Matthew 20
20
Ungipaghaatkegkat Qepghaghtengi Piitesighaghvigem
1Paninang Jesus‑em pikii, “Ataneghpagullgha Qilagem yugtun ayuquq grapes‑meng piitesighaghvilek. Unaanguluku aanluni tugulaasaghtuqaq qepghaghtekaghqameng piitesighaghvigminun. 2Aghneghmun tawavek itagnaqegkii akileghtughnaluki ataasikaghtaan denarius‑meng, taagken qepghaghyaghtestekii. 3Nine‑eklaagmi aaneqiglluni esghaqii yuget nekevghataaghullghiit sagpenateng akilpegaghvigmi. 4Enkaam pikii, ‘Elpesillu piitesighaghvimnun qepghaghyaghtek, akileghtughnaaghamsi qepghalleghpesistun’. 5Enkaangam qepghaghyaatkat. Taagken aghneghem qukaanillu, three‑klaagmillu tawaten pilaataqaq. 6Iiwenllu five‑eklaagnaqaqaa, akilpegaghvigmun pikaq, taawanguq paninang yugem ilangi nekevghataaghaqeftut. Aaptekii, ‘Sangafsi whaantaqetsi aghnelqusiq sagpenasi?’ 7Kiimsiqaat, ‘Qayughllak kitum alngunak tugunghilkanginkut qepghaghtenguluta.’ Enkaam pikii, ‘Naqam elpesillu qepghaghyaghtek piitesighaghvimnun’.
8“Ighivgaghyagu piitesighaghvilgem pikaa qepghaghtet naasquutistengat, ‘Qepghaghtet tuqlughteghluki akileghtughteghqi kingulighneng sivulighnun.’ 9Five‑eklaagmi qepghaghyaatkat tagilaghaasameng akileghtuusangegkat denarius‑kaghtaan. 10Enkaam sivuliit qepghaghtet akileghtuusangataghaghnaqniluteng pikaayalghiit, iwernga tagilaghaasalghiimeng ellngitlu akileghtuusangegkat denarius‑kaghtaan. 11Akileghtuusangyameng qivraaghutkaat piitesighaghvigem yuga. 12Pikaat, ‘Kinguliiluki tugukaghten qepghaghtut ataasighhaghmun aflumun. Whangkuta ughleghiightukut puqlaghllagmi aghnelqusiq, iwernga akileghtughaten whangkutestun angkaan.’ 13Iwernga yugem pikaa ataasiq, ‘Nagataghten, ilakumtaamni, puughhneghitamken. Itagnaqegkaqan qepghaghnaluten ataasimun denarius‑mun. 14Enkaam tuguluku akileghtuusan aglaa. Akileghtughyuganka kinguliit yuget tugukanka akileghtuusaghpetun angkaan. 15Piyukellemtun manika atughyaghqaqaqa. Aqinaziin ighlegitutemneng?’”
16Taagken Jesus‑em pikii, “Enkaam tamaakut kinguliit sivuliighsaghqaagut, sivuliit kinguliighsaghqaagut.”
Pingayiitkun Jesus‑em Aapqanga Tuqulleghqani
17Jesus‑em Jerusalem‑emun mayuutkelluku yulghutneng aafutkii qula maalghuk siipneqluku maligsaaghteni aleghqughnaaluki. 18Pikii, “Nagatek, Jerusalem‑emun mayughnaqukut. Tawani Ighnegha Yugem tuunelleqaat chief priest‑enunllu, apeghtughikayugnunllu Liilightuusaneng enkaam nanqiglluku tuqusaghqaanilleqaat. 19Taagken Gentile‑enun tuunelleqaat. Tawani legasiighwaatkelleqaat, kagsagmiglleqaat, qaquuraghlleqaatlu. Iwernga pingayiitangani aghneghem unguvaghtesaghqaaguq.”
Naam Tungsillgha
20Taagken Zebedee‑m ighneghegkenka naangak tagikaq Jesus‑mun ighneghegni kelqellukek. Manungakun segesqughtekaq aapfiknaluku.
21Jesus‑em aaptekaa, “Sameng piighsin?” Aghnam kiimsiqaa, “Akeqinga Ataneghpagulleghpeni ighneghegka aqumesnakegken aallgha aghenqigneghpegun, ilanga saghumigneghpegun.”
22Iwernga Jesus‑em pikii, “Liigikenghitaghsi sangutanga tungsiqaghsi. Meghviknayaghestegneguu qayuusiq meghyaghqaqa?”
Kiimsiqaak, “Piyaqleguukung.”
23Jesus‑em pikakek, “Qaywa qayuusimneng meghellequtek, iwernga whangangunghituq nakmiighyaghqaq kinkuk aqumyaghqaatkek aghenqignemkunllu saghumignemkunllu. Atama yataaghqegkaqaak taakuk aqumvigkak nakmikegkaminun.”
24Taakut ilangita qula maligsaaghtet nagaqughyamegtekek samatkek anglegutkullghiik ugumiyagutkagket. 25Taagken Jesus‑em tuqlughluki maligsaaghteni, pikii, “Liisimakasi Gentile‑et igleghutistengita atanghutaqiit yuteng, aangwaaghughtekatlu yugita yukeghqutkaqiit. 26Iwernga elpesi tawatesaghqaanghitusi. Nalighsi igleghutistenguyukumi qepghaghtengughlli elpesinun. 27Nalighsi aangelleghpigaayukumi qepghaghtelaaghughsaghqaaguq elpesinun, 28katam tawaten Ighneghan Yugem pillghatun. Tagimangituq qepghaatesqelluni iwernga tagikaaguq qepghaatinaluni, tuunalukullu unguvalleni naveghqellisiqnaluku uglapiglleghhiinun yugnun.”
Jesus‑em Naallghuskek Ayaakak Yugek
29Jesus‑enkut maligsaaghtekullghiit Jericho‑meng aghulaqumaluki yulghuteghllagem maligtekaat Jesus. 30Taawanguq tumet saningitni ayaakak yugek aqumlutek. Nagaqughyamegnegu Jesus naghughhniluku akilghuukak, “Ataneq, Ighneghani David‑em, nangllegyagutaghtikung!”
31Yulghutem ineghtekakek, nepiighesqellukek. Iwernga qevuutaghalluku wata akilghuukak, “Ataneq, Ighneghani David‑em, nangllegyagutaghtikung!”
32Enkaam Jesus‑em aghuliighluni tuqlughlukek aaptekakek, “Sasqellutek piiqestek whangamnun?”
33Kiimsiqaak, “Ataneq, iyepung esghaghtestaghtiki!”
34Jesus‑em nangllegyagullukek iiyngik saaftekii. Tawaninginaq esghaasagutkak enkaam maligtekaak.
Currently Selected:
Matthew 20: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
