Maatiusiup Aglangit 18

Kina Pillariuniqpauva?

Maakusi 9:33-37; Luukasi 9:46-48

1Taissumani ilinniaqtit Jiisusimuaqput, uqarlutik, “Kina pillariuniqpauva Guutiup Ataniuvingani?”

2Jiisusi surusirmik qaiqujivuq, taakkua saanganut nikuvitillugu, 3uqaqpuq, “Sulijumik uqautivassi, piusissinnik asijjirlusi kisianiuvuq surusikuluktut taimailirlusi, asijjinngikkussi Guutiup Ataniuvinganut itirunnarnianngimmarikpusi. 4Imminik mikiglitiqtuq uutunaq surusikuluktitullu taimailirluni, taanna Guutiup Ataniuvingani pillariuniqpauvuq. 5Nalliat surusikuluktitut taimaittumik ilaliuqsijuq uvanga pillunga, taanna uvannik ilaliuqsivuq.”

Pijumisaaqtauniq Ajurnirmut

Maakusi 9:42-48; Luukasi 17:1-2

6“Nalliat taimaittukulungnik ukpirninganik uvannut agviaqsikpat ajuqtulititsiluni, taanna akauniqsaugajaqpuq niaquujaksanik siqallisijjutiup ujaraalunganik qungasingagut qilaksiviuluni imavingmut itijumut kivititauguni. 7Kappianammarikpuq silarjuarmiunut katagutaujunnaqtunik ajuqtulinirmut pinasuaqpaktut! Taimailiuqtuqatsainnarniaraluaqpuq; kappiannamigli inuk katagutaujunnaqtunik aqqutigijaujuq!

8“Aggakpit itigakpilluunniit ajuqtulitippatit, nakakkit igillugit; ilingnut piuniqsaugajaqpuq inuusirmut itiruvit igluinnarmi aggaqarlutit, igluinnarmigluunniit itigaqarlutit tusiallutillu. Igluktut aggaqarlutit, igluktullu itigaqarlutit igitautuinnarajarnirnit ikumarjuarmut nungusuittumut. 9Ijivit ajuqtulitippatit, piilauruk igillugulu; ilingnut piuniqsaugajaqpuq inuusirmut itiruvit igluinnarmik ijiqarlutit, igluktut ijiqaraluaruvit igitautuinnarajarnirnit ikumarjuarmut kappianaqtuvingmut.”

Ajjiujuq Siipi Asiusimajuq

Luukasi 15:3-7

10“Qaujilirissi tamakkuakuluit narrugijariaqannginnassiuk; sulillunga uqaqpunga taakkua aingiliqutingita Ataatama qilangmiittuup kiinanga takuinnaqattaqpaat. 11Inuup Irninga tikisimangmat asiusimajut qiniriarlugit.#18:11 Takulugu Luukasi 19:10

12“Qanurli isumavisi angut 100-nik siipiqutilik, taakkua ilangat atausiq asiukpat, taakkua siipit 99 qimakkajanngilait qaqqamut qiniriarluni siipimik asiusimajumik? 13Sulillunga uqautivassi, naniguniuglu, quviasuutiginiqsariniaqpaa siipinit 99-nit asiusimanngittunit. 14Taimaatsainnaqtauq, Ataatasi qilangmiittuq tamakkuningakuluk asiuqujinngilaq.”

Inuuqatiit Ajuqtulijuq

15“Ukpiqtuuqativilli ajuqtulivigikpatit, upaguk tammarninganik uqautilugu, inutuuqatigilugu uqaqatigiguk. Tavva taassuma naalakkunitit, tavva ukpiqtuuqatiit utiqtinniaqpat. 16Taassumali naalanngippatit, atausirmik marruungnigluunniit ilaqarlutit, ‘Marruukpatik qaujisimajuuk pingasulluunniit, pasijaksannguqtitsijunnaqput.’ Taimaak Guutiup uqausinginni uqaqsimangmata. 17Sulili taakkuangutillusi naalagumanngippat, tavva uqautigiliqsiuk ukpiqtuuqatigiinut ilagiiktunut; taakkuningali ilagiiktunik suli naalagumanngippat, tavva ukpinngittutitut taimaittuutiliruk, uvvalu Ruumamiut kiinaujaiqtitsijiqutingititut.”

Qilaksuqtaujut Qilarujjaaqtaujullu

18“Sulijumik uqautivassi, nunarjuarmi qilaksuqtasi taakkua qilangmi qilaksuqsimajumaarivut, qilarujjaaqtasilu nunarjuarmi taakkuattauq qilarujjaaqsimajumaarivut qilangmi.

19“Suli uqautikkanniqpassi, nunarjuarmi marruulusik angiqatigiikkussik sunatuinnarmik tuksiarutiqarumalusik, tamatuminga tavva tunisiviuniaqpusik Ataatannut qilangmiittumut. 20Marruuk pingasulluunniit katinngaliqpata atinni, tavvaniinniaqpunga ilagilugit.”

Ajjiujuq Piji Saimmaujjiluni Isumagijunnairviqarumanngittuq

21Tavva Piitturuusi Jiisusimuaqpuq uqarluni, “Ataniq, ukpiqtuuqatima ajuqtulivigiqattaqpanga, qatsiiqturlunga isumagijunnairvigijaksarivara? 7- iqsurlunga naammakpa?”

22Jiisusiup kiuvaa, “7-iqtutuinnaqulutit uqautinngilagit, 70-lli 7-iqturlugit, 23taimaimmat Guutiup Ataniuvinga imaak ajjiqarunnaqpuq; taissumani angajuqqaarjuaqtaqalauqpuq, taanna isumataalauqpuq pijini akiliksanginnik aaqqiiqatigijumallugit. 24Kamanasuasigiaqtillugu pijingatta ilangat isiqtitauvuq angajuqqaarjuarmut akiliksalik kiinaujanik taalintinik 10,000-nik. 25Piji akiliutiksaqanngimmat, tavva angajuqqaarjuap niuvianguquliqpaa piqutititut pitaarijauqullugu, nuliangalu qiturngangillu piqutilimaangillu, akiliksangit akiliqtauqullugit. 26Piji angajuqqaarjuap saanganut siiqquqpuq, qinulluni uqaqpuq, ‘Angajuqqaak, qinuisaarvigilaunnga, akililaaqpagit iluunnanginnik.’ 27Angajuqqaarjuaq taassuminga ilatsugusulirami, isumagijunnairvigivaa akiliksalimaanginnik; aniqulirlugulu.

28“Taanna angut tavvanngat anigami pijiuqatiminik katisivuq akiliksaqarvigijiminik kiinaujanik ununngittunik; upaglugu tuqqujaaksivaa uqautillugu, ‘Akiliilaurit uvannut akiliksarijarnik.’ 29Pijiuqatingalu taanna siiqqurluni saanganut qinuvigivaa, ‘Qinuisaarvigilaunnga, akililaaqpagit.’ 30Taanna anginngilaq tigujausimavingmullu pitippaa akiliksaminik akiliilaunnginningani. 31Pijiuqatingita tamanna takugamijjuk, quviasunngijjutigimmariliqpaat, angajuqqaamingnut upagutillutik uqautigivaat piniarnirijaujulimaanik. 32Tavva angajuqqaarjuap pijini itiqtitauquliqpaa; itirmat uqautivaa, ‘Piunngittualuujutit! Isumagijunnairvigilauqpagit qinuvigigavinga iluunnalimaanginnik uvannut akiliksarijarnik. 33Nikagusuktuksaulauraluaqputit pijiuqatingnut, suurluttauq nikagilaurakkit.’ 34Angajuqqaarjuaq tavva ninngaktualuuvuq, taanna tigujausimavingmuaqtautippaa, sugiaqtauqullugu akiliksarijaminik iluunnanginnik akiliilaunnginnilimaangani.

35“Taimaaktauq Ataatama qilangmiittuup piniarvigigajarivaasi ukpiqtuuqatissinnik isumagijunnairviqarnianngikkussi, uummatissinnit pijumik.”

Currently Selected:

Maatiusiup Aglangit 18: EAIBR

Highlight

Copy