Luukasiup Aglangit 4

Jiisusiup Pijumisaaqtauninga

Maatiusi 4:1-11; Maakusi 1:12-13

1Jiisusi Juartanimit utiliqtillugu, Anirnirmik Ijjurnaittumik ilummiqtausimalluni, Anirniup Ijjurnaittuup tasiuqpaa inuqanngittumut, 2ullunik 40-nik inuqanngittumi Saataanasiup uukturlugu pijumisaaqpaa. Taakkunani ulluni nirilaunngilaq; ulluit taakkua naangmata, kaaliqpuq.

3Tavva Saataanasiup uqautivaa, “Guutiup Irnirikpatit, una ujarak niaquujannguqulauruk.”

4Jiisusiup kiuvaa, “Aglangni titiraqsimavuq, ‘Inuk niaquujamituinnaq inuujjutiqanngilaq.’”

5Tavva Saataanasiup puqtujumuaqtippaa, takutillugu silarjuarmi angajuqqauvilimaanik ijiup sikunngillangningatut qilammiutigijumik, 6Saataanasiup uqautivaa, “Angajuqqaunilimaat tamakkua niqturnarningillu ilingnut tuniniaqpakka, uvannut tunijausimajut, isumannik tunijunnaqpakka tunisivigijumajannut. 7Tamakkua tamarmik pitaariniaqpatit, tuksiarvigiguvinga.”

8Jiisusiup kiuvaa, “Aglangni titiraqsimavuq, ‘Ataniq Guutigijait tuksiarvigijaksarivat, taannatuarlu pijitsiqtaksarivat.’”

9Saataanasiup Jiisusi Jiruusalimmuarutivaa, tuksiarvigjuap puqtuniqpaanganuaqtipaa, uqautillugu, “Guutiup Irnirikpatit, tamaanngat ilingnik kataktilaurit ununga; 10aglangni titiraqsimangmat, ‘Guutiup aingiliqutini tilijumaaqpait, saputijauqullutit,’ 11ammalu, ‘Tigumiaqtauniaqputit itigatit aanniqunagit ujaqqanut.’”

12Jiisusiup kiuvaa, “Aglangni uqaqsimavuq, ‘Guutingnik Atanirnik pijumisaarijuksaunngilatit.’”

13Saataanasiup pijumisaarijjutini isulikkamigit, Jiisusimit qimaruutivuq piviksaminik utaqqilirilluni.

Jiisusiup Pinasuasigiarninga Galiliami

Maatiusi 4:12-17; Maakusi 1:14-15

14Jiisusi utiqpuq Galiliamut Anirniup Ijjurnaittuup pijunnarningata najurluniuk, uqausiuninga Galiliap qanigijanganiittulimaanut tusaumajauliqpuq. 15Ajuriqtuilluni Juutit ukpirnirmut katimavinginni, quviagijaummarikpuq inulimaanut.

Jiisusiup Narrugijauninga Naasariitimi

Maatiusi 13:53-58; Maakusi 6:1-6

16Kingurngagut Jiisusi Naasariitimuaqpuq, piruqsavigilauqtaminut; Juutit ukpirnirmut katimavingannuaqpuq, iliqqusirivaktamitut Sapatiutillugu, nikuvippuq atuaqsinialirami aglangnik; 17tunisiviugami nalauttaijup Aisaiasiup aglanginnik. Makpiramigit imaak aglaksimajut uqalimaaqpait,

18“Ataniup Anirningata najuqpaanga,

Nirualauqpaanga ajuriqtuiqullunga

Uqausirnik tusaruminaqtunik aktlujunut.

Tilivaangalu uqaujjiqullunga tigujausimajut anititauqullugit,

Tautunngittut tautuliqtitauqullugit,

Saalagijausimajullu qilarujjaaqtauqullugit,

19Uqaujjiqullunga Ataniup piulisivigijumajanngata arraagunga nalliutingmat.”

20Jiisusiup uqalimaaqtani imugamigit, utiqtippait kamajimut, ajuriqtuivingmut ingilluni; tavvaniittulimaat takunnaliqpaat. 21Uqarvigiliqpait, “Ullumi ukua aglait tusaqtasi nalliutivut.”

22Ajunnginninga uqausirivaat, kamallutik uqarunnatsiarninganik; uqarlutik, “Una Juusipiup irnirinngilauk?”

23Jiisusiup uqautivait, “Nalunanngilaq imaak uqausituqarmik uqautijumaniarassinnga, ‘Aanniasiuqti ilingnik aaqqilaurit; tusaqsimajattinnik Kapiirniami piniarnirilauqtarnik, uvani Naasariitimi pinasualaurittauq.’” 24Imaaglu uqarivuq, “Sulijumik uqautivassi, nalauttaijumik ilaliuqtaujuqalauqsimanngilaq piruqsavivinirmini. 25Sulijumik uqautivassi, amisunik uiggarniqtaqalauqpuq Isarialimiuni Ilaijja inuutillugu, taissumani silalulaunngimmat arraagunik pingasunik, taqqiniglu pingasuujuqtunik, kaangnaqturjuaqalilauqpuq nunalimaami; 26Ilaijja Isarialimiut nalliannut tilijaulaunngilaq nunalingmulli atausirmut tilijaulauqpuq Jiripaatimut, Saitunimiittumut, arnamut uiggarnirmut. 27Amisut kappiagijaujumik paqtilauqput Isarialimiut nunangani nalauttaijuq Ilaisa inuutillugu; nalliannigluunniit aaqqiktaujuqalaunngilaq, Naimanli Siriamiuq kisimi aaqqiktaujutuulauqpuq.”

28Inuit Juutit ukpirnirmut katimavinganiittut tamatuminga tusaramik ninngakput. 29Nikuvinnamik Jiisusi tigullugu tasiuqpaat, nunalingnit tavvanngat innaarurmuarutillugu, tavvanngat ijukkaqtittumallugu, iglugasaqarviup innaarungagut. 30Jiisusili inugiaktut akurngattigut taakkunanngat aullaqpuq.

Angut Anirnirlungmik Itiqtausimajuq

Maakusi 1:21-28

31Tavvanngat Jiisusi Kapiirniamuaqpuq, Galiliamiittumut. Sapatiulirmat tavvani ajuriqtuivuq. 32Ajuriqtuijjutigijangit inuit kamaniarutigivait, pijunnarniqaqtitaulluni ajuriqtuingmat. 33Juutit ukpirnirmut katimavinganiittuqaqpuq angummik anirnirlungmut itiqtausimajumik; taanna nillialiqpuq nipiqquqtulluni, 34“Aaq! Jiisusi Naasariitimiuq, qanuiliuriaqtuqpitigut, tuqurariaqtuqpitigut? Kinaungmangaaqpit qaujimagakkit, Guutiup ijjurnaittuqutigingmatit.”

35Jiisusiup anirnirluk iniqtiqpaa, uqautillugu, “Nipangirlutit, inungmit uumanngat anigit!” Anirnirluup inuk urrutippaa inuit saanginni, qanuilinagu taassumangat anivuq.

36Inulimaat kamajualuuvut immingnut uqalutik, “Qanuittuminguna uqausilik aulatsijunnaqtuq pijunnarniqarluni anirnirlungnik aniqujijunnaqtuq, naalaktaulluni taakkunanngat?” 37Jiisusiup unikkausiuninga tusaumajauliqpuq Kapirniamiut qanigijanganiittulimaanut.

Jiisusiup Aaqqiksininga Inungnik Amisunik

Maatiusi 8:14-17; Maakusi 1:29-34

38Jiisusi anivuq Juutit ukpirnirmut katimavingannit Saimuuniup iglunganuarluni. Saimuuniulli sakinga arnaq aanniavuq uutirnarluni, taanna uqausirivaat Jiisusimut. 39Jiisusiup upakkamiuk iglingata saniani nangirluni, aannianga uutirnaqtuq aniquvaa, tavvanngat anivuq; arnaq tavvainnaq makinnami tavvaniittut pijitsiraliqpait.

40Unnuliqtillugu siqiniq nipingmat, inulimaat ilaqaqtut qanimajunik qanutuinnaq aanniaqaqtunik Jiisusimut aatsivut; tamarmik patimmivait aaqqiglugit. 41Anirnirluillu inungnit unuqtunit anivut, nilliallutik imaak, “Guutiup Irnirivaatit!”

Iniqtiqpait, uqallaqunagit, qaujimangmata Christuusiuninganik.

Jiisusiup Ajuriqtuininga Juutit Ukpirnirmut Katimavinginni

Maakusi 1:35-39

42Ullaannguqtillugu qaummangmat Jiisusi nunalingnit aullaqpuq inuqanngittumuarluni, inuit qiniliqpaat, nanigamijjuk iniqtiqpaat aullaqunagu nunamingnit; 43Jiisusiup uqautivait, “Nunalingni asitsinnittauq uqausirnik tusaruminaqtunik uqausiqariaqaqpunga Guutiup Ataniuvinganik; tamanna tilijaujjutigisimagakku.”

44Taimaimmat ajuriqtuilauqpuq Juutit ukpirnirmut katimavinginni Juutiamiittuni.

Currently Selected:

Luukasiup Aglangit 4: EAIBR

Highlight

Copy