मरकूस 12

बेलूर किसाड़ होड़कूराः अउल-तउल कहड़ी

(मती 21:33-46; लूका 20:9-19)

1हनते ईसू, होड़कू एचेरे मीटोंग अउल-तउल कहड़ीय कताया, “मी होड़ अंगूरराः बगइचाय लगावतेरा अरू हनाराः चइरो गतर भीटे रेमतेरा अरू अंगूरराः रस लेन लगा मीटोंग चटइन कोटेग कोटेगे लाः बोलोतेरा अरू मीटोंग उनुसूल अगुरा मसाय तुलातेरा। हनते हाँय अधियादारकू एचेरे अधिया एमे अटूवाडखन एटाः देस तोराय।

2हना तयोमरे जोःराः बेला, हाँय अधियादारकू एचेरे आँयग बंटा गोः लगा मी होड़ हड़वाहातेने वारतेरा। 3मनदो हँकुःआ अधियादारकू हाँयग हड़वाहातेन साबकेडखनकू ञेडतिरिया अरू सदा तिःईतेकू वार कुदागोतेडीग। 4हनते हाँय मी होड़ हड़वाहातेन अधियादारकू एचेरे अरूय वारतिरिया। दो हँकू हाँयराः बोःकू लुटीग फड़ातेरा अरूकू बिंदरी बिनासगोतेडीग। 5हना तयोमते हाँय अरू मी होड़े वारतेड। दो हँकू हाँयकू ञेड गोएगगोतेडीग। अरू हाँयग मालिक मुरुक बगरा होड़कूय वारतेरा। दो अधियादारकू अदोमकूकू लुटीगतेडकुःआ अरू अदोमकूकू ञेड गोएगगोतेडकू।

6टुटीगरे मिनी होड़ हाँयरीग दुलार बेनेटात एकला बनसावनेना। अरू हाँय नाःआ ओंगोलतेडखने वारतिरिया, हँकुःआ होड़कू ईंग बेटाकू मान मरजइतता।

7मनदो अधियादारकू अँननकू अँकू कता होड़ेंगा, ननाँय इताड गोःयीग होड़ हवे। दबूपे, नाँयबू ञेड एंडा। हनते नाःआ जमा अँननबूराः होया जुवाःता। 8अरू हँकू हाँय साबतिडीगखनकू ञेड गोएग एंडागोतेडीग अरू हाँयराः मुरदा अंगूर बगइचाराः बहरीकू तेके एंडागोतेड।”

9हनते ईसू होंबोरतेड, “अपे चेले माःआनपे ओंगलेता, अंगूर बगइचारीग मालिक हँकू करा इयाय करेगकूता? हाँय वेगकियानखन अधियादारकूय ञेड एंडाकूता अरू हना अंगूर बगइचा एटाः होड़कूय ओवागोडकूता। 10अपे भगवानराः कागदरे नाःआ कता मेरपे बछावगना जा,

ओड़ाः तुला मिसतिरीकू ओरो बड़ाँवनेना, माःआनतेकू चलाः एंडातेरा,

हनानाः दिरि जमा दिरिकून अते ननपाय दिरि होयानेना?

11नाःआ दो परबू अगीते होयाकिया

अरू अबू बयावयनाबू।”#12:11 नाःआ अउल तउल कतारे एहूदा मूक होड़कू ओड़ाः तुला मिसतिरीकू हवे अरू ईसू दिरि हवे। #सेरेंगकून 118:22,23

12मूक पुजउरी अरू नियम चेडदार होड़कू अरू एहूदा मूक होड़कू सुदीगोतेडकू, ईसू अबू बदीरे नाःआ कहड़ीय कताकेरा, माःआन।#12:12 किसाड़ होड़कूराः अउल-तउल कहड़ीरे (1-9) चइरगोटोंग होड़कू बदीरे ईसू कतायतना; मालिक, अधियादारकू, हड़वाहाकू अरू बेटात। दो नाःआ अउल-तउलरे मालिक भगवान हवे, हड़वाहाकू भगवानराः बड़रा कता होड़कू हवे, बेटात ईसू मसी अरू अधियादारकू एहूदा मूक होड़कू हवे। हनालगा हँकू हाँय साबगेय लगाकू ओंगोलतेरा। मनदो हँकू ईसू साब अते होड़कूकू बोरोवाःआ अरू हँकू हाँय अड़ाःवडीगखन तोराकू।

कइसर राजा एचेरे मलगुजारी एमेराः बदीरे

13तयोमते एहूदा मूक होड़कू ईसू दाः लगा, फरीसी होड़कू अरू हरदोसरिकुःआ होड़कू हाँय एचेरेकू वारतेडकुःआ। 14हँकू ईसू एचेरे वेगकियानखनकू कताया, “ने गुरुजी अले सुदीयतनाले, आम होड़कू जहंडाव होड़ ना लवे। हनालगा आम तोनोंगीग होड़ आम ननायगे लगा मेरेम एचेयतना। मनदो भगवानराः सताय दूरमे उदुःवाकूता। दो अले उदुःवालेमे आम चेले माःआनमे ओंगलेतना? कइसर राजा एचेरे मलगुजारी एमेवाय लगा नपाय इदा जा कोवान? 15अबू एएमे इदा जा कोवान?”

दो ईसू हँकूराः पचघुचिया सुदीवाडखन हँकू एचेरेय कताया, “अपे चिला लगापे अंदजावगींगतना? मीटोंग चाँदीराः रिचकी ढिबुवा ईंग एचेरेपे अगूय। ईंग हनायिंग ञेलता।”

16दो हँकू हना चाँदीराः रिचकी ढिबुवाकू अगूतेरा अरू ईसू हँकू एचेरेय कतातेरा, “नाःआ रिचकी ढिबुवारे इयेराः मुरइत इदा अरू इयेराः ञाव ओजाःतो इदा?”

हनते हँकू कतातेरा, “मरंग राजा कइसरराः मुरइत अरू हाँयराः ञाव इदा।”

17दो ईसू कतातेड, “मरंग राजा कइसरराः हवे हना हनाँयपे ओवा अरू भगवानराः हवे हना भनगवानपे एमेवा।”

दो हँकू हाँयराः कतारेकू बयावयान।

जियाव रिमुः बदीरे सवाल

(मती 22:23-33; लूका 20:27-40)

18सदूकी होड़कू कतायता, गोएगतो होड़कू मेनेरकू जियाव रिमुःता, अरू हँकू ईसू एचेरे वेगवाडखनकू होंबोरतेरा, 19“ने गुरुजी, मोसेस भगवानराः कागदरे अबू नाःआ उड़ी एचेगे लगाय ओजाःकेरा, तोनोंगीग होड़ बियाहकिडीगखन हाँय बेगर लँइगतेय गोएगनेना दो गोएगयनाय हाँयरीग बोहोत रंडियाहीने सगइ अरू गोएगतो वगात लगा लइंगकिन जनमाव। #दो. नि. 25:5 20दो मीटोंग गाँवरे सात वगीयाकू दोहोना। मरंगीग वगातकू बियाहतेडखन लँइग अरीन होयाःतेय गोएगयान। 21हनते हाँयग रंडियाहीन हुडिंगीग सगइतिरिया अरू तयोमते हाँय होंय गोएगयान। हनन उड़ी हाँयते हुडिंगीग लगा हों होयानेना। 22हनन उड़ी सात वगीयाकू बेगर लँइगतेकू गोएगयान। हँकू देहोरते अइमी होंय गोएगयान। 23हाँय अइमी छोगोटोंग होड़कू सुदाय सगइनेना दो हाँय जियाव रिमुः मेला हँकुःआ सातगोटोंग होड़कू अते इयेरीग अइमी होयाःता?”

24दो हँकू एचेरे ईसू कताया, “अपे भगवानराः सरवन अरू हाँयराः जंगर मेरपे बुझाः अते अपे गारबाररे इदानपेःआ। 25गोएग जुवाः हना तयोमरेकू जियाव रिमुःता हँकुःआ होड़कूराः बियाह ओरो होयानेना अरू बियाहगुः लगा हँकू ओरोकू एमेतेडकुःआ। हँकू सेरमो देसरिकुःआ बराहीलकू इयाकू दोहोनता। 26गोएगतो होड़कूराः बदीरेयिंग कतायता, मोसेस ओजाःतेरा हना कागदरे भगवान हाँय सुदा सलगावतो बुदारेय बड़रानेना हना मेरपे बछावगना जा? हनमेला भगवान मोसेस एचेरेय कतातेड, ईंग इबराहीमरीग, इसहाकरीग अरू एकूबरीग भगवान इदानिंगा।#एचे उडुंग 3:6 27भगवान गोएगतो होड़कूरीग भगवान ना लवे मनदो जीयत होड़कूरीग भगवान इदानिया अरू अपे मुरुक गारबाररे इदानपेःआ।”

जमाकून अते मरंग हुकुम

28हनमेला नियम चेडदार होड़कू अते मी होड़ हंडाय दोहोना। ईसू सदूकी होड़कू एचेरे नपायतेय कता कुदातेरा। हनालगा हाँय ईसू एचेरे वेगेकियानखने होंबोरतेरा, “ने गुरुजी, जमाकून अते मरंग हुकुम चेले माःआन इदा?”

29दो ईसू हाँय एचेरेय कतातेड, “जमा हुकुमकून अते नाःआ मरंग इदा।

ने इसराएल होड़कू, अयुमेपे।

अबूरीग भगवान मिनीटोंग भगवान इदानिया।

30अरू अपे अपेरीग परबू भगवान, जमा ओंगोलते, जमा जीवते,

जमा इंदरीते अरू जमा जंगरतेपे दुलारगेय,#दो. नि. 6:4,5

31अरू एटाः हुकुम ननानाः हवे, आमरीग परुसी अनम इयाम अलार-दुलारगेय।”#लेवी 19:18

32दो नियम चेडदार होड़ ईसू एचेरेय कतातेरा, “गुरुजी, आम सतायमे कताकेरा। भगवान मिनीटोंग इदानिया अरू हाँय अते एटाः तोनोंगीग भगवान कोवाया। 33अरू अपेरीग परबू भगवान, जमा जीवते, जमा जंगरते अरू जमा कनहूनतेपे दुलारगेय अरू आमरीग परुसी अनम इयाम अलार-दुलारगेय, दो भगवान लगाकू एमेयता हना जमा बरानाः बलिदानकून अते अगम मइद इदा।”

34हाँयग होड़ ओंगोलतेडखने कतातेरा हना अते ईसू हाँयग होड़ एचेरेय कतातेरा, “ने सउंगता, आम भगवानराः राइज अते तोरे कोवामेःआ।” हना तयोमते तोनोंगीग होड़ ईसू एचेरे कहिसाः होंबोर लगा मेरकू डीड़गाड।

मसी इयेरीग बेटात हवे?

35हनते ईसू भगवानराः ओड़ाःरे होड़कू चेडतेडकूखने कतातेरा, “नियम चेडदार होड़कू करा इयाकू कतायता, मसी, दाऊद राजारीग नइड़-बाँस बेटात हवे, माःआन? 36दो दाऊद अनँयग आँयग सुद बिरुवाते पेरेगनेनखने कतातेरा,

भगवान ईंगरीग परबू एचेरेय कतातेरा,

ईंग आमरिकुःआ मुदइ होड़कू हरुवावकेडकूखन

आमराः काट चोडुः लगा अरीनिंग तुलाकू वरी

ईंगराः खउना तिःई गतर दुडुःकियानखन आम ईंग सुदाम राइजकू।#सेरेंगकून 110:1

37दनाऊद राजा हाँय, परबू माःआने कतावायता दो हाँयरीग नइड़-बाँस बेटात करा उड़ीय होयाः?”

हंडाकू दोहोना हँकुःआ मुरुक बगरा होड़कू हाँयराः कता मुरुक बहालतेकू अयुमेःआ।

38दो ईसू होड़कूय चेड मेला हँकू एचेरेय कतातेरा, “नियम चेडदार होड़कू अते सवासितीपे दोहोन। हँकू तोलोंग तोलोंग सोनहे तुसिंगकेडखन जमा होड़कू ञेलले माःआनते जमा होड़कूराः मड़ंग मड़ंगकू सेनता। बजाररिकुःआ होड़कू जमाकू अलेकू सलामकेःआ माःआनकू चहाःता। 39हँकू अरजी ओड़ाःरे अरू जोम लगाकू राःता हँकू ओड़ाःरे मइद ततेररे दुड़ुः लगाकू चहाःता। 40रंडियाहीनकू एचेरेकू अडिग जोमता। होड़कू उदुःवाकू लगा हँकू मुरुककू अरजीता। भगवान हँकुःआ होड़कू मुरुके डंडियावकूता।”

रंडियाहीनराः दसिना

41भगवानराः ओड़ाःरे ढिबुवाकून सोलोंग लगा दसिना बकसाकून दोहोना। हंडा ईसू दुड़ुःनेनखने ञेञेला, होड़कू भगवान ओड़ाःराः दसिना बकसारे ढिबुवाकून करा इयाकू सोलोंगेता। गिरहत होड़कू हना बकसारे मुरुक बगरा ढिबुवाकूनकू सोलोंगतेरा। 42मी होड़ गरीब रंडियाहीन वेगवाडखन हना दसिना बकसारे हुडिंग किमइतराः बारटोंग हुडिंग हुडिंग रिचकी ढिबुवाय सोलोंगतेरा। 43दो ईसू आँयग मूक चेलाकू राःतेडखने कतातेरा, “अपे ईंगपे अयूम, नाँयग गरीब रंडियाहीन एटाःकू अते बगरा नाःआ दसिना बकसारेय सोलोंगकेरा। 44गिरहतकू एचेरे बगरा दोहोनता अरू हना अते हँकू अदोम ढिबुवाकूनकू सोलोंगकेरा। मनदो नाँयग रंडियाहीन एचेरे दोहोना हना जमा ढिबुवाकूने सोलोंगकेरा। नाँय आँयगराः जमा आन-धाने सोलोंगगोतेडा।”

Currently Selected:

मरकूस 12: kfp

Highlight

Copy