Marco 8
8
Jesupa k'ĩmari mil p'anɨa nek'opida
Mateo 15:32-39
1Mãɨ ewaride mãicha ẽpẽerã minachia Jesumá chesidama. Ãchi nek'odai newẽ pẽra, Jesupa ichi ome p'ɨrrɨapataɨrã́ t'ɨ̃k'ari jarasima:
2—Mɨa nãɨ ẽpẽerã sõchupuria unu bɨma. Ewari k'ak'o ũpea pa bɨma mɨ ome p'anɨt'a. Ãchia nek'odai k'orea uru p'anana jõsima. 3Mɨa ãchi nek'odawẽa ãchi tiidá peek'aipɨra, ode wãutade jarra jai jitadaipɨ, chi eda waapẽarã chi t'ɨmɨɨpa che p'anɨ pẽra.
4Chi ichi ome p'ɨrrɨapataɨrãpa idisidama:
—Nãma ẽpẽerã newẽmá ¿sãma jãɨ ẽpẽerã pae nek'opidai k'orea atadaima?
5Mãɨne Jesupa idisima:
—¿Mãrapa p'ana jõmasã́ uru p'anɨma?
Ãchia p'anoosidama:
—Siete.
6Mãɨne Jesupa ẽpẽerã jeeda suak'abari beepik'oasima. Mãɨ p'ana siete ichi juade atak'ari Tachi Ak'õrea sõpia bɨade asima. Maapae p'ana t'oet'aak'ari ichi ome p'ɨrrɨapataɨrã́ teasima jedadamẽrá. Ara mãɨya oosidama. 7Mãɨnepa beta chae wariwẽa uru p'anasidama. Jesupa mãɨ k'orea Tachi Ak'õrea sõpia bɨade ak'ari chi ichi ome p'ɨrrɨapataɨrã́ teasima jedadamẽrá. 8Chi ẽpẽerãpa k'odak'ari jãwaak'oasidama. Chi pichoada jɨrɨp'esidaɨde jabara nepalá k'ak'o siete ipirusidama. 9Chi mãɨ nek'odada k'ĩmari mil p'anasidama. Maapae Jesupa chi ẽpẽerã peek'ak'ari, 10ara mãɨne ichi, chi ichi ome p'ɨrrɨapataɨrã paara p'ãp'orrode batoodak'ari Dalmanuta tuadea wãsidama.
P'ariseorãpa Jesua ẽpẽerãpa ne p'ue oodak'apɨ́ oopade a ididada
Mateo 16:1-4; Luca 12:54-56
11Mãɨ ewaride p'ariseorã chedak'ari Jesú ome k'ĩruu pedea p'anasidama. Ãchia k'awa k'ɨ̃ria p'anasidama ichi piarã pajãnepa che bɨ k'awadayá. Mãɨpuru ãchia Jesua idisidama ẽpẽerãpa ne p'ue oodak'apɨ́ oomẽrá. 12Jesú ɨbɨa ɨ̃apaak'ari jarasima:
—Mãra idiapaepemarã ẽpẽerãpa ¿k'ãre k'orea ẽpẽerãpa ne p'ue oodak'apɨ́ unu k'ɨ̃ria p'anɨma, mɨ Tachi Ak'õrenepa cherut'a k'awadayá? Mɨa piarã jararuma: mɨa ẽpẽerãpa ne p'ue oodak'apɨ́ ooiwẽma.
13Mãɨya jarak'ari p'ariseorã ameesima. Jesú ichi ome p'ɨrrɨapataɨrã paara p'ãp'orrode batoodak'ari senia k'ĩaria lao wãsidama.
P'ariseorã p'ana ooropiparí
Mateo 16:5-12
14Mãɨ wãutade chi Jesú ome p'ɨrrɨapataɨrãpa p'ana ateewãnai k'ɨ̃risia atua p'anasidama. Mãɨ p'ãp'orrode p'ana abapuru uru p'anasidama. 15Mãɨne Jesupa jarasima:
—Jĩrak'aua p'anat'ɨ chi p'ana ooropiparí p'ariseorãné ome mãɨnepa chi Herodedé ome.
16Jesú ome p'ɨrrɨapataɨrãpa ara ãstu pedea para beesima:
—Ichia mãɨya jarasima tachia p'ana enemeenaé pada pẽra.
17Jesupa mãɨ k'awaside jarasima:
—¿K'ãre k'orea p'ana newẽane a p'anɨma? ¿Mɨa ooda mãrapa unusidamina wapida k'awadawẽk'ãra? ¿Wapida atua p'anɨk'ãra mɨ k'ait'a? 18¿Mãra tau uru p'anɨmina ununak'ama? ¿K'ɨɨrɨ uru p'anɨmina ũrinak'ama? Mɨa ooda ¿k'ɨ̃risia atuasidak'ãra? 19Mɨa chi p'ana joesoma bɨdepa ẽpẽerã joesoma mil p'anɨa nek'opiside ¿jabara k'ak'o jõmasã́ mãrapa chi pichoada jɨrɨp'esidama?
Ãchia p'anoosidama:
—Doce.
20Jesupa jarasima:
—Mãɨnepa mɨa p'ana siete p'anɨnepa mɨa ẽpẽerã mil k'ĩmari p'anɨa nek'opiside ¿jabara nepalá jõmasã́ chi pichoada jɨrɨp'esidama?
Ãchia p'anoosidama:
—Siete.
21Maapae Jesupa ãchiá idisima:
—¿K'ãre k'orea mãrapa waidi ũrinawẽa p'anɨma?
Jesupa ẽpẽra tau p'ãrio bɨ jɨpada
22Betsaida p'uurude chesidaɨde waapẽarãpa ẽpẽra tau p'ãrio bɨ Jesumá ateewãnak'ari chichupuria idisidama t'õmarik'ari ya jɨpamẽrá. 23Jesupa mãɨ tau p'ãrio bɨ juade jitak'ari p'uuru awara ateewãsima. Maapae chi ẽpẽra taude iduk'ari, ichi jua ɨ̃rɨ bɨk'ari nãɨya idisima:
—¿Ne p'ue unu bɨk'ãra?
24Mãɨne chi ẽpẽrapa ak'ɨk'ari jarasima:
—Mɨa ẽpẽerã unu bɨma maamina pak'uru jĩra wã p'anɨt'a unu bɨma.
25Jesupa mãicha ichi jua chi ẽpẽra tau ɨ̃rɨ bɨsima. Mãɨne chi ẽpẽrapa minachia unu beesima ichi tau jɨpada pẽra. Ne ãarea jẽrat'ĩu unu beesima. 26Jesupa ichiá nãɨya jarasima:
—Tiidá wãrune p'uurude eda wãrãse, mãɨnepa mɨa ooda mi ãpia pida abaɨa jararãse.#8:26 Mɨa ooda mi ãpia pida abaɨa jararãse. Griego pedeade chi eda waapẽarã k'art'ade mãɨ newẽma.
Pedropa Jesú k'orea jarada
Mateo 16:13-20; Luca 9:18-21
27Mãɨya bak'ari Jesú chi ichi ome p'ɨrrɨapataɨrã ome Cesarea-P'ilipo tuade chi p'uuru chak'e becha p'ɨrrɨade wãsidama. Ode wãutade Jesupa chi ichi ome p'ɨrrɨapataɨrã́ idisima:
—Ẽpẽerãpa mɨ ¿k'aiyade a p'anɨma?
28Ãchia p'anoosidama:
—Chi eda waapẽarãpa jara p'anɨma pɨ Juan chi Porochoaparipɨ. Chi eda waapẽarãpa jara p'anɨma pɨ Eliapɨ. Chi eda waapẽarãpa jara p'anɨma pɨ Tachi Ak'õre pari pedeaparipɨ.
29Mãɨne Jesupa idisima:
—Maamina mãrapa mɨ ¿k'ai k'ɨ̃risia p'anɨma?
Pedropa p'anoosima:
—Pɨ Tachi Ak'õrepa Tachi K'aripaparí teai jaradapɨ.#8:29 Tachi Ak'õrepa Tachi K'aripaparí teai jarada. Mãɨ griego pedeade Cristo bɨ bɨma. Cristo t'ɨ̃wẽma. Jara bɨma «Tachi Ak'õrepa Tachi K'aripaparí teai jarada» wa «Tachi Ak'õrepa Tachi Chipari bɨda». Arameo pedeade Mesías jarapatama.
30Jesupa ichi k'orea mi ãpia pida abaɨa jararãapadade asima.
Jesupa ichi piui bɨt'a jarada
Mateo 16:21-28; Luca 9:22-27
31Mãɨya bak'ari Jesupa chi ichi ome p'ɨrrɨapataɨrã́ nãɨya jaratea beepachima ichi minachia mĩa bai bɨ k'orea:
—P'uurudepema minachia k'awa berãpa, p'aarerã chi mãɨrã chaarearãpa mãɨnepa Moisepa bɨda jarateapataɨrã pida mɨ itu bɨdak'ari peapidaipɨ. Maamina mɨ ewari ũpeaɨde chok'ae p'irabariipɨ.
32Jesupa mãɨ ãarea jarak'ari, Pedropa ichi awara ateewãk'ari ɨtɨasima. 33Maamina Jesupa chi ichi ome p'ɨrrɨapataɨrãmá jĩitea ak'ɨrude Pedroa nãɨya ɨtɨasima: «Tiore, mɨ omepema ãyá wãse. Pɨa Tachi Ak'õre jĩra k'ɨ̃risiawẽa bɨma. Mãɨpari ẽpẽra jĩra k'ɨ̃risia bɨma».
34Jesupa chi ichi ome p'ɨrrɨapataɨrã mãɨnepa chi ẽpẽerã minachia nɨbɨ t'ɨ̃k'oak'ari jarasima:
«Abaɨpa mɨ ome wã k'ɨ̃ria bɨpɨra, ichia oo k'ɨ̃ria bɨt'a itu bɨk'ari minachia mĩai k'orea bai bɨma. Maapae mɨ ome wãi bɨma.#8:34 Minachia mĩai k'orea bai bɨma. Griego pedeade nãɨya bɨ bɨma: Ichi k'urusu uai bɨma. 35Abaɨ pida nãɨ ĩjũane pia bai k'orea jɨrɨ baipɨra, mãɨ atuaipɨ. Maamina abaɨ pida mɨ k'orea piuipɨra wa chi pedea pia jara bɨ k'orea piuipɨra, Tachi Ak'õre ome ewaricha chok'ae baipɨ. 36Ẽpẽra nãɨ ĩjũane ne ãarea uru bɨde piuipɨra, ¿ichia uru bɨpa k'aripaik'ãra? 37¿Jõmasã́ teai bɨma, ichi piuemaapa? 38Abaɨpa nãɨ ĩjũane nemietá oo be t'ãena mɨ mãɨnepa mɨ pedea atua bɨade aipɨra, mɨ, chi Ẽpẽra Warra jua chaarea pará bɨ cherude mãɨ ẽpẽra atua bɨade aipɨ. Mãɨ ewaride mɨ Ak'õre jua chaarea bɨdepa cheipɨ, chi ichia ɨt'aripa peedaɨrã pia berã paara».
Currently Selected:
Marco 8: tdc
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
