Matthew 25

Jesus‑em Ungipaghaatkegkangi Qulaghyaget Aghnaghaat

1“Tawani pilleghmi Ataneghpagullgha Qilagem uspusaghqaaguq qulaghyagnun aghnaghaghnun kelqelluki kenelghutateng paayghilghiit nulightughnaqelghiimeng. 2Tallimat nalluuqat tallimat peghqinelghiit. 3Nalluuqat kelqegkiit kenelghutateng uqughqangunaki, 4iwernga peghqinelghiit kelqegkiit kenelghutateng uqughqalighluki. 5Nulightughnaqelghii muluuqaq, qenwat aghnaghaat qavaghnikat enkaam qavatghutkat.

6“Unugem qukaani kina akilghuukaq whaten, ‘Uka tagiiquq nulightughyaghqaq! Aanlusi payeghteggu!’ 7Aghnaghaat taghtughaghtaalluteng kenelghutateng kenghit nallghusaqiit. 8Taagken nalluuqat pikat peghqinelghiinun, ‘Uqughqalitaghtikut, kenelghutaput qaamnaqut.’ 9Peghqinellghita pikiit, ‘Seghleghhalek tamaghhamnnun uqughqapagitukut, akilpegaghtenun tukfighiyaghtughtek.’ 10Enkaam nalluuqat uqughqangyaghtuutkat. Aviisimaluki nulightughnaqelghii kaatkaq. Taakut yataaghqengngalghiit itelgusiqaat nengughutem neqenghaghqellghanun, enkaam amik uumkaat.

11“Kingunganeng nalluuqat aghnaghaat kaalluteng, akilghuukat, ‘Ataneq, Ataneq! Qelpeghutaghtikut!’ 12Iwernga nulightughnaqelghiim kiimsiqii, ‘Ipa ungipaatamsi, nallukamsi kinkungutsi.’”

13Jesus‑em ungipaghaatni taaqniqaa whaten, “Enkaangam kelengatek, qayughllak nallukaghsi natungutanga aghneq nalighmeng natungutanga aflu Ighneghan Yugem tagilleghqaa.

Jesus‑em Unipaghaatkegkangi Pingayut Qepghaghtet

14“Ataneghpagullgha Qilagem uspusaghqaaguq whavek ungipaghaatmun: Taawanguq yuuk igleghanaqelghii navek uyavanun. Tuqluqii qepghaghteni aviilleghmini aflengakistenguluki saghyaminun. 15Ataasimun 5,000 manit tuunegkii, ilanganun 2,000, kingulighmun 1,000. Tamaghhiita tunquqii pillegtulngistun. Taagken aghulaqegkaq. 16Yuuk taana 5,000‑nengegkaq, tawaninginaq aghulaqluni akiksaghqameng tukfightuqaq. Enkaam alla 5,000 allgeghtekaa. 17Taanallu 2,000‑nengegkaq, allgeghutkaq alla 2,000‑meng. 18Iwernga taana 1,000‑nengegkaq aanluni laagulluki iiqii umiilegmi maningi.

19“Muluughllagluni qepghaghtet umiilgat uteghnighyami ungipaghsuqii samatangi manini. 205,000‑nengegkam esnevaghluni pikaa, ‘Umiilemni, tagivaqaqaten 5,000 manit. Taawa alla 5,000 allgeghsimaaqaa.’ 21Umiilgan pikaa, ‘Seghleghhalek itagnapigtuten, pinightuten ataasiighmelnguq qepghaghta! Ataasiighmetkaategpeneng palaghhaghnun aflengakistengughtesnaqamken uglalghiinun. Iitghi quyalgusighyaghtughnga!’ 22Taagken 2,000‑nengegkam esnevaghluni pikaa, ‘Umiilemni, tagivaqaqaten 2,000 manit. Taawa alla 2,000 allgeghsimaaqa.’ 23Umiilgan pikaa, ‘Seghleghhalek itagnapigtuten, pinightuten ataasiighmelnguq qepghaghta! Ataasiighmetkaategpeneng palaghhaghnun aflengakistengughtesnaqamken uglalghiinun. Iitghi quyalgusighyaghtughnga!’ 24Taagken 1,000‑nengegkam esnevaghluni pikaa, ‘Umiilemni, liisimakamken elpek aaghsaghqaanghituten. Unataghaquten piitesighaqaqenghilkegpeneng. Qerngughtaqaten piitkat piitutngit ifkaghquqaqenghilketeng. 25Enkaam alinglunga laagulluki maniten iiqaqanka. Ang, taawa elpek pin.’ 26Iwernga umiilgan pikaa, ‘Uyuq seghleq, ighsanitalghii qepghaghta! Elpek piighpenga unataghaqnilunga piitesighaqaqenghilkemneng, qerngughtiiqnilungallu piitkaneng piitutngit ifkaghquqaqenghilkemneng. 27Sanganꞌngam manika kanaghhnanighsigu bank‑amun? Tawaten pikaqsaquvgu, uteghnillemni veghhnayaghaqa allgeghnelighluku.’ 28Taagken umiilgem qepghaghteni pikii, ‘Tuguluku 1,000 maninga, tuuniteggu taamun 10,000‑nelegmun. 29Tamaakut pilget tuunataghaghyaghqaagut enkaam siiptiillequt. Iwernga taana avangilnguq pillgaayaghngaan iqisaghqaqiit ellnganeng.’ 30Taagken umiilgem pikii, ‘Aanesteggu taana satngunghilnguq qepghaghta qagavek mamlegllagmun. Tawaani yuget qiyaaghwaghllagllequt, ggutetengllu terqitaagtaamiita.’

Kinguliq Nanqigtelleq

31“Ighnegha Yugem tagikumi nighughqelleghmikun, yaqulegtuumaghllagmi, taagken aqumellequq nighughqengngalghiignekun aqumutagmikun. 32Sivungakun qerngughutesleqiit qamagtengngwaaghluki nunam yugi. Taagken avughlleqii, katam penniighniightem avullghatun penniighet goat‑neng. 33Penniighet aghenqigneghminitesleqii, goat‑et saghumigneghmini. 34Taagken Umiilgem aghenqigneghminilnguut pilleqii, ‘Tagitek, Atama quyastekiitni, piliiteggu Ataneghpagulleq yataaghqegkaq elpesinun ima nuna ulimaaqngan. 35Iyatiqngulunga neghqegkaqaghpesinga; meqsugulunga meghsikaqaghpesinga; allaneghtaalunga upughatkaqaghpesinga. 36Amsikaghmellunga aasightuqaqaghpesinga, qinuyugulunga laalighfikegkaqaghpesinga, anusimingllaghaalunga esghaghyaghtuqaqaghpesinga.’ 37Taagken elqughutngalghiit pilleqaat, ‘Ataneq, qavngaq iyatiqnguluten neghesiken, nalighmeng meqsuguluten meghsiziken? 38Qavngaq allaneghtaaluten upughasiken, nalighmeng amsikaghmelluten aasightughsiken? 39Qavngaq qinuyuguluten, nalighmeng anusimingllaghvigmelluten laalighfiksiken?’ 40Umiilgem kiimsighlleqii, ‘Ipapestaaq ungipaatamsi, sangwaa alngunak pikaghsi ukalighpigaghnun anglegutemnun, whangamnun piiqasi!’

41“Taagken Umiilgem saghumigneghminilnguut pilleqii, ‘Elpesinguut Kiyaghneghem aghyuughyaghqii. Awiitek whangamneng, aglaghtek kenlengilnguugnun kenghegnun Kiyaghneghem yataaghqegkaanun Tughneghaghmunllu, yaqulganunllu! 42Iyatiqngulunga neghestellghitaghpesinga, meqsugulunga meghsillghitaghpesinga, 43allaneghtaalunga upughatellghitaghpesinga, amsikaghmellunga aasightuumangitaghpesinga. Qinuyugulungallu, anusimingllaghvigmellungallu laalighfikumangitaghpesinga.’ 44Taagken pilleqaat, ‘Ataneq, qavngaq iyatiqnguluten, meqsuguluten, allaneghtaaluten, amsikaghmelluten, qinuyuguluten, nalighmeng anusimingllaghvigmelluten, kayusiisimangisiken?’ 45Taagken Umiilgem kiimsighlleqii, ‘Ipapestaaq ungipaatamsi, tawaten pinghitelleghpesistun nalighhiiniitnun ukut ukalighpigaat, whanga pinghitaqaghpesinga.’ 46Enkaam taakut aglaghllequt kenlengilngughmun aghyuulleghmun, iwernga elqughutngalghiit aglaghllequt kenlengilngughmun unguvalleghmun.”

Currently Selected:

Matthew 25: ess

Highlight

Copy