मती 25

धंगड़ीकूराः अउल-तउल कहड़ी

1“भगवानराः राइज अँनकूराः ढिबरीकून गोःकेडखन बरवा सुदा जुमाः लगाकू उडुंगनेना हँकुःआ दसगोटोंग धंगड़ीकू इया इदा। 2हँकू अते पाँचगोटोंग धंगड़ीकू तुंदड़ीकू दोहोना अरू पाँचगोटोंग धंगड़ीकू कनहूनदारकू दोहोना। 3तुंदड़ी धंगड़ीकू अँकूराः ढिबरी सुदा सुनुम मेरकू गोःगाड, 4मनदो कनहूनदार धंगड़ीकू अँकूराः ढिबरी सुदा बगरा सुनुम होंकू गोःतेरा। 5बरवा वेग लगाय कुबेरगोतेड दो, जमा धंगड़ीकू दड़ुम घड़ीनकू अपीगा।

6मनदो हटिंग बरा रइतरे मुरुक सटीते खिररीकू अयूमतेरा, बरवा वेग लगा इदानिया। हाँय सुदा जुमाः लगा उडुंग वेगपे, माःआन।

7हनते जमा धंगड़ीकू रेमनेनखन अँनकूराः ढिबरीकूनकू सोझावतेरा। 8दो हँकुःआ तुंदड़ी धंगड़ीकू कनहूनदार धंगड़ीकू एचेरेकू कतातेरा, अपेराः सुनुम अते गुनमिन अले लगापे एमेय। अलेराः ढिबरीकून इड़ीगगुःतना।

9दो कनहूनदार धंगड़ीकू कतातेरा, होनायाःकून करे अबू जमाकू लगा सुनुम ओरो पुरावनेना। हनालगा अपे बजाररे सेनेकियानखन अँननपे लगापे किजा अगूय।

10दो हँकुःआ पाँचगोटोंग धंगड़ीकू सुनुम किजा लगाकू सेनेडा। हनमेला बरवा बियाह लगाय वेजेडा। अरू सपड़ावतोकू दोहोना हँकुःआ धंगड़ीकू हाँय सुदा बियाह भोजकू संजोड़ दोहोतेरा हना ओड़ाःरेकू बोलोयान। हनते हना ओड़ाःराः दुवार सेवकियाकू सींगगोतेडकू।

11तयोमरे एटाः धंगड़ीकू हों सोदोरनेनखनकू कतातेरा, ने परबू, ने परबू, अले लगा दुवार गिनिगगोडमे।

12मनदो हाँय कता कुदातेरा, अपे ईंगपे अयूम, ईंग अपे मेरिंग सुदीपेतना।

13हनन इया अपे हों ईंगराः कुदा वेगराः बेला मेरपे सुसुदीतना। हनालगा जगलेपे दोहोन।”

सेवकियाकूराः अउल-तउल कहड़ी

(लूका 19:11-27)

14“अरू भगवानराः राइज लंका देस सेन मेला अनँयगरिकुःआ सेवकियाकू राःतेडखन अनँयगराः आन-धान हँकूय जिमावातेरा हाँयग गिरहत होड़ इया इदा। 15हाँय मेमेड होड़ एचेरे हँकू एचे अवेयता हनामिने एमेवातेडकुःआ। मी होड़ एचेरे पाँचटोंग सोनाराः रिचकी ढिबुवा, अरू मी होड़ एचेरे बारटोंग सोनाराः रिचकी ढिबुवा अरू एटाः मी होड़ एचेरे मीटोंग सोनाराः रिचकी ढिबुवाय एमेवातेडकुःआ। हनते हाँय लंका देस तोराय। 16पाँचटोंग सोनाराः रिचकी ढिबुवाय पवावनेना हाँयग होड़ सेनेडखन फेरवइत घड़ीन अरू पाँचटोंग सोनाराः रिचकी ढिबुवाय पुंजियावतेरा। 17हनन इया बारटोंग सोनाराः रिचकी ढिबुवाय पवावनेना हाँयग होड़ हों सेनेडखन अरू बारटोंग सोनाराः रिचकी ढिबुवाय पुंजियावतेरा। 18मनदो मीटोंग सोनाराः रिचकी ढिबुवाय पवावनेना हाँयग होड़ सेनेडखन आँयगरीग मालिकराः हना रिचकी ढिबुवा ओतरे ओकोकेडखने दोहोगोतेड।

19मुरुक दिन तयोमरे हँकुःआ सेवकियाकूरीग मालिक ओड़ाःए कुदा सेनेडा अरू सेवकियाकू अते आभाय गोःतेरा। 20पाँचटोंग सोनाराः रिचकी ढिबुवाय पवावनेना हाँयग होड़ हनामिन ढिबुवा होंय अगूतेरा अरू मालिक एचेरेय कतातेरा, ने मालिक, आम ईंग एचेरे पाँचटोंग सोनाराः रिचकी ढिबुवाम जिमावातेरिंगा। ञेलमे ईंग फेरवइत घड़ीन अरू पाँचटोंग सोनाराः रिचकी ढिबुवायिंग बुता पुंजियावकेरा।

21दो मालिक कता कुदातेरा, नपायमे एचेकेरा, ईंगरीग बिसवासगेयीग अरू नपाय सेवकिया। आम गुनमिन कतारे बिसवासगेयीगमे दोहोना। दो ईंग मुरुक कताकूनराः जिमेवारीयिंग ओवामता। आमरीग मालिक सुदा आम होंम बहाल जुवाः।

22बारटोंग सोनाराः रिचकी ढिबुवाय पवावनेना हाँयग होड़ होंय वेजेडा अरूय कतातेड, ने मालिक, आम ईंग एचेरे बारटोंग सोनाराः रिचकी ढिबुवाम जिमावातेरिंगा। ञेलमे ईंग फेरवइत घड़ीन अरू बारटोंग सोनाराः रिचकी ढिबुवायिंग बुता पुंजियावकेरा।

23दो मालिक कता कुदातेरा, नपायमे एचेकेरा, ईंगरीग बिसवासगेयीग अरू नपाय सेवकिया। आम गुनमिन कतारे बिसवासगेयीगमे दोहोना। दो ईंग मुरुक कताकूनराः जिमेवारीयिंग ओवामता। आमरीग मालिक सुदा आम होंम बहाल जुवाः।

24हनते मीटोंग सोनाराः रिचकी ढिबुवाय पवावनेना हाँयग होड़ वेजेडा अरूय कतातेड, ने मालिक, ईंग सुसुदीतना, आम मी होड़ कटराहा होड़ इदानमेःआ। आम मेरेम वेरगरा हनाम ईरता अरू मेरेम लेवागरा हनातेम गरोम ठुड़ीगेता। 25हनालगा ईंग आमिंग बोरोवातेरा अरू सेनेडखन आमराः रिचकी ढिबुवा ओतरेयिंग ओकोगोतेड। ञेलमे, आमराः जिनिसिंग अगूकेरा। नामे।

26दो हाँयग मालिक कता कुदातेरा, ने बेनेलूर अरू कुड़ही सेवकिया। आम सुसुदीतना ईंग मेरिंग वेरगेता हनातेयिंग ईरता अरू मेरिंग लेवायता हनातेयिंग गरोम ठुड़ीगेता, माःआन। 27हनन इया इदान दो आम ईंगराः ढिबुवा पुंजियावगे लगा तोनोंगीग एचेरे चिला लगा मेरेम एचे पुंजीगाड?

28दो नुँहू नाँय अते हना ढिबुवा गोः अरू दसगोटोंग सोनाराः रिचकी ढिबुवा इदा हाँयग होड़मे एमेवा। 29तोनोंगीग एचेरे कहिसाः इदा, दो हाँयके भगवान अरूय एमेवायता। अरू हाँय एचेरे मुरुक बगरा होया जुवाःता। मनदो तोनोंगीग एचेरे कहिसाः मेर दोहोन, दो हाँय एचेरे गुनमिन हों इदा हना हों हाँय अते भगवान गोःयाता। 30दो नाँयग बेगर लूर सेवकिया होड़ बहरी अंदरारेपे रेमगे एंडागोडेय। हंडा होड़कू इयाम घड़ीन तिरिंगकू कड़रावगोड ञवनता।”

भेड़ाकू अरू मेरोमकूराः अउल-तउल कहड़ी

31“मनुवारीग बेटात मरंग राजा इया सेरमो देसरिकुःआ बराहीलकू सुदाय वेगता हनमेला, हाँय अनँयगराः गदीरे भगवानराः हातपाततेय दुडुःता। 32जमा जइत होड़कू हाँय मड़ंगरेकू जुमाःता। हनते हाँय मी होड़ सरवाहा, मेरोमकू अते भेड़ाकूय हिगारकूता हनन इया होड़कूय हिगारता। 33हाँय भेड़ाकू इया होड़कू अनँयग खउना तिःई गतररेय एचे चड़ाँकूता अरू मेरोमकू इया होड़कू अनँयग डिरही तिःई गतररेय एचे चड़ाँकूता।

34हनते हाँयग मरंग राजा हाँयराः खउना तिःई गतररेकू चड़ाँनता हँकुःआ होड़कू एचेरेय कतायता, दबूपे, ईंगरीग अपांग भगवान अपेराः जीवे नपायगोतेडा। चउंदीसराः बुँहड़ीन अते भगवान अपे लगाय सपड़ाव दोहोकेरा हना इताडपे पवाः। 35ईंग रंगेगतोयिंग दोहोना अरू अपे जोम लगापे एमेवातेरिंगा। ईंग ततंगतोयिंग दोहोना अरू अपे ईंग ञूय लगापे एमेवातेरिंगा, ईंग दुरीन देसरीग होड़िंग दोहोना अरू अपे ईंगपे नेत-नेवारतेरा। 36ईंग एकेतेयिंग दोहोना अरू तुसिंग लगा सोनहेपे एमेवातेरिंगा। ईंग हसूरेयिंग दोहोना अरू अपे ईंगपे तिहा हड़ाःतेरा। ईंग जेहेलरेयिंग दोहोना अरू अपे ईंग ञेल लगापे वेजेडा।

37हनमेला बेगर गारबार होड़कू हाँय एचेरेकू कता कुदायता, परबू, अले आम रंगेगतो तुमिसले ञेलतेडमेःआ अरू जोम लगा तुमिसले एमेवातेडमेःआ, अरू ततंगतो तुमिसले ञेलतेडमेःआ अरू ञूय लगाले एमेवातेडमेःआ? 38आम दुरीन देसरीग होड़ इया तुमिसले ञेलतेडमेःआ अरूले नेत-नेवारतेडमेःआ अरू एकेतेम दोहोना अरू तुसिंग लगा सोनहे तुमिसले एमेवातेडमेःआ? 39आम हसूरे सहे जेहेलरेम दोहोना माःआन तुमिसले तिहातेडमेःआ अरू आम ञेल लगाले सेनेडा?

40हनमेला मरंग राजा कता कुदायता, अपे ईंगपे अयूम। अपे ईंगरिकुःआ तोनोंगीग हुडिंगीग अजी बोपोहकू सुदा जे हों सकालाःपे एचेकेरा हना ईंग लगापे एचेकेरा।

41हनते दिरही तिःई गतररिकुःआ होड़कू एचेरेय कतायता, ने सती-सरापतो होड़कू, मड़ंग वरीते कलउ अरू हाँयरिकुःआ बराहीलकू लगा संजोड़तो इदा अरू कहियो ओरो इड़ीगनेना हना संगेलरेपे सलाव जुवाः। 42ईंग रंगेगतोयिंग दोहोन मेला अपे जोजोम लगा मेरपे ओवागडिंग। ईंग ततंगतोयिंग दोहोन मेला अपे ञूय लगा दाः मेरपे ओवागडिंग। 43ईंग दुरीन देसरीगिंग दोहोना दो, अपे मेरपे नेत-नेवारगडिंग। ईंग एकेतेयिंग दोहोना दो, अपे तुसिंग लगा सोनहे मेरपे एमेवागडिंग। ईंग हसूरे अरू जेहेलरेयिंग दोहोना। मनदो अपे ईंग एचेरे मेरपे वेगगान।

44हनते हँकुःआ होड़कू कतावायता, ने परबू, अले आम तुमिस रंगेगतो सहे ततंगतो सहे दुरीन देसरीग होड़ इया सहे एकेते सहे हसूरे सहे जेहेलरेले ञेलतेडमेःआ अरू आम मेरले सेवागाडमेःआ? माःआन।

45दो राजा हँकूय कता कुदावाता, अपे ईंगपे अयूम! अपे ईंगरिकुःआ अजी बोपोहकूतिंग अते हुडिंगीग सुदा जे हों सकालाः मेरपे एचेगरा हना ईंग लगा मेरपे एचेगरा।

46दो नँकुःआ होड़कू ओरो टुटीगनेना हना कटसियाकू पवाःता। मनदो बेगर गारबार होड़कू ओरो टुटीगनेना हना जीवकू पनावाःता।”

Currently Selected:

मती 25: kfp

Highlight

Copy