Marco 7
7
Jua sɨɨpataɨ k'orea jarateada
Mateo 15:1-20
1Ewariaba p'ariseorã mãɨnepa Moisepa bɨda jarateapataɨrã Jerusalén p'uurudepa Jesumá chesidama. 2Mãɨne unusidama chi eda waapẽarã Jesú ome p'ɨrrɨapataɨrã jua sɨɨdawẽa nek'o p'anɨt'a, mãɨ chõarãenapemarãpa oopachida jĩra.#7:2 Griego pedeade chi eda waapẽarã k'art'ade nãɨya bɨ bɨma: Ãchi ɨtɨasidama. 3(P'ariseorãpa mãɨnepa chi waapẽarã judiorãpa jua mi ãpia pida p'ue sɨɨdawẽa nek'odak'ama, chi chõarãenapemarãpa jarateadada jĩra.#7:3 Chi p'aarerã jua sɨɨdai p'anɨ k'orea bɨ bɨma, maamina Jesú ewaride p'ariseorãpa jarapachidama ãareaɨrãpa mãɨya oodai p'anɨt'a. Levítico 22:4-8 4Mãɨnepa ne netopataɨdepa chedak'ari p'ue jua sɨɨdawẽa nek'odak'ama. Mãɨ awara chõarãenapemarãpa jarateadada jĩra ne minachia oopatama: ãchi pasu, chok'o mãɨnepa p'arat'u cobre ooda, sɨɨpatama).#7:4 Griego pedeade chi eda waapẽarã k'art'ade bɨ bɨma: K'ɨda. 5Mãɨne p'ariseorãpa mãɨnepa Moisepa bɨda jarateapataɨrãpa Jesua idisidama:
—¿K'ãre k'orea pɨ ome p'ɨrrɨapataɨrãpa tachi chõarãenapemarãpa jarateadada oodak'ama? Mãɨ jarateadada itu bɨdak'ari, ãchi jua sɨɨdawẽa nek'opatama.
6Jesupa p'anoosima:
—Mãra ẽpẽerã pia jĩra berã, Tachi Ak'õre pari pedeaparí Isaíapa mãra k'orea nãɨya bɨsima:
Nãɨ p'uurudepemarãpa mɨá pia pedeapatama, maamina piarã ãchi sõne mɨne k'ɨ̃risiadak'ama.
7Ãchi k'ɨ̃ría mɨá pia pedeapatama.
Mɨ pedea k'aepẽra ẽpẽra k'ɨ̃risiat'u jarateapatama.#Isaía 29:13.
8Mãɨya chi Tachi Ak'õrepa oopi bɨ pedea mãrapa itu bɨpatama, chõarãenapemarãpa jarateadadat'u ĩjãanai k'orea.#7:8 Griego pedeade chi eda waapẽarã k'art'ade ichiaba nãɨya bɨ bɨma: Mãrapa chok'o mãɨnepa pasu sɨɨpatama. Mãrapa ne minachia mãɨ jĩra oopatama.
9Mãɨ awara Jesupa jarasima:
—Mãramá pia bɨma Tachi Ak'õrepa oopi bɨ pedea awara bɨdait'a, ara machia oopataɨ oodai k'orea. 10Moisepa nãɨya jarasima: “Pɨ ak'õre mãɨnepa pɨ nae wap'ea base”.#Éxodo 20:12; 21:17. Nãɨ sida jarasima: “Abaɨpa ichi ak'õre wa ichi nae k'orea k'achia pedeaipɨra, mãɨ nepɨra pará bɨade adak'ari, peapidaipɨ”. 11Maamina mãrapa jarapatama chi warrapa chi ak'õrea wa chi naea nãɨya jaraparima: “Ãarea mɨa uru bɨt'a Tachi Ak'õrea teayade ada pẽra mɨa mãra p'ue k'aripaiwẽma”.#7:11 Mɨa uru bɨt'a Tachi Ak'õrea teayade ada. Griego pedeade nãɨya bɨ bɨma: Nãɨ Corban. 12Mãɨya jarateapatama chi warrapa chi ak'õre mãɨnepa chi nae k'aripapiemaapa. 13Mãɨya mãra chõarãenapemarãpa jarateadada ĩjãa p'anɨnepa Tachi Ak'õre pedea itu bɨpatama. Mãrapa ne minachia ara mãɨ jĩra oopatama.
14Ya mãicha Jesupa ẽpẽerã minachia nɨbɨ t'ɨ̃k'ari nãɨya jarasima:
—Ãareaɨrãpa mɨ pedea ũrit'ɨ k'awadamẽrá. 15Tachia chik'o k'odada k'orea tachi mietá p'aneenak'ama Tachi Ak'õre k'ĩrari. Mãɨpari tachi sõnepa pedea bɨpa Tachi Ak'õre k'ĩrari mietá bɨparima. 16Chi k'ɨɨrɨ pará bɨpa jĩrak'aua ũrise.#7:16 Griego pedeade chi eda waapẽarã k'art'ade mãɨ versículo newẽma.
17Maapae Jesupa chi ẽpẽerã ameek'ari tiidá wãk'ari ichi ome p'ɨrrɨapataɨrãpa chi ichia nepɨrɨda k'orea idisidama. 18Mãɨne Jesupa jarasima:
—¿Mãra pida mãɨ p'ue ũrinawẽk'ãra? ¿Nãɨ k'awadawẽa p'anɨk'ãra? Chi tachia chik'o k'outapa mãɨ tachi mietá beepik'ama, 19tachi sõne eda wãwẽa bɨ pẽra. Mãɨpari bide wãk'ari tajatá amaaparima.
Mãɨya jara bɨdepa Jesupa k'awapisima ne ãarea k'odai pia bɨt'a. 20Maapae jarasima:
—Chi ẽpẽra sõnepa k'ɨ̃risia che bɨpa mãɨ ẽpẽra mietá beepiparima Tachi Ak'õre k'ĩrari. 21-22Nãɨ ãarea ẽpẽra sõnepa cheparima: k'ɨ̃risia mietá, nemietá awaraɨ ome oo bai, nechɨai, mĩa peai, k'ima awaraɨ ome k'ãii, ãarea uru ba k'ɨ̃ria bai, ne k'achia oo bai, ẽpẽra seai, tachi k'ak'uapa nemietá minachia oo k'ɨ̃ria bɨt'a ooi, abaɨpa uru bɨ k'orea piawẽa k'ɨ̃risiai, abaɨ k'orea sea jarai, abaɨ k'aepẽra atepe pia bɨ jĩra k'ɨ̃risiai mãɨnepa atua bɨ jĩra bai. 23Mãɨ nemietá ãarea tachi sõnepa che bɨpa ẽpẽra Tachi Ak'õre k'ĩrari mietá beepiparima.
Jesupa wẽrak'au jɨpa beepida
Mateo 15:21-28
24Jesú mãmãɨpa Tiro tuadea wãk'ari ẽpẽra tede beesima.#7:24 Tiro. Griego pedeade chi eda waapẽarã k'art'ade mãɨ awara bɨ bɨma: Mãɨnepa Sidón. Ichi sãma bɨt'a mi ãpia pida abaɨa k'awapi k'ɨ̃riawẽa basima. Maamina k'awasidama. 25Mãɨ tuade wẽra basima. Ichi k'au jaore mietá pará basima. Mãɨ wẽrapa Jesú k'orea ũriside ichi bɨmá wãk'ari ichi jĩru k'ait'a sĩraporode k'obeesima. 26Mãɨne chichupuria idisima Jesupa jaore mietá ichi k'au k'ak'uadepema ãyá jeret'aamẽrá. Maamina chi wẽra judio wẽrawẽ pasima.#7:26 Judio wẽrawẽ. Griego pedeade nãɨya bɨ bɨma: Griego. Mãawẽa Sirop'eniciadepema pasima. 27Jesupa ichiá jarasima:
—Warrarã́ itu naa k'opise. Pia bɨwẽma warrarãpa nek'omaa p'anɨt'a ẽemarik'ari usarã́ p'eut'aa teait'a.
28Mãɨne wẽrapa p'anoosima:
—Pɨa jara bɨt'a piarãpɨ, mɨ Chipari, maamina warrarãpa chik'o jurruchoa pida usapa nek'opataɨ ek'ari k'opatama.
29Mãɨ ũrik'ari Jesupa jarasima:
—Pɨa mãɨya pia p'anoona pẽra ne k'ɨ̃risiawẽa tiidá wãse. Pɨ k'au k'ak'uade bada jaore mietá ãyá wãsima.
30Ichi tiidá cheside ichi k'au k'ɨdade ne k'ɨ̃risiawẽa bɨt'a unusima. Chi jaore mietá piarã ãyá wãsima.
Jesupa ẽpẽra k'ɨɨrɨ k'ii bɨ jɨpa beepida
Mateo 15:29-31
31Jesú Tiro tuade bada jĩitea wãsima. Sidón tuade wãk'ari Decápoli lawari p'asak'ari, maapae Galilea senianea wãsima. 32Mãma ẽpẽerãpa k'ɨɨrɨ k'ii bɨt'a Jesumá ateewãsidama. Mãɨ ẽpẽra ichiaba k'ĩrame t'urrá basima. Ãchia Jesua chichupuria idisidama ichi jua mãɨ ẽpẽra ɨ̃rɨ bɨk'ari jɨpa beepimẽrá. 33Ara mãɨne Jesupa chi ẽpẽerã minachia nɨbɨ mãɨ awara ateewãsima, mãɨ ichi ome tuaba bayá. Maapae ichi jua jimini chi ẽpẽra k'ɨɨrɨ uriade berajuk'ari, ara ichi juadepa ichi iduba jitak'ari, chi ẽpẽra k'ĩrame t'õmarisima. 34Maapae pajãnea ak'ɨk'ari ɨbɨa ɨ̃apaak'ari arameo pedeade jarasima: «¡Ep'atá!» Mãɨ pedea jara k'ɨ̃ria bɨma «Ewase». 35Ara mãɨne ichi k'ɨɨrɨ ewak'ari, pia ũri beesima. Ichi k'ĩrame jɨpa beeda pẽra pia pedea beesima.
36Jesupa ãchiá jarasima mãɨ k'orea mi ãpia pida abaɨa jarapidaemaapa. Ichia mãɨya jara bapachimina, mãɨ wariara nepɨrɨpachidama. 37Chi arí p'anɨrãpa minachia k'awa k'ɨ̃risiadawẽa p'aneesidama. Nãɨya jarasidama: «Jesupa ne ãarea pia oo bɨma. ¡Chi k'ɨɨrɨ k'ii be ũripiparima mãɨnepa chi k'ĩrame t'urrá be pedeapiparima!»#Isaía 35:5-6.
Currently Selected:
Marco 7: tdc
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
