मूक चेलाकू 13

बरनाबास अरू साहूलराः एटाःगुः

1अंतकियाराः कलसियारे तोनोंग तोनोंग भगवानराः बड़रा कता होड़कू अरू चेडदार होड़कू होंकू दोहोना। हँकूराः ञाव दोहोना बरनाबास, निगर माःआन एटाः ञाव दोहोना हाँयग सिमोन, कुरेनरीग लुकियूस, हरदोस सुदा मिनी सउंगताकिन दोहोना हाँयग मनाहेम अरू साहूल। 2दो हँकू उपास घड़ीन परबूकू जाग मेला, सुद बिरुवा कतातेरा, “ईंग राःकेडकिना हना बुता एचे लगा बरनाबास अरू साहूलपे एटाःगोड।” 3दो हँकू जमाकू अरू उपास घड़ीनकू अरजीतेरा। हनते हँकू हँकिन बना होड़किन चोटरे तिःई खेपातेडखन भगवान हँकिने एटाःकेरा हना बुता एचे लगाकू वारगोतेडकिन।

पउलूस अरू बरनाबास सइपरास डुगूरे

4दो भगवानराः सुद बिरुवा हँकिन बना होड़ वारगोतेडकिन अरू हँकिन सिलुकिया सहर अगी तोराकिन अरू हना ततेर अते जहाजरे देगकियानखन सइपरास डुगु अगी तोराकिन। 5हँकिन सइपरास डुगुराः सलामीस सहररेकिन सोदोरनेन दो हँकिन हंडाःआ अरजी ओड़ाःरिकुःआ एहूदाकू एचेरे भगवानराः सरवनकिन परसार उदुःतेरा। एहुना#13:5 एहुनाराः एटाः ञाव दोहोना मरकूस।#मूक चेला 12:12,25 हँकिन सुदा संघरा होड़ इयाय दोहोना।

6हँकू हना डुगुराः एटाः एटाः ततेर पारनेनखन पाफूस सहर वरीकू सोदोरनेना। हंडा मी होड़ होड़ दोहोना। हाँयराः ञाव दोहोना बर-ईसू अरू उनानी भासीरे हाँयराः ञाव दोहोना एलीमास। हाँय एहूदा होड़े दोहोना अरू हाँय जादो होड़ अरू भगवानराः बड़रा लबराते कतायीग होड़े दोहोना। 7हाँय हना डुगुराः मरंगीग हातपात होड़ सिरगियूस पउलूसरीग सउंगताय दोहोना। हाँयग मरंगीग हातपात होड़ मुरुक कनहूनदार होड़े दोहोना अरू हाँय बरनाबास अरू साहूल अते भगवानराः सरवन अयूम लगा हँकिने एचे राःतेरा। 8दो हाँयग जादो होड़ हँकिने घंटावतेरा अरू हाँयग मरंग हातपात होड़ भगवानराः सरवन बिसवासगे अते रोंकावगेय लगाय चहाःआ।

9दो उनानी भासीरे पउलूस#13:9 नाःआ वरीते लूका साहूलराः उनानी ञाव पउलूस बदीरेय ओजाःगेतना। माःआनकू रगेयता हाँयग साहूल भगवानराः सुद बिरुवाते पेरेगनेनखन हाँयग जादो होड़े ञेलतेरा अरूय कतातेरा, 10“आम कलउरीग बेटात अरू जमा सताय कतारीग मुदइ हवे। आम जमा बरानाः लबरा अरू अडिग अकामते पेरेगतो इदानमेःआ। परबूराः बदीरे सनातायतो इदा हना कता एचे बदलावाडखन लबरा कता तुला अते तोरेम दोहोन। 11नुँहू परबू आमे डंडियावता। आम अंधा जुवाःता अरू तोनोंग बेला वरी बेर हों ओनोरोम ञेल अवेतेरा।”

हननमेला हाँयराः मेड अंदरायान अरू हाँय हना अगी नाःआ अगी तोनोंगीग हाँय तिःईरे साबकिडिगखन एचे सेनेगेय लगाय टमडाःआ। 12दो हना डुगुरीग मरंग हातपात होड़ सेरगियूस-पउलूस परबू ईसूराः चेडतो बदीरेय बयावयान। हनालगा हाँय नाःआ जमाकून ञेलतेडखन भगवानराः सरवनरेय बिसवासतेरा।

पउलूस अरू बरनाबास अंतकिया सहररे

13हनते पउलूस अरू आँयग सउंगताकू पाफूस अते जहाजते पंपुलिया छतरराः पिरगा सहररेकू सोदोरनेन। मनदो एहुना हँकिन अड़ाःतेडखन एरुसलेम सहर अगीय कुदायान। 14हनते हँकिन पिरगा अते पिसिदिया छतरराः अंतकिया सहररेकिन सोदोरनेना अरू लोड़ोनराः दिनरे एहूदाकूराः अरजी ओड़ाःरेकिन सेनेडा अरू हंडाकिन दुड़ुःयान। 15दो भगवानराः नियमकून अरू भगवानराः बड़रा कता होड़कूराः कागद अते बछावनेनखन तयोमरे हना अरजी ओड़ाःरिकुःआ हातपात होड़कू हँकिन एचेरे मी होड़ होड़तेकू एचे होंबोरतेडकिना, “ने वपक बोपोहकिन, नँकुःआ होड़कू कता-बहालकू लगा अबा एचेरे तोनोंगाः बड़रा कता लगा इदान दोबा कताय।” 16दो पउलूस चड़ाँनेना अरू हाँय अनँयग तिःईते होड़कू उदुःवाडखने कताया,

“ने इसराएल होड़कू अरू भगवानपे मान मरजइतगेता हँकुःआ बेगर एहूदाकू, अपे ईंगपे अयूम। 17इसराएल होड़कूरीग भगवान अलेरिकुःआ खुटिपरिया होड़कूय सुनावतेरा अरू हँकुःआ होड़कू मिसिरी देसरेकू दोहोन मेला भगवान हँकू मरंगे बड़ाँवतेडकुःआ अरू हाँय अनँयग मरंग जंगरते हँकुःआ होड़कू हना देस अतेय एचे अजइततेडकुःआ। 18हनते चालीस बरिस वरी टयंगाब ततेररे भगवान हँकूराः लूर-नेवने सहावतेरा। 19अरू कनान देसरिकुःआ सातगोटोंग जइत होड़कू लाय एंडातेडकूखन हना देस इसराएल होड़कू लगा भगवान हटिंगवातेडकुःआ। नाःआ जमाकून साड़हे चइर सव बरिसरे होयानेना।

20हना तयोमरे समुएल ञावीग भगवानराः बड़रा कतायीग होड़राः जूग वरी इसराएल होड़कूरीग राजा मेरेय दोहोगान। अरू भगवान हँकू लगा फड़ियावदारकूय एमेतेड। 21हना तयोमरे हँकुःआ होड़कू भगवान एचेरे मी होड़ अँकूरीग राजा होयाः लगाकू असेतेरा अरू भगवान हँकू लगा बिनियामीन गोतोरीग कीसरीग बेटात साहूले सुनावतिरिया अरू हाँय चालीस बरिस वरी हँकूरीग राजाय दोहोना। 22हना तयोमरे हाँय साहूल बदलारे इसराएल होड़कूरीग राजा, दाऊदे तुलातिरिया। हाँयग दाऊद बदीरे भगवान नाःआ हिदइत होंय एमेतेरा, ईंग ईंगराः ओंगोल इयायीग होड़ एसेरीग बेटात दाऊद सुदायिंग जुमावनेना।#1 समु 13:14 हाँय ईंगराः जमा ओंगोल इयाय एचेयता।#1 समु 16:1-13 23अरू हाँयग दाऊद राजारिकुःआ नइड़-बाँस होड़कू अते इसराएल होड़कू लगा, भगवान जबानतेरा हना इया, मी होड़ सडावदार ईसूय एमेतेरा।#एस 11:1-16 24ईसू वेग अते मड़ंग एहुना जमा इसराएल होड़कू एचेरे, हँकू कसूर अते जीव कुदाकेडखन, बतिसमाकू गोः लगाय परसारतेरा।#मती 3:1-6; मर 1:1-5; लूका 3:1-6 25दो एहुना आँयग सेवा चबागे मेलाय कतातेरा, अपे ईंग मसी हवे माःआनपे ओंगलेयिंगतना जा? बुरी, ईंग ना लवे। मनदो ईंग तयोमरेय वेगता हाँयगराः चाटीराः डोरा हों लड़ा जुकूर ईंग कोवायिंगा, माःआन।#मती 3:11; मर 1:7; लूका 3:17; एहु 1:27

26ने ईंगरिकुःआ वपक बोपोहकूतिंग, इबराहीमरिकुःआ नइड़-बाँस होड़कू अरू भगवानपे मान मरजइतता हँकुःआ जमा बेगर एहूदाकू, सडावबू लगा अबू एचेरे नाःआ सरवन भगवान वारकेरा। 27अरू एरुसलेमरेकू दोहोना हँकुःआ होड़कू अरू अँकूरिकुःआ मूक होड़कू ईसू, मसी हवे माःआन, मेरकू मनेवागडीग, अरू हँकू हाँयकू डंडियावतेरा दो, हँकू अरजी ओड़ाःरे लोड़ोनराः दिनरेकू बछाःता भगवानराः बड़रा कता होड़कूराः कताकू पूरावगोतेड। 28हाँय एचेरे तोनोंगाः कसूर मेर दोहोगान, हनारे हों हँकू पिलातूस एचेरे हाँय ञेड एंडागेय लगाकू असेतिरिया। 29हाँयराः बदीरे भगवानराः कागदरे ओजाःतो दोहोना हना जमाकून पुरावनेन दो, हँकू हाँय हना कुरूस अतेकू उतरावतिरिया, अरू लात मड़गटरेकू मंडावतिरिया। 30मनदो भगवान हाँय गोएगतो होड़कू अतेय जियाव रेमतिरिया, 31अरू हाँय सुदा गलील छतर अते, एरुसलेम सहर वरीकू वेजेडा हँकुःआ होड़कू एचेरेय, एचे ञेलयान। दो नुँहू हँकुःआ होड़कू, अबूरिकुःआ होड़कू एचेरे हाँयरिकुःआ हिदइतदार इदानकुःआ। 32भगवान अबूरिकुःआ खुटिपरिया होड़कू एचेरेय जबानतेरा हना जबान, हाँय ईसू गोएगतो होड़कू अतेय जियाव रेमकिरिगखन, अबू जूगरेय पुरावगोतेडा। 33ननानाः नपाय सरवन अपे एचेरे कता उदुःगे लगा, नंडा अलिंग वेगकिया। सेरेंगकून कागदराः बार नमार पाठरे ओजाःतो इदा, हनन इया नाःआ होयाकिया।

आम ईंगरीग बेटा हवे,

अरू तिसिंग ईंग आमरीग अपांगिंग बड़ाँवकिया।#सेरेंगकून 2:7

34भगवान हाँयग ईसू गोएगतो अतेय जियाव रेमकिरिया अरू तोनोंग मेला हाँय ओरोय सेयानेना। नाःआ कता बदीरे भगवान नाःआ इयाय कतातेरा,

ईंग दाऊद एचेरेयिंग जबानतेरा हना सुद अरू भरसागे इयाःआ जबान आम लगायिंग एमेयता।#एस 55:3

35अरू सेरेंगकून कागदराः एटाः पाठरे नाःआ इया ओजाःतो इदा;

आमरीग सुद होड़ ओरोम सेया ओवातिडिया।#सेरेंगकून 16:10

36दाऊद आँयग जूगरिकुःआ होड़कू भगवानराः ओंगोल इया सेवातेडकूखने गोएगनेना अरू हाँयराः मुरदा दो सेयायना। 37मनदो भगवान ईसूय जियाव रेमकिरिया। हनालगा हाँयराः मुरदा मेर सेयागान।

38हनालगा ईंगरिकुःआ अजी बोपोहकूतिंग, नाःआ कता अपे सुदीगे लगायिंग चहाःतना। नाःआ नपाय सरवनलिंग परसार उदुःगेतना, नाँयग होड़ ईसूते अपेराः कसूर भगवान बराव एंडागेता, 39अरू ईसू एचेरेकू बिसवासगेतना हँकुःआ होड़कू भगवान अनँयग ओंगोलरे बेगर गारबार होड़कूय बड़ाँवगोडकूता। मनदो मोसेस एमेतेरा हना नियम मनाःता अते तोनोंगीग होड़ बेगर गारबारीग होड़ हवे माःआन भगवान ओरोय ओंगोलतिरिया। 40भगवान आँयग बड़रा कतायीग होड़तेय कताया हनन इया अपेराः जीवरे अहा होयाः लगा अपे सवासितीपे दोहोन।

41ईंगपे एरांगवाता हँकुःआ होड़कू,

बयावकियानखन लाय जुवाःपे।

अपेराः जूगरे ईंग मीटोंग बुतायिंग एचेयता,

हना बुता बदीरे तोनोंगीग अपे एचेरेय कताय होले

अपे तोनोंग मेला ओनोरोपे बिसवासतेरा।”#हबु 1:5

42हनते पउलूस अरू बरनाबास हना अरजी ओड़ाः अते सेन मेला, होड़कू हँकिन दरवाःआ हना लोड़ोनराः दिनरे नाःआ कता अरूकिन परसार उदुःगे लगाकू कतातेरा। 43तयोमरे अदोम एहूदाकू अरू भगवानकू मान मरजइतता हँकुःआ बेगर एहूदाकू, एहूदा धरमरेकू बोलोनेना हँकुःआ होड़कू पउलूस अरू बरनाबासराः तयोम तयोमकू ओतोंग वेगा। दो हँकिन हँकू सुदाकिन बड़रानेन अरू कता-बहालतेडकूखनकिन कतातेड, “भगवान अपेय मयावारा, हनालगा हाँय एचेरेपे बिसवासगोड ञवन।”

44दो एटाःआ लोड़ोनराः दिनरे बरोबइर हना सहररिकुःआ जमा होड़कू परबूराः सरवन पउलूस अरू बरनाबास अते अअयूम लगाकू वेजेडा। 45मनदो अदोम एहूदाकू नाःआमिन होड़कूकू ञेला दो, हँकू इरातेकू पेरेगयान अरू पउलूस कतातेरा हना कताकून बदीरे ओपता घड़ीनकू कताया।

46दो पउलूस अरू बरनाबास डिनीड़ते हँकुःआ होड़कू एचेरेकिन कता कुदातेरा, “अलिंग अपे एहूदाकू एचेरे भगवानराः सरवन मड़ंगरे ककता दोहोना, मनदो अपे हना सरवनपे टड़ाव एंडाकेरा अरू नाःआते सुदीगोडतापे ओरो टुटीगनेना हना जीव लगा भगवान अपे मेरेय सुनावगाडपेःआ। नुँहू अलिंग बेगर एहूदाकू एचेरे भगवानराः नपाय सरवनलिंग कता उदुःता। 47परबू नाःआ कता अलिंग एचेरेय कता उदुःतेरा,

चउंदीसरिकुःआ जमा होड़कू एचेरे भगवान होड़कूय सडावता माःआनमे कता उदुः लगा,

बेगर एहूदाकू एचेरे हँकू लगा मरसल इया आमिंग वारमेतना।”#एस 49:6

48नाःआ कता बेगर एहूदाकू अयूमतेरा दो हँकू मुरुककू बहालयान अरू परबूराः सरवनकू मान मरजइतकेरा। भगवान ओरो टुटीगनेना हना जीव पवाः लगाय ओंगोल दोहोतेरा, हँकुःआ जमा होड़कू हना सरवनकू बिसवासतेरा।

49दो हनन इया हँकुःआ बिसवासी होड़कू भगवानराः सरवन जमा छतररेकू परसारगोड ञवना। 50मनदो एहूदाकू हना सहररिकुःआ मरंग मरंग होड़कू अरू भकतीनकू दोहोना अदोम गिरहत अइमीकू, पउलूस अरू बरनाबास बदीरेकू एचे रीसवाकुःआ। हँकुःआ होड़कू पउलूस अरू बरनाबास बदीरे कड़ीगकू एचे रेमतेरा अरू हँकूराः सिमान अतेकू एचे उडुंगगोतेडकू। 51हनालगा हँकिनाः होड़किन अँकिनराः काट अते धुंदराकून कोटा एंडागोतेडखन इकुनियुम सहर अगी तोराकिन। 52मनदो अंतकियारिकुःआ चेलाकू भगवानराः सुद बिरुवाते पेरेगतोकू दोहोना अरू हँकू मुरुक बहालतेकू दोहोना।

Currently Selected:

मूक चेलाकू 13: kfp

Highlight

Copy