Tashches Corintoĉantyidyes 5
5
Yirity voꞌvoijtyiꞌ muntyiꞌ
1Yụ chịj miꞌinĉan muꞌyaꞌ yirity voꞌvoijtyiꞌ muntyiꞌ, mọꞌtum ca bäꞌyi jenꞌsiꞌtum p̂en muꞌ. Anic mọꞌ där aꞌc̣his juchaj, uyaꞌyaꞌdye qui muꞌin in jam anicjetety Jenꞌ in jam meꞌ jämꞌtaqui in. 2Miꞌin na vaꞌbunyi mọmoꞌ. Damꞌdye jämꞌ yoquejamꞌ ĉojtyiꞌĉan miꞌin. Vaꞌquecmac miꞌin muꞌ meꞌ bäꞌyity juchajtumtyiꞌ. 3Meꞌ tsanꞌ moch miꞌinyaꞌ yụ, ĉojtyiꞌĉan qui namꞌ yụ penꞌdyetuyac miꞌin. Meꞌ tsanꞌ yụ itŝij miꞌinyaꞌ, Jesucristoscheꞌ tịj muꞌ, Ayos tsun, aty yụ yụꞌtyeyete vaꞌtacdyeꞌ muꞌ voꞌvoijtyiꞌ muntyiꞌ. 4Vajmuꞌyaꞌyevac miꞌin Jesucristoscheꞌ tịj muꞌ, Ayos tsun, muꞌsiꞌ raꞌ ferdyeꞌ soꞌminac raꞌ miꞌin, judyeyaꞌ yụ raꞌ penꞌdyetuyac ĉojtyiꞌĉan yụ. 5Vaj yiriꞌyaꞌ yi raꞌ miꞌin meijjebajtinte raꞌ miꞌin, paj qui aty jam penꞌdyetubunac, paj qui muꞌ Satanás jạñibeꞌbuti aꞌ muꞌ judyeyaꞌ qui raꞌ c̣hoñiꞌ ạꞌedyeꞌ muꞌ aty ayijyaꞌ tupudyeꞌ Jesússiꞌ Ayos tsun.
6Jemoñeꞌ jam meꞌ vaꞌbunyi miꞌin, junꞌ chuc rụij bäꞌyi miꞌin. ¿Jam adac chị́yetiñeꞌ miꞌin ọij p̂eyacdyeꞌ yiꞌ: "Damꞌ mọmoꞌ bijtac mọꞌ jiꞌdujraquis, uts na tas jiꞌdujrete muꞌ pan" yiꞌ? 7Jeshaꞌ, jiquej tas vaꞌquequeꞌ in mọꞌ jiꞌdujraquis, yedyej qui mọmoꞌ pan jämꞌte in, meꞌdye raꞌ miꞌin chimeꞌ meꞌjetiñeꞌ raꞌ mọꞌ juchaj, vaꞌquectiñeꞌ raꞌ räj paj yedyej jämꞌtyiꞌ shupqui miꞌin, ĉaĉaij na aty meꞌ yuꞌnac muꞌ Jenꞌ. Meꞌdye muꞌ Cristo, aty ijac tsundyes, jeñej buꞌyi oveca jiꞌcoꞌshayes jiquej in feshtayaꞌ Jiꞌc̣honacdyedyes. 8Jam jiꞌdujraquistum jiquej feshtaij in,#5:8 Exodo 13:7 räj vaꞌquequeꞌ in, meꞌdye tsun chimeꞌ farajjejaꞌyaꞌ aꞌc̣his dyijyedyeꞌ tsun judyeyaꞌ juchaj tsun. Jämꞌsiꞌ qui raꞌ dyijyedyeꞌ rụijsis cạjaꞌ, paj qui meꞌ shupquiꞌ yojdyemꞌ jiquej feshtaij u in jam jiꞌdujraquistum.
9Yocsiꞌcheꞌ sánacdyeꞌ jiquej yụ, yụ jéyac paj qui miꞌin jam penꞌdyetucsi muꞌin voꞌvoijtyiꞌ in. 10Meꞌ jéyac yụ jiquej, jam muꞌin p̂eyacsi yụ, muꞌin ac̣hiꞌyity in jam anicjetety Jenꞌ in, muꞌin meꞌtyity in tupuj tsanꞌ penꞌdyetucsi miꞌin, ĉaĉaij na úcheꞌ jaccheꞌ yedyejyaij muꞌin ac̣hiꞌ bäꞌyity in, voꞌvoijtyiꞌ in, fer mạꞌjetety querec̣ha in, shuꞌaijtyiꞌ in, judyeyaꞌ jämꞌtacdyeꞌcheꞌ cudyitity chimeꞌ in. Jam meꞌtyity mạꞌjeꞌ penꞌdyetucsejaꞌ jụijyaꞌ tsun, jemoñeꞌ qui ọij jac yacchujaꞌ tsun. 11Yụ yi p̂eyacsi jam raꞌ penꞌdyetucsi miꞌin mijam raꞌ jebetacsi miꞌin muꞌin yity in: "Yụ nash anicjetety Jenꞌ", ac̣hiꞌ qui namꞌ bäꞌyity in, chivoꞌvoty in, fer mạꞌjetety querec̣ha in, jämꞌtacdyeꞌcheꞌ cudyitity in, ñinaquity in, tyeijtyiꞌ in, judyeyaꞌ shiꞌaijtyiꞌ chimeꞌ in, jam raꞌ meꞌtyity penꞌdyetucsi miꞌin. 12-13Jeshaꞌ, yụ jam yụꞌtac paj qui yụ jịꞌcäts yụꞌtacsi juchadyeꞌyaꞌ muꞌin jam anicjetety Jenꞌ in. Jenꞌdye raꞌ jịꞌcäts yụꞌtacsi juchadyeꞌyaꞌ muꞌin. Miꞌin tupuj jịꞌcäts yụꞌtacsi juchadyeꞌyaꞌ muꞌin anicjetety Jenꞌ in Cristoty ñuruꞌtyity muꞌ, mọꞌ nash miꞌinsiꞌ carijtacdyeꞌ. Vaꞌquecmac yiristum muꞌ juchajtumtyiꞌ muntyiꞌ voꞌvoijtyiꞌ muꞌ miꞌinĉantyiꞌ paj qui aty jam miꞌintum bäꞌyi.
Currently Selected:
Tashches Corintoĉantyidyes 5: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'