Efesoĉantyidyes 3
3
Pablos yụꞌtacdyeꞌ voroꞌtacdyeꞌ jam judío in
1Mọꞌdyes yụ Pablo, meꞌ ĉäꞌräij yụ q̂uinꞌ Jesucristodyes, ĉaĉaij na yụ voroꞌtyeyac miꞌin jam judío miꞌin p̂eyacdyeꞌ muꞌ. 2Jedac aty chịj miꞌin junꞌ chuc muꞌ Jenꞌ ñịbeꞌjitidyesyaꞌ muꞌ yuꞌtyin yụ, paj qui yụ voroꞌtyeyac p̂eyacdyeꞌ muꞌ miꞌin jam judío miꞌin, meꞌ yụ nọ́tyeyac. 3Jenꞌ jin yụ ĉụiꞌsiꞌ dyijyedyeꞌ muꞌ, mọꞌ jam chị́yeptes muntyiꞌ jiquej in, yoj yiꞌdyemꞌ sáñeꞌ u yụ ọ́cheꞌ. 4P̂iyibutiĉamꞌ ọ́ches jụijyaꞌ miꞌin, meꞌ raꞌ chat chịj miꞌin junꞌ chuc yụ chị́yepte Jenꞌsiꞌ dyijyedyeꞌ muꞌ, mọꞌ jam chị́yeptes muntyiꞌ jiquej in, mọꞌ yiꞌ muꞌ dyijyi jutete jiquej muꞌ Cristo. 5Jenꞌ jambiꞌ jịꞌchiqueyacsi urucyaty muntyiꞌ jiquej in ọij dyijyedyeꞌ muꞌ. Q̂uinꞌ chat muꞌ Jenꞌ mọꞌ jịꞌchiqueyacsi jutactyiꞌ muꞌ judyeyaꞌ jasoꞌmitity p̂eyacdyeꞌ muꞌ. Ĉụiꞌsiꞌyaꞌ Ạꞌedyeꞌ muꞌ jéyacsiꞌ junꞌ chuc dyijyedyeꞌ muꞌ. 6Dyijyedyeꞌ Jenꞌsiꞌ muꞌ jam chị́yeptes muntyiꞌ jiquej in, yiꞌ: muꞌin jam judío in, anicjeptety in jämꞌsiꞌ p̂eyacdyeꞌ Jenꞌsiꞌ muꞌ, muꞌinmun raꞌ chimeꞌ ñịbeꞌjeyacsi vaj cätsdye judíotum in. Chimeꞌ muꞌin in jeñej buꞌyi Cristos aꞌ muꞌ muꞌindyesmun chimeꞌ in mọꞌ p̂eyacdyeꞌ Jenꞌsiꞌ muꞌ yụꞌtyes jiquej muꞌ, mọꞌ jịꞌcätsepte tsundyes muꞌ Cristo Jesús.
7Jenꞌ yuꞌtyin yụ úñity muꞌ, ĉụiꞌsiꞌyaꞌ ñịbeꞌjitidyes muꞌ yuꞌtyin yụ judyeyaꞌ soꞌmin ferdyeꞌ muꞌ chimeꞌ paj qui yụ voroꞌtacsi p̂eyacdyeꞌ muꞌ. 8Meꞌ tsanꞌ yụ uyaꞌyaꞌtacsi räj muꞌin anicjetety Jenꞌ in, Jenꞌ qui namꞌ ñịbeꞌjitidyesyaꞌ muꞌ yuꞌtyin yụ paj qui voroꞌtacsi yụ jam judío in, jéyacsi yụ junꞌ chuc muꞌ Cristo anic där jämꞌsiꞌ mọjoꞌchas ñịbeꞌjitidyes soꞌmisinꞌ tsun. 9Mọꞌ yụꞌtacdyeꞌ yụ paj qui räj jéyacsi yụ muntyiꞌ in mọꞌ tạꞌcas dyijyedyeꞌ Jenꞌsiꞌ muꞌ, muꞌ jämꞌtacsity räj jedyeꞌ in. Jämꞌtyeꞌyaꞌ ọij jac jiquej meꞌdye q̂uinꞌ, muꞌ jam jịꞌchiqueyacsi muntyiꞌ in mọꞌ dyijyedyeꞌ muꞌ. 10Q̂uinꞌ qui namꞌ muꞌ Jenꞌ räj jịꞌchiqueyacsi rụijsis dyijyedyeꞌ muꞌ muꞌin cheꞌve fer buꞌyity in, judyeyaꞌ muꞌin anjer ayoꞌbuꞌyity in, paj qui muꞌin cạvete in junꞌ chuc muꞌ räjĉan dyijyedyeꞌtum carijtaqui. Mọꞌdyes qui aty cạvacsiyaꞌ in muꞌin anicjetety Jenꞌ in, muꞌinyaꞌ chị́yepte in junꞌ chuc anic dyijyedyeꞌtum carijtaqui Jenꞌ. 11Jenꞌ meꞌ jịꞌcätseꞌ mọꞌ tạꞌcas dyijyedyeꞌ muꞌ, aty juteteyaꞌ muꞌ Cristo Jesús Ayoꞌ tsun. 12Q̂uinꞌ aty Cristoty tsun anicyedyeꞌyaꞌ tsun, mọꞌdyes q̂uinꞌ, aty jam noiꞌyedyeꞌtum c̣hẹiꞌyaꞌjeja Jenꞌ. 13Mọꞌdyes yụ fercheꞌ jéyac miꞌin: meꞌ tsanꞌ ñịbeꞌ cạveꞌ yụ úĉan, jam qui na ramꞌ tári ĉojtyiꞌĉan miꞌin ñịbedyesyaꞌ yụ, meꞌ dyijtutiĉaꞌyaꞌ yụ miꞌin, ĉaĉaij na miꞌindyes meꞌ jịꞌĉojtyeꞌ yụ.
Cristo anic fer mạꞌjisinꞌ tsun
14Mọꞌdyes yụ dyụtsyi Jenꞌsiꞌyaꞌ vej muꞌ, muꞌ nash tsuntyiꞌ Jenꞌ. 15Muꞌdye Jenꞌ räj jämꞌtacsi jaccheꞌ bäꞌyity in, judyeyaꞌ mạyedyeꞌchety chimeꞌ in, räjenꞌ meꞌchucsi muꞌ. 16Yụ cọdyete muꞌ ferdyeꞌtumtyiꞌ Jenꞌ, muꞌ meꞌchuiꞌtyiꞌ mọꞌ mọjoꞌchas jämꞌsiꞌ ñịbeꞌjitidyes muꞌ, paj qui Ạꞌedyeꞌyaꞌ muꞌ soꞌminac ferdyeꞌ ĉojtyiꞌĉandyes miꞌin. 17Cọdyete chimeꞌ yụ paj qui muꞌ Cristo ĉojtyiꞌĉan jajbuꞌyinac miꞌin anicyedyeꞌyaꞌ miꞌin, paj qui räjĉan mạꞌjitidyestum bäꞌyi miꞌin, meꞌ raꞌ mạꞌjeyacsity bäꞌyi miꞌin, mijam raꞌ yocve dyijyi miꞌin. 18Meꞌ raꞌ miꞌin yojtumdyemꞌ anicjetety Jenꞌ u in, miꞌin tupuj chị́yebitinte Cristos mạꞌjitidyes muꞌ, junꞌ chuc muꞌ mạꞌjinac miꞌin. Anic där mọjoꞌchas mạꞌjitidyes muꞌ, jeñej buꞌyiꞌ yiris därsiꞌ jedyeꞌ, anic jiyiꞌ moc̣has judyeyaꞌ därves judyeyaꞌ moches chimeꞌ, méquis mạꞌjitidyes muꞌ. 19Meꞌ tsanꞌ muntyiꞌ tsun jam tupuj räj chaꞌshepja mạꞌjitidyes muꞌ, yụ qui namꞌ cọdyete Jenꞌ, paj qui muꞌ jiꞌchäquiyibunac Cristos mạꞌjitidyes muꞌ, junꞌ chuc mọꞌ. Meꞌ raꞌ chat q̂uinꞌdyem tupuj meꞌchubitinte Jenꞌsiꞌ dyijyedyeꞌ muꞌ, mọꞌ raꞌ bänꞌjibunac ĉojtyiꞌ miꞌin.
20Mọꞌdyes timaꞌqueja Jenꞌ, muꞌ mujuꞌchaꞌ ferdyeꞌtumtyiꞌ, muꞌ tupuj jụjjibusinꞌ räj cọdacdyeꞌ tsun, yódyesdyemꞌ tsun muntyiꞌ u tsun jam chaꞌshejaꞌ dyijtujaꞌsiꞌ yiriꞌ u, muꞌ na Jenꞌ tupuj muꞌ meꞌ jämꞌtaqui. Anic jiyiꞌ därsiꞌ ferdyeꞌ muꞌ, mọꞌ carijtaquis tsunĉan. 21Tsun anicjejaty Jenꞌ, jemoñeꞌ räjĉan timaꞌqueja Jenꞌ, ĉaĉaij na tsun aty Cristoty, jam raꞌ mọtsiꞌ timaꞌcacdyeꞌ muꞌ.
Currently Selected:
Efesoĉantyidyes 3: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'