ၼႂ်းထိူၼ်ႇ 23

1မိူဝ်ႈၼၼ်ႉပႃႇလၢမ်ႇလၢတ်ႈတီႈၶုၼ်ပႃႇလၵ်ႈလႄႈဝႃႈ၊ တႄႇႁဵတ်းယိတ်ႈပလၢင်ႇၸဵတ်းဢၼ်ၵႃႈတီႈၼႆႈပုၼ်ႈၵဝ်တႃႉ။ ပွင်ႁႅၼ်းဝူဝ်းပေႃႈၸဵတ်းတူဝ် ဢိၵ်ႇတင်းသူဝ်းပေႃႈၸဵတ်းတူဝ်ပုၼ်ႈၵဝ်တႃႉ၊ ဝႃႈၼင်ႇၼႆလႄႈ၊- 2ၶုၼ်ပႃႇလၵ်ႈ ႁဵတ်းၸွမ်းၵႃႈၼင်ႇဢၼ် ပႃႇလၢမ်ႇဝႃႈၼၼ်ႉသေယဝ်ႉ၊ ၶုၼ်ပႃႇလၵ်ႈဢိၵ်ႇတင်းပႃႇလၢမ်ႇၼၼ်ႉ ဢဝ်ဝူဝ်းယေႈတူဝ် ဢိၵ်ႇတင်းသူဝ်းယေႈတူဝ် ပုၵ်ႈၸေႃႇၵႃႈၼိူဝ်ယိတ်ႈပလၢင်ႇယေႈဢၼ်ဢေႃႈ။- 3ပႃႇလၢမ်ႇၵေႃႈလၢတ်ႈတီႈၶုၼ်ပႃႇလၵ်ႈလႄႈဝႃႈ၊ ၶုၼ်လူင်ၸုၵ်းယူႇၵႃႈတီႈႁိမ်းယိတ်ႈဢၼ်တုတ်ႇၽႆးၼႆႉတႃႉ၊ ၵဝ်တၵ်းၵႂႃႇဢေႃႈ။ ထႃႇဝရႃႉၽြႃး လီမႃးႁပ်ႉႁူဝ်တၢင်းၵဝ်တၵ်းမႃးဢေႃႈ။ ၵဝ်တၵ်းၶိုၼ်းမွၵ်ႇလၢတ်ႈၵႃႈဢၼ်မၼ်းၸဝ်ႈ ၼႄပျႃးတီႈၵဝ်ၼၼ်ႉတီႈၶုၼ်လူင်ဢေႃႈ၊ ဝႃႈၼင်ႇၼႆသေယဝ်ႉ၊ ၶိုၼ်ႈၵႂႃႇၵႃႈၼိူဝ်လွႆဢုၼ်ႈလုၵ်ႈၼိုင်ႈဢေႃႈ။- 4ၽြႃးပဵၼ်ၸဝ်ႈႁပ်ႉႁူဝ်တၢင်းပႃႇလၢမ်ႇသေယဝ်ႉ၊ ပႃႇလၢမ်ႇလဝ်ႊလၢတ်ႈတီႈမၼ်းၸဝ်ႈလႄႈဝႃႈ၊ ၶႃႈၸဝ်ႈမႄးႁႅၼ်းယိတ်ႈပလၢင်ႇ ၸဵတ်းဢၼ်သေလႄႈ ဢဝ်ဝူဝ်းပေႃႈယေႈတူဝ် ဢိၵ်ႇတင်းသူဝ်းပေႃႈယေႈတူဝ်ပုၵ်ႈၸေႃႇ ၵႃႈၼိူဝ်ယိတ်ႈပလၢင်ႇ ယေႈဢၼ်တီႈၶႃႈယဝ်ႉ၊ ဝႃႈၼင်ႇၼႆဢေႃႈ။- 5ထႃႇဝရႃႉၽြႃး ဢဝ်ၵႂၢမ်းသႂ်ႇဝႆႉၵႃႈတီႈသူပ်းပႃႇလၢမ်ႇသေလႄႈ မီးဢမိင်ႉလႄႈဝႃႈ၊ မႂ်းၶိုၼ်းမိူဝ်းၸူးၵႃႈတီႈၶုၼ်ပႃႇလၵ်ႈလႄႈလၢတ်ႈၸိူဝ်ႉၼင်ႇၼႆတႃႉ၊ ဝႃႈၼင်ႇၼႆလႄႈ၊- 6မိူဝ်ႈဢၼ်မၼ်းၶိုၼ်းမႃးၼၼ်ႉၸိုင် ၶုၼ်လူင်ဢိၵ်ႇတင်း မူးမၢတ်ႈၽွင်းမိူင်းမေႃႇၽႃႉတင်းသဵင်ႈတင်းလူင် ဢွၼ်ၵၼ်ၸုၵ်းယူႇၵႃႈတီႈႁိမ်းယိတ်ႈဢၼ်တုတ်ႇၽႆးၶုၼ်လူင်ၼၼ်ႉဢေႃႈ။

7မိူဝ်ႈၼၼ်ႉ မၼ်းဢဝ်တင်းၵႂၢမ်းပရေႃးၽႅတ်ႈသေလႄႈ ဢွၵ်ႇသူပ်းဝႃႈၸမ်ႉ၊ ၶုၼ်ပႃႇလၵ်ႈႁွင်ႉဢဝ်ၵဝ်သေၵႃႈၼႂ်းမိူင်းဢႃႇရမ်ႇလႄႈ ၶုၼ်ႁေႃၶမ်းမေႃႇၽႃႉ ႁွင်ႉဢဝ်ၵဝ်သေ ၵႃႈတီႈလွႆၽၢႆႇဝၼ်းဢွၵ်ႇတင်းလၢႆၼၼ်ႉလႄႈဝႃႈ၊ မႃးလႄႈၵိၼ်ႇလႃႇၵိၼ်ႇဝႃႈ မဵဝ်းယႃႇၵုပ်ႈ ပုၼ်ႈၵဝ်သေၵမ်း။ မႃးလႄႈဢဝ်မဵဝ်းဢီႉသရေႇလႃႉဢၢပ်ႈပၼ်တီႈတၢင်းလူႉတၢင်းလႅဝ်သေၵမ်း၊ ဝႃႈၼင်ႇၼႆမႃးယဝ်ႉ။- 8ၵဝ်တၵ်းၵိၼ်ႇလႃႇၵိၼ်ႇဝႃႈ ၵေႃႉဢၼ်ၽြႃးပဵၼ်ၸဝ်ႈ ဢမ်ႇၵိၼ်ႇလႃႇၵိၼ်ႇဝႃႈၼၼ်ႉလႆႈၸိူဝ်ႉၼင်ႇႁိုဝ်။ ၵဝ်တၵ်းဢဝ် ၵေႃႉဢၼ်ၽြႃးပဵၼ်ၸဝ်ႈ ဢမ်ႇဢဝ်ဢၢပ်ႈပၼ်တီႈတၢင်းလူႉတၢင်းလႅဝ်ၼၼ်ႉ ဢၢပ်ႈပၼ်လႆႈၸိူဝ်ႉၼင်ႇႁိုဝ်။- 9ၵဝ်ယူႇၵႃႈတီႈၼိူဝ်မၢၵ်ႇႁိၼ်သေလႄႈ ႁၼ်မၼ်းဢေႃႈ။ ၵဝ်ယူႇၵႃႈတီႈၼိူဝ်လွႆသေလႄႈ လူတူၺ်းမၼ်းဢေႃႈ။ ၵူၼ်းမဵဝ်းၼၼ်ႉ ယူႇမဵဝ်းလဵဝ်ၵူၺ်းၶဝ်ဢေႃႈ။ ၶဝ်ဢမ်ႇလႆႈလေႃးလႄးလူၺ်ႈၵၼ်တင်းၵူၼ်းတၢင်ႇၸိူဝ်ႉတၢင်ႇမဵဝ်း။- 10ၽူႈလႂ်ၼပ်ႉဢၢၼ်ႇ မုၼ်ႈလိၼ်မဵဝ်းယႃႇၵုပ်ႈလႆႈ။ ၽူႈလႂ်ၶပ်ႉလူၶပ်ႉတူၺ်းမဵဝ်းဢီႉသရေႇလႃႉသီႇပုၼ်ႈပုၼ်ႈၼိုင်ႈလႆႈ။ ႁႂ်ႈၵဝ်တၢႆမိူၼ်ၸိူဝ်ႉၼင်ႇဢၼ် ၵူၼ်းသိုဝ်ႈတေႃႇတၢႆၼၼ်ႉသေၵမ်းလူၺ်ႈ။ ႁႂ်ႈတီႈသုတ်းတီႈၵွႆၵဝ်ပဵၼ်မိူၼ်ၸိူဝ်ႉၼင်ႇတီႈသုတ်းတီႈၵွႆမၼ်းၼၼ်ႉ သေၵမ်းလူၺ်ႈ၊ ဝႃႈၼင်ႇၼႆဢေႃႈ။- 11ၶုၼ်ပႃႇလၵ်ႈၵေႃႈလၢတ်ႈတီႈပႃႇလၢမ်ႇလႄႈဝႃႈ၊ ၸဝ်ႈႁဵတ်းၸိူဝ်ႉၼင်ႇႁိုဝ်တီႈၵဝ်။ ၵဝ်ႁွင်ႉၸဝ်ႈမႃးႁႂ်ႈၸဝ်ႈၵိၼ်ႇလႃႇၵိၼ်ႇဝႃႈ ရၢၼ်ႇသူႇၵဝ်ယဝ်ႉ။ တူၺ်းလူး၊ ၸဝ်ႈပၼ်တၢင်းလီတီႈၶဝ်လုမ်းလုမ်းယဝ်ႉလူင်ပႄႇ၊ ဝႃႈၼင်ႇၼႆသေယဝ်ႉ၊- 12မၼ်းၶိုၼ်းလၢတ်ႈလႄႈဝႃႈ၊ ၵဝ်ဢမ်ႇလႆႈႁဵတ်းသတီႉ ႁႂ်ႈလႆႈလၢတ်ႈၵႂၢမ်းဢၼ်ထႃႇဝရႃႉၽြႃး ဢဝ်သႂ်ႇဝႆႉၵႃႈတီႈသူပ်းၵဝ်ၼၼ်ႉႁိုဝ်။ ဝႃႈၼင်ႇၼႆဢေႃႈ။

13ၶုၼ်ပႃႇလၵ်ႈလၢတ်ႈတီႈမၼ်းလႄႈဝႃႈ၊ ၸွမ်းလူၺ်ႈၵၼ်တင်းၵဝ်ၵႂႃႇတၢင်ႇတီႈ၊ တီႈဢၼ်ၸဝ်ႈႁၼ်ၶဝ်လႆႈၼၼ်ႉသေၵမ်း။ ၵူၺ်းၵႃႈ ၸဝ်ႈယင်းဢမ်ႇလႆႈႁၼ်ၶဝ်တင်းသဵင်ႈတင်းလူင်လႄႈ၊ ၵွမ်ႉပေႃးတၵ်းလႆႈတူၺ်းႁၼ် ပွတ်းၼိုင်ႈၵူၺ်းၼၼ်ႉဢေႃႈ။ ၵိၼ်ႇလႃႇၵိၼ်ႇဝႃႈၶဝ်ၵႃႈတီႈၼၼ်ႈပုၼ်ႈၵဝ်သေၵမ်း၊ ဝႃႈၼင်ႇၼႆသေလႄႈ၊- 14ဢဝ်ၵႂႃႇၵႃႈတီႈပၢင်ႇပဵင်းၸေႃးၽိမ်ႇ ၵႃႈၼိူဝ်လွႆပီႉသၵႃႇလႄႈ တႄႇႁဵတ်းယိတ်ႈပလၢင်ႇၸဵတ်းဢၼ်သေယဝ်ႉ၊ ဢဝ်ဝူဝ်းယေႈတူဝ် ဢိၵ်ႇတင်းသူဝ်းပေႃႈယေႈတူဝ်ပုၵ်ႈၸေႃႇၵႃႈၼိူဝ်ယိတ်ႈပလၢင်ႇယေႈဢၼ်ဢေႃႈ။- 15မၼ်းလၢတ်ႈတီႈၶုၼ်ပႃႇလၵ်ႈလႄႈဝႃႈ၊ ၸုၵ်းယူႇၵႃႈတီႈၼႆႈႁိမ်းယိတ်ႈဢၼ်တုတ်ႇၽႆးၶုၼ်လူင်ၼႆႉတႃႉ။ ၵဝ်တၵ်းၵႂႃႇႁႂ်ႈလႆႈႁပ်ႉႁူဝ်တၢင်းထႃႇဝရႃႉၽြႃး ၵႃႈတီႈပုၼ်ႉဢေႃႈ၊ ဝႃႈၼင်ႇၼႆဢေႃႈ။- 16ထႃႇဝရႃႉၽြႃးႁပ်ႉႁူဝ်တၢင်းပႃႇလၢမ်ႇလႄႈ ဢဝ်ၵႂၢမ်းသႂ်ႇၵႃႈတီႈသူပ်းမၼ်းသေလႄႈ မီးဢမိင်ႉလႄႈဝႃႈ၊ ၶိုၼ်းမိူဝ်းၸူးၵႃႈတီႈၶုၼ်ပႃႇလၵ်ႈလႄႈ လၢတ်ႈၸိူဝ်ႉၼင်ႇၼႆတႃႉ၊ ဝႃႈၼင်ႇၼႆသေယဝ်ႉ၊- 17မိူဝ်ႈဢၼ်မၼ်းၶိုၼ်းမႃးၼၼ်ႉၸိုင်၊ ၶုၼ်လူင် ဢိၵ်ႇလူၺ်ႈၵၼ်တင်းမူးမၢတ်ႈၽွင်းမိူင်းမေႃႇၽႃႉတင်းလၢႆၼၼ်ႉ ၸုၵ်းယူႇၵႃႈတီႈႁိမ်းယိတ်ႈဢၼ်တုတ်ႇၽႆးၶုၼ်လူင်ၼၼ်ႉဢေႃႈ။ ၶုၼ်ပႃႇလၵ်ႈထၢမ်လႄႈဝႃႈ၊ ထႃႇဝရႃႉၽြႃး မီးဢမိင်ႉၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။

18မိူဝ်ႈၼၼ်ႉ မၼ်းဢဝ်တင်းၵႂၢမ်းပရေႃးၽႅတ်ႈသေလႄႈ ဢွၵ်ႇသူပ်းဝႃႈၸမ်ႉ၊ ၶုၼ်ပႃႇလၵ်ႈဢိူၺ်း၊ လုၵ်ႉလႄႈငိၼ်းသေၵမ်း။ လုၵ်ႈၸၢႆးၸီႉၽေႃႇဢိူၺ်း၊ ထွမ်ႇၵႂၢမ်းၵဝ်သေၵမ်း။- 19ၽြႃးပဵၼ်ၸဝ်ႈၼၼ်ႉ ပဵၼ်ၵူၼ်းႁႂ်ႈလႆႈလၢတ်ႈၵႂၢမ်းမူႉသႃႇဢမ်ႇၸႂ်ႈ၊ မၼ်းၸဝ်ႈပဵၼ်လုၵ်ႈၵူၼ်း ႁႂ်ႈလႆႈၶုၵ်းၸႂ်လႆႈမႆႈၸႂ်ၵွပ်ႈဢမ်ႇၸႂ်ႈ။ မၼ်းၸဝ်ႈမီးဢမိင်ႉသေယဝ်ႉ၊ ယင်းဢမ်ႇႁဵတ်းၸွမ်းၼင်ႇၵႂၢမ်းၼၼ်ႉလႄႈ တၵ်းယူႇႁိုဝ်။ မၼ်းၸဝ်ႈဝႆႉၵတီႉသေယဝ်ႉ၊ ယင်းဢမ်ႇႁႂ်ႈၵတီႉၼၼ်ႉတႄႇလႄႈ တၵ်းယူႇႁိုဝ်။- 20တူၺ်းလူး၊ ၵဝ်လႆႈၶၢမ်ႇဢမိင်ႉၸဝ်ႈႁႂ်ႈလႆႈပၼ်တၢင်းလီယဝ်ႉ။ မၼ်းၸဝ်ႈပၼ်တၢင်းလီယဝ်ႉ။ ၵဝ်ဢမ်ႇယႃႉတၢင်းလီၼၼ်ႉပႅတ်ႈလႆႈ။- 21မၼ်းၸဝ်ႈလူတူၺ်းလွင်ႈတၢင်းဢၼ်ဢမ်ႇတြႃးၵႃႈၼႂ်းမဵဝ်းယႃႇၵုပ်ႈၼၼ်ႉဢမ်ႇၸႂ်ႈ။ မၼ်းၸဝ်ႈႁၼ်လွင်ႈတၢင်းဢၼ် ၸၢင်ႈႁဵတ်းၶတ်းၶႅင်ႁႅင်းတႃႉ ၵႃႈၼႂ်းမဵဝ်းဢီႉသရေႇလႃႉၼၼ်ႉဢမ်ႇၸႂ်ႈ။ ထႃႇဝရႃႉၽြႃး ၽြႃးပဵၼ်ၸဝ်ႈမၼ်းၼၼ်ႉ မီးယူႇလူၺ်ႈၵၼ်တင်းမၼ်းဢေႃႈ။ သဵင်တၢင်းဢၼ်ၶုၼ်ႁေႃၶမ်းႁွင်ႉပၢဝ်ႇႁွင်ႉသေႃႇၼၼ်ႉ လႆႈမီးယူႇၵႃႈၼႂ်းၶဝ်ဢေႃႈ။- 22ၽြႃးပဵၼ်ၸဝ်ႈၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်းဢေႇၵိပ်ႉတူႉမႃးဢေႃႈ။ မၼ်းၼၼ်ႉ ႁႅင်းယႂ်ႇၼႃႇမိူၼ်ၸိူဝ်ႉၼင်ႇ ၸူင်ႁႅင်းယႂ်ႇၼႃႇၼၼ်ႉဢေႃႈ။- 23ပိူဝ်ႈၼႆလႄႈ ဢမ်ႇဢဝ်တင်းဢတၢတ်ႈပိင်ႇၺႃႇ ဢၼ်လၢၵ်ႇလၢႆးၼၼ်ႉသေလႄႈ ပႄႉၼႅင်ႇမဵဝ်းယႃႇၵုပ်ႈလႆႈ။ ဢမ်ႇဢဝ်တင်းဢတၢတ်ႈတၢင်းဢၼ်ၸေႃႉ ဢၼ်ႁဵတ်းၼၼ်ႉသေလႄႈ ပႄႉၼႅင်ႇမဵဝ်းဢီႉသရေႇလႃႉလႆႈ။ တၵ်းဢွၼ်ၵၼ်ထွၵ်ႈလူၺ်ႈၶိင်ႇၵႃႇလႃႉမိူဝ်ႈလဵဝ်ၼႆႉသေလႄႈ မီးထုင်းမီးၽိင်ႈဢၼ်ဢဝ်လွင်ႈမဵဝ်းယႃႇၵုပ်ႈ မဵဝ်းဢီႉသရေႇလႃႉလႄႈဝႃႈ၊ ၽြႃးပဵၼ်ၸဝ်ႈႁဵတ်းၸိူဝ်ႉၼင်ႇႁိုဝ်ယဝ်ႉလူင်ပႄႇ၊ ဝႃႈၼင်ႇၼႆဢေႃႈ။- 24ၵူၼ်းမဵဝ်းၼႆႉတၵ်းလုၵ်ႉမိူၼ်ၸိူဝ်ႉၼင်ႇသၢင်ႇသီႈတူဝ်မႄႈဢေႃႈ။ တၵ်းယုၵ်ႉတူဝ်ၵွင်ႇတူဝ်မိူၼ်ၸိူဝ်ႉၼင်ႇ သၢင်ႇသီႈတူဝ်ၼုမ်ႇဢေႃႈ။ ၸူဝ်ႈဢၼ်ဢမ်ႇပႆႇၵိၼ်တူဝ်ဢၼ်တီႉလႆႈလႄႈ ၸုပ်ႇၵိၼ်လိူတ်ႈတရိၵ်ႈသၢၼ်ႇဢၼ်ထုၵ်ႇဢဝ်တၢႆၼၼ်ႉၸိုင်၊ မၼ်းဢမ်ႇၶိုၼ်းမူပ်ႇၶိုၼ်းၼွၼ်းလႃးလႃး၊ ဝႃႈၼင်ႇၼႆဢေႃႈ။

25ၶုၼ်ပႃႇလၵ်ႈၵေႃႈလၢတ်ႈတီႈပႃႇလၢမ်ႇလႄႈဝႃႈ၊ ယႃႇပေၵိၼ်ႇလႃႇၵိၼ်ႇဝႃႈၶဝ်လႃးလႃးသေၵမ်း။ တၢင်းလီၵေႃႈယႃႇပေပၼ်လႃးလႃးသေၵမ်း၊ ဝႃႈၼင်ႇၼႆသေယဝ်ႉ၊- 26ပႃႇလၢမ်ႇၶိုၼ်းလၢတ်ႈတီႈၶုၼ်ပႃႇလၵ်ႈလႄႈဝႃႈ၊ ၵဝ်လႆႈလၢတ်ႈတီႈၶုၼ်လူင်ဝႆႉလႄႈဝႃႈ၊ ၵဝ်တၵ်းလႆႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃးမီးဢမိင်ႉၼၼ်ႉဢေႃႈ၊ ဝႃႈၼင်ႇၼႆမႃးယဝ်ႉဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။

27ၶုၼ်ပႃႇလၵ်ႈသမ်ႉၶိုၼ်းလၢတ်ႈတီႈပႃႇလၢမ်ႇလႄႈဝႃႈ၊ မႃးသေၵမ်းတႃႉ။ ၵဝ်တၵ်းဢဝ်ၸဝ်ႈၵႂႃႇၵႃႈတီႈတၢင်ႇတီႈတၢင်ႇလႅၼ်ဢေႃႈ။ ၽြႃးပဵၼ်ၸဝ်ႈလီမီးဢလူဝ်ႇမၼ်းၸဝ်ႈ တၵ်းမီးဢလူဝ်ႇႁႂ်ႈလႆႈၵိၼ်ႇလႃႇၵိၼ်ႇဝႃႈၶဝ်ပုၼ်ႈၵဝ် ၵႃႈတီႈၼၼ်ႈဢေႃႈ၊ ဝႃႈၼင်ႇၼႆသေယဝ်ႉ၊- 28ၶုၼ်ပႃႇလၵ်ႈၼၼ်ႉဢဝ်ပႃႇလၢမ်ႇၵႂႃႇၵႃႈတီႈပၢႆၸိၵ်းလွႆပေႇၵူႉရႃႉ ဢၼ်ဝၢႆႇၼႃႈတေႃႇထိူၼ်ႇယေႇသီႉမုၼ်ႇၼၼ်ႉဢေႃႈ။- 29ပႃႇလၢမ်ႇၵေႃႈလၢတ်ႈတီႈၶုၼ်ပႃႇလၵ်ႈလႄႈဝႃႈ၊ တႄႇႁဵတ်းယိတ်ႈပလၢင်ႇၸဵတ်းဢၼ်ၵႃႈတီႈၼႆႈပုၼ်ႈၵဝ်တႃႉ။ ပွင်ႁႅၼ်းဝူဝ်းပေႃႈၸဵတ်းတူဝ် ဢိၵ်ႇတင်းသူဝ်းပေႃႈၸဵတ်းတူဝ်တႃႉ၊ ဝႃႈၼင်ႇၼႆလႄႈ၊- 30ၶုၼ်ပႃႇလၵ်ႈႁဵတ်းၸွမ်းၵႃႈၼင်ႇဢၼ်ပႃႇလၢမ်ႇဝႃႈၼၼ်ႉသေလႄႈ ဢဝ်ဝူဝ်းယေႈတူဝ် ဢိၵ်ႇတင်းသူဝ်းယေႈတူဝ်ပုၵ်ႈၸေႃႇ ၵႃႈၼိူဝ်ယိတ်ႈပလၢင်ႇယေႈဢၼ်ဢေႃႈ။

Popular Bible Verses from
ၼႂ်းထိူၼ်ႇ 23

Bible:

Shan

Version: သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး - CBMS