ်ဢရႃႇ ယိတ်ႈပရေႃးႁဵၵ်ႈလူင်ပႄႇ။- 11ပိူဝ်ႈၼႆလႄႈ မႂ်းဢိၵ်ႇတင်းမုၵ်ႉၵူၼ်းၸိူဝ်းၵူၼ်းမႂ်းၵႃႈမီးၼၼ်ႉ ၸူႉၵၼ်တုမ်ၵၼ်ယူႇၽၢႆႇၼိုင်ႈတင်း ထႃႇဝရႃႉၽြႃးလူင်ပႄႇ။ ဢႃႇရုၼ်ႇၼၼ်ႉၸမ်ႉ၊ လွင်ႈၼင်ႇႁိုဝ် သူတၵ်းလႆႈတၢင်ႇဢပႅတ်ႈပွင်ႉၶၢင်းပွင်ႉမိူၼ်ႇတီႈမၼ်းၸိုင်၊ မၼ်းပဵၼ်ၵူၼ်းၸိူဝ်ႉၼင်ႇႁိုဝ်။ ဝႃႈၼင်ႇၼႆသေယဝ်ႉ၊- 12မူဝ်းသေႇ ပွႆႇၸႂ်ႉၵႂႃႇႁႂ်ႈလႆႈႁွင်ႉဢဝ်တႃႇသၼ်ႇ တင်းဢၽီႉရမ်ႇ လုၵ်ႈၸၢႆးဢေးလျႃႇၽႃႉၸိူဝ်းၼၼ်ႉမႃးဢေႃႈ။ သွင်ၶႃၵေႃႈ ၶိုၼ်းလၢတ်ႈလႄႈဝႃႈ၊ ႁဝ်းဢမ်ႇမႃး။- 13လွင်ႈဢၼ်မႂ်းဢဝ်ႁဝ်းဢွၵ်ႇသေၵႃႈၼႂ်းမိူင်းဢၼ် ၼမ်ႉၼူမ်းတင်းၼမ်ႉၽိုင်ႈၸၢင်ႈလႆယူႇၼၼ်ႉမႃး ႁႂ်ႈလႆႈဢဝ်ႁဝ်းတၢႆၵႃႈတီႈထိူၼ်ႇၼႆႉဢမ်ႇၵႃး၊ ႁဵတ်းၶုၼ်ယူႇၵႃႈတီႈၼိူဝ်ႁဝ်းလုမ်းလုမ်းၼၼ်ႉ ဢမ်ႇပွင်ႇလွင်ႈၵႃႈသင်တီႈမႂ်းလူင်ပႄႇ။- 14ၼွၵ်ႈသေၼၼ်ႉ မႂ်းယင်းဢမ်ႇဢဝ်ႁဝ်းၵႂႃႇၵႃႈတီႈမိူင်းဢၼ် ၼမ်ႉၼူမ်းတင်းၼမ်ႉၽိုင်ႈၸၢင်ႈလႆယူႇၼၼ်ႉ၊ ယင်းဢမ်ႇပၼ်ဢမူၺ်ႇႁႆႊၼႃး သူၼ်ဢူးယဵၼ်ႇၸပိတ်ႈတင်းလၢႆတီႈႁဝ်းလႄႈ ၶႂ်ႈၶွၵ်းမၢၵ်ႇတႃၵူၼ်းၸိူဝ်းၼႆႉပႅတ်ႈႁိုဝ်။ ႁဝ်းဢမ်ႇမႃးၵႃႈတီႈမႂ်း၊ ဝႃႈၼင်ႇၼႆဢေႃႈ။
15 မူဝ်းသေႇၸႂ်မႆႈၶႆႈၸႃႉၼႃႇလူင်လၢင်လႄႈ လဝ်ႊလၢတ်ႈတီႈထႃႇဝရႃႉၽြႃးလႄႈဝႃႈ၊ ယႃႇပေႁဵတ်းပမႃႇၼႃႉတီႈၶိူင်ႈပုၵ်ႈၸေႃႇၶဝ်သေၵမ်းတီႈၶႃႈ၊ ၶႃႈၸဝ်ႈဢမ်ႇသိမ်းဢမ်ႇဢဝ်လီႈၶဝ်သေတူဝ်တီႈၶႃႈ၊ ၶႃႈၸဝ်ႈဢမ်ႇၼိၵ်ႈၸၢၵ်ႈငႅၼ်းသႄးၼႂ်းၶဝ်သေၵေႃႉသေၵူၼ်းတီႈၶႃႈ၊ ဝႃႈၼင်ႇၼႆသေယဝ်ႉ၊- 16မူဝ်းသေႇ လၢတ်ႈတီႈၵေႃးရႃႉလႄႈဝႃႈ၊ ဝၼ်းမိူဝ်ႈၽုၵ်ႈ မႂ်းတင်းမုၵ်ႉၵူၼ်းၸိူဝ်းၵူၼ်းမႂ်းၵႃႈမီး ဢိၵ်ႇတင်း ဢႃႇရုၼ်ႇၼၼ်ႉ ဢွၼ်ၵၼ်မီးယူႇၵႃႈတီႈၽၢႆႇၼႃႈထႃႇဝရႃႉၽြႃးတႃႉ။- 17သူဢွၼ်ၵၼ်ဢဝ် လၢင်ႇပၢၼ်းတူဝ်ၸဝ်ႈၵဝ်ႇ ႁင်းၽႂ်ႁင်းမၼ်းသေလႄႈ ဢဝ်ၼၢမ်ႇသႃႇတၢင်ႇသႂ်ႇသေယဝ်ႉ၊ ဢွၼ်ၵၼ်ဢဝ်လၢင်ႇပၢၼ်းတူဝ်ၸဝ်ႈၵဝ်ႇဢၼ်ၼပ်ႉပွင်းၵၼ် ပဵၼ်လၢင်ႇပၢၼ်းသွင်ပၢၵ်ႇႁႃႈသိပ်းၼၼ်ႉ ႁင်းၽႂ်ႁင်းမၼ်းမႃး ၵႃႈတီႈၽၢႆႇၼႃႈထႃႇဝရႃႉၽြႃးတႃႉ။ မႂ်းဢိၵ်ႇတင်းဢႃႇရုၼ်ႇၵေႃႈ ပႃးဢဝ်လၢင်ႇပၢၼ်းတူဝ်ၸဝ်ႈၵဝ်ႇသေလႄႈမႃးတႃႉ၊ ဝႃႈၼင်ႇၼႆလႄႈ၊- 18ၶဝ်ၼၼ်ႉဢွၼ်ၵၼ်ဢဝ်လၢင်ႇပၢၼ်းတူဝ်ၸဝ်ႈၵဝ်ႇႁင်းၽႂ်ႁင်းမၼ်းလႄႈ ဢဝ်ၽႆးတင်းၼၢမ်ႇသႃႇတၢင်ႇသႂ်ႇသေယဝ်ႉ၊ ဢွၼ်ၵၼ်ၸုၵ်းယူႇၵႃႈတီႈႁူးၽၵ်းတူ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ ႁူမ်ႈလူၺ်ႈၵၼ်တင်းမူဝ်းသေႇ တင်းဢႃႇရုၼ်ႇဢေႃႈ။
19 ၵေႃးရႃႉၵေႃႈ ႁႂ်ႈပရဵၵ်ႈသၢတ်ႈတင်းသဵင်ႈတင်းလူင် ၸူႉၵၼ်တုမ်ၵၼ်ယူႇၽၢႆႇၼိုင်ႈတင်းၶဝ်ၼၼ်ႉ ၵႃႈတီႈႁူးၽၵ်းတူ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈသေယဝ်ႉ၊ မုၼ်ၽုင်းထႃႇဝရႃႉၽြႃး၊ ထၢင်ႇသႃးမႃးၵႃႈတီႈပရဵၵ်ႈသၢတ်ႈ တင်းသဵင်ႈတင်းလူင်ဢေႃႈ။- 20ထႃႇဝရႃႉၽြႃးမီးဢမိင်ႉတီႈမူဝ်းသေႇ တင်းဢႃႇရုၼ်ႇလႄႈဝႃႈ၊- 21သွင်ၶိူဝ်ၽၢတ်ႇယၢၼ်ၵၼ်တင်းပရဵၵ်ႈသၢတ်ႈၼႆႉသေလႄႈ ယူႇတၢင်ႇတီႈတႃႉ။ ၵဝ်တၵ်းယႃႉၶဝ်ပႅတ်ႈၵမ်းလဵဝ်၊ ဝႃႈၼင်ႇၼႆသေယဝ်ႉ၊- 22ၶဝ်ဢွၼ်ၵၼ်ၶုပ်ႉမူပ်ႇသေလႄႈလဝ်ႊဝႃႈ၊ ဢူဝ်းၽြႃးပဵၼ်ၸဝ်ႈ၊ ၽြႃးပဵၼ်ၸဝ်ႈဢၼ်ဢုပ်ႉပိူင်ႇဢသၢၵ်ႈဝီႉၺိၺ်ႇသတ်ႉတဝႃႇ တင်းသဵင်ႈတင်းလူင်တီႈၶႃႈ၊ ၵွပ်ႈပိူဝ်ႈဢၼ်ၵူၼ်းၵေႃႉၼိုင်ႈၽိတ်းပိူင်ႈလႄႈ ၸဝ်ႈႁဝ်းတၵ်းၸႂ်မႆႈၶႆႈၸႃႉတေႃႇ ပရဵၵ်ႈသၢတ်ႈ တင်းသဵင်ႈတင်းလူင်တီႈၶႃႈႁိုဝ်။ ဝႃႈၼင်ႇၼႆဢေႃႈ။
23ထႃႇဝရႃႉၽြႃးၵေႃႈ မီးဢမိင်ႉတီႈမူဝ်းသေႇလႄႈဝႃႈ၊- 24သင်ႇလၢတ်ႈတီႈပရဵၵ်ႈသၢတ်ႈတင်းလၢႆ ႁႂ်ႈၶဝ်ဝႄႈပႅတ်ႈတီႈယူႇၵေႃးရႃႉ ဢိၵ်ႇတင်း တႃႇသၼ်ႇတင်းဢၽီႉရမ်ႇၸိူဝ်းၼၼ်ႉသေလႄႈယူႇတႃႉ၊ ဝႃႈၼင်ႇၼႆသေယဝ်ႉ၊- 25မူဝ်းသေႇ လုၵ်ႉလႄႈၵႂႃႇၸူးၵႃႈတီႈ တီႈယူႇတႃႇသၼ်ႇ တင်းဢၽီႉရမ်ႇၼၼ်ႉလႄႈ ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းၵူၼ်းမဵဝ်း ဢီႉသရေႇလႃႉတင်းလၢႆၸိူဝ်းၼၼ်ႉၵေႃႈ ဢွၼ်ၵၼ်ၸွမ်းမၼ်းၵႂႃႇသေလႄႈ၊- 26မၼ်းသင်ႇလၢတ်ႈတီႈပရဵၵ်ႈသၢတ်ႈလႄႈဝႃႈ၊ သူဢွၼ်ၵၼ်ဝႄႈပႅတ်ႈတီႈယူႇၵူၼ်းႁၢႆႉၸိူဝ်းၼႆသေလႄႈယူႇတႃႉ။ ယႃႇပေတိူဝ်ႉပေယိပ်း ဢုၵ်ႉၸႃႇၶဝ်သေၸိူဝ်ႉသေပိူင်။ ပေႃးဢမ်ႇၼၼ် သူတၵ်းႁွတ်ႈထိုင်တၢင်းလူႉတၢင်းလႅဝ် လူၺ်ႈဢပႅတ်ႈၵႃႈဢၼ်ၶဝ်မီးၼၼ်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 27ၶဝ်ဢွၼ်ၵၼ်ဝႄႈပႅတ်ႈတီႈဢၼ်လဵပ်ႈႁွပ်ႈႁိမ်းမူဝ်းၵႃႇၵေႃးရႃႉ ဢိၵ်ႇတင်း တႃႇသၼ်ႇ တင်းဢၽီႉရမ်ႇၸိူဝ်းၼၼ်ႉလႄႈ ၵႂႃႇသေယဝ်ႉ၊ တႃႇသၼ်ႇတင်းဢၽီႉရမ်ႇၸိူဝ်းၼၼ်ႉ ဢွၼ်ၵၼ်ဢွၵ်ႇလႄႈ ၸုၵ်းယူႇၵႃႈတီႈႁူးၽၵ်းတူမူဝ်းၵႃႇၶဝ် ႁူမ်ႈလူၺ်ႈၵၼ်တင်းမေးၶဝ်တင်းလုၵ်ႈဢွၼ်ႇၶဝ်ဢေႃႈ။- 28မူဝ်းသေႇၵေႃႈ လၢတ်ႈလႄႈဝႃႈ၊ သူတၵ်းလႆႈႁူႉလွင်ႈဢၼ်ထႃႇဝရႃႉၽြႃး ပွႆႇၸႂ်ႉၵဝ်ႁႂ်ႈၵဝ်လႆႈႁဵတ်းလွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼႆႉလႄႈ ၵဝ်ဢမ်ႇၸွမ်းဢလူဝ်ႇတူဝ်ၵဝ်ႇသေလႄႈ ႁဵတ်းၼၼ်ႉၸိူဝ်ႉၼင်ႇႁိုဝ်ဝႃႈၼႆၸမ်ႉ၊- 29ပေႃးၵူၼ်းၸိူဝ်းၼႆႉလႆႈတၢႆမိူၼ်ၸိူဝ်ႉၼင်ႇဢၼ်ၵူၼ်းသတ်ႉတဝႃႇတင်းလၢႆၸၢင်ႈတၢႆ၊ ပေႃးၶဝ်လႆႈၶၢမ်ႇတၢင်းဢၼ်သင်ႇသွၼ်သုင်းမႃႉ မိူၼ်ၸိူဝ်ႉၼင်ႇဢၼ်ၵူၼ်းသတ်ႉတဝႃႇတင်းလၢႆၸၢင်ႈၶၢမ်ႇၼၼ်ႉယူႇၸိုင်၊ ထႃႇဝရႃႉၽြႃးဢမ်ႇပွႆႇၸႂ်ႉၵဝ်မႃး။- 30ပေႃးဢမ်ႇပဵၼ်ၼင်ႇၼၼ် ပေႃးထႃႇဝရႃႉၽြႃး ၽၢၼ်ႇသၢင်းႁဵတ်းပဵၼ်ဢၼ်မႂ်ႇလႄႈ လိၼ်မိူင်းတႅၵ်ႇဢႃႈသူပ်းယူႇ၊ ဢိုၼ်ၶဝ်ၸိူဝ်းၼႆႉ ဢိၵ်ႇတင်းၵႃႈဢၼ်ၸၢပ်ႈသႅင်ႇၵၼ်တင်းၶဝ်ၼၼ်ႉပႅတ်ႈလႄႈ၊ ၶဝ်ဢသၢၵ်ႈလိပ်းယူႇသေလႄႈ လူင်းၵႂႃႇၵႃႈတီႈမိူင်းမရၼႃႉၸိုင်၊ သူတၵ်းလႆႈႁူႉလႆႈၸႅင်ႈလွင်ႈဢၼ်ၵူၼ်းၸိူဝ်းၼႆႉ လႆႈႁဵတ်းဢမ်ႇပေႃးၼင်ႇႁိုဝ်တီႈထႃႇဝရႃႉၽြႃးၼၼ်ႉဢေႃႈ၊ ဝႃႈၼင်ႇၼႆလႄႈ ၼႂ်းမိူဝ်ႈဢၼ် မၼ်းလၢတ်ႈဝႃႈၸိူဝ်ႉၼင်ႇၼႆ သုတ်းထၢတ်ႇယဝ်ႉၼၼ်ႉ၊- 31လိၼ်မိူင်းတီႈဢၼ်ၶဝ်ယဵပ်ႇၼၼ်ႉ တႅၵ်ႇလႄႈ၊- 32ဢႃႈသူပ်းမၼ်းသေယဝ်ႉ၊ ဢိုၼ်ၶဝ် ဢိၵ်ႇတင်းၵူၼ်းႁိူၼ်းၵူၼ်းယေးၶဝ်တင်းၵူၼ်းၵႃႈဢၼ်ၸၢပ်ႈသႅင်ႇၵၼ် တင်းၵေႃးရႃႉတင်းလၢႆ တင်းဢုၵ်ႉၸႃႇၶဝ်ၵႃႈမီးၸိူဝ်းၼၼ်ႉပႅတ်ႈဢေႃႈ။- 33ၼင်ႇၼၼ်လႄႈ ၶဝ်ၼၼ်ႉ ဢိၵ်ႇလူၺ်ႈၵၼ်တင်းၶဝ်ၸိူဝ်းဢၼ် ၸၢပ်ႈသႅင်ႇၵၼ်တင်းၶဝ်ၼၼ်ႉ ဢသၢၵ်ႈလိပ်းယူႇသေလႄႈ လူင်းၵႂႃႇၵႃႈတီႈမိူင်းမရၼႃႉလႄႈ လိၼ်မိူင်းၶိုၼ်းငီႇငႅၼ်ႈၵၼ်ၵႃႈတီႈၼိူဝ်ၶဝ်သေယဝ်ႉ၊ ၶဝ်ၼၼ်ႉ လႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းပရဵၵ်ႈသၢတ်ႈဢေႃႈ။- 34ၵူၼ်းမဵဝ်းဢီႉသရေႇလႃႉ ဢၼ်မီးလဵပ်ႈႁွပ်ႈႁိမ်းႁွမ်းၼၼ်ႉတင်းသဵင်ႈတင်းလူင် ငိၼ်းသဵင်ဢၼ်ၶဝ်ႁွင်ႉသႅၼ်ႇၼၼ်ႉယူႇသေလႄႈ ဢွၼ်ၵၼ်ပၢႆႈဢေႃႈ။ လွင်ႈမၼ်းၸမ်ႉ ၶဝ်ဝႃႈ၊ ၵူဝ်လိၼ်မိူင်းတၵ်းဢိုၼ်ႁဝ်းပႅတ်ႈဢေႃႈ၊ ဝႃႈၼင်ႇၼႆဢေႃႈ။- 35ၵူၼ်းသွင်ပၢၵ်ႇႁႃႈသိပ်း ဢၼ်ဢဝ်ၼၢမ်ႇသႃႇတုတ်ႇၽႆးသေလႄႈ ပုၵ်ႈၸေႃႇၸိူဝ်းၼၼ်ႉၵေႃႈ၊ ၽႆးဢွၵ်ႇၵႃႈတီႈထႃႇဝရႃႉၽြႃးလႄႈ မႆႈဢေႃႈ။
ပၢၼ်ႉဢၼ်သႂ်ႇၽႆး
36ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 37သင်ႇလၢတ်ႈတီႈဢေးလႃႇၸႃႇ လုၵ်ႈၸၢႆးယိတ်ႈပရေႃးႁဵၵ်ႈဢႃႇရုၼ်ႇ ႁႂ်ႈမၼ်းၵဵပ်းဢဝ်လၢင်ႇပၢၼ်းၸိူဝ်းၼၼ်ႉ ၵႃႈၼႂ်းတီႈၽႆးမႆႈ ၵွပ်ႈပိူဝ်ႈဢၼ်ပဵၼ်ဢၼ်မူတ်းၸၢင်ႇလႄႈ ဢဝ်ၽႆးပိုၼ်ပႅတ်ႈတီႈၵႆသေယဝ်ႉ၊- 38ဢဝ်လၢင်ႇပၢၼ်းၶဝ်ၸိူဝ်းဢၼ်ၽိတ်းပိူင်ႈ ႁႂ်ႈဢသၢၵ်ႈတူဝ်ၸဝ်ႈၵဝ်ႇတၢႆၸိူဝ်းၼၼ်ႉ ႁဵတ်းၶႅပ်းတွင်းလိူင် ပုၼ်ႈဢၼ်တၵ်းမူမ်ႇႁေႃႇ ၵႃႈၼိူဝ်ယိတ်ႈပလၢင်ႇတႃႉ။ လၢင်ႇပၢၼ်းၸိူဝ်းၼၼ်ႉ ပဵၼ်ဢၼ်မူတ်းၸၢင်ႇ ၵွပ်ႈပိူဝ်ႈဢၼ်ၶဝ်ဢဝ်ပုၵ်ႈၸေႃႇ ၵႃႈတီႈၽၢႆႇၼႃႈထႃႇဝရႃႉၽြႃးလႄႈ တၵ်းလႆႈပဵၼ်ၼီႉမိၵ်ႈလၢၵ်ႈၶၼႃႇ တီႈၵူၼ်းမဵဝ်းဢီႉသရေႇလႃႉတင်းလၢႆဢေႃႈ၊ ဝႃႈၼင်ႇၼႆလႄႈ၊- 39ယိတ်ႈပရေႃးႁဵၵ်ႈဢေးလႃႇၸႃႇ ဢဝ်လၢင်ႇပၢၼ်း ဢၼ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၽႆးမႆႈၼၼ်ႉ ပုၵ်ႈၸေႃႇၸိူဝ်းၼၼ်ႉသေယဝ်ႉ၊ ၶဝ်ႁဵတ်းၶႅပ်းတွင်းလိူင်ပုၼ်ႈဢၼ်တၵ်း မူမ်ႇႁေႃႇယိတ်ႈပလၢင်ႇလႄႈ၊- 40ပဵၼ်တီႈဢၼ် ၵူၼ်းမဵဝ်းဢီႉသရေႇလႃႉတင်းလၢႆ တၵ်းၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ၵူၼ်းတၢင်ႇၸိူဝ်ႉတၢင်ႇမဵဝ်း ဢၼ်ဢမ်ႇၸႂ်ႈၵူၼ်းမဵဝ်းဢႃႇရုၼ်ႇၼၼ်ႉ ဢမ်ႇလႆႈသုတ်ႉၸပ်းသုတ်ႉၸူးႁႂ်ႈလႆႈတုတ်ႇၽႆးၼၢမ်ႇသႃႇ ၵႃႈတီႈၽၢႆႇၼႃႈထႃႇဝရႃႉၽြႃး လႄႈ ပဵၼ်ၸိူဝ်ႉၼင်ႇၵေႃးရႃႉ ဢိၵ်ႇတင်း မုၵ်ႉၵူၼ်းၸိူဝ်းၵူၼ်းမၼ်းၸိူဝ်းၼၼ်ႉ မႅၼ်ႈၸွမ်းၵႃႈၼင်ႇဢၼ်ထႃႇဝရႃႉၽြႃး ဢဝ်မူဝ်းသေႇ သင်ႇလၢတ်ႈဝႆႉ တီႈမၼ်းၼၼ်ႉဢေႃႈ။
ဢႃႇရုၼ်ႇၵႄႇသႄႇဢဝ်ၵူၼ်းတင်းလၢႆ
41ဝၼ်းမိူဝ်ႈၽုၵ်ႈ ပရဵၵ်ႈသၢတ်ႈၵူၼ်းမဵဝ်းဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်တၢင်ႇဢပႅတ်ႈပွင်ႉၶၢင်းပွင်ႉမိူၼ်ႇတီႈ မူဝ်းသေႇ တင်းဢႃႇရုၼ်ႇလႄႈဝႃႈ၊ သူၼႆႉဢဝ်ၵူၼ်းထႃႇဝရႃႉၽြႃးတင်းလၢႆတၢႆယဝ်ႉ၊ ဝႃႈၼင်ႇၼႆဢေႃႈ။- 42မိူဝ်ႈဢၼ်ပရဵၵ်ႈသၢတ်ႈတင်းလၢႆ ၸူႉၵၼ်တုမ်ၵၼ်ယူႇၽၢႆႇၼိုင်ႈတင်းမူဝ်းသေႇ တင်းဢႃႇရုၼ်ႇၼၼ်ႉၸိုင်၊ ၶဝ်ႁႅၼ်တူၺ်း မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉလႄႈ မွၵ်ႇၵုမ်ႈႁူမ်ႇသုမ်ႇမၼ်းယူႇလႄႈ မုၼ်ၽုင်းထႃႇဝရႃႉၽြႃး ထၢင်ႇသႃးမႃးဢေႃႈ။- 43မူဝ်းသေႇ တင်းဢႃႇရုၼ်ႇ ဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈၽၢႆႇၼႃႈ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉဢေႃႈ။- 44ထႃႇဝရႃႉၽြႃးမီးဢမိင်ႉတီႈမူဝ်းသေႇလႄႈဝႃႈ၊- 45ဝႄႈပႅတ်ႈပရဵၵ်ႈသၢတ်ႈၸိူဝ်းၼႆႉသေလႄႈယူႇတႃႉ။ ၵဝ်တၵ်းယႃႉၶဝ်ပႅတ်ႈၵမ်းလဵဝ်ဢေႃႈ၊ ဝႃႈၼင်ႇၼႆသေယဝ်ႉ၊ သွင်ၶႃဢွၼ်ၵၼ် မူပ်ႇတဵတ်ႇသေလႄႈယူႇဢေႃႈ။
46 မူဝ်းသေႇၵေႃႈ သင်ႇလၢတ်ႈတီႈဢႃႇရုၼ်ႇလႄႈဝႃႈ၊ မႂ်းယိပ်းဢဝ်လၢင်ႇပၢၼ်းမႂ်းသေလႄႈ ဢဝ်ၽႆးၵႃႈၼိူဝ်ယိတ်ႈပလၢင်ႇသႂ်ႇသေယဝ်ႉ၊ ဢဝ်ၼၢမ်ႇသႃႇတၢင်ႇသႂ်ႇယူႇသေလႄႈ ၵႂႃႇၸူးၵႃႈတီႈဢၼ် ပရဵၵ်ႈသၢတ်ႈမီးၼၼ်ႉ ၶၼ်ၶၼ်ၽႂ်းၽႂ်းလႄႈ ႁဵတ်းတၢင်းဢၼ်ၽေႇဢပႅတ်ႈပုၼ်ႈၶဝ်တႃႉ။ တၢင်းၸႂ်မႆႈၶႆႈၸႃႉဢွၵ်ႇၵႃႈတီႈထႃႇဝရႃႉၽြႃးၵႂႃႇလႄႈ ၽေးၵႃႇလႃႉႁွတ်ႈမႃးမီးယူႇဝႆႉယဝ်ႉ၊ ဝႃႈၼင်ႇၼႆလႄႈ၊- 47ဢႃႇရုၼ်ႇ ၸွမ်းၵႃႈၼင်ႇဢၼ်မူဝ်းသေႇ သင်ႇလၢတ်ႈဝႆႉၼၼ်ႉ သေလႄႈ ဢဝ်လႅၼ်ႈၵႂႃႇၵႃႈၼႂ်းၵၢင်ပရဵၵ်ႈသၢတ်ႈဢေႃႈ။ မိူဝ်ႈၼၼ်ႉ ၽေးၵႃႇလႃႉၸႃႉႁွတ်ႈမႃးမီးယူႇၵႃႈၼႂ်းၵူၼ်းတင်းလၢႆၼၼ်ႉလႄႈ မၼ်းဢဝ်ၼၢမ်ႇသႃႇတၢင်ႇသႂ်ႇလႄႈ ႁဵတ်းတၢင်းဢၼ်ၽေႇဢပႅတ်ႈပုၼ်ႈၵူၼ်းတင်းလၢႆဢေႃႈ။- 48မၼ်းၸုၵ်းယူႇၵႃႈၼႂ်းၵႄႇဝူင်ႈၵၢင်ၶဝ်ၸိူဝ်းဢၼ်ဢသၢၵ်ႈယင်းလိပ်းယူႇ ဢိၵ်ႇတင်းၶဝ်ၸိူဝ်းဢၼ်တၢႆယဝ်ႉ ၸိူဝ်းၼၼ်ႉလႄႈ၊ ၽေးၵႃႇလႃႉၼၼ်ႉ ထၢတ်ႇယဵၼ်မႃးဢေႃႈ။- 49ၼွၵ်ႈသေၶဝ်ၸိူဝ်းဢၼ်တၢႆၵွပ်ႈပိူဝ်ႈဢမူႉၵေႃးရႃႉၼၼ်ႉ၊ ၵူၼ်းဢၼ်တၢႆလူၺ်ႈၽေးၵႃႇလႃႉၼၼ်ႉ တင်းသဵင်ႈတင်းလူင်ၸမ်ႉ၊ မီးမိုၼ်ႇၼိုင်ႈသီႇႁဵင်ပၢႆၸဵတ်းပၢၵ်ႇဢေႃႈ။- 50ဢႃႇရုၼ်ႇ ၶိုၼ်းမႃးၸူးၵႃႈတီႈမူဝ်းသေႇ တီႈႁူးၽၵ်းတူ မူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၼၼ်ႉလႄႈ ၽေးၵႃႇလႃႉၼၼ်ႉၵေႃႈ ထၢတ်ႇၵႂႃႇယဵၼ်ၵႂႃႇဢေႃႈ။
Currently Selected:
ၼႂ်းထိူၼ်ႇ 16: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship