Luukasiup Aglangit 9
9
Jiisusiup Tilisininga Ilinniaqtiminik 12-nik
Maatiusi 10:5-15; Maakusi 6:7-13
1Jiisusiup ilinniaqtini 12 katiqullugit qaiquvait, pijunnarnirmik angajuqqaunirmiglu tunisivigivait anirnirlungnik anititsijunnaqullugit, aanniajuniglu aaqqiksijunnarnirmik. 2Tilivait ajuriqtuiqullugit Guutiup Ataniuvinganik aanniajuniglu aaqqiksiqullugit. 3Uqautillugillu “Aulaniriniaqtassinnut sunatuinarmik naksaqtailigissi, ajauppialijarasi, ikpiarjulijarasiluunniit, niqiksagirasiluunniit, kiinaujalijarasiluunniit; atijaksakkannirmik annuraaginngillusi. 4Nalliannutuinaq iglumut itirussi, tavvaniinginnarissi, nunalingnit aullalaunginnissinni. 5Tunngasuktitaunngikkussili, nunalingnit tavvanngat aullalirussi saaniit itigassinnit katagaqtisiuk naammagijaunnginninginik nalunaikkutauniarmat.”
6Ilinniaqtingit aullaqput, nunalilimaanut aqqusaaqattarlutiq, ajuriqtuillutik uqausirnik tusaruminaqtunik qanimajut aaqqikpait nanituinnaaq.
Iruutasiup Nalulirninga
Maatiusi 14:1-12; Maakusi 6:14-29
7Iruutasi Galiliami angajuqqaangujuq tusaqattalirami piniarnirijauvalliajunik, naluliqpuq, inuit ilangit uqaqattarmingmata Juanasi Paaptitsiriji tuqungajunit makinniraqtaulluni, 8ilangillu uqaqattarmata Ilaijja saqqinniraqtaulluni, ilangillu uqaqattarillutik nalauttaijut ilangat uummaqsimaniraqtaulluni. 9Iruutasi uqaqpuq, “Juanasi niaquiqtautilauqpara; kinaliinna angut tusaqattaqpara tamakkuninga pinasuaqtuq?” Tavva Jiisusi takunasuaqpaa.
Jiisusiup Nirititsininga Angutinik 5,000-nik
Maatiusi 14:13-21; Maakusi 6:30-44; Juanasi 6:1-14
10Aapuusitalit utiramik qanuiliurnirilauqtamingnik unikkaaqput Jiisusimut. Ilagillugit aullaqput nunalingnut Pitsaitamik atilingmut. 11Inugiaktut qaujigamik, maliksaqpaat; Jiisusiup tunngasuktippait uqallagvigillugit Guutiup Ataniuvinganik, aaqqiktaujarialit aanniajut aaqqikpait.
12Siqiniq akpalirmat unnuliqtillugu; ilinniaqtingit Jiisusimuaqput uqautillugu, “Inuit aullaqulikkit, nunalingnuarlutik qanigijanginnullu siniktarvingnuarlutik nirijasaqtaarniarmata; maani inuqanngittumiikkatta.”
13Jiisusiup uqautivait, “Ilissi niritilauqsiuk.”
Ilinniaqtingit uqaqput, “Tallimainnarnik niaquujaqaqpugut iqaluungniglu marruungnik, niuviriaquvitigut? Ukua inugiagaaluit nirijaksanginnik?” 14Tavvaniittut 5,000 qanigijaaniilauqput angutit.
Ilinniaqtini uqautivait, “Inuit ingiqulauqsiuk avikturlugit 50-unaaqtirlutik.” 15Ilinniaqtingit taimaak pinasuaqput, inulimaat iksivaalirmata. 16Tavva Jiisusiup niaquujait tallimat iqaluuglu marruuk tigullugit qilangmut aarluqpuq, Guuti qujagijariiramiuk avikpait, ilinniaqtiminut tunillugit inungnut tuniuqqaiqullugit. 17Inulimaat nirivut aqiatturlutik; ilinniaqtingita amiakkut agguqsimajut nuappait iviujanut 12-nut.
Piitturuusiup Nalunaiqsininga Jiisusimik
Maatiusi 16:13-19; Maakusi 8:27-29
18Jiisusi inutuulluni tuksiaqtillugu, ilinniaqtingita upakpaat; ilinniaqtini apirivait, “Inungnit kinaunasugijauvunga?”
19Ilinniaqtingit kiuvut, “Juanasi Paaptitsirijiunasugijauvutit; ilanginillu Ilaijjaunasugijaullutit, ilangitalu nalauttaijut ilangat uummaqtuviniunasugivaatit.”
20Jiisusiup apirivait, “Ilissili, kinaunasugivisinnga?”
Piitturuusiup kiuvaa, “Misaiasiuvutit#9:20 “Christuusi” “Misaiasi” ajjigiingmatik tukiqaqpuq uqsuqtitausimajuq niruaqtausimanirminut Guutimit pisimajuq.”
Jiisusiup Uqaujjininga Aanniatitauniksaminik Tuqutauniksaminiglu
Maatiusi 16:20-28; Maakusi 8:30—9:1
21Jiisusiup ilinniaqtini iniqtimmarikpait uqaqunagit tamatuminga kinatuinnarmut. 22Uqautillugit, “Inuup Irninga angijumik aanniatitaujariaqaqpuq, narrugijauluni Juutit angajuqqaanginnit, tunirrusiqtitsijillu angajuqqaanginnit, piqujaniglu ilisaijinit, tuqutaulaaqpuq, ulluit pingajuannik makilaarivuq.”
23Jiisusiup tavvaniittulimaat uqautivait, “Uvannik maligumajuqaqpat, isumaminik inuujumajuksaunngilaq, sanningajuliksaminik qautamaat agjaqsijuksauvuq maliglungalu. 24Nalliat inuusirminik pisimanasuluaqtuq inuusirminik asiujijumaaqpuq; nallialli inuusirminik asiujijuq pijjutigilunga, inuusini piulijumaaqpaa. 25Inuk sunamik pivallirutiqarajaqpaa, silarjualimaaq pitaarigaluuruniuk, nangminirlu inuusirminik asiujingaarluni atuutiksaqarunniitikkuniuk? 26Inuup nalliatta kanngusuutigikpanga inungnut ajuriqtuijjutigijakkalu, taannattauq Inuup Irningata kanngusuutigijumaarivaa niqturnaqturjuanguluni tikikkuni Ataataup niqturnarnirjuangani aingilillu ijjurnaittut ilagilugit. 27Sulijumik uqautivassi, maanna uvani nangiqatigijasi ilangit tuqunianngilat, Guutiup Ataniuvinganik takulauqqaaratik.”
Jiisusiup Takuminaqsititauninga
Maatiusi 17:1-8; Maakusi 9:2-8
28Tamatuma kingurngani pinasuarusiq naasimaliqtillugu taakkuninga uqausiqalaurluni, qaqqamut tuksiariaqtuqpuq Piitturuusi Juanasilu Jaimisilu ilagillugit. 29Tuksiaqtillugu, kiinangata tauttua ajjigijunniiqpaa, annuraangit qakuqsivut qilliqsillutik. 30Takugit, angutiingnik marruungnik uqaqatiqaliqpuq, Muusisimik Ilaijjamiglu, 31taakkuak saqqiqpuuk takuminaqtualungmik qaumaniqarlutik Jiisusiup akuniunngittuq aullarnialirninganik uqausiqarlutik, aturniaqtanganik Jiruusalimmi. 32Piitturuusi ilangillu uirngarnirmut sinilauqput, iqqummaramik Jiisusiup niqturnarnirjuanga takuvaat angutiiglu marruuk nangiqatigijangik. 33Qimaruutilirmatik Jiisusimit, Piitturuusi uqaqpuq, “Ajuriqtuiji, uvaniinnivut quvianaqtualuuvuq; siniktaviliulauqta pingasunik, ilingnut Muusisimullu Ilaijjamullu”, taimaak uqaraluarami imminik ikpigilaunngilaq.
34Piitturuusi uqariituarmat, nuvuja saqqippuq taakkua ulikpait; ilinniaqtit kappiasuliqput nuvujamut uliktaugamik. 35Nuvujamit nipi tusaqsauliqpuq uqaqtuq, “Una Irnira, niruaqsimajara; taanna naalaksiuk!”
36Nipi nipangirmat, Jiisusi taannatuuliqtuq ujjiriliqpaat. Taakkua tamatuminga kinamulluunniit uqausiqalaunngilat, taissumaniutillugu takulauqtamingnik.
Jiisusiup Anirnirlungmik Anititsininga Surusirmit
Maatiusi 17:14-18; Maakusi 9:14-27
37Qautillugu, qaqqamit ammuangmata, inugiakturjuanit Jiisusi upaktauvuq. 38Inugiaktunilli angut qaigalaaliqpuq, “Ajuriqtuiji, qinuvigivagit irnira takulauruk, qiturngatuarigakku; 39anirnirluup tikiqattarmagu, tikitsaraingmagu tavvainnaq nillialiqattaqpuq; aulatitaalugilluniuk sukangajualuutiqattarmagu, qaninga qapualiqtualuulluni; taimaaglu aanniatiqattaqpaa qimagunnaillivaglugu. 40Ilinniaqtitit taassuminga anirnirlungmik anititsiqulauraluaqpakka, ajuqpaalli.”
41Jiisusiup kiuvait, “Ukpirniqanngittusi, tammaqsimallusilu, qanuq akuniutigijuq najuriaqaqpassi, qanurlu akuniutigijuq qinuisaarutigijariaqaqpassi?” Angut uqautivaa, “Irniit maunga qaitilauruk.”
42Surusiq qailiqtillugu, anirnirluup nunamut urrutippaa sukatitaalugillugu. Jiisusiup anirnirluk iniqtirlugu aniquvaa, surusiq aaqqikpaa, ataatanganut utiqtillugu. 43Inulimaat kamavigjuaqput Guutiup ajunnginnialuanik.
Jiisusiup Suli Tuqutaulaarnirminik Uqausiqarninga
Maatiusi 17:22-23; Maakusi 9:30-32
Inuit kamajualuutillugit suli Jiisusiup piniarninganik, ilinniaqtini uqautivait, 44“Ukua uqausiriniaqtakka puiguqtailisiuk; Inuup Irninga pititaugiaviliqpuq inuit pijunnarninginnut.” 45Ilinniaqtingilli tamatuminga uqaqtanganik tukisilaunngilat, uqausit nalunaqtitaulaurmata taakkununga tukisilaunngilat; iliragivaalu apirijariaksaq tamatuminga.
Kina Pillariuniqpaanguva?
Maatiusi 18:1-5; Maakusi 9:33-37
46Jiisusiup ilinniaqtingit aivaqatigiiliqput nalliat pilariuniqpaungmangaat. 47Jiisusiup qanuq isumaqarmangaata qaujigamigit, surusirmik tigusivuq saniminut nangiqsitillugu, 48taakkua uqautivait, “Nalliat uuminga surusikulungmik ilaliuqsijuq pijjutigilunga uvannik ilaliuqsivuq, uvanniglu ilaliuqsijuup uvannik tilisijuq ilaliurivaa; ilissinnit mikinniqpaangujuq taanna pilariuniqpaanguvuq.”
Nalliatta Ilissinnik Akiraqtunngittuup Ilagivaasi
Maakusi 9:38-40
49Juanasi uqaliqpuq, “Ajuriqtuiji, inungmik takulauqpugut anititsiqattaqtumik anirnirlungnik ivvit atingani, taanna iniqtilauqpavut taimailiuqunagu ilaginnginnattigu.”
50Jiisusiup uqautivaa, “Taimailiuqtuq iniqtirniarasiuk; ilissinnik akiraqtunngittuup ilagivaasi.”
Samiariamiut Nunaliit Jiisusimik Ilaliuqsijumanngittut
51Jiisusiup qilangmuaqtitauviksanga qaglivallialirmat, kajusijumaliqpuq Jiruusalimmut aijumalirluni. 52Upangniaqtaminut uqariaqtuqtitsivuq, Samiariarmiut nunalingita ilangannut siniktarviginiaqtamingnik upalungaiqsiqullugit; 53Samiariamiulli ilaliunngilaat, nalunanngimmat Jiisusi Jiruusalimmuaqpalliangmat. 54Ilinniaqtingita Jaimisiup Juanasiullu tamanna tusaramikkuk, Jiisusimut uqaqpuuk, “Ataniq, qilangmit ikumamik kataktuqaqullugu tuksiaquvitikkuk ilaliuqsijumanngittut nungutauqullugit?”
55Jiisusiup takusarlugik iniqtiqpaak; [uqarluni, “Anirnirmut qanuittumut qiturngarijaungmangaassik naluvusik; Inuup Irninga tikisimanngimmat inungni asiruijaqturluni, piulijaqturlugilli.”]#9:55 Ijjujutuqait ilanginni pitaqanngilluni ilanginni ilijausimalluni 56Jiisusi ilinniatini ilagillugit nunalit asinginnuaqput.
Jiisusimik Maliktiujumajut
Maatiusi 8:19-22
57Aqqutikkut pisuglutik angummit Jiisusi uqaujjauvuq, “Malingniaqpagit namutuinnaq aigaluaruvit.”
58Jiisusiup kiuvaa, “Tiriganiat sitiqaqput, tingmiallu ulluqaqtlutik; Inuulli Irninga nanituinnaq sinigviksaqanngilarluunniit.”
59Amma asianut uqarivuq, “Ivvit malinnga.”
Taanna kiuvuq, “Ataniq, ataataga iluviriaqtuqqaalaurlagu.”
60Jiisusiup kiuvaa, “Tuqungajut tuqujiamingnik iluviqsilirli; ivvit Guutiup Ataniuvinganik uqausiqariaqtulirit.”
61Suli ilangat uqarivuq, “Ataniq, maligumavagit; ilakkali tavvauvutiiriaqtuqqaalaurlakka.”
62Jiisusiup kiuvaa, “Nalliat piruqsiiviliurutiminik tigusijuq sanasigiarluni, kingumut qiviaruni, atuqtaujunnanngilaq Guutiup Ataniuvinganut.”
Currently Selected:
Luukasiup Aglangit 9: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
