Luukasiup Aglangit 13

Piunngittulinisi Tunusiuk Tununngikkusiuk Tuquniaqpusi

1Taissumani inuit tavvaniittut ilangita Jiisusi unikkautivaat Galiliamiunik Pailaatuusiup tuqutautilauqtanginnik tunirrusiqtillugit Guutimut tunirrusirvingmi. 2Jiisusiup uqautivait, “Taikkua Galiliamiut taimaak tuqutaugamik piunngittuliniqsaunasugivisiuk asimingnik Galiliamiunguqatimingnit? 3Uqautivassi, taimainngilaq; ilissittauq piunngittulinissinnik tunutsinianngigussi, taimaaktauq tuqujumaarivusi. 4Uvvaluunniit taikkua inuit 18 napajualungmut Sailuami urruviulauqtut tuqullutik, nalunaikkutaunasugivisiuk taikkua piunngittuliniqpaangunasugillusiuk Jiruusalimmi? 5Uqautivassi, taimainngilaq; ilissittauq piunginnissinnik qaqialirnianngikkussi taimaaktauq tuqujumaarivusi.”

Ajjiujuq Napaaqtuq Paurngaliksaq Pirurviunngittuq

6Uuminga ajjiujumik uqautivait: “Angutitaqalauqpuq piruqsiiviqutimini napaaqtuqutiqaqtumik pigilingnik paurngaliksamik; paurnganik qiniriaqpuq napaaqtumut, nanisinani. 7Piruqsiivilirijiqutiminut uqaqpuq, ‘Takugit, arraagunik pingasunik takujaqtuqattaraluaqpunga uvunga napaaqtumut paurngaqsiuriarlunga pitaqalauqsimanngimmat. Nakaliruk; sungmanuna piruqsiivingmi agviaqpa?’ 8Piruqsiivilirijiup kiuvaa, ‘Angajuqqaak taimailingakalaurli suli tamaani arraagumi; avataa qalurarniaqpara piruqsautiksanganik uumajut ananganik ilisivigilugu. 9Arraagu paurnganik pirurviukpat naammakpuq; pirurviunngimmikpat tavva nakatautigunnalaaqpat.’”

Jiisusiup Aaqqiksininga Arnamik Iliqqusirluktumik Sapatiutillugu

10Sapatimik ajuriqtuitillugu Juutit ukpirnirmut katimavinganni. 11Arnamik tavvaniittuqalauqpuq anirnirlungmut ilummiqtausimajumik taassuma aanniatippaa ukiunik 18-nik, taanna piringalauqpuq isivittunnarani. 12Jiisusiup takugamiuk, qaiquvaa uqautillugu, “Arnaaq, aanniagijarnit aaqqiktauvutit.” 13Patimmingmagu, tavvainnaq arnaq isivippuq, taassuma Guuti niqtuliqpaa.

14Juutit ukpirnirmut katimavingatta aulatsijingat Jiisusimut ninngakpuq Sapatimi aaqqiksingmat, inuit uqautivait, “Ullunik pingasuujuqtunik pinasuarviksaqtaqaqpuq; ulluni taakkunani qaigissi aaqqiktaujaqturlusi, Sapatimiunngittuq.”

15Ataniup kiuvaa uqarluni, “Ilissi takkurmuuqtusi! Uumajuqutissinnik siutiqquqtujuqutiminigluunniit ininganit pituijjaaqsivakpusi imiqtigiaqturlugu Sapatiutillugu? 16Unali arnaq, Aiprahaam kinguvaanga saataanasiup qilaksuqsimalauqtanga arraagunik 18-nik, taanna qilarujjaaqtaujariaqanngilaq Sapatimi?” 17Taimaak uqarmat, akiraqturasuaqtulimaat kanngusuliqput; inulimaat quviasuktualuulirlutik, Jiisusiup kamanaqtitalimaangit pijjutigillugit.

Ajjiujuq Piruqsiaksat Mikinniqpaangat Masitart

Maatiusi 13:31-32; Maakusi 4:30-32

18Taimaimmat Jiisusi uqaqpuq, “Sunamik Guutiup Ataniuvinga ajjiqaqpa? Sunamut ajjiutittunnaqpara? 19Imaittuujaaqpuq, piruqsiaksaq mikinniqpaaq masitart angutiup piruqsiaksaq mikijukuluk pigamiuk piruqsiivingminut kanngaqsuutigivaa; taanna piruliqpuq napaaqtunngurluni, tingmiat tavvani avalangajunginni ivaviqarunnaqsillutik.”

Ajjiujuq Puvallaqqut

Maatiusi 13:33

20Suli Jiisusi uqarivuq, “Sunamulli Guutiup Ataniuvinga ajjiutittunnarivara? 21Imaittuujaaqpuq, puvallaqqut,#13:21 Pujjuqsiutik arnaup puvallaqqut ilaliutivaa niaquujaksangmut angijumut, niaquujaksalimaaq taanna puvallaqtippaa.”

Itirvik Nirukittuq

Maatiusi 7:13-14,21-23

22Jiisusi nunaliktigut iglugasaktigullu aqqusaaqpuq, inuit ajuriqturlugit Jiruusalimmuaqpallialluni. 23Inuit ilangatta uqautivaa, “Ataniq inuit ununngittut piulijaujumaaqpat?”

Jiisusiup uqautivait, 24“Aksururissi itirvikittukkut itirasuarlusi; amisut itirasuarniarmata itirunnarniaratiglu. 25Igluup inuata makilluni matu matukpagu; ilissi tavva silataani nangilirumaaqpusi tiglukturlusi, uqarumaaqpusi, ‘Ataniiq, matuirutitigut,’ taassuma kiujumaaqpaasi, ‘Nakinngaarmangaassi qaujimanngilassi.’ 26Tavva kiujumaaqpusi, ‘Niriqatigilauqpattigit imiqatigillutillu, ajuriqtuilauqputit nunattinni.’ 27Taanna kiujumaarivuq, ‘Nakinngaarmangaassi qaujimanngilassi; tamaaniinngilaurissi, piunngittulijualuujusi!’ 28Tavvani qiajumaaqpusi aglirularlusilu, Aiprahaam Aisakilu Jaikulu nalauttaijuulauqtullu Ataniuvinganiittut takugussiuk ilissi anititaulusi. 29Inuit tikittumaaqput siqiniup nuiviata nalaanit, siqiniullu nipiviata nalaanit, unnuallu nalaanit, ulluullu nalaanit, taakkua iksivaqataujumaaqput nirivingmi Guutiup Ataniuvingani. 30Takugit, kingulliujut sivulliujumaaqput, sivulliillu kingulliujumaarlutik.”

Jiisusiup Nagligusungninga Jiruusalimmik

Maatiusi 23:37-39

31Taissumani ikarrami Paarisit Jiisusimuaqput uqautillugu, “Tamaanngat aullarit, Iruutasiup tuquttumangmatit.”

32Jiisusiup uqautivait, “Tiriganiaq tainna uqautijaqtuqsiuk, ‘Takugit, ullumi anirnirlungnik anititsivunga aaqqiksillungalu, qaukpat suli, ulluillu pingajuanni pijariiniaqpunga. 33Sulili maanna ingirrajariaqaqpunga ullumi qaukpallu ungaliagulu; naammanngimmat nalauttaijuq tuqutaujariaksaq Jiruusaliup asiani.’

34“Jiruusalim, Jiruusalim, nalauttaijunik tuqutsijutit ujaqqanut milluqtutit nalauttaijunik! Unuqtuiqsurlunga inugijatit iqittumakattalauraluaqpakka suurlu aqiggiujaup qiturngani isarurmi ataanut katititangititut, taimaitaujumalaunngilasili! 35Takugit, iglusi qimaktaujumaaliqpuq. Uqautivassi, takuniarunniiqpassinga uqalauqqaaqtinnasi, ‘Guutiup saimmarliuk Ataniup atingani tikittuq!’”

Currently Selected:

Luukasiup Aglangit 13: EAIBR

Highlight

Copy