Mateo 15

Jua sɨɨpataɨ k'orea idida

Marco 7:1-23

1Mãɨya bak'ari waapẽarã p'ariseorã mãɨnepa Moisepa bɨda jarateapataɨrã Jerusalén p'uurudepa Jesumá chedak'ari idisidama:

2—Pɨ ome p'ɨrrɨapataɨrã jua sɨɨdawẽa nek'opatama. ¿K'ãre k'orea tachi chõarãenapemarãpa jarateadada itu bɨpatama?#15:2 Tachi Ak'õre pedeade jara bɨma p'aarerã k'uidai p'anɨ k'orea, maamina Jesú ewaride p'ariseorãpa jarateapachidama jõmãɨrãpa jua sɨɨdai pia bɨma chõarãenapemarãpa jaradada jĩra. Levítico 22:4-8.

3Mãɨne Jesupa p'anoosima:

—Mãra pida ¿k'ãre k'orea Tachi Ak'õrepa oopi bɨ pedea itu bɨpatama ara machia oopataɨ oodayá oo p'anɨẽra? 4Tachi Ak'õrepa nãɨya jarasima: “Pɨ ak'õre mãɨnepa pɨ nae wap'ea p'anat'ɨ”.#Éxodo 20:12; 21:17. Nãɨ sida jarasima: “Abaɨpa ichi ak'õre wa ichi nae k'orea k'achia pedeaipɨra, mãɨ nepɨra pará bɨade adak'ari, peapidaipɨ”. 5Maamina mãrapa jarateapatama ẽpẽrapa nãɨya jarai chi ak'õrea wa chi naea: “Ãarea mɨa uru bɨt'a Tachi Ak'õrea teayade ada pẽra mɨa mãra p'ue k'aripaiwẽma”. 6Mãɨya jarak'ari, pia bɨade apatama, chi ak'õrerã k'aripapiemaapa. Mãra chõarãenapemarãpa jarateadada ĩjãa p'anɨ k'orea, Tachi Ak'õre pedea itu bɨpatama. 7¡Mãra ẽpẽerã pia jĩra berã! Tachi Ak'õre pari pedeaparí Isaíapa mãra k'orea piarã bɨsima. Nãɨya jarasima:

8Nãɨ p'uurudepemarãpa mɨá pia pedeapatama, maamina piarã ãchi sõne mɨne k'ɨ̃risiadak'ama.

9Ãchi k'ɨ̃ría mɨá pia pedeapatama. Mɨ pedea k'aepẽra ẽpẽra k'ɨ̃risiat'u jarateapatama.#Isaía 29:13.

10Maapae Jesupa ẽpẽrarã arí p'anɨ t'ɨ̃k'ari nãɨya jarasima:

—Mɨ pedea ũrit'ɨ k'awadamẽrá. 11Tachia chik'o k'odada k'orea tachi mietá p'aneenak'ama Tachi Ak'õre k'ĩrari. Mãɨpari tachi it'aedepa pedea bɨpa Tachi Ak'õre k'ĩrari mietá bɨparima.

12Mãɨya bak'ari Jesú ome p'ɨrrɨapataɨrãpa orrobari chedak'ari jarasidama:

—¿Pɨa k'awa bɨk'ãra p'ariseorã sõne kĩruusidaɨt'a jãɨ pedea jarada k'orea?

13Jesupa p'anoosima:

—Mɨ Ak'õre pajãne bɨpa, ichia uudawẽ paara ãarea ẽut'aak'oaipɨ, chi k'arra para. 14Mãɨpuru p'ariseorã k'orea k'ɨ̃risiarãt'ɨ. Ãchi tau p'ãrio be jĩra p'anɨma. Tau p'ãrio bɨpa abaɨ tau p'ãrio bɨa o jarateasira, umea uriade baewãnaipɨ.

15Mãɨne Pedropa Jesua jarasima:

—Tachia nek'opataɨ k'orea pɨa jarateada taiyá k'awapise.

16Jesupa idisima:

—¿Mãrapa waidi atua p'anɨk'ãra? 17Ne ãarea ẽpẽra it'aede wãna bidea wãparima, mãɨya bak'ari amaaparima. ¿Mãɨ k'awadawẽa p'anɨk'ãra? 18Maamina ẽpẽra it'aedepa che bɨt'a sõnepa cheparima. Mãɨpa mãɨ ẽpẽra mietá beepiparima Tachi Ak'õre k'ĩrari. 19Ẽpẽra sõnepa nãɨ k'ɨ̃risia mietá cheparima: mĩa peai; k'ima awaraɨ ome k'ãii; nemietá awaraɨ ome oo bai; nechɨai; sea jarai; waapẽarã k'orea k'achia pedeai; jãkɨɨ ãarea k'ɨ̃risiai. 20Jõma makɨɨpa ẽpẽra Tachi Ak'õre k'ĩrari mietá beepiparima, maamina jua sɨɨwẽa nek'orupa tachi mietá beepik'ama.

Jesupa cananeo wẽra jɨpa beepida

Marco 7:24-30

21Jesú mãmãɨpa Tiro mãɨnepa Sidón tuadea p'ɨrrɨade wãsima. 22Mãɨne cananeo wẽra mãɨ tuadepema Jesú nimá chesima. Mãɨ wẽrapa nãɨya jĩk'ua pedea nɨbeesima:

—¡Mɨ Chipari, Davidepa cheda, mɨ k'ĩra chupuriase! Mɨ k'au jaore mietapa minachia mĩapi bɨma.

23Maamina Jesupa p'anooé pasima. Mãɨne ichi ome p'ɨrrɨapataɨrã orrobari chedak'ari ichiá nãɨya chupuria idisidama:

—Jãɨ wẽra tachi k'aade bia nima. Ichiá ãyá wãpade ase.

24Wẽra cananeo pida pẽra Jesupa ichiá jarasima:

—Tachi Ak'õrepa mɨ peesima Israel ĩjũanepemarã k'aripamẽrá, ãchi ovejarã atuadada jĩra p'anɨẽra.

25Mãɨne wẽra Jesú k'ĩrari sĩraporode k'obeek'ari jarasima:

—Mɨ Chipari, ¡k'aripase!

26Jesupa p'anoosima:

—Pia bɨwẽma warrarãpa nek'omaa p'anɨt'a ẽemarik'ari usarã́ p'eut'aa teait'a.

27Mãɨne wẽrapa jarasima:

—Pɨa piarã jara bɨma, mɨ Chipari, maamina usapa chipari nek'opataɨ ek'ari chik'o jurruchoada k'oparima.

28Jesupa jarasima:

—Wẽra, pɨa piarã ĩjãa bɨma mɨa pɨ k'au p'ue jɨpa beepiit'a. Mãɨpuru pɨa k'ɨ̃ria bɨ jĩra mɨa ooipɨ.

Ara mãɨne chi k'au jɨpa beesima.

Jesupa ẽpẽrarã cuatro mil p'anɨrã́ nek'opida

Marco 8:1-10

29Mãmãɨpa Jesú senia choma Galileadea wãsima. Eyade ɨt'ɨ wãk'ari mãma suak'abari beesima. 30Maapae ẽpẽrarã chok'ará ichi bɨmá cheepɨrɨsidama. Ãchia chok'ará enemeesidama bɨɨrɨ sorek'ea berã, tau p'ãrio berã, k'ĩrame t'urrá berã, jua piawẽa berã mãɨnepa wawaria k'ɨdade berã. Mãɨrã Jesumá bɨsidama. Maapae Jesupa ãarea jɨpa beepik'oasima. 31Ẽpẽra ará p'anɨpa unusidama chi k'ĩrame t'urrá beada pedea p'anɨt'a, chi jua piawẽa beada pia p'anɨt'a, bɨɨrɨ sorek'ea beada pia nipada, ichiaba tau p'ãrio beadapa unu p'anɨt'a. Ãareaɨrãpa k'awa k'ɨ̃risiadaé pasi pẽra, chi Israelpema Ak'õrea pia pedeasidama.

32Mãɨya p'anɨne Jesupa ichi ome p'ɨrrɨapataɨrã́ t'ɨ̃k'ari jarasima:

—Mɨa nãɨ ẽpẽrarã sõchupuria unu bɨma. Ewari k'ak'o ũpea pa bɨma mɨ ome p'anɨt'a. Ãchia nek'odai k'orea uru p'anana jõsima. Mɨa ãchi nek'odawẽa peei k'ɨ̃riawẽma ãchi tiidá, ode wãutade jarra jai jitapidaemaapa.

33Maamina ichi ome p'ɨrrɨapataɨrãpa idisidama:

—Nãma ẽpẽerã newẽmá ¿sãma chik'o ununaima nãɨ ẽpẽrarã chi chok'ará p'anɨ pae?

34Mãɨne Jesupa idisima:

—¿Mãrapa p'ana jõmasã́ uru p'anɨma?

Ãchia p'anoosidama:

—Siete uru p'anɨma, mãɨnepa beta chak'e wariwẽa uru p'anɨma.

35Maapae Jesupa ẽpẽrarã́ jarasima ĩjũane suak'abari p'aneenamẽrá. 36Mãɨ p'ana siete bada mãɨnepa beta ichi juade atak'ari Tachi Ak'õrea sõpia bɨade asima. Mãɨyak'ari beta mãɨnepa p'ana t'oet'aak'ari ichi ome p'ɨrrɨapataɨrã́ teasima jedadamẽrá. Maapae jedasidama. 37Jõmãɨrãpa k'odak'ari jãwaak'oasidama. Chi pichoada jɨrɨp'esidaɨde jabara nepalá k'ak'o siete ipirusidama. 38Mãma nek'odada chi ɨmɨk'ĩira k'ĩmari mil p'anasima, wẽrarã mãɨnepa warrarã joisiadawẽa. 39Maapae ẽpẽrarã wãpik'ari Jesú p'ãp'orrode batook'ari Magadán ĩjũanea wãsima.#15:39 Magadán. Griego pedeade chi eda waapẽarã k'art'ade bɨ bɨma: Magdala.

Currently Selected:

Mateo 15: tdc

Highlight

Copy