मरकूस 13

चउंदीस टुटीगगुःराः चिनहाकून

(मती 24:1-28; लूका 21:5-24)

1भगवानराः ओड़ाः अते ईसू आँयगरिकुःआ चेलाकूतेन सुदाय उडुंगकुःआ, हनमेला हँकू अते मी होड़ चेलातेन हाँय एचेरेय कतातेरा, “ने गुरुजी, ञेलमे नाय नपाय दिरिकून अरू नाःआ मरंग मरंग ओड़ाःकून तुमिन नपाय इदा।”

2दो ईसू हाँय एचेरेय कतातेरा, “आम नाःआ मरंग मरंग ओड़ाःकूनमे ञेलतना? नंडा मीटोंग दिरि हों एटाः दिरि सेरमो ओरो दोहोनेना। जमाकून कसड़ लोजोरगोडतकू।”#13:2 ई. त. 70 रे रूमी देसरिकुःआ सइना होड़कू एरुसलेम सहररेकू वेजेडखन भगवानराः ओड़ाः होंकू कसड़ लोजोर एंडागोतेडा। हनमेला ईसूराः नाःआ कतत सरवन पुरावयना।

3ईसू भगवान ओड़ाःराः मड़ंग तोरेरे जइतून पहाड़रेय दुड़ुःकुःआ। हनमेला पतरस, एकूब, एहुना अरू अंदरियास हाँय एचेरे सेनेवाडखनकू होंबोरतिरिया, 4“ने गुरुजी आम उदुःवालेमे, नाःआ कता तुमिस होयाःता? अरू नाःआ होयाःता हनाराः चिनहा करा इया दोहोनता?”

5दो ईसू हँकू एचेरेय कताया, “तोनोंगीग अपे अहाकू बहकाव अवेपे लगा सवासितीपे दोहोन। 6मुरुक होड़कू ईंगराः ञावते अपे एचेरेकू वेगता अरूकू कतायता, ईंग हनाँय हवे। अरू हँकू मुरुक होड़कूकू अडिगकूता। 7अपे एटाः एटाः देसरे लड़ाइ होयाःराः बदीरेपे अयुमे दो, अलोपे बोर। नाःआ इयाःआ लड़ाइ मड़ंगरे होनोयाः लगा इदा। मनदो हनमेला टुटीगगुःराः बेला कोवानेःआ। 8जइत जइतरिकुःआ होड़कू अरू देस देसरिकुःआ होड़कू अँननकू अँकू लड़ाइता। एटाः एटाः ततेरराः ओत डोलाःता अरू कतकाल हों होयाःता। नाःआ जमाकून, लँइग होयाः मेला हसू बुँहड़ीनता हना इया चउंदीस लुलिगगुःराः बेलारे होयाःता।

9हनमेला अपे जगलेपे दोहोन। तोनोंग तोनोंग होड़कू पंचाइतरेकू साब इदीपेता अरू अरजी ओड़ाःरे अपेकू एचे ञेडपेता। ईंगराः ञाव बदीरे राजाकू अरू हातपात होड़कू मड़ंगरे अपेकू एचे चड़ाँपेता। अपे हनमेला हँकू मड़ंगरे ईंगरिकुःआ हिदइतदारकूपे होयाःता। 10नाःआ इया जमा होयाः अते मड़ंग ईंगराः नपाय सरवन जमा जइत होड़कू एचेरे उउदुः लगा इदा। 11अपे दरबाररेकू साब इदीपेता हनमेला अपे अलोपे ओंगोल दोहोगे, ईंग चेले माःआनिंग कतायता। हनमेला भगवान उदुःवापेता हना कतापे बड़रा। अपे कतायता हना अपेराः बड़रा ओरो दोहोनेना, मनदो सुद बिरुवाराः बड़रा दोहोनता।

12वगात अनँयग बोहोत अरू अपात अनँयग बेटा ञेड एंडा लगाकू इदीता। लइंकू अँननकूरिकुःआ एंगात अपातकू हिनइस-बिनइसवाता अरू हँकूकू एचे ञेड गोएगगोडकूता। 13ईंगराः ञाव अते जमा होड़कू अपेकू हिनइस-बिनइसवाता। मनदो अरीन टुटीगगुः वरी सनाहाव ञवनता हनाँयग होड़ भगवान सडावगेयता।

14मुरुक बेलूर जिनिस, दोहोन लगा कोवानेःआ हंडापे ञेलता दो नाःआ बछाःता हाँय बुझाः लगा इदा। हनमेला एहूदिया छतररे इदानकुःआ हँकुःआ होड़कू पहाड़ अगीकू ञिञीर लगा इदा।#दानि 9:27; 11:31; 12:11 15सड़ुम सेरमोरे इदानिया हाँयग होड़ हंडा अते उतरावकियानखन अनँयग ओड़ाःरेय बोलोकियानखन तोनोंग जिनिस अलोय गोः। 16अरू दोहोड़रे इदानिया हाँय आँयग सोनहे अगू लगा अलोय कुदान। 17हना दिनकूनरे उड़सी अइमीकू अरू दुदू एचे ञू अइमीकू लगा मुरुक कटसिया होयाःता। 18नाःआ इया ररंग बेलारे अहा होयाः लगापे अरजीगे। 19हना बेलारे ओतरिकुःआ होड़कू लगा मुरुक सिकिसता होयाःता। भगवान ओते तुलाकेरा हना वरीते हना बेलारे होयाःता हना इयाःआ सिकिसता मेर होयागना अरू मड़ंग अगी हों नाःआ इया सिकिसता ओरो होयानेना।#दानि 12:1; उदुःतो कता 7:14 20भगवान नाःआ सिकिसताराः दिनकून मेरेय हुडिंगकेः दो तोनोंगीग होड़ ओरोय बनसावकुःआ। मनदो भगवान अनँयग सुनावतो होड़कू लगा नाःआ दिनकूने हुडिंगकेरा। 21हना बेला तोनोंग तोनोंग होड़कू कतायता, ञेलेयपे, नंडा मसी इदानिया अरू माररे मसी इदानिया, माःआन। दो अपे हना कतारे अलोपे बिसवासगे। 22हना बेला मुरुक बगरा होड़कू लबरा घड़ीनकू कतायता, ईंग मसी हवे अरू ईंग भगवानराः बड़रा कतायीग होड़ हवे, माःआन। हँकू मुरुक चिनहाकून अरू बयाव जुवाः इयाःआ बुताकून एचेवाडखन भगवानरिकुःआ सुनावतो होड़कू हों बहकावकू लगाकू कुरनिसगेता। 23नानलगा अपे जगलेपे दोहोन। नाःआ जमाकून होयाः अते मड़ंगरे अपे एचेरेयिंग उदुःवापेतना।

24हना सिकिसताराः दिनकून अते तयोमरे,

बेर अंदरा जुवाःता,

अरू बांगो अते मरसल ओरो टेडेगनेना।

25अरू सेरमो अते इपीलकू लुजुरुःता

अरू सेरमोरे विड़चेड़ता हना जंगरकून डोलाव जुवाःता।#एस 13:10; एज 32:7; ओवेल 2:31; उदुःतो कता 6:12,13

26हनमेला जमा होड़कू मनुवारीग बेटात, मुरुक जंगर अरू मरसलते बदरीरेय वेगतोकू ञेलेयता।#दानि 7:13; उदुःतो कता 1:7 27हनते हाँय अनँयगरिकुःआ बराहीलकूय वारकूता अरू हाँय चउंदीसराः चइरो गतर अते, सेरमोराः मी कोना अते एटाः कोना वरीते, भगवान सुनावकेडकुःआ हँकुःआ जमा होड़कू भगवान एचेरेय एचे जुमावकूता।

28लुवा दूब अते अपे नाःआ कतापे चिडुः। सींग दूबराः डइड़ अते नँवा गोजा उडुंग पलहुवाता दो अपे सुदीगोडता जेट असाड़ सोदोरयना, माःआन। 29ननन इया ईंग कताकेरा हना जमाकून होयाः मेला अपे सुदीगोड, ईंगराः कुदा वेगराः बेला निचकाःतना। 30अपे ईंगपे अयूम। नाःआ जमाकून अरीन होयाः वरी नाःआ जूगरिकुःआ होड़कू ओरोकू गोएगनेना। 31ओत अरू सेरमो टगाव जुवाःता, मनदो ईंगराः सरवन कहियो ओरो टगावनेना।

32मनदो हना दिन सहे बेला तोनोंगीग होड़ मेरकू सुसुदीता। सेरमोरिकुःआ बराहीलकू अरू बेटात हों मेरकू सुदीयतना, मनदो अपांग भगवान एनेकला नाःआय सुसुदीतना। 33अपे मेरपे सुदीयतना तुमिस ईंग कुदा वेगता। हनालगा अपे जगलेपे दोहोन। 34ईंगराः कुदा वेग नाःआ इया होयाःता। तोनोंगीग होड़ आँयग ओड़ाः अटूवाडखने सेनता दो, हाँय सेन मेला आँयगरिकुःआ सेवकिया होड़कू हना ओड़ाः ञेल हड़ाःगे लगाय जिमा अटूता अरू मेमेडटोंग बुता मेनेमेड होड़कू लगाय एमेतेरा। ओड़ाःरीग अगुरादार होड़ एचेरे ओड़ाः अगुरा लगाय कता जिमाकेरा।

35हनन लगा अपे जगलेपे दोहोन। अपे मेरपे सुदीयतना ओड़ाः मुवार तुमिन बेलाय वेगता। हाँय सिंगाड़ मेला, सहे हटिंग बरा रइत, सहे कुकुड़ा कुकूड़चुः बेला सहे निंदावाय वेगता। 36हाँय असाकाय वेग दो अपीगतो अहाय ञेलपे। 37ईंग अपे एचेरेयिंग कतायता हना कता जमाकू एचेरेयिंग कतायतना, जगलेपे दोहोन।”

Currently Selected:

मरकूस 13: kfp

Highlight

Copy