Matthew 24

Jesus‑em Aapqanga Temple‑em Naavelleghqaa

1Jesus aanluni Temple‑meng aghulaqumaluku maligsaaghtengita takuluku kelgutkiit mangteghat Temple‑em pingi. 2Pikii, “Esghaghasi tamaakut mangteghat. Ipa piimsi, talwa ataasiq uyghak nemininnaanghituq. Qamaglluteng ulleghqughyaghqaagut.”

Seghleliillghetlu Amyuqetaatkellghetlu

3Jesus aqumyan Mount Olives‑kun, maligsaaghtengita takuluku ellnginaghhaamaaghluteng aaptekaat, “Ungipaatikut, qakun tamaakut piyaghqaawat? Sangulleqa liisimakusighqaghput tagilleghqaghpenun, nunamllu iqugtelleghqaanun?”

4Jesus‑em kiimsiqii, “Kelengalusi, kitumun alngunak puughtestegpenasi. 5Qayughllak uglaapiglleghhii tagiyaghqaaguq atuqluku aatqa, whaten piiqluteng, ‘Whanga Christ‑anguunga’, puughqughtaayaghqaqaatlu yulghun. 6Nagaquullequsi pilluwaneng, akusqaghtaatkellghitnengllu pilluwat; alingegpenasi qayughllak tamaana piyaghqaaguq. Iwernga salin iquggnaqngunghituq. 7Nunat yugit pillugutullequt, ataneghpagullghetlu pillugutullequt, nani alngunak neqangisagllagllequq, nunat uvelegtaghllagllequt. 8Qamaglluni tamaana aghnam ighniyukestallghatun ayuqellequq.

9“Taagken tamaana pimaluku yuget tugulleqiisi, amyuqetaatkelleqiisi, tuqulleqiisillu. Nunataghhaan tamaghhaan ramkengan ugumiilleqiisi whanga apalluqlunga. 10Enkaam uglaapiglleghhiim ugpeqnanighlleqaatnga, uveghpagutusagullequt, ugumiisagullequtlu. 11Taagken uuknaliqistesighwaalghutet tagiluteng puughqughlleqiit yulghutet. 12Seghleq nulam angtalanganeng apalluqluku allulluteng yuget piniqinanighllequt. 13Iwernga kina alngunak nuqenneghtuqaq kenlemun yugulillengyaghqaaguq. 14Ukutlu Pinilghiit Ungipat Kiyaghneghem Ataneghpagullghaneng ayuqelghiit ungipaqsaghqaagut nunataghhaani tamaghhaani ramkengitnun nagaqiisqelluki. Taagken nuna iqugllequq.”

Jesus‑em Aapqanga Seghleliilleghqaghllak

15“Yeqay atightughtem liigikligu sameng pisiitanga uuknaliqistem Daniel‑em uuknaliqutkegkaa. Uuknaliqutkegkaa taana agleghniilnguuguq paaghqiitestilghii agleghnalghiimi nemi. Esghaqufsigu tesqamani nekevelghii, 16Judea‑melnguut anagniighhaat naayghanun. 17Yuuk mangtegham qaaynganilnguq ukigluni saghyaqufqaami pilghaaq. 18Yuuk piitesiighaghvigmelnguq qaaslighqufqaami pilghaaq. 19Tamaani aghneghni seghleghwaaghunaqnguut qumilget aghnat, mamaghtalgetlu! 20Yughaghtek anagniifqaafsi uksumi pisqellusi nalighmeng Sabbath‑mi, 21qayughllak tamaani seghleliiq elngaatall seghleghllagughsaghqaaguq. Seghleghataghaayaghqaaguq seghleliighaqelleghneng ima piinlighyuggaallghaneng nunam whavemun kenlanga. Allamengllu tawatelnguq pinaanghitngwaaghtuq. 22Tamaakut aghneghet Kiyaghneghem palallimangisaqaki, kina alngunak unguvanayanghituq. Iwernga apalluqluki nakmikegkani aghneghet palalliyaghqaqii.

23“Tamaani kitum alngunak pikangisi, ‘Ii‑i, Christ‑a whaa’, nalighmeng, ‘Tazingantuq!’ ugpeqegpenaan, 24qayughllak Christ‑asighwaaghetlu, uuknaliqistesighwaaghetlu tagillequt. Allaaghlluwhaghtighllagllequt, saghiighanaghqeghllagllequtlu puughhnaluki yuget, talwa Kiyaghneghem nakmikegkii puughsaqlegukumegteki. 25Taawa ungipaatamsi sivutghulluku pilleghqaq.

26“Enkaangam whaten pikangisi, ‘Ii‑i, Christ‑a paaghqillghanituq!’ takugpenaan; nalighmeng whaten pikata, ‘Ii‑i, mangtegham ilunganituq’, ugpeqegpenaki. 27Qayughllak Ighnegha Yugem tagikumi tawatesaghqaaguq nighugpaguutelleghtun kuukgullequq asivaghmeng pakfallamun.

28“Qawaagpaget qerngughtaqut nani alngunak kemegqwaalgunghani.

Tagilleghqaa Ighneghan Yugem

29“‘Kingungiighhiitneng tamaakut seghleliilleghllaget Kiyaghneghem siqineq mamlegtesleqaa,

tanqiq nighugunnanightesleqaa, ighaleqetaaghet ifkaquutesleqii qilagameng,

aghtughyaghqaanghillghet qilagamelnguut igleghallghit allangughquutesleqii.’

30“Taagken qilagakun sangwaa allgeghllequq liisimakusighqaq Ighneghaneng Yugem. Taagken qamagtengngwaaghluteng nunam ramkengi qivghum qiyaaghuuteghllagllequt. Esghaghlleqaat Ighnegha Yugem tagilghii qilagwaaghteggun, aghtughyaghqaanghilleghtuumaghmillu nighughqellelighllaglunillu. 31Enkaam Ighneghan Yugem qalghightaan qalghightesteghllakumigu kayaglleqii yaquleni navek alngunak qerngughtesqelluki nakmikegkani nunataghhaaneng tamaghhaaneng.

Figs‑em Uqfiga Liitfiksaghqaq

32“Liitfikiteggu uqfiga figs‑em. Esghaqufsiki avayii uniilliighalghiit, ququngii piitekestalghiit, liisimakaghsi kiigyaghtungestaghaa. 33Tawateghpigaq qamagtengngwaaghluki aapqanka tamaakut esghaqufsiki, liisimakelleqaghsi ellnga kaasaghtungestaamaaq, aaqun amigmun lliighumaaq. 34Ipa ungipaatamsi, maaten unguvalghiit tuqulaghaatestegpenaki qamaglluteng tamaakut piyaghqaagut. 35Qilagallu, nunallu aviighusaghqaaguk, iwernga whanga akuzitenka aviighunnaanghitut.

Kelengakluku Tagilleghqaa

36“Kitum alngunak nallukaa taam aghneghem aflunga qakun kaasaghqaatanga. Talwa qilagmelnguut yaqulget nallukaat, Ighneghemllu nallukaa, Atanginaghhaam liisimakaa. 37Katam tamaani Noah‑m kiyaghtellghani, yuget tawatesaghqaagut Ighneghan Yugem tagilleghqaani. 38Tamaani aghneghni, sivungani ulevem yuget neghaqluteng, meghaqluteng, nengughutaqluteng ayuqegkat kenlanga tawavek aghneghmun Noah‑nkut itellghitnun ark‑mun. 39Nallukegkaat natesaghqaatanga kenlanga ulevelleghmun, enkaam qamagtengngwaaghluteng tuqulaghaatkat. Tawateghpigaq Ighnegha Yugem tagikan, nallukelleqaat natesaghqaatanga. 40Tawani pilleghmi maalghuk yugek piitesiighaghvigmegni qepghaatek, aallgha tugulleqaa, ilanga uneglleqaa. 41Aghnak kagimtilghiik grain‑meng, aallgha tugulleqaa, ilanga uneglleqaa.

42“Enkaangam kelengalusi, qayughllak nallukngwaaghaghsi nani aghneghmi Ataneghpesi tagilleghqaa. 43Nalluneqniituq, mangtegham yugan liisimaksaqumigu teglegniightem tagilleghqaa, qavaghpenani kelenganayaghtuq naafqulluni iteghnayukan mangteghaminun. 44Enkaam tamaaken apalluqluku elpesillu apeghiighsaghlusi quunpeng, qayughllak Ighnegha Yugem tagiyaghqaaguq waakenghillghaghllusi.

Qepghaghta Ataasiighmelnguq Nalighmeng Ataasiighmenneghilnguq

45“Kinangaawa ataasiighmelnguq peghqinelghii qepghaghta? Taananguuq umiilgan igleghutistengllaqaa qepghaghtelgutanganun, neqelitaatiisqellukillu aghhutanga tamaghhaan. 46Taana qepghaghta quyastellengyaghqaaguq umiilgan kaalluni esghaqumigu qelelleghmitun pilghii. 47Ipa ungipaatamsi, taana qepghaghta umiilgan aflengakistengllaghyaghqaqaa saminun tamaghhaanun. 48Iwernga taana qepghaghta seghleghukumi sumeghtaghaghllequq whaten, ‘Umiilka tagilghaghtughnaanghituq’, 49enkaam amyuutkesagulleqii qepghaghtelgutni. Ilallequqlu suumelghiinun, neghelgusighaqluki, meghelgusighaqluki lliighllequq. 50Taagken ataasimi aghneghmi umiilga kaallequq qepghaghta yataaghqellghillukullu, sighimakellghillukullu. 51Enkaam umiilgan qevuulluku aghyuughlleqaa, aglaghtesleqaa piniiyugneghnun aghyuughyaghqaaluku maligulluku. Tawani qiyiqellequt, gguteteng terqitaagtaamiita.

Currently Selected:

Matthew 24: ess

Highlight

Copy