Maatiusiup Aglangit 20
20
Pinasuaqtiit Piruqsiivingmi Uainiliksami
1“Guutiup Ataniuvinga ajjiqaqpuq angummik ullaammarikkut qiniriaqtumik inungnik pinasuaqtiksaminik paurganik uainiksauniaqtunik piruqsiiviqutimini. 2Pinasuaqtit angiqatigijariiramigit akiliutausuumik akilirumallugit, siulvirimik atausirmik ullumut atausirmut, tilivait paurganik uainiksauniaqtunik piruqsiiviqutimini pinasuariaqtuqullugit. 3Kinguningagut 9-muaqtillugu anigivuq, takulluni angutinik niuvirvingni nangituinnaqtunik pinasuagaksaqannginnamik. 4Tavva uqautivait, ‘Ilissittauq pinasuariaqtulirissi paurganik uainiksauniaqtunik piruqsiiviqutinnit, akilirniaqpassi akiliutauvaktutitut.’ 5Asuilaak taakkua pinasuariaqtuqput. Tavva kinguningagut taimaatsainnaq qiniriarivuq 12-muaqtillugu ullukkut, amma unnusakkut 3-muaqtillugu taimailiurivuq. 65-mualiqtilluguli niuvirvingmut aqqutimiittumuarivuq, takulluni angutinik tavvani nangituinnaqtunik. Taakkua apirivait, ‘Sungmat ullulimaaq tavvaniituinnaqpisi pinasuarasi?’ 7Taakkua kiuvaat, ‘Pinasugiaqtuqujauluta tilijaulaunnginnatta.’ Taassuma uqautivait, ‘Pinasuariaqtulirissi paurganik uainiksauniaqtunik piruqsiivingmi.’
8“Unnungmat piruqsiiviqutilik pinasuaqtinut angajuqqautitaminut uqaqpuq, ‘Pinasuaqtit qaiqulugit akililikkit akiliutausuumik, kingulliqpaullutik pinasuasigiaqqaujunit pigiaqqaarlutit sivulliqpauqqaujunut tikillugit.’ 9Angutit pinasuariasiqqaujut 5-nguliqtillugu, akiliqtauvut siulvirimik atausirmik atunit. 10Kinguningagut taakkua angutit sivulliqpaullutik tilijauqqaaqaujut akiliqtauliramik, anginiqsamik akiliqtauniarasugivut; atunilli tunisiviugivut siulvirimik atausirmik. 11Kiinaujaqtaamingnik pijariiramik uqaqattautiliqput naammaksaratik pinasuaqtitsijigijamingnik. 12Uqarlutik, ‘Ukua angutit kingulliqpaullutik tilijauqqaujut ikarramik atausituinnarmik pinasuarataaqtut, uvattititulluatuinnaq akiliqpatit! Uvagulli ullulimaaraluk pinasuaqtugut siqiniq uqquujualuutillugu’ 13taassuma nangminiliup piruqsiivingmik kiuvait, ‘Piqannarijakka silairrinngilassi; angiqatigiiqqaunngilagut ullulimaaq pinasuaqullusi siulvirimik atausirmik akiliqtauniarlusi? 14Akiliutigijaujut kiinaujaqtaasi pilusiuk angirralirissi; angut kingulliqpaulluni tiliqqaujara tunisivigijumavara ilissingnut akiliutigijama ajjinganik. 15Isumaqsuriaqanngilanga nangminiq kiinaujannik? Uvvalu ajjigiiktitsituinnarninnut pitsiaqtaunasugijunniiqpisi?’
16“Taimaimmat kingullit sivulliujumaaqput, sivullillu kingulliujumaaqput.”
Jiisusiup Tuqutauniksaminik Uqausiqarninga Pingajungannik
Maakusi 10:32-34; Luukasi 18:31-34
17Jiisusi Jiruusalimmuarnialirami, ilinniaqtini 12 aqqummit avalautillugit, pisukpallialutik uqautiliqpait taakkutuutillugit. 18“Takugit, Jiruusalimmualiqpugut; tavvani Inuup Irninga aittuutaulaaqpuq tunirrusiqtitsijit angajuqqaanginnut piqujaniglu ilisaijiujunut, taakkua tuqutaksannguqtilaaqpaat. 19Tunirrutigilaaqpaallu Juutiunngittunut, mitautigijauqullugu, tiigaqtuqtaulunilu kikiaqtuqtaulaaqpuq, ulluilli pingajuanni makilaaqpuq.”
Sipitiup Nuliangata Qinuninga
Maakusi 10:35-45
20Tavva Sipitiup nulianga Jiisusimuaqpuq irnirminik marruungnik ilaqarluni, saanganut ukuvuq, pijumajaminik uqarumalluni.
21Jiisusiup uqautivaa, “Sunamik pijumavit?”
Arnaq uqaqpuq, “Piqujilaurit angajuqqaarjuannguruvit ukuak irniikkak iksivaqulugik Ataniuvingni aippanga taliqpingni aippangalu saumingni.”
22Jiisusiup kiuvaak, “Apiqqusirijassingnik qaujimanngilasik, imiutimik imirniaqtannik imirunnaqpisik?”
Taakkuak kiuvaa, “Imirunnaqpavuuk.”
23Jiisusiup uqautivaak “Imirniaqtannit imirunnaraluaqpusik, kisianili taliqpinni sauminnilu iksivajuksanik uvanga initaaqtitsijunnanngilanga, Ataatama upalungaiqsimajanginnut kisiani iniksarijauvut.”
24Ilinniaqtit ilangit qulit tamatuminga tusaramik, taakkungninga nukariingnik akauksarunniiqput. 25Jiisusiup qaiqullugit uqautivait, “Qaujimavusi Juutiunngittut angajuqqaangit inuqutimingnut pijunnarniqarmata, tasiuqtingit suunguniqammariglutik. 26Ilissili akunnassinni taimailiuqattautijuksaunngilasi; nallisi angajuqqaangujumajuq ilissinnut pijigijaujuksauvuq; 27nallisilu akunnassinni sivulliqtiujumajuq taanna sialaarijaujuksauvuq. 28Inuup Irninga tikilaunngilaq pijitsiqtaujaqturluni pijitsiriaqturlunili, inuusirminiglu tunisiluni inuit amisut akiliijjutillunigit utiqtitaujjutiksanginnut.”
Jiisusiup Angutiingnik Marruungnik Tautuliqtitsininga
Maakusi 10:46-52; Luukasi 18:35-43
29Jiisusi ilinniaqtingillu Jirikuumit aullaliqtillugit, inugiaqturjuat maliksaqput. 30Takugit, angutiik marruuk tautunngittuuk aqqutiup saniani iksivajuuk, tusaqpuuk Jiisusiup aqqusaarninganik, tavva qaigalaaliqpuuk, “Taivitiup Irninga, naakkigitiguk!”
31Inugiaqturjuanit iniqtiqtauvuuk, nipiqaqujaunatik; taakkuagli nipiqquqtusikkannituinnarlutik#20:31 Nipiriksigiallatuinnaqpuuk qaigalaaliqpuuk, “Ataniq, Taivitiup Irninga, naakkigitiguk!”
32Jiisusi nuqqarluni taakkungninga qaiqujiliqpuq, uqarluni, “Uvannut qanuq pinasuarviujumavisi?”
33Taakkuak kiuvuuk, “Ataniq, ilingnut tautuliqtitaujumavuguk!”
34Jiisusiup nagligilirlugik ijingiktigut aktuqpaak; tavvainnaq takujunnaqsivuuk, Jiisusimik malilirlutiglu.
Currently Selected:
Maatiusiup Aglangit 20: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
